ICIPANDE CA KUSAMBILILAMO 34
Mwacindama Nkaninye mwi Wungwe lya kwe Yehova!
“Amuno ndi vino umuwili wuli wonga, lelo wuli ni vyawi ivivule, ivyawi vyonsi ivya muwili, nanti vingavula, amuwili wonga; avino ne Klistu nye ali.”—1 KOR. 12:12
ULWIMBO 101 Ukubombela Pamo Mukwikatana
VINO TWANDI TUSAMBILILE *
1. Alongo ci luno twawa nalo?
TWAWA nu longo ulukulu ulwa kuwa mwi wungwe lya kwe Yehova! Tukamupepa ponga na wanawitu na wankazi mu mutende ni nsansa. Nomba amulimo ci wuno mwawa nawo mwi wungwe?
2. Uzye acakulolelako ci cino e Paulo wawisile mu ma kalata yakwe yano walenvile?
2 Twandi tusambilile ivivule ku cakulolelako cino e Paulo wawisile mu makalata yano walenvile, pe vino tungamanya umulimo wuno twakwata mwi wungwe. Mwe kalata yonga na yonga e Paulo wakolinye umuwili kwi wungwe. Swinya wakolinye awanawitu nawa nkazi ku vyawi vino vyawa ku muwili.—Roma. 12:4-8; 1 Kor. 12:12-27; Efes. 4:16.
3. Avintu ci vitatu vino twandi tusambilile mwe co-o icipande?
3 Mwe co-o icipande, twalanda pa vintu vitatu vino tungasambilila ku cakulolelako ca kwe Paulo. Ica kutalicilako, twandi tusambilile ukuti cila muntu wawa nu mulimo * wuno akawomba mwi wungwe. Icaciti wili, twandi tulole vino tungacita nga twazana ukuti cikatuwomela ukulola umulimo wuno twawa nawo mwi wungwe. Ica kulecelezya, twalanda umulandu wuno cila muntu azipizile ukuwicila amano ku mulimo wuno Yehova wamupa mwi wungwe.
SWENSINYE TWAWA NU MULIMO MWI WUNGWE LYA KWE YEHOVA
4. Acani cino amazwi yano yawa pa Waroma 12:4, 5 yakatusambilizya?
4 Ica kutalicilapo cino tukusambilila ku cilanjililo cino Paulo wawomvizye aca kuti, cila muntu wawa nu mulimo uwucindame wuno angawomba mu lupwa lwakwe Yehova. Watalicizile na mazwi yakuti: “Amuno ndi vino sweswe tuli ni vyawi vivule mu muwili wonga, lelo ivyawi vyonsi visi nu mulimo uwuli wonga: acino naswe, swe wantu twavula, swe muwili wonga mwa kwe Klistu, nga ivyawi vyonsi conga na conga acawi ca muwuye.” (Roma. 12:4, 5) Cino e Paulo walandangapo aca kuti, cila muntu wawa nu mulimo uwuyiwele wuno akawomba mwi wungwe. Swinya swensinye twacindama.
Swensinye twacindama mwi wungwe (Lolani amaparagrafu 5-12) *
5. “Avyawila” ci vino Yehova wapa kwi wungwe lyakwe?
5 Nga mwelenganya pe wano wawa ni milimo mwi wungwe, nce pamwi cino cikatalicila ukwiza mu mutwe awanawitu wano wakatungulula. (1 Tes. 5:12; Hebe. 13:17) Kweni molimonye ukuti e Yehova ukupitila mwe Yesu wapa “ivyawila mu wantu” mwi wungwe lyakwe. (Efes. 4:8) Pe vyo-o “ivyawila” pawa awa mwi wumba lino Likatungulula na wakavwa wawo, awa mu Komiti ya Musambo, wa Kangalila wa Muputule, na wano wakasambilizya mu ma sukulu yano yawa mwi wungwe lya kwe Yehova, wa eluda, na watumikila. Wa-a awanawitu wonsinye wakasontwa nu muzimu uwutele pa kuti wasakamala icete ing’onzi zya kwe Yehova nu kuwomya iwungwe lyakwe.—1 Pet. 5:2, 3.
