1. Uzye Yehova akalonda tuwe wuli?

 AWAKWASI wakakwivwa icete nkaninye nga cakuti umwana wakwatwa. Lelo nanti ciwe wo-o, watange wivwe icete swinya cingawasakamika nga cakuti weyo umwana atakukula. Wonye avino e Yehova akakwivwa nga cakuti apano twatalika ukusambilila Baibolo. Asilonda ukuti tupelele vye pa kusambilila. (1 Kor. 3:1) Lelo akatuwomelezya ukuwa swe wina Klistu ‘wasongo.’—1 Kor. 14:20.

2. Amuwuzyo ci yano twandi twasuke mwe co-o icipande?

² Uzye cikasula mwinye ukuwa we songo mu vya kwe Leza? Avyani vino tuzipizile ukucita pa kuti tuwe swe wasongo mu vya kwe Leza? Uzye ukuyisambilizya ivisinka vya mu Baibolo iviwome kungatwavwa wuli ukuwa swe wasongo mu vya kwe Leza? Amulandu ci wuno tutazipizile twakwelenganya ukuti, casila swe wasongo mu vya kwe Leza swinya tusakulondekwapo nu kutwalilila ukuwomya wuciwuza witu ne Yehova? Ya-a amawuzyo ayano twandi twasuke mwe co-o icipande.

UZYE CIKASULA MWINYE UKUWA WE SONGO MU VYA KWE LEZA?

3. Uzye cikasula mwinye ukuwa e songo mu vya kwe Leza?

³ Izwi lya ci Greek ilya mu Baibolo lino wapiliwula ukuti “wasongo” lingasula na mukuti “ukufikapo,” nanti “ukukula.” a (1 Kor. 2:6) Ndi wulyanye vino umwana akakula mpaka awa we songo avino nasweswenye tuzipizile ukutwalilila ukuwomya wuciwuza witu ne Yehova pa kuti tuwe swe wasongo mu vya kwe Leza. Swinya nanti acakuti twafikapo ukuwa swe wasongo mu vya kwe Leza, tutazipizile ukuleka ukuwomya wuciwuza witu na weliwe. (1 Tim. 4:15) Swensinye ukuwikako na waciticinye tungafikapo ukuwa awina Klistu  wasongo mu vya kwe Leza. Nomba avyani vino vingalenga tumanye ukuti tufisilepo ukuwa wasongo?

4. Uzye umwina Klistu e songo mu vya kwe Leza wawa wuli?

⁴ Umwina Klistu e songo mu vya kwe Leza akakonka amasundo ya kwe Yehova yonsinye, ukwasowa ukusola yano azipizile ukukonka na yano atazipizile ukukonka. Kweni pa mulandu nu kukana pwililika, kukawa mumwi muno akaluvyanya. Lelo vino akakwelenganya na vino akacita cila wanda avino vingalanjizya nga cakuti akakonka amasundo ya kwe Yehova. Cinji aca kuti akazwala uwuntu wupya swinya akakwelezya na maka ukukolanya Yehova. (Efes. 4:​22-24) Wasambilila ivyakupingula icete pa vintu ukulingana na vino wawazya mu Baibolo, swinya asilondekwa na masundo amavule ayakumutungulula. Ne nga ca kuti wapingulapo pe cimwi, akawombesya na maka ukuficilisya.—1 Kor. 9:​26, 27.

5. Avyani vino vikacitika ku mwina Klistu wino asa wesongo mu vya kwe Leza? (Waefeso 4:​14, 15)

⁵ Umwina Klistu wino asa wesongo mu vya kwe Leza cikapepuka ukumuwipa na ‘masambilizyo ya wantu’ na ‘yawuchenjezi.’ Swinya angasuwila amalyasi yonsinye ayawufi yano wakasalanganya pa mulawasa na pa intaneti. Cinji acakuti, wangamuwipa na kuwasangunye. b (Wazyani Waefeso 4:​14, 15.) Asa vyo-o vitupu, angakwivwila wanji uwuzuwa, ukupusana nawo nanti ukufulwa zuwa. Swinya imiku imivule angacita iviwipe nga cakuti welezwa.—1 Kor. 3:3.

