1. Avyani vino e Yesu wanenile awasambilizi wakwe pa manda yakulecelezya?

 PANO kwasyazilevye amanda yatici ukuti e Yesu afwe, awasambilizi wakwe 4 wamukolowozizye ukuti: ‘Acani cino ciliwa acimanyilo . . . cansilo ya mpindinye yoo?’ (Mat. 24:3) Wa-a awasambi wafwile wakolowozizye wo-o pakuti wamanye vino vyalinji nukuwalanjizya ukuti e Yerusalemu ni tempile vyalinji nukononwa. Acino e Yesu pakuwasuka atalanzilevye pakononwa kwa musumba wa Yerusalemu ni tempile, lelo walanzile na pa “nsilo ya mpindinye yoo” yino tukwikalamo. Watili: “Ukuwa kweni, pasi nanti wenga wino wamanya ukwiza kwawanda wowonye nanti ampindinye-nanti awangelinye awamwiyulu, nanti a Mwananye; nkandi Umukwasi wenganye-nsu awino wamanya.” Wasosile na wasambilizi wakwe ukuti “mucenjele” swinya ‘lolanji.’​—Mar. 13:32-37.

2. Amulandu ci wuno cawezile acicindame ku wina Kristu wakutalicila ukutwalilila ukuwa awalole?

² Awina Klistu wano wikalanga mu Yudea wazipizile ukutwalilila ukuwa awalole pakuti wapusuke. E Yesu wanenile awasambilizi wakwe vino walinji nukumanyilako ukuti imitecele ya waYuda yalinji nu kunonwa. Walanzile ukuti: “Ndimwiza mwalola e Yerusalemu waliwilizwa nimisika nanti awasilika, paponye apano mwize mumanye muti ukulowa kwakwe Yerusalemu kwapalamila.” Peyoyo impindi pano Yesu wawanenile wo-o, wazipizile ukwivwila ‘nukusamalila mu myamba.’ (Luk. 21:20, 21) Wano wivwizile wapususile pano awina Roma wononile umusumba wa Yerusalemu.

3. Avyani vino twandi tusambilile mwe co-o icipande?

³ Peyo-o impindi tukwikala mu manda yakulecelezya aya kwe yo-o insi imbipe. Acino swensinye tuzipizile ukuwa awacenjele mwe vino tukacita nukutwalilila ukuwa awalole. Mwe co-o icipande twandi tusambilile pevino tungatwalilila ukuwa awawome  mu vya kwe Leza nukutwalilila ukuwa awalole pano tukulola vino vikucitika munsi. Twasambilila na vino tungatwalilila ukuwa awacenjele mwe vino tukucita nu kuwomvya icete impindi yitu.

4. Amulandu ci wuno tuzipizile ukuwicila amano kukulola vino ivya munsi vikuficilisya amasesemo ya mu Baibolo?

⁴ Kwawa imilandu imicindame yino yikalenga twalola vino amasesemo ya mu Baibolo yakuficiliswa. Tukacita wo-o, ukupitila mukulola vino vikucitika mu nsi. Ku cakulolelako, e Yesu watunenile vino vilicitika pakutwavwa ukumanya ukuti insilo ya kwe yo-o insi imbipe yipalamizile. (Mat. 24:3-14) Umutumwa Peter nawe watuwomelezizye ukuwika amano kwe vino amasesemo yakuficiliswa pakuti isuwilo litu litwalilile ukuwomelako. (2 Pet. 1:19-21) Ne Ibuku lyakulecelezyako ilya mu Baibolo lyatalicila na mazwi yakuti: ‘E kalata wee wawalikwa mwenemo ivintu vino Yesu Klistu wawumbuzile. Ivintunye vyoo we Leza wamupile, ukuti alanjizye awantu wakwe Leza vino vyandi vize vipone nanti kuzimba.’ (Ukuwu. 1:1) Fwandi tukawikako sana amano kwe vino vikacitika munsi nukulola vino vikuficilisya amasesemo ya mu Baibolo. Swinya tungavwambisya nu kunenako wanji pe vino vikucitika.

5. Avyani vino tuzipizile ukucita swinya avyani vino tutazipizile ukucita? (Lolani ni vikope.)

⁵ Pano tukulanzyanya pa masesemo ya mu Baibolo, tutazipizile ukuwatunganyavye pe vino vyandi vicitike. Amulandu? Amuno tusilonda ukulanda icili consinye cino cingalenga mwiwungwe muwe ukupawunkana. Ku cakulolelako, ncepamwi tungivwa kuno intunguluzi zya munsi wakulanda pevino wandi wacite pakumala intazi yimwi na pakuleta umutende nukucinjililwa. Ukucila ukutunganyavye ukuti vino wakulanda vikuficilisya uwusesemo wuno wawa pe 1 Watesalonika 5:3, tuzipizile ukuwika amano ku vyewo ivipya vino iwungwe lya kwe Yehova litupekanizizye. Nga cakuti tukulanzyanya pe vyo-o ivyewo, tuliwalenga iwungwe ukutwalilila ukulemenkana ‘namelenganyo ayali yonga.’​—1 Kor. 1:10; 4:6.

