Vino Wawacitizile Vyalenzile Walole Ukuti Wawakunda
E YOMARA na ndume zyakwe e Marcelo ne Hiver wakakwikala mukaya kano wakakwita ukuti Guatemala. E Yomara watalisile ukusambilila Baibolo ni Nte zya kwe Yehova, swinya mukupita kwa mpindi na ndume zyakwenye watalisile ukusambilila. Lelo palinji intazi pakucita wo-o. Amuno wonsinye watatu antonko swinya watamanyile ni vyakuwazya ivilembo vya ntonko. Acino wino wawasambilizyanga e Baibolo awino wa wawazizyanga amaparagrafu na mawaliko.
Cinji cino cawawomelanga, akuzanwa mukulongana. Watakumanisyanga ukupita wonga pa mamineti 40 ukuya ku Ng’anda ya Wufumu iyapafupi. Lelo awanawitu watantisile ukuti waya mukuwasenda amanda yonsinye ayakulongana. Swinya pano watalisile ukupa amalyasi ya mwisukulu pakulongana kwa mukasi ke sabata, awanawitu wawavwanga ukusunjila amalyasi.
Mu May 2019, ukulongana kwa piwungwe kwizile akutalika ukuwele mu kaya muno wikalanga. Peyoyo impindi lyo wapayiniya wa mpindi zyonsi awatwalane wacintila kwe kako akaya. Nanti acakuti wa-a awatwalane watamanyile ivyakulemba nukuwazya ivilembo vya ntonko, walondanga ukusambilizya wa-a awasambi ivyakulemba nukuwazya. Acino wayile ku laibulale nukusenda amabuku ya ntoko pakuti wamanye nukusambilizyako wanji ivyakuyawomvya.
E Marcelo akwasukapo pakulongana
Pa nsizi ya myezivye mitici e Yomara, e Marcelo, ne Hiver wizile awatalika ukuwazya ivilembo vya ntonko swinya na co cawavwizye ukuwa na wuciwuza uwuwome ne Yehova. Cinji acakuti, pe yo-o impindi awapayiniya wa mpindi zyonsi. Swinya e Marcelo amuwomvi wino akatumicila. E sabata wensinye wakawa awapamviwe mu mulimo wa kwe Yehova. Wakawombesya nkaninye na co-o cikalenga na wano wawa mupipi na woliwo wawombesya.
E Yomara, e Marcelo, ne Hiver wakasalifya nkaninye pe vino iwungwe likawatunjilila. E Yomara watili: “Ukufumilila pa muku wakutalicilanye pano twamanyine ni Nte zya kwe Yehova, watulanjizya ulukundo lya cisinka ulwa wina Klistu.” Ne Marcelo watili “Twawa niviwuza ivizima nkaninye mwiwungwe swinya twawa mulupwa lwa wanawitu na wankazi ukuzinguluka insi yonsinye wano walemenkana swinya wano wawa nulukundo.” E Yomara na ndume zyakwe, wakalondesya sana ukwiza mukulolako pano e Yehova alipilula insi ukuwa we Paradaise.—Amalu. 37:10, 11; Ayize. 35:5.
Mungakunda na vyoo
VINO IMISANGULO YINU IKAWOMBA
Amatoni Yano Yakapiliwula Amawumi
Tusifumyavye amabuuku mu vilembo vya ntonko lelo tukasambilizya na wantu ivya kuyawazya.
