1. Avyani vimwi vino vikalenga wamwi wakwivwa intete ukuwizizyako wanji? (Lolani ni cikope.)

 UKUKUNDA Yehova akuno kukalenga twawizizyako wanji swinya tukalonda ukuwavwa pa kuti nawo wamumanye. Wakawizya wamwi wakakwivwa icete nkaninye ukuwomba umulimo wa kuwizya. Lelo wamwi cikawatalila ukucita wo-o. Amulandu ci? Amuno wamwi wawa ni nsoni swinya wakalola ngati asa wakasambilizya awazima. Ne wamwi wasilonda ukuya mu ma ng’anda yaweneco pano watawisile. Wanji nawo, wakatina ukuti ncepamwi wandi wawakanile. Wamwi wawasambilizya ukuti watazipizile ukulenga awantu ukufulwa. Vyo-o vino twalandapo avino vikalenga catalila awanawitu na wankazi ukuwizizyako wanji ilyasi lizima asa mulandu nu kuti wakunda e Yehova. Lelo nanti ciwe wo-o, wamanya ukuti umulimo wakuwizya wacindama. Swinya conye acino cikalenga watwalilila ukuwomba. Ukwasowa nu kuvwilika e Yehova akakwivwa icete nkaninye pe vino wakacita.

2. Amulandu ci wuno mutazipizile ukuyivwa uwuwi nga cakuti musisecelela pano muli mu mulimo wa kuwizya?

² Uzye vyo-o vino twalandapo vingalanga avino vikalenga mwapotwa ukusecelela pano mukuwomba umulimo wakuwizya? Nga vino cawa mutazipizile ukuyivwa uwuwi. Amuno mpindi zimwi ukuyivwa kwa musango wo-o kungalanjizya ukuti mwayicefya, musilonda ukupusana na wantu swinya musilonda awantu wawika sana amano kwe mwemwe. Cinji acakuti pasi wino akalonda wakana ukwivwa kwe weliwe, maka maka nga cakuti akwelezya na maka ukucitila wanji ivizima. Acino mwakwizuka lyonsinye ukuti umukwasi winu uwa kwi yulu wamanya vino mukayivwa swinya akavwambisya ukumyavwa. (Ayize. 41:13) Mwe co-o icipande,  twalanda pa nzila 5 zino zingatwavwa ukuleka ukuyivwa wo-o. Swinya twandi tusambilile na pe vino tungacita pa kuti twasecelela pano tukuwomba umulimo wa kuwizya.

MWALEKA IZWI LYA KWE LEZA LIWAMYAVWA

3. Acani cino cavwizye e kasesema Jeremiya ukuya mukuwizizyako wanji?

³ Izwi lya kwe Leza lyawomizye nkaninye awawomvi wa kwe Yehova awa ku kaali wano walolanga ngati watanga wakumanisye ukuwomba imilimo imiwome yino wawapile. Ku cakulolelako, lekani tulande pe kasesema Jeremiya. Wasakamile nkaninye pano Yehova wamupile umulimo wakuwizya. Walanzile ukuti: “Ntamanya ukuvwanga ne mwana mutichi.” (Jere. 1:6) Acani cino cizile acimwavwa ukusipa? Vino Yehova wamunenile avino vyamuwomizye. E Jeremiya walanzile nu kuti: “Izwi lyako likakwaka ngati amulilo mu mwezo wane; wiyalilwa chakala chati-ndi mu muwili wane natonta ukuwuzimya.” (Jere. 20:​8, 9) Nanti acakuti kucifulo kuno e Jeremiya walinji nu kuya mu kuwombela kwalinji awantu awatale, ivyewo vino walinji nu kuya mukuwawizizya avino vya muwomizye.

4. Avyani vino vikafumamo nga ca kuti tukuwazya Baibolo nu kwelenganyapo? (Wakolose 1:​9, 10)

⁴ Awina Klistu wonsinye wakazana ivya kuwawomya mwi Zwi lya kwe Leza Baibolo. Ku cakulolelako, pano umutumwa Paulo walembezile awina Klistu wawuye mu Kolose e kalata, wawanenile ukuti ukwivwicisya amano ya cisinka aya kwe Leza kwalinji nu kulenga wavwambisya ‘ukupita ndimuno Imfumu ikalondela.’ Swinya nga ca kuti watwalilila ukucita wo-o, walinji nu kukoma “ivikomwa mu mulimo wonsi uwuzima.” (Wazyani Wakolose 1:​9, 10.) Pe yo-o imilimo imizima yino wawanenile pawa nu mulimo wakuwizya. Fwandi nga tukuwazya e Baibolo nu kwelenganyapo, isuwilo litu likawomelako swinya tukalola nu wucindami wuno wawa mukuwizizyako wanji pa Wufumu wa kwe Leza.