6. Avyani vino tukusambililako kwe 2 Peter 3:11-13?

⁶ Wazyani 2 Peter 3:11-13. Umutumwa Peter watwavwizye ukumanya umulandu wuno tuzipizile ukuwicila amano ku masesemo ya mu Baibolo. Watuwomelezizye ukuti “mwalola swinya mwalondesya nkaninye ukwiza kwa wanda wakwe Leza.” Amulandu ci? Amuno tusilonda ukumanyavye ‘uwanda nimpindi’ pano e Yehova alileta e Amagedoni, lelo tukalonda ukuwomvya impindi yino tusyazile nayo kukucita ‘ivilungamane nukuyipa kwe Leza.’ (Mat. 24:36; Luk. 12:40) Ne mu mazwi yanji tungati, tukalonda ukutwalilila ukuwa ni miwele imizima nukusinincizya ukuti tukuwombela e Yehova ukufika pano papelezile amaka yitu pamulandu wakuti twamukunda. Nomba pakuti tucite wo-o, tuzipizile ukucenjela.

7. Uzye tukalanjizya wuli ukuti swe wacenjele? (Luka 21:34)

⁷ E Yesu wanenile awasambilizi wakwe ukuti wazipizile ukucenjela asa kuwikavye amano kwe vino vikucitika munsi. Co-o icisinka calondololwa icete sana pakusoka kuno kwawa pe Luka 21:34. (Wazyani.) Pa-a e Yesu walanzile ukuti: “Cenjelani.” Umuntu umucenjele mwe vino akucita, akamanya amasanso yonsinye yano yangonona wuciwuza wakwe ne Yehova swinya akayataluka. Na co-o cikalenga e Yehova atwalilila ukumukunda.​—Imilu. 22:3; Yud. 20, 21.

8. Avyani vino umutumwa Paulo wanenile awina Klistu wonsinye?

 ⁸ Umutumwa Paulo wanenile awina Klistu ukuti wazipizile ukuwa awacenjele mwe vino wakucita. Ku cakulolelako, wanenile awina Klistu wa mu Efeso ukuti: “Achaleka muwalolechesya ichetechete muno mukupitila. Mutize muwawa wakwe wano wasi namano, ukuwa nkandi awamano.” (Efes. 5:15, 16) E Satana akakwelezya na maka ukonona wuciwuza witu ne Yehova, acino e Baibolo yikatusoka ukuti “vwambanji muno ukulonda kwa Mfumu [e Leza] kwawela,” pakuti tucimvye amelezyo yonsinye yano Satana akatuletela.​—Efes. 5:17.

9. Tungamanya wuli ukulonda kwakwe Leza?

⁹ E Baibolo yisitulondololela vyonsinye vino vingonona wuciwuza witu ne Yehova. Ilivule tuzipizile ukupingulapo pa vintu vino Amawaliko yatalandapo namukulungatika. Acino pakuti tupingule icete pa vintu tuzipizile ukumanya, nukuvwamba, ‘ukulonda kwakwe Leza.’ Tungacita wo-o, ukupitila mukuwazya Baibolo lyonsinye nukwelenganyapo. Pano tukuya tukwivwicisya ukulonda kwakwe Leza swinya tukwelezya na maka ukuwa “namano ya Mfumu [Klistu]” apano tuliwaya tukupita ngati awantu “wamano,” nanti acakuti tutakweti amasundo yamukulungatika yano yakututungulula. (1 Kor. 2:14-16) Mpindi zimwi cikapepuka ukumanya ivintu vino tuzipizile ukutalukako, lelo mpindi zimwi cisipepuka.

10. Avintu ci vimwi vino tuzipizile ukutalukako?

¹⁰ Pa vintu vimwi vino tuzipizile ukutalukako pawa, ukusenga-senga, ukukolwa, ukufunuka, ukulanda iviwipe ivyakulumisya wanji imyezo, ukutamba ivyamisiku ni ivyawunkalwe, apano nivintu vye vinji ivikolaneko. (Amalu. 101:3) Umulwani witu e Ciwa akakwelezya na maka ukuvwamba inzila zino angononelamo wuciwuza witu ne Yehova. (1 Pet. 5:8) Nga tutacenjezile, e Satana angalenga mu melenganyo na mumyezo yitu, twakwivwila wanji akaso, ukukanawa ni cisinka, ukuvwambisya ukuwa ni vivule, ulupato, icilumba, nukupita nicikonko. (Gal. 5:19-21) Pakutalika mungakwelenganya ukuti yo-o imiwele asayiwipe na nkani. Lelo nga tutayilesile paponye pano twalola ukuti tuli nayo, yingatwalilila ukukula ngati acimuti ce poyizoni nukuleta intazi.​—Jemu. 1:14, 15.

