1-2. Acani cino calenzile e Yehova atulete mu lupwa lwakwe, swinya wacisile wuli?

E YEHOVA watwita ukuti tuwe mu lupwa lwa wantu wano wakamupepa. Ala twawa nu longo ulukulu! Mwe lo-o ulupwa, mwawa awantu wano wayipa kwe Yehova, swinya wano wasuwila mu nzuwi ya Mwana wakwe. Twawa mu lupwa lwa nsansa. Tukayitopwa uwumi pe yo-o impindi, swinya twawa ni nsansa amuno twawa ni suwilo lyakwikala umuyayaya nampo nga akwi yulu nanti mu Paradaise mu nsi.

² Cino calenga ukuti e Yehova atulete mu lupwa lwakwe amuno watutemwa. Pa kucita wo-o wacisilepo icintu icicindame nkaninye. (Yoha. 3:16) Watukazile pa ‘mutengo uwukulu.’ (1 Kor. 6:20) E Yehova wawomvizye inzuwi ya Mwana wakwe pa kuti tuwe iviwuza vyakwe. Twasyuka nkaninye ukwita e Yehova, e Leza wino wakulisya nkaninye mu nsi na mwi yulu ukuti Tata. Swinya ukulingana na vino twasambilizile mu cipande cino cafumileko, kutawa Umukwasi uwili wensinye wino angalingana ne Yehova.

3. Amawuzyo ci yano tungawuzya? (Lolani na kambokosi kano ka kuti “ Uzye Yehova Wambikako Amano?”)

³ Na sweswenye tungayikolowozya ndi vino wino walemvile e Baibolo wayikolowozizye ukuti: ‘Acani cino nandi nyosezye e Yehova pa vizima vyonsinye vino wancitila?’ (Amalu. 116:12) Icasuko aca kuti kusi nanti cimwi cino tunganyosezya e Yehova. Lelo nanti ciwe wowo ukutemwa kwakwe kukalenga na sweswe twamutemwa. Umutumwa Yohani walemvile ukuti: “Tukatemwa, amuno awino watalicizilepo ukututemwa.” (1 Yoh. 4:19) Uzye tungacita  wuli pa kulanjizya ukuti twatemwa Umukwasi witu uwa kwi yulu?

4. Ukulingana ne Jemusi 4:8, amulandu ci wuno tuzipizile twawombesya ukuwa iviwuza vya kwe Yehova?

⁴ E Yehova akalonda tuwe iviwuza vyakwe swinya akalonda twalanzyanya nawe. (Wazyani Jemusi 4:8.) Akatunena ukuwa nu “mute wa kupepa,” swinya wayiteyanya nu kukutika ku mapepo yitu. (Roma. 12:12) Asitonta swinya wayiteyanya ukukutika impindi iyili yonsinye. Na swe, tukakutika kwe Yehova nga tukuwazya Izwi lyakwe, e Baibolo na mabuku yano yakatwavwa ukwivwicisya vino vyawa mu Baibolo. Swinya tukakutika kwe weliwe nga tukuwikako sana amano pano tukulongana. E Yehova akalonda twalanda nawe cila wanda pa kuti tuwe iviwuza vyakwe ngati awulyanye vino awana wakakwivwa icete nga wakulanda na wakwasi wawo.

5. Uzye tungacita wuli pa kuzifyako amapepo yitu?

⁵ Uzye amazwi yano mukalanda mu mapepo yinu, yakalanjizya ukuti wuciwuza winu ne Yehova wawa wuli? E Yehova akalonda twamunena vyonsinye vino tuli navyo ku mwezo. (Amalu. 62:8) Cingazipa sana ukuyiwuzya ukuti: Uzye nkapepa ukufuma pa nsi ya mwezo nanti nkapepa amapepo ya kuswatila vye? Ukwasowa nu kuvwilika mwatemwa sana e Yehova, swinya mukalonda ukutwalilila ukuwa iviwuza vyakwe. Pa kuti mutwalilile ukuwa iviwuza vyakwe, muzipizile ukutwalilila ukulanzyanya nawe cila wanda mwi pepo. Muwamunena ni vya nkama nye. Muwamunena vino vikamisakamika na vino vikalenga mwawa ni nsansa. Nga mwawa ni ntazi, muwamunena pa kuti awamyavwa.