5. Tungacita wuli pa kuti twayitopwa vino tukuwazya mwi Zwi lya kwe Leza?

⁵ Pa kuti twayitopwa vino tukuwazya mwi Zwi lya kwe Leza, tutazipizile twasamazyanya pakuwazya, lelo tuzipizile ukuteka umwezo nu kwelenganyapo. Nga ca kuti mutivwicisizye iwaliko limwi pano mukuwazya, mutazipizile ukuciluka. Muzipizile ukuvwamba ivyewo vino vyalondolola yoyo e vesi, mwi buku lya kuti Icisontelelo ca Mpapulo sha Watch Tower nanti ilya kuti Icitabo ca Kwafwa Inte sha kwa Yehova Ukusanga Ifyebo. Nga ca kuti mukuteka umwezo pano mukuwazya, cilimyavwa sana ukusuwila ukuti vino Baibolo yikalanda avya cisinka. (1 Tes. 5:21) Nga ca kuti mwavisuwila, apano ciliwamipepucila ukunenako wanji pe vino mwasambilila.

 MWAYIPEKANYA PANO MUKUYA MU MULIMO

6. Amulandu ci wuno tuzipizile ukuyipekanya pano tutani tuye mu mulimo?

⁶ Nga cakuti mwayipekanya pano mutani muye mu mulimo, ciliwamipepucila ukulanzyanya icete na wantu. Ne Yesu nye pano atani atume awasambi wakwe mu mulimo, wawavwizye ukuyipekanya. (Luk. 10:​1-11) Pano wawomvizye vino wawasambilizizye, wanyosile wakusecelela, pa mulandu wa kuti wacisile ivizima ivivule.—Luk. 10:17.

7. Avyani vino tuzipizile ukucita pano tukuyipekanya ukuya mu mulimo? (Lolani ni cikope.)

⁷ Avyani vino tuzipizile ukucita pano tukuyipekanya ukuya mu mulimo? Tuzipizile ukwelenganya pe vino tunganena awantu icisinka ca mu Baibolo mu mazwi yitu asa kuswatila. Swinya tungelenganya na pe vimwi vino awantu wano wawa mu cifulo cino tukawombelamo wakacita nga twaya mu kuwawizizya, nu kulola vyo tungawasuka. Cinji aca kuti pano tukulanzyanya nawo tuzipizile ukutekanya, ukumwentula nu kuwa na wuciwuza kwe woliwo.

8. Amunzila ci muno awina Klistu wakolana ni viya vyivu vino umutumwa Paulo walanzilepo?

⁸ Umutumwa Paulo walondolozile uluwali ulucindame luno twakwata mu mulimo wa kuwizya pano walanzile ukuti: ‘Ukuwa tuli ni chuuma mu viya vyi vu.’ (2 Kor. 4:7) Uzye conye icuuma cino walanzilepo acili cani? Amulimo wakupususya uwakuwizya pa Wufumu wa kwe Leza. (2 Kor. 4:1) Ngi viya vyivu vyeni avyani? Awawomvi wa kwe Leza wano wakawizya ilyasi lizima. Mu mpindi zya kwe Paulo, wano wacitanga uwukazi wawomvyanga insembo ku kusendela ivintu ivicindame ponga ngati avyakulya, e wayini ni ndalama. Nasweswenye e Yehova watupa umulimo uwucindame uwakuwizya ilyasi lizima. Nga ca kuti watwavwa, tungatwalilila ukuwizya.

MWALENGA UKUTI E YEHOVA AWAMYAVWA UKUSIPA

9. Tungacita wuli pa kuti tutatina ukuwizizya awantu? (Lolani ni cikope.)

⁹ Mpindi zimwi tungatina awantu nanti ukulola ngati wandi wakane ukuteyelezya. Tungacita wuli pa kucimvya yo-o intazi? Lekani tulande pe vino ipepo lyavwizye awatumwa pano wawanenile ukuleka ukuwizya. Watatalisile ukutina awantu lelo walenzile kwe Yehova ukuti awavwe watwalilile ‘ukuvwanga amazwi yakwe Leza nukusinga.’ E Yehova wasusile ipepo lyawo paponye. (Imili.  4:​18, 29, 31) Nasweswenye nga ca kuti twatalika ukutina awantu, tuzipizile ukupepa kwe Yehova ukuti atwavwe. Mwamunena ukuti amyavwe ukukunda awantu pa kuti mutatina ukuwawizizya ilyasi lizima.

