1. Uzye awina Klistu wakutalicila watungululwanga wuli?

 NGA CAKUTI e Yehova wapa awantu umulimo, akalonda wawomba mu muyano. (1 Kor. 14:33) Ku cakulolelako, akalonda ilyasi lizima ukuwizwa ku wantu wonsinye munsi. (Mat. 24:14) Swinya wapa e Yesu ukuti awino awatungulula wo-o umulimo. E Yesu nawe akasinincizya ukuti wo-o umulimo wukuwombwa mu muyano. Mu mpindi zya wina Klistu wakutalicila, pano ama wungwe yapanzilwevye mu ncende izilekane lekane, wasonsile wa eluda awakutungulula nu kunena awantu ivya kukonka. (Imili. 14:23) Iwumba lino likatungulula mu Yerusalemu, pano palinji awatumwa na wa eluda wamwi, lwapinguzilepo icintu cimwi cino awa mu ma wungwe wonsinye wazipizile ukukonka. (Imili. 15:2; 16:4) Pa mulandu wakuti awina Klistu wivwizile vino wawanenile, ama wungwe “yawomile mwisuwilo swinya nawasuwizi awalanga wakonjelezya ukuvula amanda yonsi.”—Imili. 16:5.

2. Uzye awantu wa kwe Yehova wakatungululwa wuli ukufumilila mu 1919?

² E Yehova watwalilila ukutungulula awantu wakwe na mweyanye amanda. Ukufumilila mu 1919, e Yesu akakonka uwutunguluzi wa kwe Yehova ukupitila mukuwomvya iwumba itici ilya wapakwe ukutungulula umulimo wakuwizya nu kutupekanizizya ivya kulya vya kumuzimu. a (Luk. 12:42) Ukwasowa nu kuvwilika, cayilanjizya apatiswenye ukuti e Yehova akapaala umulimo wuno lyo-o iwumba likawomba.—Ayize. 60:22; 65:​13, 14.

3-4. (a) Landani pa cakulolelako cino cikulanjizya ukuti cawa icete nkaninye wo-o vino twawa nu wutunguluzi uwuzima. (b) Avyani vino twandi tusambilile mwe co-o icipande?

 ³ Kwanga kutawa uwutunguluzi uwuzima, nga tutakumanisya ukuwomba umulimo wuno Yesu watupa. (Mat. 28:​19, 20) Ku cakulolelako, wanga watatuputulila ivifulo umwakuwombela, cila muntu nga akayavye mukuwombela kuno akulonda. Na co-o nga calenga mu matalitali yamwi wakawizya waya mukuwombelamo imiku ni miku, ne mwe yanji nga wasilyatako ni tamba. Uzye kwawa ivizima na vinji vino mwalola pa mulandu wakuwa nu wutunguluzi uwuzima?

⁴ E Yesu watwalilila ukututungulula icete wulyanye vino watungululanga awasambi wakwe pano walinji munsi. Mwe co-o icipande, twandi tusambilile pe vino e Yesu watungululanga na vino iwungwe lya kwe Yehova lingamukolanya mwe ya-a amanda. Swinya twandi tulande na pe vino tungalanjizya ukuti tukasalifya pe vino iwungwe lya kwe Yehova likatutungulula.

VINO IWUNGWE LYA KWE YEHOVA LIKAKOLANYA YESU

5. Uzye iwungwe lya kwe Yehova likakolanya wuli e Yesu? (Yohani 8:28)

⁵ E Yesu walandanga nu kucita vino wasambilizile ku mukwasi wakwe. Wonye avino ni wungwe lya kwe Yehova likacita. Vino likasambilizya na vino likatunena ukucita, vikafuma mwe Baibolo. (Wazyani Yohani 8:28; 2 Tim. 3:​16, 17) Swinya likatwizusyako lyonsinye ukuti tuzipizile twawazya Baibolo nu kuwomvya vino tukusambilila. Avizima ci vino tukazanamo mukucita wo-o?

6. Avyani vino tukawomvya pakuyisambilizya Baibolo, swinya avizima ci vino tukazanamo mukucita wo-o?

⁶ Tukayitopwa nkaninye nga ca kuti tukuwazya Baibolo ukuwomvya ama buku yano iwungwe lya kwe Yehova lyatupekanizizya. Ku cakulolelako, tukawa nu lungo lwakulinganya vino iwungwe lya kwe Yehova likutunena ukupitila mu mpapulo kwe vino Baibolo yikalanda. Nga twazana ukuti vino wakutunena vilingine na vino Baibolo yikalanda, cikalenga atutwalilila ukusuwila iwungwe lya kwe Yehova.—Roma. 12:2.