6. Acani cino tuzipizile ukucita pa kuti tutwalilile ukuwa iviwuza vya kwe Yehova?

⁶ Pa kuti tutwalilile ukuwa iviwuza vya Mukwasi witu uwa kwi yulu, tuzipizile twalanjizya ukuti tukasalifya. Nanti asweswenye tungalanda wulyanye vino e kimbila wa malumbo walemvile ukuti: “Vino wacita avivule, We Yehova Leza wane, imilimo yako iyakuzungusya na melenganyo yako kwe sweswe yavula nkaninye. Kusi wino ungalingana nawe. Nga nalinji nu kulanda pe vyo-o ivintu vyavulisya ica kuti ntanga mvipende.” (Amalu. 40:5) Tusilanda vye ukuti tukasalifya, lelo vino tukacita na vino tukalanda avino vikalanjizya ukuti tukasalifya. Co-o cikalenga tupusaneko na wantu wa mu nsi. Twikala mu nsi muno mwawa awantu wano wasisalifya pe vino e Leza akatucitila. Icintu conga cino Baibolo yalandapo cino cikalanjizya ukuti tukwikala “mu manda ya kulecelezya,” aca kuti awantu wataliwasalifya. (2 Tim. 3:1, 2) Tutazipizile ukukolanya awantu wa musango wo-o.

7. Acani cino e Yehova akalonda twacita, swinya amulandu ci?

⁷ Awakwasi wonsinye wakalonda awana wawo wakwivwana nu kuwa iviwuza. Wonye wo-o, avino ne Yehova akalonda wano wakamupepa wacita. Swinya ukutemwana kuno twatemwana akuno kukalanjizya ukuti swe Wina Klistu wa cisinka. (Yoha. 13:35) Na sweswenye tukalanda wulyanye vino e kimbila wa malumbo walemvile ukuti: “Lolani! Ukwikala ponga mukwivwana na wanawitu kwazipa swinya kukaleta insansa nkaninye!” (Amalu. 133:1) Nga twakunda awanawitu na wankazi, lyo tukulanjizya ukuti twakunda e Yehova. (1 Yoh. 4:20) Ala tukakwivwa icete sana ukuwa mu lupwa lwa wanawitu na wankazi wano ‘wakalangulucilana swinya wano wawa nu luse’!​—Efes. 4:32.

8. Ukulingana ne 1 Yohani 5:3, acani cino cikalenga twakwivwila e Yehova?

⁸ E Yehova akalonda awana wakwivwila awakwasi wawo, swinya akalonda na sweswenye tuwamwivwila. (Efes. 6:1) Tuzipizile tuwamwivwila amuno awino watupanzile, swinya  akatusakamala. Wawa na mano ukucila umukwasi wensinye. Lelo cino cikalenga twamwivwila apa mulandu wa kuti twamutemwa. (Wazyani 1 Yohani 5:3) Kwawa imilandu imivule yino yikalenga twakwivwila e Yehova, lelo asitupaticizya ukuti twamwivwila. Watupa insambu zya kuyisolela ivya kucita. Acino nga twasolapo ukumwivwila pa mulandu wa kuti twamutemwa, akakwivwa icete sana.

9-10. Amulandu ci wuno cacindamila ukumanya amasundo ya kwe Leza nu kuyakonka?

⁹ Awakwasi wakalonda awana wawo ukucinjililwa. Awuli umulandu wuno wakapa awana wawo amasundo pa kuti yawacinjilila. Nga ca kuti awana wakutontela awakwasi, wakalanjizya ukuti wawasuwila nu kuwacindika. Fwandi cacindama nkaninye ukuti tumanye amasundo ya Mukwasi witu uwa kwi yulu nu kukonka vino akalanda. Nga tukucita wo-o, ivintu vikatuzipila swinya tukalanjizya ukuti twamutemwa nu kumucindika. (Ayize. 48:17, 18) Lelo wano wasikwivwila e Yehova wakayiletelela.​—Gal. 6:7, 8.

¹⁰ Nga tukucita ivya kusecelesya e Yehova, tukacinjililwa kwe vino vingatuletela intazi na vino vingonona wuciwuza witu ne Yehova. E Yehova wamanya vino vingatuzipila. E Aurora wino akakwikala ku United States, walanzile ukuti, “Nasinincizya ukuti nga tukwivwila e Yehova imikalile yitu yikazipilako.” Nakawuzyenye, co-o acisinka nkaninye. Avizima ci vino mwazana mukwivwila uwutunguluzi wa kwe Yehova?