6. Uzye ukukula nu kuwa e songo mu vya kwe Leza tungakukolanya wuli ku mwana wino akukula lwa ku muwili? (Lolani ni cikope.)

⁶ Amawaliko yakolanya vino umuntu akakula pakuwa wesongo mu vya kwe Leza kwe vino umuntu akakula lwa ku muwili nu kuwa wesongo. Kwawa ivivule vino umwana asimanya pano acili amutici. Acino akalondekwa uwakumutungulula nu kumucinjilila. Ku cakulolelako, umukwasi angalema umwana pi kasa pano wakulamba pa musewo. Nomba pano akuya akukula umukwasi angaleka ukumulamvya, lelo angamwizusyako vye ukuti awacewenkanya pano atani alambe. Ne nga ca kuti wakula, akatalika ukuyilambila umweneco ukwasowa nu kuti e mama wakwe amwizusyeko vino azipizile ukucita. Wonye avino umwina Klistu wino asa wesongo mu vya kwe Leza angalondekwa umwina Klistu e songo mu vya kwe Leza ukumwavwa ukulewuka kwe vino vingonona wuciwuza wakwe ne Yehova nu  kupingula icete pa vintu. Lelo umwina Klistu e songo mu vya kwe Leza pano atani apingulepo pe cimwi, akakwelenganya pa visinka vya masundo ya mu Baibolo pa kuti amanye vino Yehova akakwelenganya pe cino akulonda ukupingula. Na mukulecelezya akawomvya vino wazana.

7. Uzye wasongo mu vya kwe Leza nawonye wakalondekwa uwakuwavwa?

⁷ Mpindi zimwi na wasongonye mu vya kwe Leza wakalondekwa uwakuwavwa. Lelo wino asa wesongo mu vya kwe Leza angakwenecela wanji ukumunena ivya kucita nanti ukumupingulilako pa vintu vino umweneco azipizile ukupingulapo. Uwupusano awakuti pano umwina Klistu e songo mu vya kwe Leza akulenga ukuti wanji wamwavwe nanti ukumupandako amano, akamanya ukuti umweneco awino azipizile ukuyipingulila amuno cila muntu wazipila “ukuyisendela ichisendo chakwe umwenecho.”—Gal. 6:5.

8. Amuvyani mumwi muno awina Klistu wasongo mu vya kwe Leza wangapusanamo?

⁸ Ndi wulyanye vino awantu wakapusana mu milolecele nga wakula, avino na wina Klistu wasongo mu vya kwe Leza wakapusana mu miwele ponga ngati, amano, ukusipa, umwezo wa kupa nga ni nkumbu. Ku cakulolelako, awina Klistu wawili wasongo mu vya kwe Leza wangapingula ukucita icintu cimwi munzila impusane pusane swinya zino zitapusinepo na vino Baibolo yikalanda. Vyo-o vikacitika maka maka nga cakuti vino wakupingulapo vikumile vino kampingu yawo yikuwazumilizya wenga na wenga. Acino wasipingula wanji nga cakuti vino wapingulapo vipusine na vino weni wakwelenganya. Lelo wakawika amano pa kuwa awalemenkane.—Roma. 14:10; 1 Kor. 1:10.

VINO TUNGACITA PAKUWA WASONGO MU VYA KWE LEZA

9. Uzye vino tukakula lwa ku muwili avino cikawa na pakuwa we songo mu vya kwe Leza? Londololani.

⁹ Pano impindi yikuya yikupita, tukakula lwa ku muwili ukufuma ku wutici nu kuwa swe wasongo. Lelo wo-o asa vino cawa pakuwa wesongo mu vya kwe Leza. Peni pakalonda ukucitapo cimwi. Ku cakulolelako, awina Klistu wa mu Korinte wivwile ilyasi lizima nu kubatizwa, wapocelezile umuzimu wutele swinya wasambilizile ivivule ku mutumwa Paulo. (Imili. 18:​8-11) Lelo nanti ciwe wo-o, wamwi na pansizi ya myaka imivule ukufuma pano wabatizizwe, wacilinji watani wawe awasongo mu vya kwe Leza. (1 Kor. 3:2) Uzye tungacita wuli pa kuti nasweswe ivya musango wo-o vitakatuciticile?