10. Uzye e Yehova akatwavwa wuli? (Ayizeya 43:​10-12)

¹⁰ E Yehova watusola ukuwa Inte zyakwe, swinya watulaya nu kuti wandi awatwavwa ukusipa. (Wazyani Ayizeya 43:​10-12.) Lekani tulande pa nzila 4 zino akatwavwilamo. Iya kutalicila, e Yesu akawa na sweswe pano tukuwizya. (Mat. 28:​18-20) Iya citi wili, akawomvya awangeli wano wasonta ku kutwavwa. (Ukuwu. 14:6) Iya citi tatu, akawomvya umuzimu wakwe uwutele ku kutwavwa ukwizuka vino twasambilila. (Yoha. 14:​25, 26) Ni ya kulecelezya, watupa awanawitu na wankazi wano tukawombela ponga. Wo-o vino twawa ne Yehova na wanawitu na wankazi, cikalenga tuwe swe wasipe nu kutwalilila ukuwomba umulimo wakuwizya.

MUTAKWIMILILA PA CINTU CONGA, MWAWIKA AMANO PA VIZIMA

11. Mungacita wuli pa kuti mwazana awantu pano muli mu mulimo? (Lolani ni cikope.)

¹¹ Uzye mukakwivwa uwuwi nga ca kuti mutakuzana awantu pa ma ng’anda pano mukuwizya? Cingazipa ukuyikolowozya ukuti: ‘Akwinye kuno ningaya mbazane pe yo-o impindi?’ (Imili. 16:13) ‘Uzye wangalanga wayile ku ncito nanti mukukala vimwi?’ Nga vino cili, cingazipa ukuya kuno kukazanwa sana awantu, ponga ngati amumisewo. Umwanawitu wumwi uwizina lya kuti Joshua watili, “Nazana ukuti cikanjavwa nga naya mukuwombela ku ncende kuno wakakazya ivintu na muno wakakwimilika imyotoka.” We-e umwanawitu nu muci e Bridget, wiza walola ukuti wakazana awantu awavule nga ca kuti waya mukuwizya amanguzi ne pa sabata umusanya.—Efes. 5:​15, 16.

12. Mungacita wuli pakumanya vino awantu wazumilamo nanti vino wakunda?

¹² Nga ca kuti awantu watatemwa ukuwawizizya, mungelezya ukumanya vino wazumilamo na vino wakunda. Umwanawitu e Joshua nu muci e Bridget, wakawomvya iwuzyo lino likawa pa nkolelo pe trakiti pakutalika ukulanzyanya na wantu. Ku ca kulolelako, pakuwomvya e trakiti ya kuti Uzye Avyani Vino Wamanya Pakwe Baibolo? wakatalicila ukulanda ukuti “Awantu wamwi wakalola e Baibolo ukuti ali buku lino lyafuma kwe Leza, ne wamwi wakavwilika. Nga mwemwe  mukakwelenganyapo wuli pe Baibolo.” Ukucita wo-o kukalenga awatalika ukulanzyanya icete na wantu.

13. Amulandu ci wuno tungawela ni nsansa asa mulandu tutakuzana awantu nanti nga wakukana ukuwawizizya? (Imilumbe 27:11)

¹³ Nanti aca kuti awantu watakuzumila ukuwawizizya, icicindamisye aca kuti sweswe lyo tuwomvile umulimo witu. Amulandu ci wuno twalandila wo-o? Amuno lyo tucisile cino e Yehova ne Yesu wakalonda, akuli ukuti ukuwomba umulimo wakuwizya. (Imili. 10:42) Fwandi nanti aca kuti tutazanilepo umuntu uwili wensinye nanti nga wakukana, tungawa ni nsansa. Amuno lyo tumanyile ukuti tusecelesizye Umukwasi witu uwa kwi yulu.—Wazyani Imilumbe 27:11.