11. Uzye ipepo likatwavwa wuli?

¹¹ Ipepo likatwavwa ukwivwila Yehova na  pano ivintu visyufile. Twamanya ukuti impindi zimwi cingatuwomela ukwivwila Yehova pa mulandu wa kuti swe wawembu. Lelo tuzipizile ukwelezya na maka ukwivwila vino akutunena. Acino calenzile e kimbila wa malumbo alenge kwe Leza ukuti: “Uleke imbe nu muzimu wa kutontela.” (Amalu. 51:12) E Denise wino akawomba wupainiya wa mpindi zyonsi walanzile ukuti, “Nga nalola ukuti cambomela ukwivwila e Yehova, nkapepa ukuti ampe amaka ya kucita icizima.” E Yehova akakwasuka amapepo ya musango wo-o.​—Luka 11:9-13.

12. Ukulingana na Waefeso 5:1, acani cino tuzipizile ukucita?

¹² Wazyani Waefeso 5:1. Pa mulandu wa kuti swe ‘wana wa kwe Leza wano wakunda,’ tuzipizile twawombesya pa kuti twamukolanya. Tukakolanya e Yehova nga ca kuti tukutemwa wanji nu kuwa ni cikuuku ku wantu. Swinya tufwile tuwayikundila nu kutetela wano wakutuluvyanya. Awantu wano watamanya e Leza nga walola imiwele yitu imizima wangasolapo ukutalika ukusambilila pe Yehova. (1 Pet. 2:12) Awakwasi Awina Klistu wazipizile wasunga awana wawo wulyanye vino e Yehova akasunga awantu wakwe. Nga ca kuti awakwasi wakukolanya e Yehova, awana na wonye wangawa iviwuza vya kwe Yehova.

13. Uzye acani cino tuzipizile ukucita nga tukulonda ukusipa?

¹³ Awana awatici wakakwivwa icete ukuwa na wakwasi wawo swinya wakakwivwa icete nu kulanda pa wakwasi wawo. Avino na sweswenye  tukakwivwa icete ukuwa nu Mukwasi witu uwa kwi yulu, e Yehova, swinya tukalonda na wanji ukuti wamumanye. Tukakwivwa wulyanye vino Imfumu Davidi yalemvile ukuti, ‘Mwe Yehova amuno nkayivwila.’ (Amalu. 34:2) Uzye tungacita wuli nga ca kuti tukakwivwa intete izya kulanda pe Yehova? Acani cino cingatwavwa ukusipa? Tungasipa nga ca kuti tukwelenganya pe vino Yehova akatemwa nga tukulanda pe weliwe na vino awantu wakawa ni nsansa nga ca kuti wamumanya. E Yehova alitwavwa ukusipa. Wavwizye Awina Klistu wa kutacilipo, na sweswenye alitwavwa.​—1 Tes. 2:2.

14. Amilandu ci yimwi yino cacindamila ukuwombako umulimo wa kupanga awasambi?

¹⁴ Pa mulandu wa kuti e Yehova atawa na kapatulula, akakwivwa icete nga walola ukuti tukulanjizya ukutemwa kwe wanji asa mulandu na vino wawa na kuno wafuma. (Imili. 10:34, 35) Inzila yonga yino tungalanjizizyamo ukuti twatemwa wanji, akuwanenako ilyasi lizima. (Mat. 28:19, 20) Avyani vino vilifumamo kwe wano wakakwivwa pano tukuwawizizya? Imikaliile yawo yikazipilako, swinya waliwa nu wumi wa muyayaya mu Paradaise.​—1 Tim. 4:16.

15-16. Avyani vino vingalenga twawa ni nsansa?

¹⁵ E Yehova akalonda awawomvi wakwe wawa ni nsansa, amuno Amukwasi wa kutemwa. (Ayize. 65:14) Kwawa ivivule vino vingalenga tutwalilile ukuwa ni nsansa na pano tukupita mu ntazi. Ku ca kulolelako, twamanya ukuti Umukwasi witu uwa kwi yulu watukunda nkaninye. Twamanya ni cisinka cino cawa mwi Zwi lyakwe, e Baibolo. (Jere. 15:16) Twawa na mu lupwa lwa wantu wano wakundana, nu kukunda e Yehova na masundo yakwe.​—Amalu. 106:4, 5.

¹⁶ Tufwile ukutwalilila ukuwa ni nsansa amuno twasuwila ukuti e Yehova alizifya ivintu ku nkolelo. Nombanye wandi afumyepo iviwipe vyonsinye, swinya Uwufumu wakwe wulilenga insi yonsinye ukuwa Paradaise. Awafwe wonsinye walizyulupuka swinya tuliwakwikala nawo. (Yoha. 5:28, 29) Tulitemwa nkaninye ukulola kuno vyo-o vikucitika! Ni cicindame sana aca kuti, ivyelewulwa vyonsinye mu nsi na mwi yulu viliwacindika e Yehova, umukwasi witu uwa kwi yulu nu kumupepa ukulingana na vino akalonda.