Lelo nanti ciwe wo-o, e Yehova akakwenecela ukuti tutwalilile ukulindilila ukuficila pa mpindi yino umweneco watantika. Amulandu ci wuno akatwenecela ukuti twalindilila? Avyani vino vingatwavwa ukuwa ni nsansa pano tukulindilila?

AMULANDU CI WUNO AKATWENECELA UKUTI TWALINDILILA?

E Baibolo yikati: “Imfumu e Leza akulindilila ukuwalolela inkumbu. Ali nichilanda namwe nkaninye, amuno weni akachita ichete penye. Ichimwemwe chinu chikawa mukusuwila mu Mfumu e Leza.” (Ayize. 30:18) Ya-a amazwi, e Ayizeya wanenanga awaYuda wano walinji ni cilumba. (Ayize. 30:1) Lelo yavwizye nawa Yuda wano walinji ni cisinka ukuwa ni suwilo. Swinya yakakwavwa na wawomvi wa kwe Yehova awacisinka mwe ya-a amanda.

Tuzipizile ukutwalilila ukulindilila amuno ne Yehova nye watekanya pano akulindililila ukuti impindi yize yifike yino watantika ukuti ayino alifumizyapo iviwipe vyonsinye munsi. (Mat. 24:36) Pe yoyo impindi ciliyilanjizya apatiswenye ukuti vino e Satana akalanda pe Yehova na pa wantu Wakwe avya wufi. Swinya alinyepa e Satana nu konona wano wawa kuluwali lwakwe, lelo sweswe alitulanjizya “inkumbu.”

Pe yo-o impindi e Yehova asifumyapo intazi zino tukapitamo, lelo watunena ukuti tungawa ni nsansa pano tukulindilila. Ndi vino Ayizeya walanzile tungawa ni nsansa pano tukulindilila ukuti ivizima vicitike. (Ayize. 30:18) Tungacita wuli pa kuti twayivwa wo-o? Kwawa ivintu 4 vino vingatwavwa.

VINO VINGATWAVWA UKUWA NI NSANSA PANO TUKULINDILILA

Mwawika amano pa vizima. Pano Imfumu Davidi yacilinji nu wumi, yalolanga iviwipe vino vya citikanga. (Amalu. 37:35) Lelo yalemvile ukuti: “Uwalindilila chimyamya kwechino angachita . . . nant’ akusakamala wano wakawa ichete munzila zyawo imbipe.” (Amalu. 37:7) E Davidi wawomvyanga ya-a amazwi ukupitila mukuwika amano kwe vino Yehova wamulayile na pa vizima vyonsinye vino wamucitilanga. (Amalu. 40:5) Nasweswenye nga tukuwika amano pa vizima ukucila  ukuwika amano pa viwipe vino vikutuciticila mu wumi, ciliwatupepucila ukutwalilila ukulindilila pe Yehova.

Mwalumbanya Yehova lyonsinye. Pano Davidi walembanga Amalumbo icipandwa 71, walanzile pe Yehova ukuti: “Nalanga nkakusuwila wewenye; ndutilizye ukukutumvya nanti ukukulumbanya.” (Amalu. 71:14) Avyani vino Davidi walinji nu kuwacita pa kulumbanya Yehova? Walinji nu kuwanenako wanji pe Yehova nu kuwakwimbila indwimbo zya kumulumbanya. (Amalu. 71:​16, 23) Tungatwalilila ukusecelela ndi wulyanye vino calinji kwe Davidi. Amuno nasweswenye tukalumbanya e Yehova pano tukuwizya, po tukusimika na walupwa ni viwuza, na pano tukwimbila. Pano mukwimbila, mwawikako sana amano ku mazwi yano yalimo nu kulola vino yangalenga mwasecelela.

Mwawa ponga na wanawitu na wankazi pakuti wamiwomelezya. Pano Davidi wapitanga mu ntazi, wanenile e Yehova ukuti: “Ndiwawizya ivyawuzima wako piwumba lyawantu wako.” (Amalu. 52:9) Nasweswenye awanawitu na wankazi wangatuwomelezya. Wasicitavye wo-o pano tuli pakulongana na pano tuli mu mulimo wakuwizya, lelo wakatuwomelezya na pano tukwizizya caponga.—Roma. 1:​11, 12.

Mwawomya isuwilo linu. Pa Amalumbo 62:5 pakati: “Akwakwe Leza wenganye-nsu akuno neyamila; nawika isuwilo mwakwe weliwe.” Cicindime sana ukuwa ni suwilo iliwome, maka maka nga cakuti tukulola ukuti insi mbipe yitononilwe zuwa ukulingana na vino twenecelanga. Tuzipizile ukusuwila ukuti e Yehova alificilisya vino watulaya, asa mulandu nu wutali wa mpindi yino twalindilila. Tungawa ni suwilo iliwome ukupitila mukuyisambilizya Baibolo. Ku cakulolelako, mwakwelenganya pe vino amasesemo yamwi yaficiliswa na pe vino ivisinka vya mu Baibolo vikakwivwana, asa mulandu nu kuti vyalemvilwe na wantu awapusane pusane. (Amalu. 1:​2, 3) Swinya tuzipizile ‘ukupepela na pa maka ya Muzimu’ wutele ukuti yatwavwa ukutwalilila ukuwa na wuciwuza uwuzima ne Yehova pano tukulindilila ukuti ayize aficilisye uwulayo wakutupa uwumi wa muyayaya.—Yud. 20, 21.

Ndi wulyanye vino calinji kwe Davidi, mwasuwila ukuti e Yehova akalola swinya Akalanjizya ulukundo uluntasila kwe wano wakalindilila pe Weliwe. (Amalu. 33:​18, 22) Acino twalililani ukutekanya pano mukulindilila pe Yehova, ukupitila mukuwika amano pa vizima, ukumulumbanya, ukuwa ponga na wanawitu na wankazi pa kuti wamiwomelezya, nu kutwalilila ukuwomya isuwilo linu.