6. Ukulingana ne 1 Watesalonika 2:6-8, avyani vino awana witu wano wasontwa nu muzimu wutele wakakwelezya ukucita?
6 Awanawitu wakasontwa nu muzimu wutele pakuti wawomba imilimo imilekane lekane. Wulyanye vino amakasa na manama ni vilundwa vinji ivya ku muwili vikawombela ponga pa kuti cizipile umuwili, avino na wanawitu wano wasontwa nu muzimu wutele wakawombesya pa kuti cizipile iwungwe. Wasiwomba wo-o mulimo pa kuti wacindikwa kwe wanji. Lelo wakawombesya pakuti wakwavwa awanawitu na wankazi mwi wungwe. (Wazyani 1 Watesalonika 2:6-8.) Tukasalifya nkaninye e Yehova pa kutupa wa-a awonsi wano wawika amano pa kuwombela wanji!
7. Avizima vino wano wawa mu mulimo wa mpindi zyonsi wakayitopwa?
7 Wamwi wakawombako wumishonari, wupainiya uwuyiwele, nanti wupainiya wampindi zyonsi. Awanawitu na wankazi insi yonsinye wasolapo ukuwomvya uwumi ni mpindi yawo mu mulimo wa kuwizya nu kupanga awasambilizi. Co-o calenga wavwe awavule ukuwa awasambi wa kwe Klistu. Kweni awavule wano wasolapo ukuwomba umulimo wa mpindi zyonsi watawa ni cuuma, lelo e Yehova wawapa ivitu ivivule swinya ivizima nkaninye. (Mar. 10:29, 30) Twawakunda nkaninye pa myezo yino wawa nayo. Swinya tukakwivwa icete ukuwa nawo mwi wungwe!
8. Amulandu ci wuno wakawizya wonsinyene wacindamila kwe Yehova?
8 Uzye wano wawa nu mulimo mwi wungwe awalyanye wano wawa mu mulimo wa mpindi zyonsi na wonsi awasontwe? Awe! Amuno e kawizya uwili wensinye wacindama nkaninye kwe Yehova na kwi wungwe lyakwe. (Roma. 10:15; 1 Kor. 3:6-9) Icikalambane cino twawela mwe lyo-o iwungwe, akupanga awasambi we Tatakulu e Yesu Klistu. (Mat. 28:19, 20; 1 Tim. 2:4) Fwandi wakawizya wonsinyene awabatizwe na wano watabatizwa, wakalola wo-o umulimo ukuti wacindama nkaninye.—Mat. 24:14.
9. Amulandu ci wuno tukacindicila wa wankazi?
9 E Yehova walanjizya vino wacindika wankazi pakuwapako umulimo wakuwomba mwi wungwe lyakwe. Akasalifya sana pe vyo wakawomba asa mulandu awasimbe, watwalwa, wawa na wana nanti wafwilwa awalume. E Baibolo yikalanda pa wanaci awavule wano waselecezizye Leza. Yikalanda pa mano yawo, isuwilo lino wakweti, ukucincila, ukusipa, ukupako wanji, nga ni milimo imizima yino wawombanga. (Luka. 8:2, 3; Imili. 16:14, 15; Roma. 16:3, 6; Flpi. 4:3; Hebe. 11:11, 31, 35) Tukasalifya nkaninye e Yehova pa kutupa wankazi mwi wungwe wano wawa ndi vino wa-a awanaci wacisinka wano wawalikwa mu Baibolo!
10. Amulandu ci wuno tukalolela ukuti alongo ukuwa na wasongo mu mawungwe yitu?
10 Tukakwivwa icete ukuwa nawa songo mwi wungwe. Mu ma wungwe yamwi mwawa awanawitu na wankazi wano wakotela mu cine swinya wano wawombela Yehova pa myaka imivule. Ne wamwi wizile awasambilila icine nombanye mu wusongo. Lelo wonsinye wa-a wakapita mu ntazi imvule zino zikakwiza pa mulandu wakukula. Zyo-o intazi zikalenga watawomba sana mwi wungwe na mulimo wakuwizya. Lelo nanti ciwe wo-o wakawomba ukufika pano papelezile amaka yawo swinya wakawomelezya nu kusambilizyako wanji imilimo! Tukayitopwa nkaninye ukusambililako kwe vino wamanya. Wa-a wasongo wayemba nkaninye kwe Yehova na kwi wungwe lyakwe.—Imilu. 16:31.