7. Acani cino e Yesu wasambilizyangapo, swinya uzye wano wawa mwi wungwe lya kwe Yehova mwe ya-a amanda wakamukolanya wuli?

⁷ E Yesu wawizyanga “Ilandwe Zima ilya Wufumu wakwe Leza.” (Luk. 4:​43, 44) Swinya wanenile na wasambilizi wakwe ukuti avino wacita. (Luk. 9:​1, 2; 10:​8, 9) Pe yo-o impindi wonsinye wano wawa mwi wungwe lya kwe Yehova, wakawizya ilyasi ilizima, asa mulandu na kuno wali nanti imilimo yino wawa nayo mwi wungwe.

8. Alongo ci uluyiwele luno twawanalo?

⁸ Lwawa alongo uluyiwele ukunenako wanji icisinka pa Wufumu wa kwe Leza. Amuno asa we wonsi wano wawa na lo-o ulongo. Ku cakulolelako, pano Yesu walinji munsi atazumilizizye imizimu miwipe ukulanda pe weliwe. (Luk. 4:41) Fwandi pa kuti wumwi atalike ukuwombela ponga ni Nte zya kwe Yehova umulimo wa kuwizya, azipizile ukufika pe vino vikalondekwa. Tungalanjizya wuli ukuti tukasalifya pe lo-o ulongo? Tungacita wo-o ukupitila mukuwombako lyonsinye umulimo wakuwizya. Tukawombesya ukufika pano papelezile amaka yitu ukuwizya nu kusambilizya wanji ndi vino Yesu wacitanga.—Mat. 13:​3, 23; 1 Kor. 3:6.

9. Uzye iwungwe lya kwe Yehova lyalenga wuli izina lya kwe Leza ukumanyikwa?

⁹ E Yesu walenzile izina lya kwe Leza ukumanyikwa. Amazwi yano walanzile mwipepo ayano yalenga tusinincizye wo-o. Watili: “Naleka wakumanya.” (Yoha. 17:26) Wonye avino ni wungwe lya kwe Yehova likacita pe yo-o impindi. Likakwelezya na maka ukwavwa wanji ukumanya izina lya kwe Leza. Ku cakulolelako, mwe Baibolo iyipitulukwemo iye New World Translation, iwungwe lyanyocezyamo izina  lya kwe Leza mulyanye muno lizipizile ukuwa. Yo-o Baibolo akuno yawa yonsinye nanti iviputulwa ukucila pa vitundu 270. Nga mwaya mu kalibuku kakuti Akatabo ka Kutwafwa Ukusambilila Icebo ca kwa Lesa amafwa 1-13, mulizana ivyewo ivivule vino vikalanda pe vino wanyocezizyemo izina lya kwe Leza nu mulandu wuno wacitizile wo-o. Ne pa cipande ca kuti “Bushe Ishina lya Kuti Yehova Lifwile Ukusangwa mu Cipangano Cipya?” ica mu Ulupungu lwa kwa Kalinda ulwa August 1, 2008, amafwa 18-22, walondolola umulandu wuno izina lya kwe Leza lizipizile ukuwela mu ma waliko ya wina Klistu aya ci Greek imiku 237.

10. Avyani vino mukusambililako ku mwanaci wino akakwikala ku Myanmar?

¹⁰ Ndi wulyanye vino e Yesu wacitanga, nasweswenye tukalondesya nkaninye ukwavwa awantu ukumanya izina lya kwe Leza. Umwanaci wumwi uwa myaka 67 wino akakwikala ku Myanmar wizile alila pano wasambilizile pi zina lya kwe Leza. Wanenile wino wamusambilizyanga ukuti: “Wo-o awuli umuku wakutalicilapo ukusambilila ukuti izina lya kwe Leza we Yehova. . . . Mwansambilizya icintu icicindame nkaninye ukucila pe vyonsinye vino nasambilila.” Co-o ica kulolelako cikulanjizya ukuti ukusambilizyavye umuntu pi zina lya kwe Leza, kungalenga apiluke.

