1. Amulandu ci wuno twakundila awantu wano watekanya?

 SWENSINYE twakunda awantu wano watekanya. Amulandu ci? Amuno wasifulwa zuwa pano wakulindilila cimwi. Swinya awantu wamusango wo-o wakacindikwa sana. Cinji acakuti tukakwivwa icete nkaninye nga cakuti watutekanizizya pano twaluvyanya. Asa vyo-o vitupu, tukakwivwa icete nga cakuti wano wakutusambilizya Baibolo wakututekanizizya pano catutamya ukwivwicisya, ukuzumila nu kukonka vino tukusambilila. Ni cicindamisye acakuti, tukasalifya nkaninye e Yehova pe vino akatutekanizizya.​—Roma. 2:4.

2. Ampindi ci pano cingatutalila ukuwa awatekanye?

² Nanti acakuti tukatemwa awantu awatekanye, nasweswenye asa welyonsi pano cikatupepucila ukucita wo-o. Ku cakulolelako, mpindi zimwi cingatutalila ukuteka umwezo nga cakuti pano tutantamizile pa cipatala ukuti tupoke umulembo nomba twalola ukuti wino akuwombelako akuwayawaya. Swinya mpindi zimwi tungafulwa nu kufulwa nga cakuti watulumisya umwezo. Ne mpindi zimwi cingatutalila ukutwalilila ukulindilila ukuti e Yehova ayize aficilisye vino watulaya. Uzye na mwemwe mungatemwa ukuwa awatekanye? Mwe co-o icipande twandi tusambilile muno ukutekanya kwasula nu mulandu wuno kwacindamila. Swinya twasambilila na pe vino vingatwavwa ukuwa awatekanye.

3. Uzye umuntu umutekanye akacita wuli nga wumwi wamulumisya umwezo?

³ Lekani tulande pa nzila 4 muno tungalanjizya ukuti twatekanya. Iyakutalicila, Umuntu wino watekanya asifulwa zuwa. Nga cakuti wamwi wamuluvyanya akakwelezya na maka ukuteka  umwezo nu kukana wanyocezyamo. Cinji acakuti asicitila wanji iviwipe pa mulandu vye na vino vimusakamisile. Umuku wakutalicila pano wawomvya amazwi ya kuti “asivitwa zuwa,” apano Baibolo yalondolola Yehova ukuti “Imfumu-nye e Leza awili Leza wino wizula ninkumbu nu wulanda, wino asivitwa zuwa.”​—Ukuf. 34:6

4. Uzye umuntu umutekanye akacita wuli nga cakuti pali vimwi vino akulindilila?

⁴ Icaciti wili, umuntu umutekanye akateka umwezo pano akulindilila. Nga cakuti cino tekulindilila cazimba ukucila na pe vino tekwenecela, akakwelezya na maka ukukana fulwa nanti ukukanapita ni cikonko. (Mat. 18:26, 27) Kwawa ivivule vino tuzipizile ukuteka umwezo pano tukulindilila. Ku cakulolelako, tutazipizile ukucilinganya pano wumwi akulanda, lelo twatekanya nu kuteyelezya. (Job 36:2) Swinya twatekanya pano tukwavwa umusambi ukwivwicisya vino Baibolo yikasambilizya nanti pano tukumwavwa ukuleka imiwele imiwipe.

5. Anzila ci na yinji yino tukalanjizizyamo ukuti twatekanya?

⁵ Icaciti tatu, umuntu umutekanye akakwelenganyapo pano atani acite cimwi. Kweni kwawa vimwi vino vikalondekwa ukuwombelwapo paponye. Umuntu wino watekanya nga akuwomba umulimo uwucindame, asisamalila vye mukutalika ukuwomba nanti ukuti amale zuwa. Lelo akapawulako impindi yakutantika vino wandi awombe. Cinji acakuti, akateka umwezo pano akuwomba wowo umulimo.