11-12. Uzye awacitici wakamiwomelezya wuli mwi wungwe linu?
11 Lekani, tulandeko pa wacitici. Wakapita mu ntazi imvule amuno wakakulila mu nsi ya kwe Satana muno mwawa ivisambilizyo iviwipe. (1 Yoh. 5:19) Lelo tukasecelela nkaninye ukulola kuno wakwasukapo pa kulongana, wakuwizya, nu kulanda pe vino wazumilamo mu kusipa. Mwe wacitici, manyani ukuti mukawomba umulimo uwucindame mwi wungwe lya kwe Yehova!—Amalu. 8:2.
12 Awanawitu na wankazi wamwi wakalola ngati patawa na cino wakawomba mwi wungwe lya kwe Yehova. Acani cino cingatwavwa ukumanya ukuti twawa nu mulimo mwi wungwe lya kwe Yehova? Lekani tulole cino cingatwavwa.
MWACINDAMA NKANINYE MWI WUNGWE
13-14. Amulandu ci wuno wamwi wangalola ngati watacindama mwi wungwe?
13 Ica citi wili cino e Paulo walanzile mu cakulolelako cakwe cikatwizusyako intazi yino awavule wakapitamo. wakayilola ukuti watacindama mwi wungwe lya kwe Yehova. E Paulo walemvile ukuti: “Ndi itamba lingati, amuno insi ne likasa, nsi ne cawi ca muwili, coconye citanga cilesye ukuti lisi acawi ca ku muwili. Swinya ndi ikutwi lingati, amuno nsi ne lilinso, insi ne cawi ca muwili, coconye citanga cilesye ukuti lisi acawi ca ku muwili.” (1 Kor. 12:15, 16) Acani cino e Paulo walondanga tusambilileko?
14 Ukuyikolanya kwe wanji kungalenga mutalike ukuyilola ukuti mutacindama mwi wungwe lya kwe Yehova. Wamwi wawa ni cawupe ca kusambilizya, ukutantika icete imilimo na vinji, ne wanji wamanya ivya kucema. Impindi zimwi mungalola ngati mutanga mufikeko. Ukwelenganya kwa musango wo-o kwazipa nkaninye amuno kukalanjizya ukuti mwayicefya. (Flpi. 2:3) Lelo muzipizile ukucenjela sana. Amuno mungafupulwa nga mwatwalilila ukuyikolanya kwe wanji. Mungasyala mukuyivwa ukuti mutawa nu mulimo mwi wungwe lya kwe Yehova. Wulyanye vino Paulo walanzile mu cakulolelako cakwe. Nomba acani cino cingamyavwa?
15. Ukulingana ne 1 Wakorinte 12:4-11, acani cino tuyine ukwizuka pa vya wupe ivili vyonsinye vino twakwata?
15 Yelenganyani pe co-o, e Yehova wapile awina Klistu wakutalicilako ivya wupe vyakucita ivizungusyo ukupitila mu muzimu wakwe uwutele. Lelo asa wina Klistu wonsinye wano wapocelezile ivya wupe ivili vyonga. (Wazyani 1 Wakorinte 12:4-11.) Lelo wonsinye wacindime kwe Yehova. Kweni pe yo-o impindi, tutawa ni vyawupe vya kucita ivizungusyo ndi vino awina Klistu wapocelezile ukupitila mu muzimu uwutele. Lelo icisinka ci sundo cino cawa mwe co-o icakulolelako cicili cikawomba. Tusiwomba imilimo iyili yonga mwi wungwe, lelo swensinye twacindama kwe Yehova.