11. Acintu ci conga cino tungatalukako, swinya amulandu ci?

¹¹ Acani cimwi cino cingalanjizya ukuti tukwizya nawamiwele miwipe? Lekani tulandeko pe co-o icakulolelako. Tuti mukawomba na wumwi wino asa Nte ya kwe Yehova. Nomba mukulonda weyo umuntu awakwelenganya ivizima pa Nte zya kwe Yehova. Acino mwasolapo ukuwa nicikuku nukumwavwa swinya mpindi zimwi mukulila nacaponga ivyakulya vyamusanya. Ukwasowa nukusumba impindi, mwatalika ukulya nawe lyonsinye. Pamuku wakutalicila pano weyo umuntu walanda iviwipe, mutavitemilwe. Nomba kuzimba kuzimba, mwawelela ukuteyelezya ku viwipe swinya mutakwivwa nuwuwi pano akulanda. Wanda wumwi wamita ukuti mukamwele caponga ivyakumwa pa nsizi yakuwomba, namwe asa mwewakani, mwazumila. Icakuti mukulecelezya, namwenye mwatalika ukwelenganya ndi vino weyo umuntu. Uzye vwilani mukwelenganya pano cafika pa-a, awutali wa mpindi wuli yino yingapitapo pakuti namwe mutalike ukucita ivintu ndivino weyo umuntu? Kweni tukalonda ukuwa awacikuku nu mucinzi ku wantu wonsinye, lelo tuzipizile ukwizuka ukuti, tungawa nimiwele yino wano tukusumba nawo impindi inkulu wawa nayo. (1 Kor. 15:33) Nga tuli swe wacenjele ngati avino e Yesu watuwomelezizye ukucita, tutaliwazanwa na wantu awamiwele imiwipe wano wasikonka amasundo ya kwe Yehova. (2 Kor. 6:15) Tuliwalola uwusanso nukuwutaluka.

12. Avyani vino awasambilizi wa kwe Yesu wazipizile ukucita pano wakulindilila ukononwa kwa musumba wa Yerusalemu ni tempile?

¹² E Yesu walondanga awasambilizi wakwe wawe ni vyakucita ivivule pano wakulindilila insilo ya kwe yo-o insi. Acino wawapile umulimo wakuwomba. Wa wanenile ukuwawizya ilyasi lizima “mwe Yerusalemu na mwe Yudeya monsi na mwe Samariya ukufika nakuno insi yapakula.” (Imili. 1:6-8) Wo-o walinji amulimo uwukulu nkaninye wuno e Yesu wawapile. Wawomvyanga icete impindi yawo ukupitila mukuwombesya mwe wo-o umulimo.

13. Amulandu ci wuno tuzipizile ukuwomvezya icete impindi yitu? (Wakolose 4:5)

¹³ Wazyani Wakolose 4:5. Pakuti tuwe swe wacenjele mwe vino tukucita, tuzipizile ukulola vino tukuwomvya impindi yitu. Amuno “umukosi nanti ivintu ivyasowa ukwenecela” vingaponela umuntu uwili wensinye. (Ekawi. 9:11) Swinya tungafwa ukwasowa nukwenecela.

14-15. Tungacita wuli pakuwomvya icete impindi yitu? (Waheberi 6:11, 12) (Lolani ni cikope.)

¹⁴ Tungawomvya icete impindi yitu ukupitila mukucita ukulonda kwa kwe Yehova nukuwomya wuciwuza witu na weliwe. (Yoha. 14:21) Tuzipizile ‘ukusimpisya, nanti kusyembuka,  tulandalile nukuwombesya mu mulimo wa Mfumu.’ (1 Kor. 15:58) Nga twacita wo-o pano tutani tufwe nanti pano tutani tufike kunsilo ya kwe yo-o insi imbipe, tutaliwalanguluka ukuti tutawombezile e Yehova ukufika pano papelezile amaka yitu.​—Mat. 24:13; Roma. 14:8.

¹⁵ Na peyonye impindi e Yesu watwalilila ukutungulula awasambi wakwe pano wakuwizya pa Wufumu wa kwe Leza insi yonsinye. Waficilisya vino watulayile. Akawomvya iwungwe lya kwe Yehova pakutusambilizya ivyakuwizya na pakutupa iviwombelo vino vikalondekwa pakutwalilila ukuwizya ilyasi lizima. (Mat. 28:18-20) Tukacita vino Yesu watunenile ukupitila mukuwizya nukusambilizyako wanji apano nukutwalilila ukuwa awalole pano tukulindilila ukuti e Yehova ayize ayonone yo-o insi imbipe. Ukupitila mukukonka ukusunda kuno kwawa pa Waheberi 6:11, 12, tulitwalilila ukulemasya kwi suwilo “ukwizafika nakunsilo.”​—Wazyani.

16. Acani cino tukuvwambisya ukucita?

¹⁶ E Yehova wasola kaali uwanda ni mpindi pano aliyonona insi ya kwe Satana. Nga cakuti wo-o uwanda wiza wafika, e Yehova alificilisya amasesemo yonsinye yano yawa mwi Zwi lyakwe, yano yakalanda pansi mpya. Nomba mpindi zimwi tungakwelenganya ukuti insilo ya kwe yo-o insi yikucelwa ukwiza. Lelo icisinka acakuti uwanda wakwe Yehova “wutalicelwa!” (Haba. 2:3) Acino lekani tutwalilile ‘ukulindilila Imfumu e Leza, twalindilila e Leza wino alitutula.’​—Mika 7:7.