6. Avyani vino umuntu umutekanye akacita pano akupita mu ntazi?

⁶ Icaciti 4, umuntu umutekanye asiyilizyanya pano akusipicizya intazi. Izwi lya kuti ukutekanya lyalemenkana nkaninye ni zwi lya kuti ukusipicizya. Kweni citawipa ukunenako e ciwuza witu pa ntazi yino tukupitamo. Lelo nanti ciwe wo-o, umuntu umutekanye, akakwelezya na maka ukuwika amano pa vintu ivizima nu kutwalilila ukuwombela Yehova ni nsansa. (Kolo. 1:11) Swe wina Klistu tuzipizile ukuwa awatekanye mwe zyonsinye zyo-o inzila zino  twalandapo. Amulandu ci? Lekani tulande pa milandu yino ukutekanya kwacindamila.

7. Ukulingana ne Jemusi 5:7, 8, amulandu ci wuno ukutekanya kwacindamila? (Lolani ni cikope.)

⁷ Tuzipizile ukutekanya pa kuti twize tupusuke. Ndi wulyanye vino awawomvi wa kwe Yehova awa cisinka wano walinjiko kunsizi walinji awatekanye, avino nasweswenye tuzipizile ukulindilila ukuti e Yehova ayize aficilisye vino watulaya. (Hebe. 6:11, 12) E Baibolo yatukolanya ku mulimi. (Wazyani Jemusi 5:7, 8.) Umulimi akawombesya na maka ukulima nu kwitilizya ivizawalo vyakwe. Lelo pa mulandu wakuti asimanya icete cete pano umusanya wuliwala nanti pano imvula yilitonya, asimanya ni mpindi nye pano vilica. Acino akatekanya pano akulindilila nu kusuwila ukuti vilica alisombola. Nasweswenye avino cawa, tukawombesya mu mulimo wa kwe Yehova nanti acakuti ‘tutamanya impindi pano Imfumu yitu yiliyiza.’ (Mat. 24:42) Twatekanya pano tukulindilila ukuti e Yehova ayize aficilisye vino watulaya pa mpindi injanane. Amuno nga cakuti tutatekinye, tungatonta ukulindilila swinya ncepamwi tungayipawula na kwi wungwe. Cinji acakuti, tungawika vye amano ku vintu vino tukulola ukuti avino vingatuletela insansa. Lelo nga swe watekanye, tungatwalilila ukusipicizya swinya tungiza tupusuke.​—Mika 7:7; Mat. 24:13.

8. Uzye ukutekanya kukatwavwa wuli? (Wakolose 3:12, 13)

⁸ Ukutekanya kukatwavwa ukwivwana icete na wantu wanji swinya kukatwavwa ukuwikako amano pano wanji wakulanda. (Jemu. 1:19) Cinji acakuti, kukalenga tuwa nu mutende na wantu wanji nu kukana kalawuka ukucita nanti ukulanda iviwipe pano tucili tufuzilwe. Asa vyo-o vitupu, kukatwavwa nu kukana fulwa zuwa nga cakuti wumwi watulumisya umwezo. Acino mutanyocezya iciwipe paciwipe, lelo “yavwananji swinya tetelananji.”​—Wazyani Wakolose 3:12, 13.

9. Uzye ukutekanya kungatwavwa wuli pano tukulonda ukupingula pe vimwi? (Imilumbe 21:5)

⁹ Ukutekanya kungatwavwa ukupingula icete pa vintu. Nga cakuti twatekanya tutaliwapingula pa vintu ukwasowa ukwelenganyapo. Lelo tuliwavwambilizya nu kulola nga cakuti tungakumanisya ukucita vino twapingulapo. (Wazyani Imilumbe 21:5.) Ku cakulolelako, nga cakuti tukuvwamba incito, ncepamwi tungazumila ukutalika ukuwomba yino yaloleka zuwa, nanti acakuti yingalenga twapotwa ukuzanwa mu kulongana nu kuya mu mulimo wakuwizya. Lelo nga cakuti twatekanya, tuliyelenganya pa cifulo kuno tuliwawombela, pa maawala yano tuliwamala na pe vino yoyo incito yilikuma ulupwa na wuciwuza witu ne Yehova. Fwandi nga cakuti swe watekanye, tuliwapingula icete pa vintu.

