MU MASUNDO ya kwe Musa, e Yehova wazumilizizye ukuti awina Israeli wangapa inkunda nanti intozi ukuwa anzuwi. Intozi ni nkunda wakavilumbulila ponga ukuti wapanga inzuwi kwe Yehova. Swinya amasundo yazumilizizye umuntu ukupa intozi nanti inkunda, ukulingana vye na cino akweti. (Lev. 1:14; 12:8; 14:30) Amulandu ci wuno amasundo yazumilizizizye? Umulandu wonga awakuti, asa we lyonsi pano intozi zyawangako. Amulandu ci wuno zitawelangako?

Intozi zikazanwa sana mu Israeli papo pano kukalangula nkani. Cila mwaka ukutalika mu Otober zikacintila ku nsi indungule, nukunyoka mu Israeli ukutalika mu myezi ya mu ma March. (Ulwim. 2:11, 12; Jere. 8:7) Fwandi nga cafika icisiku, citapepukanga ku wina Israeli ukupa intozi ukuwa anzuwi amuno lyo zitani ziwele.

Nomba inkunda zyeni zisicinta. Fwandi zyawangako umwaka wonsinye mu Israeli. Cinji ca kuti watekanga inkunda. (Linganyaniko ne Yohani 2:14, 16.) Ibuku lya kuti Bible Plants and Animals, likati “wonsinye wano wikalanga mu twaya na mu misumba yamu Palestine watesile inkunda. Cila ng’anda pawanga icitele ca nkunda nanti icipongolo umwaku zyakwikala.”—Linganyaniko Ayizeya 60:8.

Wo-o vino e Yehova wazumilizizye awina Israeli ukupa icinyunyi conga pa nkunda nanti intozi, calanjizyanga ulukundo luno wakwata na vino akalangulucilako awantu.