10. Avyani vino tuzipizile ukucita pa kuti tuwe swe wasongo mu vya kwe Leza? (Yuda 20)

¹⁰ Tutanga tufikepo ukuwa swe wasongo mu vya kwe Leza nga cakuti asa vino tukulonda. Wano Baibolo yikakwita ukuti ‘awantu watumpe,’ wano wakasolapo ukutwalilila ukuwa atunya lwa ku muzimu, wasilunduluka nu kuwa awasongo mu vya kwe Leza. (Imilu. 1:22) Tusilonda ukuwa ngati awawo wano wakakula lwa ku muwili lelo awalanga wakulindilila ukuti awakwasi wawo awano wawapingulilapo ivya kucita. Ukuwa swe weneconye, aswe wano tuzipizile ukuwombesya nu kutwalilila ukuwomya wuciwuza witu ne Yehova. (Wazyani Yuda 20.) Acino nga mukulonda ukuwa mwe wasongo mu vya kwe Leza, mwapepa kwe Yehova ukuti awamipa amaka “yakulondesya nu kucitapo cimwi.” [NWT].—Flpi. 2:13.

11. Avyani vino Yehova watupa pakutwavwa ukuwa swe wasongo mu vya kwe Leza? (Waefeso 4:​11-13)

¹¹ E Yehova atatuleka vye ukuti twandi twayikulila nu kuwa wasongo mu vya kwe Leza. Watupa wakacema na wakasambilizya mwi wungwe wano wayipekanya ukutwavwa ukuwa swe ‘wasongo’ pa kuti, “twawoma. . . twafika pachimo chikulu chakwe Klistu.” (Wazyani Waefeso 4:​11-13.) Swinya e Yehova akatupa umuzimu wutele wuno wukatwavwa ukuwa “namano yakwe” Klistu. (1 Kor. 2:​14-16) Cinji acakuti walenga ama buku yamalandwe 4 ukulembwa pa kutwavwa ukumanya vino Yesu welenganyanga, vino walandanga na vino wacitanga pano walinji munsi. Nga tukukolanya vino Yesu walandanga nu kucita, tungafikapo ukuwa wasongo mu vya kwe Leza.

 VINO IVISINKA VYA MU BAIBOLO IVIWOME VINGATWAVWA

12. Uzye amasambililo “aya wucece,” avili vyani?

¹² Pa kuti tuwe swe wasongo mu vya kwe Leza, tuzipizile ukusya amasambililo “yano aya wucece,” akuli ukuti tutazipizile ukupelelavye pa kumanya amasambililo ya kutalicila. Pa masambililo ya kutalicila pawa nu kumanya icisinka pe vino Baibolo yikalanda pa kulapila, pi suwilo, pa lubatizyo na pa kuzyulupuka. (Hebe. 6:​1, 2) Ya-a amasambililo ayano Inte zya kwe Yehova wonsinye wakatalicilapo ukumanya. Wo-o awuli umulandu wuno umutumwa Peter wayalandilangapo sana pano wasambilizyanga pa Pentekositi. (Imili. 2:​32-35, 38) Fwandi tuzipizile ukumanya amasambililo yakutalicila pa kuti tuwe swe wasambi wakwe Yesu. Ku cakulolelako, umutumwa Paulo watusosile ukuti nga twakana ukusuwila mu kuzyulupuka lyo tusi swe wina Klistu wacisinka. (1 Kor. 15:​12-14) Lelo nanti ciwe wo-o, tutazipizile ukupelelavye pa kumanya amasambililo ya kutalicila.

13. Uzye tungacita wuli pa kuti twazanamo ivizima mu vya kulya vya ku muzimu iviwome vino vyalandwapo pa Waheberi 5:14? (Lolani ni cikope.)

