1. Acani cino Davidi walanzile pe vino Yehova wayicefya?

E YEHOVA wayicefya nkaninye. E Davidi walanzile ukuti: “Wenji Mfumu Leza ukancinjilila untula ukunsayila kwako [nanti ukuyicefya] kwankuzya.” (2 Sam. 22:36; Amalu. 18:35) Ncepamwi e Davidi wizukanga vino calinji pano e Samuel wayile mukusola imfumu impya iya wina Israeli ku ng’anda ya kwe Yisi. E Yehova wasozile Davidi ukupyana pe Shauli nanti aca kuti walinji amutici pa wana wa kwe Yese wonsinyene 8.​—1 Sam. 16:1, 10-13.

2. Avyani vino twandi tusambilile mwe co-o icipande?

² Ne Davidi nye nga walanzileko amazwi yano e kimbila wa malumbo wumwi walanzile pe Yehova ukuti: “Akakwinamila pansi ukuti alole amayulu ni nsinye. Akakatusya awapina awafumya mwi tukumbu. Akanyamula awasowelwe . . . aleka awikala ponga na wakankala.” (Amalu. 113:6-8) Mwe co-o icipande twandi tusambilile pe vino Yehova akalanjizya ukuyicefya. Twandi tusambilile na pa kuyicefya ukufuma ku Mfumu Shauli, e kasesema Daniel ne Yesu.

3. Uzye e Yehova akawomba wuli na wantu, swinya co-o cikalanjizya cani?

³ E Yehova akalanjizya ukuti wayicefya ukupitila mwe vino akawomba na wantu wano watapwililika. Asipocelela vye imipepele yitu lelo akatulola ukuti swe viwuza vyakwe. (Amalu. 25:14) Walanjizya vino akalonda ukuti tuwe swe viwuza vyakwe pano watumile umwana wakwe ukwizafwila pa mawembuko yitu. Ala e Yehova wawa nu luse nkaninye!

4. Acani cino e Yehova watupa swinya amulandu ci?

⁴ Teyelenganyani pa nzila na yinji yino e Yehova akalanjizizyamo  ukuti wayicefya. Pano we Kelewula, nga watwelewuzile vye ukwasowa nu kutupa insambu zya kuyisolela ica kucita mu wumi witu. Lelo asa vyo wacisile. Watwelewuzile mu mukola wakwe nu kutupa insambu zya kuyisolela ivya kucita mu wumi. Acino akalonda twayikundila ukumuwombela pa mulandu wa kuti twamukunda. Na pa mulandu wa vizima vino tukazana nga tukumwivwila. (Amasu. 10:12; Ayize. 48:17, 18) Tukasalifya nkaninye pe vino e Yehova wayicefya!

5. Uzye e Yehova akatusambilizya wuli ukuwa awayicefye? (Lolani icikope pa nkupo.)

⁵ E Yehova akatusambilizya ukuwa awayicefye ukupitila mwe vino akawomba na sweswe. Kutawa nanti wenga wino angalingana nawe amano. Lelo nanti ciwe wo-o akakwivwako nga cakuti wamwi wakulonda ukulandapo pe vimwi. Ku ca kulolelako wazumilizizye umwana wakwe ukumwavwako ukwelewula ivintu. (Imilu. 8:27-30; Kolo. 1:15, 16) Nanti aca kuti awa maka yonsinye swinya angakwanisya ukuwomba imilimo yonsinye ukwasowa intazi, akapako na wanji imilimo. Wasonta e Yesu ukuwa Amfumu mu wufumu wakwe, swinya alipako na maka ya kuteka kwa 144,000. (Luka 12:32) E Yehova watezile asambilizya e Yesu ivya kuwa e Simapepo mukulu swinya imfumu. (Hebe. 5:8, 9) Akasambilizya na wano waliwateka ponga ne Yesu kwi yulu. Lelo asiwacemelela pano wakuwomba wo-o umulimo, amuno wawasuwila nkaninye swinya asiwavwilika nanti katicinye.​—Ukuwu. 5:10.

6-7. Avyani vino tukusambililako ku mukwasi witu uwa kwi yulu pa kupako wanji imilimo?

⁶ Nga ca kuti e Yehova uwa maka yonsi  akapako wanji imilimo, lyo sweswe cifwile cilusye! Ku cakulolelako nga cakuti mwe wa eluda nanti mwe mutwe wa lupwa, mungakolanya e Yehova nga ca kuti mukupako wanji imilimo swinya musakuwacemelela pano wakuwomba. Nga mukukolanya e Yehova mutaliwa mwawomba vye icete imilimo. Lelo muliwasambilizyako na wanji nu kulenga wakunde sana yoyo imilimo. (Ayize. 41:10) Avyani vinji vino wano wapwa amaka yakutungulula wangasambilila kwe Yehova?

⁷ E Baibolo yikalanjizya ukuti e Yehova akateyelezya na ku wangeli. (1 Izya. 22:19-22) Mwe wakwasi mungakolanya e Yehova, nga ca kuti mukukolowozyako na wana winu pe vimwi vino viyine nu kukonka vino walandapo ukuti avino vingawomba.