14. Amulandu ci wuno tungasecelela nga ca kuti e kawizya wumwi wazana wino akulonda ukusambilila?

¹⁴ Tungasecelela na pano e kawizya winji wazana umuntu wino akulonda ukusambilila. Ulupungu lwa kwe Kalinda lumwi, lwakolinye umulimo wakuwizya ku kuvwamba umwana wino asovile. Nga ca kuti umwana wasowa, awavule wano wakaya mukumuvwamba. Ne nga waloleka, wonsinye wakasecelela asa mulandu nu kuti asa wano tewamuzanile. Wonye avino cawa na ku mulimo wakuwizya. Wonsinye mwi wungwe wakawombako umulimo wakupanga awasambi. Swinya wakalondekwa ukuwombako pa kuti tukumanisye ukuwizya mu vifulo vyonsinye. Cinji aca kuti, wakasecelela nga wumwi watalika ukwiza mukulongana.

UKUKUNDA YEHOVA NA WANTU WANJI

15. Mungacita wuli pa kuti mwasecelela pano muli mu mulimo wakuwizya? (Mateyu 22:​37-39) (Lolani ni cikope pa nkupo.)

¹⁵ Mungasecelela pano muli mulimo wakuwizya, nga cakuti mukwizuka ukuti wo-o umulimo awuno wukalanjizya ukuti mwakunda e Yehova na wantu wanji. (Wazyani Mateyu 22:​37-39.) Mwakwelenganya pe vino e Yehova akawa ni nsansa nga walola mukuwomba umulimo wakuwizya na pe vino awantu wakakwiza mukuwa ni nsansa nga ca kuti watalika ukusambilila Baibolo. Swinya mwakwizuka ukuti wano wakazumila ukuteyelezya kwi lyasi lizima nu kutalika ukuwombela e Yehova, walipusuka nu kuwa nu wumi wa muyayaya.—Yoha. 6:40; 1 Tim. 4:16.

16. Avyani vino vingatwavwa ukuwasecelela nanti aca kuti tutakukumanisya ukuya mukuwomba umulimo wakuwizya? Landani pa vya kulolelako.

¹⁶ Uzye kwawa vimwi vino vikalenga mwapotwa  ukufuma pa ng’anda nu kuya mukuwomba umulimo wakuwizya? Nga akuno vyawa, mwacita vye vino mungakumanisya ukufika pano papelezile amaka yinu pakulanjizya ukuti mwakunda e Yehova na wantu wanji. Pano kwalinji indwala ye Korona umwanawitu Samuel nu muci e Dania watafumanga pa ng’anda. Pe yo-o impindi pano ivintu vyatazile, wawizyangavye ukuwomvya ama foni, ukulemba ama kalata, nu kutungulula amasambililo pa Zumu. Umwanawitu e Samuel wawizizyangako na wano wazananga pa cipatala nga waya mukupoka umulembo we kansa yino walwile. Walanzile ukuti: “Nga tukupita mu ntazi, kukawa ukusakamikwa, ukutonta lwa ku muwili, ni suwilo lingatonta. Fwandi pa kuti twasecelela, tuzipizle twawombako umulimo wa kwe Yehova.” Peyilyanye impindi apano e Dania umuci wizile apona swinya wamutesile mu cipatala pa myezi yitatu. Acino walondekwanga akanjinga ka cilema akakuwomvya ukupitilako pa myezi 6. E Dania walanzile ukuti: “Nelezyanga ukuwomba ukufika pano papelezile amaka yane. Nawizizyangako e nasi wino wizanga mukundola na wantu wano waletanga ivintu pa ng’anda. Swinya nawizizyangako nu mwanaci pa foni wino wawombanga pa kampani yimwi yino yikakazya imilembo.” Nanti aca kuti peyoyo impindi e Samuel nu muci e Dania watawombanga ndi vino wawombesyanga kaali, wawombanga ukufika pano papelezile amaka yawo. Swinya wasecelelanga pe wo-o vino wacitanga.

17. Mungacita wuli pa kuti muzanemo ivizima mwe vino tusambilizile mwe co-o icipande?

¹⁷ Vino twalandapo mwe co-o icipande, vikawomba icete nga cakuti mwaviwomvya vyonsinye ponga. Vyonsinye conga na conga, vili ngati avya kuwomvya nu kukonka pakupanga nanti ukutenda vimwi. Nga ca kuti mwavisanzinkanya vyonsinye mukakwiza mukufuma icintu cimwi icizima nkaninye. Wonye avino cawa na ku mulimo wakuwizya. Nga ca kuti mukuwomvya vyo-o vino tulanzilepo mwe co-o icipande, mutaliwakwivwa uwuwi pano muli mu mulimo wakuwizya lelo muliwasecelela.