¹³ Ivyakulya vya ku muzimu iviwome vya pusana na masambililo ya kutalicila. Pa vyakulya iviwome patawa vye amasundo ya kwe Yehova lelo pawa ni visinka vya masundo vino vikatwavwa ukumanya vino Yehova akakwelenganya. Pa kuti twazanamo ivizima mwe vyo-o, tuzipizile twayisambilizya Baibolo, ukwelenganyapo apano nu kuwomvya vino twasambilila. Nga twacita wo-o, tulisambilila ivya kupingula icete pa vintu vino vingasecelesya Yehova. c—Wazyani Waheberi 5:14.

14. Uzye e Paulo wavwizye wuli awina Klistu wa mu Korinte ukuwa wasongo mu vya kwe Leza?

¹⁴ Awina Klistu wano asa wasongo mu vya kwe Leza cikawatalila ukupingula icete nga cakuti kusi isundo lya mu Baibolo ilya mu kulungatika pe cino wakulonda ukupingulapo. Co-o cingalenga wamwi wakwelenganya ukuti, wo-o vino kusi isundo lino likalandapo wangacita icili consinye cino wakulonda. Ne wamwi wangavwamba isundo lya kuwomvya pano patakulondekwapo nu kucita wo-o. Ku cakulolelako, awina Korinte wakolowozizye e Paulo ukuti awalanjizye isundo lino likazumilizya nanti ukukanya ukulya vino wapanga ku tuluwi. Nomba e Paulo  atawalanjizizye nanti ukuwanena vino wazipizile ukucita. Amuno wamanyile ukuti cila muntu wawa ni ‘nsambu’ zyakupingulapo ukulingana na vino e kampingu yakwe yikumuzumilizya. Lelo wawanenile ivisinka vya masundo vino vyalinji nu kuwavwa ukupingulapo icete ukwasowa nu kuti e kampingu yisyale yikuwacuzya nanti ukuti wapunuzye wanji. (1 Kor. 8:​4, 7-9) Wo-o vino wacisile, wawasambilizyanga ukuti wazipizile ukuyipingulila aweneco ukuwomvya amawaliko, asa kulindilila ukuti awantu wanji wawapingulilepo nanti pawe amasundo ya mukulungatika pe cino wakulonda ukupingulapo. Ukucita wo-o, kwawavwizye ukuwa wasongo mu vya kwe Leza.

15. Uzye e Paulo wavwizye wuli awina Klistu awaHeberi ukuwa wasongo mu vya kwe Leza?

¹⁵ Tungasambilila icisinka icicindame na cinji kwe vino e Paulo walembezile awina Klistu awaHeberi. Wamwi watatwalilizile ukuwomya wuciwuza wawo ne Yehova ‘ukuwa napano walyanga ivyakulya vikalambane, wachilinji wakulonda ukonka isulu.’ (Hebe. 5:12) Wakanile ukusambilila nu kuzumila ivipya vino Yehova wawasambilizyanga mwi wungwe. (Imilu. 4:18) Ku cakulolelako, awa Yuda awavule watwalilizile ukukonka amasundo ya kwe Musa nanti aca kuti papisile imyaka mupipi ne 30 ukufumilila pano yalecezile ukuwomba pa mulandu ni nzuwi ya kwe Yesu. (Roma. 10:4; Tait. 1:10) Ukwasowa nu kuvwilika pa myaka yonsinye yo-o yino yapisilepo wanga wawe awakupiluka, nga walesile ukukonka ya-a amasundo. Amuno wensinye wino wawazizyepo e kalata yino Paulo walembezile awaHeberi, waweni ukuti mwalinji ivyakulya vya songo. Swinya vino vyalinji mwe we-e kalata, vyalinji nu kuwavwa ukulola ukuti inzila iyipya iyakupepelamo Yehova yino yizile ayiwako pa mulandu wa nzuwi yalinji ayizima. Cinji aca kuti, yalinji nu kuwavwa ukutwalilila ukuwizya asa mulandu nu kuwacuzya.—Hebe. 10:​19-23.