10. Uzye tungatwalilila wuli ukuwa awatekanye?

¹⁰ Mwapepa ukuti mutwalilile ukuwa awatekanye. Ukutekanya kwawa pa vikomwa vya ku muzimu. (Gal. 5:22, 23) Fwandi tungalenga Yehova ukuti atwavwe nu muzimu wakwe uwutele ukuwa na co-o icikomwa. Swinya nga cakuti twapita mu ntazi yino yalenga cituwomele ukuwa awatekanye, tuzipizile ukutwalilila ‘ukulenga’ umuzimu wa kwe Leza ukutwavwa ukutekanya. (Luk. 11:9, 13) Cinji acakuti, tuzipizile ukumulenga ukuti awatwavwa ukulola ivintu ndi vino weni akavilola. Ne nga cakuti twapepa, twakwelezya cila wanda ukuwa awatekanye. Pano tukuya tukupepa nu kwelezya na maka ukuwa na co-o icikomwa, apano tuliwaya tukuwelako naco swinya cililimba mu myezo yitu.

11-12. Uzye e Yehova walanjizya wuli ukuti watekanya?

¹¹ Mwakwelenganya pa wantu wa mu Baibolo.  E Baibolo yalandapo pa wantu awavule wano walinji awatekanye. Fwandi nga tukwelenganya pe ya-a amalyasi, na sweswenye tungasambililako ivya kuwa awatekanye. Nomba pano tutani tulande pe vyo-o ivya kulolelako, lekani tutalicile ukulanda pe Yehova wino watekanya nkaninye ukulusya wonsinye.

¹² E Satana wasewinye izina lya kwe Yehova mu Edeni, ukupitila mukulenga e Eva atalike ukuvwilika nga cakuti e Yehova awamulinganya swinya nga cakuti we Kateka wa lukundo. Nomba e Yehova atononile e Satana papo napapo lelo watekinye swinya wayilamile. Amuno wamanyile ukuti palinji nu kupita impindi pa kuti awantu wamanye ukuti awili e Kateka muzima. Swinya ukufumilila palyanye ukufika na pe yo-o impindi akasipicizya umusewanya wuno wakaleta pi zina lyakwe. Cinji acakuti, watwalilila ukutekanya pa kuti awantu awavule wize wawe nu wumi wa muyayaya. (2 Pet. 3:9, 15) Na co-o calenga awantu awavule wamumanye. Nga cakuti tukuwika amano pa vizima vino vyawa mukutekanya kwa kwe Yehova, cilitupepucila ukutwalilila ukulindilila ukuti ayize afumyepo iviwipe pa Armagedoni.

13. Uzye e Yesu wakolanyanga wuli ukutekanya kwa kwe Yisi? (Lolani ni cikope.)

¹³ E Yesu walanjizizye ukuti wakolanyanga ukutekanya kwa kwe Yisi ukupitila mwe vino wacitanga pano walinji munsi. Citalinji acipepuke kwe Yesu ukuwa amutekanye maka maka kwa kalemba na wa Farise, wano wayilanjizyanga ngati awina Klistu nkaninye. (Yoha. 8:25-27) Lelo atafulwanga zuwa ndi wulyanye vino Yisi wawa. Ku cakulolelako, atawanyocezyangamo nga cakuti wamutuka nanti nga wamunena iviwipe pa kuti watalike ukupokota nawe. (1 Pet. 2:23) Swinya wasipicizyanga intazi ukwasowa ukuyilizyanyapo. Awuli umulandu wuno Baibolo yikatunenela ukuti  ‘twakwelenganya pe wino wacuzile pano awantu wawembu wamupasile.’ (Hebe. 12:2, 3) Nasweswenye nga cakuti Yehova watwavwa tungasipicizya intazi izili zyonsinye zino tungapitamo.