TWALILILANI UKUSALIFYA PI WUNGWE LYA KWE LEZA

11. Uzye wa eluda wangalanjizya wuli ukuti wakasalifya pi wungwe lya kwe Yehova? (Lolani ni cikope.)

¹¹ Anzila ci yimwi yino wa eluda wangalanjizyamo ukuti wakasalifya pi wungwe lya kwe Yehova? Nga ca kuti wapocelela uwutunguluzi wumwi ukufuma kwi wungwe, wazipizile ukuwikako sana amano pano wakuwazya nu kwelezya na maka yawo yonsinye ukuwukonka. Ku cakulolelako, wakawanena ivya kukonka pakulanda icete amalyasi, ivya kupepa pano wali pa kulongana, ni vya kusakamala ing’onzi zya kwe Klistu. Nga ca kuti wakukonka vyonsinye vino wakuwanena, awanawitu na wankazi wakayivwa ukuti e Yehova wawakunda swinya akawasakamala.

12. (a) Amulandu ci wuno tuzipizile ukuwela ni civwila kwe wano wakatungulula? (Waheberi 13:​7, 17) (b) Amulandu ci wuno tuzipizile ukuwicila vye amano pa vizima vino wa eluda wakacita?

¹² Tuzipizile ukuyikundila ukwivwila vino wa eluda wakutunena. Nga tukucita wo-o, tulilenga ciwawapepucila ukuwomba umulimo wawo uwakutungulula. E Baibolo yikatuwomelezya ukuti tuzipizile twakwivwila nu kutontela wano wakatungulula. (Wazyani Waheberi 13:​7, 17.) Kweni asa welyonsi pano cingatupepucila ukucita wo-o. Amulandu ci? Amuno na wa eluda nye watapwililika. Nga tukuwika amano kwe vino wakaluvyanya, ukucila ukuwika amano ku vizima vino wakacita, ciliwa ngati tukutunjilila awalwani witu. Amulandu ci wuno twalandila wo-o? Apa mulandu wa kuti awalwani witu wakalonda twavwilika nga ca kuti e Yehova awino akatutungulula ukuwomvya iwungwe. Acino nga twatalika ukwelenganya iviwipe pa eluda, tungatalika ukwelenganya iviwipe na pi wungwe lya kwe Yehova nye nu kuleka ukulisuwila. Tungacita wuli pa kuti tutwalilile ukusuwila iwungwe lya kwe Yehova nu kukana uwufi wa kwe Satana?

MUTALEKA WANJI WALENGE MWAVWILIKA IWUNGWE LYA KWE YEHOVA

13. Avyani vino awalwani wa kwe Yehova wakacita pa kulenga twalola ngati iwungwe lya kwe Yehova litazipa?

¹³ Awalwani wa kwe Yehova wakalonda twalola ivizima vino vikacitika mwi wungwe ngati aviwipe. Nomba e Yehova akalonda tuwe swe wasaka lwa ku muwili, na mu miwele ni micitile, swinya twamupepa ukulingana na vino akalonda. Walanda nu kuti wensinye wino akunyocezyapo uluwembu ululi longanye  ukwasowa ukulapila, wazipizile ukumuwinga mwi wungwe. (1 Kor. 5:​11-13; 6:​9, 10) Lelo pa mulandu wa kuti tukakwivwila lyo-o isundo, awalwani witu wakatuseka ukuti twawomya ivintu swinya tutawa nu lukundo.

14. Weweni wino akalenga walanda ivya wufi pi wungwe lya kwe Yehova?

¹⁴ Tuzipizile ukumanya umulwani witu. E Satana awino akalanda ivya wufi pi wungwe lya kwe Yehova. E Baibolo yikamwita ukuti ‘enyina wawufi.’ (Yoha. 8:44; Inta. 3:​1-5) Fwandi tuzipizile twakwenecela ukuti e Satana wandi awawomvya awantu wamwi ku kulanda ivya wufi pi wungwe lya kwe Yehova. Swinya wonye avino calinji na mu mpindi zya wina Klistu wakutalicila.