8. Uzye e Yehova walanjizizye wuli ukuti watekanya kwe Abrahamu ne Sara?

⁸ Inzila na yinji yino e Yehova akalanjizyamo ukuyicefya akupitila mu kutekanya. Ku cakulolelako, akalanjizya ukutekanya na pano awawomvi wakwe wakumukowozya pe vino akulonda ukucita. Watekanizizye e Abrahamu pano wakolowozizye vino umusumba wa Sodomu ne Gomora walinji nu kononwa. (Inta. 18:22-33) Izukani na vino wawomvile ne Sara. Pano Yehova wanenile Sara ukuti ali nu kukwata umwana mu wukote, e Sara wasesile. Nomba e Yehova atafuzilwe swinya atamukalipizile. (Inta. 18:10-14) Lelo wamwavwizyevye mu mucinzi.

9. Uzye awakwasi na wa eluda wangasambililako vyani ku ca kulolelako ca kwe Yehova?

⁹ Avyani vino mwe wakwasi na wa eluda mungasambilila kwe Yehova? Uzye mukacita wuli nga cakuti awana winu nanti wamwi mwi wungwe watazumizile pe vino mwapingulapo? Uzye mukatalika ukuyipokolola? Nanti uzye mukakwelezya ukwivwa kwe vino wakulanda? Awa mwi wungwe na wa mu lupwa wakanoncelamo nkaninye nga ca kuti wano wakuwatungulula wakukolanya Yehova. Ukufika pa-a, twasambilila vino tungakolanya ukuyicefya kwe Yehova. Nomba twandi tusambilile pa vya kulolelako na vinji ivya mu Baibolo pe vino tungalanjizya ukuyicefya.

10. Uzye e Yehova akawomvya wuli ivya kulolelako vye wanji pa kutusambilizya ukuyicefya?

¹⁰ Pa mulandu wakuti e Yehova we ‘Kasambilizya Mukulu’ wawika ivya kulolelako vimwi mwe Baibolo pa kuti twasambililako. (Ayize. 30:20, 21) Swinya mwawa ni vyakulolelako vya wantu wano watalinji awayicefye.​—Amalu. 37:37; 1 Kor. 10:11.

11. Acani cino tukusambililako ku cakulolelako iciwipe ica kwe Shauli?

¹¹ Teyelenganyani cino cacitisile ku Mfumu Shauli. Pano wacilinji amutici walinji amuyicefye. Wamanyile umwakupelela swinya atazumizile zuwa pano wamupile imilimo na yinji. (1 Sam. 9:21; 10:20-22) Lelo mukupita kwa mpindi e Shauli wizile awa ni cilumba swinya watalisile nu kuwomba imilimo yino atapilwe insambu zya kuwomba. Impindi yimwi waposilwe ukutekanya pano walindililanga e kasesema Samuel. Wazipizile ukusuwila e Yehova ukuti wandi apususye awantu wakwe. Lelo asa vino wacisile. Wapile inzuwi nanti aca kuti atapilwe insambu zya kuwomba wo-o umulimo. Co-o calenzile e Yehova aleke ukumwavwa swinya wizile amufumya na pa wufumu. (1 Sam. 13: 8-14) Ukuwazya ivya kulolelako vya musango wo-o kukatwavwa ukukanacita ivintu vino tutakwetipo insambu.

12. Uzye e Daniel walanjizizye wuli ukuti walinji amuyicefye?

¹² Lekani tulole ica kulolelako icizima ica kwe kasesema Daniel wino wapusineko nkaninye na vino Shauli walinji. E Daniel watwalilizile ukuwa amuyicefye mu wumi wakwe wonsinye. Lyonsinye nga akulonda ukucita cimwi wakolowozyanga e Yehova. Ku cakulolelako pano e Yehova wamuwomvizye ukwilula iciloto ca Mfumu Nebukadinezari, e Daniel wacindisile e Yehova. Atatalisile ukulanda ukuti wawomvizye amaka yakwe ukwilula iciloto. (Dan. 2:26-28) Acani cino tukusambililako? Nga ca kuti tukalanda icete amalyasi nanti nga tukasambilizya icete mu mulimo wakuwizya, tuzipizile twaleka awantu wacindika Yehova. Tuzipizile ukumanya ukuti pasi cimwi cino tungacita e Yehova nga atatwavwizye. (Flpi. 4:13) Nga tukucita wo-o lyo tukulanjizya apatiswenye ukuti tukukolanya ica kulolelako ca kwe Yesu. Mu nzila ci?

13. Acani cino tukasambililako pa kuyicefya kwe Yesu pa mazwi ya pe Yohani 5:19, 30?

¹³ Nanti aca kuti e Yesu walinji amupwililike, weyamizile sana pe Yehova. (Wazyani Yohani 5:19, 30.) Asitela ayelenganyepo ukutalika ukutungulula Yisi. Pa Wafilipi 2:6 pakatunena ukuti “atelenganianga nanti akuyitutuwalika ukuti alingane nu Leza.” E Yesu wamanyile umwakupelela swinya wacindisile nu wutunguluzi wa kwe Yisi.

