Mwe co-o icipande twasambilizile pa mulandu uwucindame wuno watukuma swensinye ukuwikako na wangeli. Na wo-o umulandu, akulenga izina lya kwe Yehova ukucindikwa. Icisinka cakuti imitecele ya kwe Yehova ayino yazipa pa mitecele yonsinye, calemenkana nkaninye nu kulenga izina lyakwe ukucindikwa. Cawa ngati awulyanye vino umuntu wino wawa ni cisinka akacita. Umuntu wa musango wo-o, akalenga ni zina lya kwe Yehova nye ukucindikwa.

Amulandu ci wuno tukulandila sana pa kucindikwa kwi zina lya kwe Yehova? Lekani tulande pa milandu yitatu yino yilenzile.

Icakutalicila, e Satana wakwelenguzile izina lya kwe Yehova mu Edeni. Iwuzyo lino wakolowozizye Eva lyalanjizizye ukuti e Yehova awacami nu kuti vino wawanenile ukukonka vyalinji aviwome. Wo-o vino Satana walanzile ivipusaneko na vino Yehova wawanenile, calinji ngati akumunena ukuti awawufi. Wonye avino ni zina lya kwe Yehova lyakwelengusile. Acino e Satana wizile awa ‘Weciwa’ cino casula mukuti e ‘kakwelengula.’ (Yoha. 8:44) Nomba pa mulandu wakuti e Eva wasuwizile uwufi wa kwe Satana, wakanile ukutwalilila ukuwa ni civwila. (Inta. 3:1-6) Ukufika na peyonye impindi, e Satana watwalilila ukukwelengula izina lya kwe Yehova. Swinya wano wakakonka uwufi wakwe ilivule wakaleka ukuwa ni civwila kwe Yehova. Cikawipa nkaninye nga cakuti umwina Klistu awino atakucindika izina lya kwe Yehova. Amuno wonye awuli umulandu wuno munsi mwawela ukuyimba nu wuwipe wonsinye.

Icaciti wili, e Yehova akavwambisya ukucindamika izina lyakwe nu kufumyapo umukwelengula pa kuti ivintu vizipile ivyelewulwa vyonsinye, maka maka awantu na wangeli. Swinya conye acili icicindamisye cino Yehova akalonda ukucita. Awuli umulandu wuno umweneco walandila ukuti: ‘Ndilanjizya . . . uwukulu wizina lyane palwenze.’ (Ezek. 36:23) Swinya e Yesu atapisile na mumbali ukulanda pa cintu icicindame cino wakapepa wa kwe Yehova wazipizile ukuwika mu mapepo yawo, pano watili: “Izina lyako itele licindikwe.” (Mat. 6:9) Cinji acakuti, e Baibolo yanyocezyapo imiku imivule ukulanda pa kucindamika izina lya kwe Yehova. Lekani tulande pa mawaliko yamwi yano yalandapo. Yakati: “Panji Imfumu e Leza uwukankala wizina lyakwe.” (1 Imila. 16:29; Amalu. 96:8) “Yimbilanji uwukankala wizina lyakwe.” (Amalu. 66:2) “Ndange nkawizya uwukulu wizina lyako penye.” (Amalu. 86:12) Impindi yimwi e Yehova wayilandizile umweneco ukufuma kwi yulu pi tempele mu Yerusalemu pano e Yesu watili: “Tata, leka izina lyako lichindamikwe.” E Yehova nawe wasusile ukuti: “Nachindamika izina lyane, swinyanye ndilichindamika.”​—Yoha. 12:28. a

Icaciti tatu acakuti, akulonda kwa kwe Yehova ukwa kuti izina lyakwe ilitele litwalilile ukucindikwa umuyayaya. Lekani nomba tulande pe vino vilicitika kwi zina lya kwe Yehova pa nsizi ya myaka 1,000 iya kuteka kwa kwe Yesu. Uzye awangeli na  wantu wano walitwalilila ni cisinka waliyivwa wuli pa mulandu nu kucindikwa kwi zina lya kwe Yehova pe yoyo impindi? Pa kwasuka lyo-o iwuzyo lekani tulandeko pa vintu viwili, akuli ukuti imitecele ya kwe Yehova nga na wucisinka wa wantu. Uzye awantu wano walitwalilila ukuwa ni cisinka, waliwapita mu ntazi pa mulandu na wucisinka wawo? Wataliwapitapo mu ntazi, amuno walipwililika swinya lyo wasipicizya amelezyo yonsinye. Cinji acakuti waliwa nu wumi wamuyayaya. Asa vyo-o vitupu, kutaliwa nu kuvwambisya ukulenga awantu wamanye ukuti imitecele ya kwe Yehova ayili iyizima. Amuno wonsinye mwi yulu na munsi walilemenkana, swinya waliwatekwa ne Yehova. Uzye na pe yoyo impindi umulandu uwukulu wuliwa awakulenga izina lya kwe Yehova ukucindikwa?

Awantu wonsinye walimanya icisinka pe Yehova swinya umukwelengula wulifumapo pi zina lyakwe. Lelo umulandu uwukulu uwakulenga izina ukucindikwa, wulitwalilila ukuwa awucindame ku wantu wa kwe Yehova mwi yulu na munsi. Amulandu ci? Amuno waliwalola kuno Yehova akucita ivintu ivizima ivya kuzungusya. Swinya pa mulandu wakuti e Yesu alinyocezya uwufumu kwe Yisi, e Leza aliwa “we vyonsi mwakwe wonsi.” (1 Kor. 15:28) Pa nsizi ya kwe co-o, awantu wonsinye munsi waliwayitopwa ‘uwukankala nu wanangwa wawana wakwe Leza.’ (Roma. 8:21) Apano e Yehova alificilisya ukulonda kwakwe ukwakuleta ponga ivyelewulwa vyakwe vyonsinye ivya munsi na mwi yulu ukuwa alupwa longa.​—Efes. 1:10.

Uzye ulupwa lwa kwe Yehova luliyivwa wuli nga cakuti vyonsinye vyo-o vino twalandapo vyacitika? Ukwasowa nu kuvwilika tulitwalilila ukuvwambisya ukulumbanya izina lya kwe Yehova. E kalemba wi Lumbo e Davidi walemvile ukuti: “Tumvyani Imfumu e Leza . . . Tumvyani izina lyakwe ilyawukankala.” (Amalu. 72:18, 19) Kuliwa ivintu na vinji ni milandu imilekane lekane yino yililenga tutwalilile ukulumbanya Yehova umuyayaya.

Izina lyakuti Yehova likakwimililako vyonsinye vino akacita. Ni cikulu nkani acakuti likatwizusyako pa lukundo luno wawa nalo. (1 Yoh. 4:8) Tuliwakwizuka lyonsinye ukuti ulukundo luno wakwata aluno lwalenzile ukuti atwelewule, atupe Inzuwi ya kutuluwula swinya aluno lwalenga ni mitecele yakwe ukuwa ayilungamane. Citalipelela vye pa-a, lelo alitwalilila ukutulanjizya ulukundo. Cinji acakuti tulitwalilila ukupalamila ku mukwasi witu nu kulumbanya izina lyakwe umuyayaya.​—Amalu. 73:28.