15. Avyani vino intunguluzi zya simapepo zyacisile kwe Yesu na ku wasambi wakwe?

¹⁵ Mu mpindi zya wina Klistu wakutalicila, e Satana walenzile awantu walanda iviwipe pe Yesu nanti aca kuti walinji amupwililike swinya wacitanga ni vizungusyo. Ku cakulolelako, intunguluzi zya simapepo zyalandanga ukuti amaka yano Yesu wawomvyanga pa kuwinga ivimizimu viwipe, yafumanga ku “mfumu yamizimu miwipe.” (Mar. 3:22) Swinya pano wamuluwulusyanga, intunguluzi zya simapepo zyamuwipizizye ukuti apondocezile e Leza swinya zyazembelesile na wantu ukuti wamukome. (Mat. 27:20) Mukupita kwa mpindi pano awasambi wa kwe Yesu wawizyanga, awalwani wawo wizile ‘awawavulunganya’ nu kulenga awantu wawacuzya. (Imili. 14:​2, 19) Ukulingana ni waliko lya Imilimo 14:​2, Ulupungu lwa kwe Kalinda ulwa December 1, 1998, lwalondolozile ukuti: “Wa-a awalwani wa kwe Yehova watalondangapo ukuteyelezya kwe vino awina Klistu wasambilizyanga. Swinya walandanga iviwipe pa kuti awantu wawapate nu kuleka ukwivwa kwe wa-a awina Klistu.”

16. Avyani vino tuzipizile twakwizuka nga cakuti twivwa amalyasi ya wufi?

 ¹⁶ E Satana acili watwalilila ukulanda ivya wufi pi wungwe lya kwe Yehova na peyonye impindi. E Baibolo yikalanda ukuti, “akasovya awamunsi yonsi.” [NWT] (Ukuwu. 12:9) Nga mwivwa wakulanda iviwipe pi wungwe lya kwe Yehova na pa wanawitu wano wakatungulula, mwakwizuka vino awalwani wa kwe Leza wacuzizye e Yesu na wasambi wakwe. E Yesu walanzile ukuti awalwani waliwacuzya awantu wa kwe Yehova nu kulanda iviwipe pe woliwo. Swinya vyonye avino vikucitika. (Mat. 5:​11, 12) Fwandi tutaliwakoncelela amalyasi ya wufi nga twamanya kuno yakafumilila, nu kucitapo cimwi paponye pa kuti tuyicinjilile. Nomba avyani vino tuzipizile ukucita?

17. Avyani vino tuzipizile ukucita pa kukana amalyasi ya wufi? (2 Timoti 1:13) (Lolani na kambokosi ka kuti “ Vino Tungacita nga Twivwa Amalyasi ya Wufi.”)

¹⁷ Mutakoncelela amalyasi ya wufi. Umutumwa Paulo walanzile pe vino tungacita nga cakuti twivwa amalyasi ya wufi. Wanenile e Timoti ukuti “Ukawakalipile waleke . . . ukuwika amano ku malyasi ya wufi” [NWT] nu ku “kana imilumbe yino imintamanya Leza ikavwanga.” (1 Tim. 1:​3, 4; 4:7) Ku cakulolelako, umwana umutici angasola icili consinye pansi nu kuwika pa mulomo. Nomba e songo weni atanga acite wo-o, amuno amanyile ukuti cili ni viko swinya cingamulwalika. Wonye avino cawa na kwesweswenye, tukakana amalyasi ya wufi amuno twamanya kuno yakafuma. Lelo tukateyelezya ku “mazwi yakusimichila”.—Wazyani 2 Timoti 1:13.

18. Tungalanjizya wuli ukuti tukasalifya pi wungwe lya kwe Yehova?

¹⁸ Tusambilizile pa nzila zitatu zino iwungwe lya kwe Yehova likakolanizizyamo e Yesu. Pano mukuyisambilizya e Baibolo mwalola na vinji vino iwungwe lya kwe Yehova likacita pa kukolanya e Yesu. Mwakwavwako awanawitu na wankazi ukutwalilila ukusuwila iwungwe lya kwe Yehova. Twalililani ukulanjizya ukuti mukasalifya ukupitila mu kuwombela Yehova ni cisinka nu kukonka vino iwungwe lyakwe likutunena lino akawomvya pa kuficilisya ukulonda kwakwe. (Amalu. 37:28) Lekani tutwalilile ukusalifya pakuwa mwi wungwe lya kwe Yehova muno mwawa awantu wano wakundana swinya awa cisinka.