16. Akusunda ci ukwe Paulo kuno tuzipizile ukukonka?
16 Ukucila ukutalika ukuyikolanya kwe wanji, tuzipizile ukukonka ukusunda kuno e Paulo walanzile ukwa kuti: “Ukuwa lekani wila muntu awayelezya imiwele yakwe umweneco, ndi acino akacita icete, peni apano angayitumvya kwe cino akacita, nanti kukolanya vino awawuye wakacita.”—Gal. 6:4.
17. Avizima ci vyo vilifumamo mukwivwila ukusunda kwa kwe Paulo?
17 Nga twakonka ukusunda kwa kwe Paulo, tuliwalola ukuti naswenye twawa ni vyawupe vino wanji watakwata. Ku cakulolelako, e eluda wino asilanda icete amalyasi, mungazana ukuti akawomba icete umulimo wakupanga awasambi. Ne wino atamanya ukutantika icete imilimo mungazana ukuti wawa ni cikuku swinya akuno awanawitu na wankazi wakasamalila mu kupocelela ukwavwa kwa mu Mawaliko. Nanti pamwi wawa vye nu mwezo wakupocelela aweni. (Hebe. 13:2, 16) Nga twamanya icawupe cino twakwata mwi wungwe, tuliwalola ukuti naswenye twacindama. Swinya tutaliwazuwila wanji pa vyawupe vino wakwata.
18. Uzye tungazifya wuli imisambilizizye yitu?
18 Swensinye tuzipizile twazifyako mumwi pa kuti twawomba icete umulimo wuno twakwata mwi wungwe. Pakuti twazifyako imiwombele yitu, e Yehova watupa ivya kutwavwa mwi wungwe lyakwe. Ku cakulolelako, pa kulongana kwa mikalile, tukapocelela ukwavwa pe vino tungawomba icete umulimo wa kuwizya. Uzye mukaviwomvya?
19. Mungacita wuli pakuti mufikepo ukuzanwa kwi Sukulu lya Kawizya wa Wufumu?
19 E Yehova watupako ni Sukulu lya Kawizya. Wano wangazanwako awawo wano wawa mu mulimo wa mpindi zyonsi, awa myaka pakasi ke 23 ne 65. Impindi zimwi mungayisula nu kulola ngati mwemwe mutanga mufikepo ukuya kwe lyo-o isukulu. Cino cingamyavwa akulemba imilandu yino mukulondela ukuyila kwe lyo-o isukulu, asa vino vikulenga mwalola ukuti mutanga muyeko. Cino muzipizile ukucita akulemba vino vilimyavwa ukufikapo pa kuti mwize muzanweko. Nga mwawombesya nu kuyiwicilisyako, e Yehova angamyavwa ukucita vino mwalolanga ukuti mutanga mucite.
MWAWOMVYA IVYA WUPE VINU MU KUWOMYA IWUNGWE
20. Acani cino tukusambililako pa Waroma 12:6-8?
20 Ica citi tatu cino tukusambililako ku cakulolelako ca kwe Paulo cikazanwa pa Waroma 12:6-8. (Wazyani.) Pe lyo-o iwaliko e Paulo walanda icisinka icili conganye ica kuti cila muntu mwi wungwe wawa ni ca wupe. Nomba pa-a pa peni walanda sana ukuti cila muntu azipizile ukuwomvya ica wupe cino wakwata mu kuwomya iwungwe.
21-22. Avyani vino tungasambiliko ku mwanawitu Robert ne Felice?
21 Yelenganyani pe cino cacitisile ku mwanawitu wino twakwita ukuti Robert. Pa nsizi yakuwombela ku nsi yinji, wamutumile ukuya mukuwombela pa Musambo wa ku mwawo. Nanti cakuti awanawitu wamunenile ukuti pasi cino waluvinye pa kumutuma ku mwawo, walanzile ukuti: “Pa myezi imivule ntalinji ni nsansa amuno nalola ngati naposilwe ukuwomba imilimo yino wampile. Impindi zimwi nelenganyanga na pakuleka umulimo wane uwa pa Musambo.” Uzye wacisile wuli pakuti atalike ukuwa ni nsansa na swinya? E eluda muwuye wamunenile ukuti, e Yehova akatupa imilimo yimwi pa kuti atusambilizye ivyakwiza mukuwomba icete umulimo wuno tuliwomba kunkwelelo. Umwanawitu Robert wilusile ukuti wazipizile ukwiwililako kwe vino wawombanga ku nsizi nu kuwika amano pe vino angawomba icete umulimo wuno wapilwe.