14. Uzye e Yesu wacisile wuli pano wamuwuzizye ukucita vino atakwetipo insambu zya kucita?

¹⁴ Teyelenganyani vino e Yesu wacisile pano e Jemusi, e Yohani ne mama wawo wamulenzile ukuti awacitile vino atakwetipo amaka. Atawapisile na mumbali wawanenile ukuti, wino wawa na maka yakusola wino aliwa kwikasa lyakwe ilya kwe ndilo ni lya kwe kamani we Yisi. (Mat. 20:20-23) E Yesu walanjizizye ukuti wamanyile umwakupelela amuno walinji amuyicefye. Atacisile icili consinye ukwasowa ukupocelela insambu ukufuma kwe Yehova. (Yoha. 12:49) Uzye tungakolanya wuli ica kulolelako icizima ica kwe Yesu?

15-16. Uzye ukusunda kuno kwawa pe 1 Wakorinte 4:6 kungatwavwa wuli?

 ¹⁵ Tukalanjizya ukuti tukakolanya ica kulolelako ca kwe Yesu nga cakuti tukukonka ukusunda kuno kwawa pe 1 Wakorinte 4:6 pano pakati: “Musambilile ukuntacila mu vintu vino vyawalikwa.” Fwandi nga tukwavwa wanji, tuzipizile ukwelenganyapo sana pano tutani tuwavwe. Tutazipizile ukuwanena vino tukwelenganyavye mu mitwe yitu. Lelo tuzipizile ukuwomvya ukusunda kuno kwawa mu Baibolo na mu mabuku yitu. Nga tukucita wo-o lyo tukulanjizya ukuti tutamanya vyonsi. Swinya lyo twayicefya amuno lyo tukulanjizya ukuti ukupanda amano kwa kwe Yehova kwalusya pa mano yitu.​—Ukuwu. 15:3, 4.

¹⁶ Kwawa imilandu na yinji yino tuzipizile ukuwela awayicefye. Uzye ukuyicefya kungalenga wuli tuwe ni nsansa nu kutalika ukwivwana icete na wanji? Lyo-o iwuzyo alino twandi tulanzyanyepo.

17. Acani cino cikalenga wano wayicefya wawa sana ni nsansa?

¹⁷ Tungawa sana ni nsansa nga cakuti twayicefya. Mu nzila ci? Amuno nga twamanya ukuti kwawa vimwi vino tutanga tuwombe, tuliwapocelela ukwavwa ukufuma kwe wanji. Yelenganyani cino cacitisile pano e Yesu wapozizye awa mambombo 10. Wenga vye pe wa-a awino wanyosile mukusalifya e Yesu. Amuno wamanyile ukuti atalinji nu kuyipozya umweneco. Ukuyicefya kwalenzile we-e umonsi asalifye Yesu pe vino wamwavwizye swinya watalisile nu kucindika Leza.​—Luka 17:11-19.

18. Uzye ukuyicefya kukalenga twakwivwana wuli na wanji? (Waroma 12:10)

¹⁸ Awantu awayicefye wakakwivwana sana  na wanji swinya wakawa ni viwuza ivya cisinka. Amulandu ci? Amuno wakamanya ukuti wanji wawa ni miwele imizima yino weni watawa nayo, swinya wakawasuwila nkaninye. Wano wayicefya wakasecelela nkaninye nga cakuti wumwi wawomba icete imilimo yino wamupile, wakamusalifya nu kumucindika.​—Wazyani Waroma 12:10.

19. Amilandu ci yino tutazipizile ukuwela ni cilumba?

¹⁹ Umuntu wacilumba asilonda ukusalifya wanji. Akalonda awino walumbanya. Akayilinganya kwe wanji swinya akatalika nu kucimvyanya na wawuye. Asilonda ukusambilizya wanji imilimo amuno akalola ngati watanga wawombe icete suka nga awino akuwombelapo. Akalola ukuti walusya wanji swinya akatalika ukuwivwila akaso nga wakucita icete. (Gal. 5:26) Umuntu wamusango wo-o asitwalilila ukuwa e ciwuza na wanji. Fwandi nga twazana ukuti tuli ni cilumba cingazipa sana ukupepa kwe Yehova pa kuti icilumba citati ciwatutungulula.​—Rom. 12:2.

20. Amulandu ci wuno tuzipizile ukuwela awayicefye?

²⁰ Tukasalifya sana pe vino e Yehova wayicefya. Tukalola vino wayicefya mwe vino akawomba na wawomvi wakwe icakuti tukalondesya ukumukolanya. Swinya tukalonda nu kukolanya awantu wano wawalikwa mwe Baibolo wano watwalilizile ukuwombela e Yehova mukuyicefya. Lekani tutwalilile ukucindika e Yehova amuno wayana ukumucindika. (Ukuwu. 4:11) Nga tukucita wo-o tuliwa iviwuza vyakwe ku ciyayaya amuno wakunda awantu wano wayicefya.