MU MPINDI zya mu Baibolo, e siwinga nanti ulupwa lwakwe, awano walipilanga impango ku lupwa lwa canaci nga cakuti indupwa zyonsinye zyowili zyazumilizyako. Pamwi pe vino walipilanga pawanga ivintu vya mutengo, inyama nanti indalama. Ne mpindi zimwi walipilanga impango ukupitila mukuwomba imilimo yimwi, ndi vino Yakobi wacisile pano wazumizile ukuwombela e yisivyala pa myaka 7 pakuti atwale e Rakele. (Inta. 29:17, 18, 20) Amulandu ci wuno walipililanga impango?

E Carol Meyers wino wasambilila sana ivya mu Baibolo watili: “Cimwi cino cifwile calenganga walipila impango ku lupwa lwa canaci apa mulandu nukuwasendela umwana wawo wino wawavwanga ukuwomba imilimo yimwi, icintu cimwi cino cacindime sana maka maka mu ndupwa zye wano [walimanga].” Impango zifwile zyalemenkanyanga indupwa ziwili, ulwa ku consi nu lwa ku canaci. Co-o calenganga zyakwavwana mu ntazi. Cinji acakuti, impango zyalanjizyanga apatiswenye ukuti umukazyana wimalwa swinya umulume awino alitalika ukumusakamala nu kumucinjilila nga watwalwa, ase yisi.

Ukulipila impango kutasulanga mukuti umwanaci aciya cakukazya nanti ukukala. Ibuku lyakuti Ancient Israel—Its Life and Institutions likati: “Wo-o vino walipilanga indalama nanti ivintu vinji ku lupwa lwa canaci vino vingalingana ni mpango, cingaloleka ngati awina Israeli walolanga itwala ngati awukazi. Lelo cikaloleka ukuti [impango zino walipilanga] wazilolanga ukuti andalama zino walipilanga ku lupwa lwa canaci, asa mutengo wamwanaci.”

Munsi zimwi, wacili wakakonka lo-o ulutambi ulwakulipila impango. Fwandi pano awakwasi awina Kristu wakupingula icuuma wasipingula ukucila mu cipimo lelo wakapingula vye iciyane. (Flpi. 4:5; 1 Kor. 10:32, 33) Nga wacita wo-o lyo wakulanjizya ukuti “watakundisya indalama,” nanti ukuvwambisya ukuwa ni vintu ivivule. (2 Tim. 3:2) Cinji acakuti, nga cakuti awakwasi awina Klistu watapinguzile nkani icuuma, lyo nu mukwalima nye cilimupepucila ukumala zuwa nukutwala umwana wawo. Swinya umonsi nga we painiya ataliwakwelenganya pa kuleka wupainiya pakuti awasumba impindi inkulu ku ncito yino yingalenga azane indalama zyakupilila impango.

Munsi zimwi, isundo lya wuteko alino likapima umutengo wa mpango zino wumwi afwile ukulipila. Munsi muno cawa wo-o awakwasi awina Kristu wakakonka ya-a amasundo. Amulandu ci? Amuno Izwi lya kwe Leza likati awina Kristu wazipizile “ukutontela wakateka wansi” nu kutontela amasundo ya wuteko cikuluvye nga yatapusine na masundo ya kwe Leza.—Roma. 13:1; Imili. 5:29.