14. Tukusambililako cani kwe Abrahamu? (Waheberi 6:15) (Lolani ni cikope.)

¹⁴ Tungacita wuli nga cakuti twalindilila pa myaka imivule ukuti insilo ya kwe yo-o insi yize, lelo yitiza ukufika na nomba? Ncepamwi tungakwelenganya ukuti insilo ya kwe yo-o insi yiliyiza lyo twafwa kaali. Avyani vino vingamyavwa ukutwalilila ukutekanya pano mukulindilila? Lekani tulande pe vino calinji kwe Abrahamu. Pano abrahamu walinji ni myaka 75, lyo atani akwatepo nu mwana uwili wensinye, e Yehova wamulayile ukuti: “Ndileka uyize uwe we mwiko wukulu.” (Inta. 12:1-4) Uzye e Abrahamu waweniko pano wo-o uwusesemo waficiliswanga? Waweniko vye vitici, lelo ataweniko pano waficiliswanga wonsi. Amuno pano wizile alamba Uluzi lwa Yufureti walindilizile pa myaka 25 apano wiza wakwata umwana wenga e Isaki. Swinya patili papita imyaka 60 apano wizile awa na wizikulu wa mwana Isaki e Esau ne Yakobi. (Wazyani Waheberi 6:15.) Nomba asitela alolepo kuno uluko lwakwe lukukula na pano wakupyana Insi ya Wulayo. Lelo nanti ciwe wo-o, we-e umonsi wa cisinka watwalilizile ukuwa na wuciwuza uwuwome ne Yehova. (Jemu. 2:23) Swinya alila wazyulupuka, aliyivwa icete nkaninye ukumanya ukuti isuwilo lyakwe nu kutekanya vyalenzile awantu wonsinye munsi ukuzanamo ivizima. (Inta. 22:18) Avyani vino tukusambililako? Pe yo-o impindi ncepamwi tutanga tulole kuno Yehova akuficilisya vyonsinye vino watulaya. Lelo nga cakuti swe watekanye ngati we Abrahamu, tungasuwila ukuti e Yehova alitulambula  pe yo-o impindi nga na ku nkolelo Munsi mpya.​—Mar. 10:29, 30.

15. Amawuzyo ci yamwi yano tungayikolowozya pano tukuyisambilizya?

¹⁵ E Baibolo yalanda na pa wantu na wanji wano walinji awatekanye. (Jemu. 5:10) Cingazipa sana nga cakuti mwatalisile ukuyisambilizya na pe wa-a awantu. b Ku cakulolelako, nanti acakuti e David wamusonsile ukuwa amfumu ya wina Israeli lyo acili amutici, walindilizile pa myaka imivule pa kuti wamuwike pa cilimba ca wufumu. Swinya e Simoni ne Anna watwalilizile ukupepa Yehova ni cisinka pa myaka imivule pano walindililanga ukwiza kwa kwe Mesiya. (Luk. 2:25, 36-38) Pano mukuwazya amalyasi ya musango wo-o, mwakwelezya ukuvwamba ivyasuko ku mawuzyo ya-a. Acani cino cavwizye we-e umuntu ukutwalilila ukuwa amutekanye? Avizima ci vino wazanilemo? Ningamukolanya wuli? Cinji acakuti, na kwe walyanye wano watalinji awatekanye mungasambililako cimwi. (1 Sam. 13:8-14) Mungayikolowozya ukuti, ‘Acani cino cingalanga calenzile wa-a awantu wapotwe ukuwa awatekanye? Aviwipe ci vino vyawaciticizile pa mulandu nu kukana tekanya?’

16. Avizima ci vimwi vino vyawa mukutekanya?

¹⁶ Mwakwelenganya pa vizima vino vikafuma mukutekanya. Nga cakuti swe watekanye, tukawa ni nsansa nu kuteka umwezo. Swinya kukawa ukwelenganya icete nu kuwa nu wumi uwuzima. Uwuzima wunji awakuti, nga tukutekanizizya wanji kukawa ukwivwana icete. Asa vyo-o vitupu, na mwi wungwe mukawa sana ukulemenkana. Ne cinji nga tutakufulwa zuwa pano wamwi watuluvyanya, tutaliwalenga intazi ukukulilako. (Amalu. 37:8, Imilu. 14:29) Ni cicindamisye acakuti, nga swe watekanye, tuliwakolanya umukwasi witu uwa kwi yulu nu kupalamila sana kwe weliwe.

17. Acani cino swensinye tuzipizile ukutwalilila ukucita?

¹⁷ Ukutekanya kwacindama nkaninye, amuno swensinye tukazanamo ivizima. Kweni asa we lyonsi pano cikapepuka ukutekanya, lelo e Yehova nga watwavwa tungatwalilila ukuwa swe watekanye. Pano tukulindilila ukuti ayize alete insi mpya, tuzipizile ukusuwila ukuti, “Imfumu e Leza akalolecesya wano wakamutina, wano wakalindilila ulukundo lwakwe uluntasila.” [NWT] (Amalu. 33:18) Acino lekani swensinye tutwalilile ukuwa awatekanye.