MUTAYISUWILA NKANI

16. Uzye tuzipizilevye ukupelela pa kuwa swe wasongo mu vya kwe Leza?

¹⁶ Tutazipizile ukuleka ukuwombesya nga cakuti twawa swe wasongo mu vya kwe Leza. Co-o cikusula mu kuti, tutazipizile twalola ngati casila po twawa swe wasongo mu vya kwe Leza swinya tusakulondekwapo nu kutwalilila ukuwomya wuciwuza witu ne Yehova. (1 Kor. 10:12) Lelo tuzipizile ukutwalilila ‘ukuyelezya swewenecho’ pa kuti tuyilole nga ca kuti tukulunduluka.—2 Kor. 13:5.

17. Uzye e kalata yino e Paulo walembezile awina Kolose yikalanjizya ukuti amulandu ci wuno tuzipizile ukutwalilila ukuwa wasongo mu vya kwe Leza?

¹⁷ Mwe kalata yino Paulo walembezile awina  Kolose, walanzilepo na swinyanye pa mulandu wuno tuzipizile ukutwalilila ukuwa swe wasongo mu vya kwe Leza. Nanti acakuti awina Kolose walinji kaali awasongo mu vya kwe Leza, e Paulo wawasosile ukuti wazipizile ukucenjela pa kuti watakakombele nimyelenganizizye ya mwe yo-o insi. (Kolo. 2:​6-10) E Epafurasi nawe, wamanyile nkaninye awamwi wungwe swinya wa wasakamalanga nu kuwapepelako ukuti wawome “wafike na pakafiko” nanti ukuti wawe awasongo mu vya kwe Leza. (Kolo. 4:12) Avyani vino tungasambililako? E Paulo ne Epafurasi wamanyile ukuti pa kuti umuntu atwalilile ukuwa we songo mu vya kwe Leza, akalondekwa ukwavwa ukufuma kwe Yehova nu kuwombesya pa lwakwe ukutwalilila ukuwomya wuciwuza wakwe na weliwe. Wa-a wonsinye wawili walondanga ukwavwa awina Kolose ukutwalilila ukuwa wasongo nanti ukukula mu vya kwe Leza, asa mulandu na vino wapitangamo.

18. Avyani vino vingaciticila umwina Klistu e songo mu vya kwe Leza nga atacenjezile? (Lolani ni cikope.)

¹⁸ E Paulo wasosile awaHeberi ukuti nga ca kuti umwina Klistu waleka ukuwa we songo mu vya kwe Leza, wuciwuza wakwe ne Yehova wungasila nga atacenjezile. Co-o cingacitika nga ca kuti, asakwivwila Yehova swinya asa kulapila. Cinji aca kuti, ne Yehova nye atanga amutetele. Nomba icizima acakuti, awaHeberi weni asa vino walinji. (Hebe. 6:​4-9) Nga mwe ya-a amanda, cikawa wuli kwe wawo wano wakatonta nanti ukuwingwa lelo mu kupita kwa mpindi awalapila? Nga cakuti wayicefya nu kulapila, wakalanjizya ukuti wapusine na wano Paulo walandangapo. Swinya nga wanyoka mwi wungwe, e Yehova akawavwa. (Ezek. 34:​15, 16) Wa eluda wanganena umwanawitu nanti e nkazi e songo mu vya kwe Leza ukwavwa weyo umuntu wino wanyoka ukuwomya wuciwuza wakwe ne Yehova na swinya.

19. Avyani vino tuzipizile ukutwalilila ukucita?

¹⁹ Na mwemwenye mungakumanisya ukuwa mwe wasongo mu vya kwe Leza nga ca kuti avino mukalonda. Acino twalililani ukuyisambilizya ivisinka iviwome ivya mu Baibolo nu kwelenganya ndi vino Yehova akakwelenganya. Swinya nga mwe wasongo mu vya kwe Leza, twalililani ukuwomya wuciwuza winu nawe umuyayaya.