22 Vino vyaciticizile umwanawitu Felice Episcopo vyakoline na vino umwanawitu Robert wapisilemo. Weni wazanilwe na kwi sukulu lya Gileadi ne wa kwakwe mu 1956. Swinya wawatumile ukuya mukuwombela mu muputule mu Bolivia. Nomba mu 1964 wizile awakwata umwana. E Felice walanzile ukuti: “Citapepusile ukusya umulimo wuno twakunzile nkaninye. Ukulanda vye icisinka papisile umwaka wonga nkayivwa vye uwuwi. Lelo e Yehova wanjavwile ukupiluka mwe vyo nelenganyanga nu kuwika amano ku mulimo wuno nakweti uwa kusakamala umwana.” Uzye namwenye mukayivwa ngati we Robert nanti e Felice? Uzye mukayivwa uwuwi pa mulandu wa kuti musakuwomba umulimo wuno mwawombanga ku nsizi? Nga avino mukayivwa, cino cilimyavwa akuwika vye amano pe vino mukuwombela e Yehova na wamunyonko pe yo-o impindi asa pe vino mwaleka ukuwomba. Acino muwawombesya swinya mwawonvya icawupe cinu ku kwavwa wanji. Muliwawa sana ni nsansa pano mukwavwa awa mwi wungwe.
23. Avyani vino tuzipizile twacita, swinya tulisambilila cani mu cipande cino cinkonsilepo?
23 Swensinye twacindama kwe Yehova. Swinya akalonda tutwalilile ukuwa mu lupwa lwakwe. Nga tukwelenganya pe vino tungawomelezya awanawitu na wankazi, swinya tukuwomba umulimo witu, tuliwalola ukuti twacindama mwi wungwe lya kwe Yehova! Uzye vino tukalola wanji mwi wungwe vikalanjizya ukuti twawa wuli? Uzye vikalanjizya ukuti twawakunda nu kuwacindika? Mu cipandwa cino cikonsilepo, tulisambilila pe co-o icisinka icicindame sana.
ULWIMBO 24 Iseni ku Lupili lwa kwa Yehova
^ par. 5 Swensinyene tukalonda ukuwayivwa ukuti twacitandama kwe Yehova. Lelo manda yamwi tukasakamala nga cakuti twacindama kwe weliwe. Co-o icipande candi citwavwe ukulola ukuti cila muntu wawa amucindame mwi wungwe.
^ par. 3 UKULONDOLOLA AMAZWI: Izwi lyakuti umulimo wuno tukawomba mwi wungwe likasula kwe vino tungacita pa kuwomya iwungwe. Umulimo wuno tungawomba mwi wungwe wutasintilila pa ndalama zino twakwata, pa lupwa luno twakwatilwamo, inkanda nanti umutundu.
^ par. 62 UKULONDOLOLA IVIKOPE: Vyo-o ivikope vitatu vikulanjizya vino vikacitika pano tutani tutalike ukulongana, pano tukulongana, na pano ukulongana kwasila. Icikope 1: E eluda akulamukana nu mweni, umwawitu alemile ivivwanjilo, ne nkazi wacitici akulanda ne nkazi umukote. Icikope 2: Awacitici na wasongo watumpuzile amakasa pi sambililo lya Ulupungu lwa kwe Malonda. Icikope 3: Awatwalane wa kuzifyako mu Ng’anda ya Wufumu. E nkazi akusambilizya umwana wakwe umwakusumbila umusangulo. Umwanawitu uwacitici akuzifya kuno wakasunjila amabuuku, ne winji akuwomelezya e nkazi wacisongo.
