ICIPANDE CA KUSAMBILILAMO 4
ULWIMBO 30 Amukwasi Wane, We Leza Wane Swinya we Ciwuza
E Yehova Wawa ni Nkumbu
“Imfumu [e Yehova] awili wankumbu-nkumbu.”—JEMU. 5:11.
VINO TWANDI TUSAMBILILE
Twandi tulande pe vino ulukundo lwa kwe Yehova lungalenga twalola ukuti swe wacinjililwe, awasakamalwe swinya na vino lungatuteka umwezo.
1. Avyani vino mukakwelenganyapo nga mwivwa izwi lya kuti Yehova?
UZYE mukatela amwelenganyapo pe vino Yehova akaloleka? Nga mukupepa, mukamwelenganya ukuti akuloleka wuli? Nanti acakuti e Yehova asiloleka, e Baibolo yamulondolola mu nzila izivule. Ku cakulolelako, yikamwita ukuti we “musanya swinya we cisawu” [NWT] nu kuti “wemulilo wuno wukakocha.” (Amalu. 84:11; Hebe. 12:29) E Ezekiel walondolozile e Yehova mu cilolwa ukuti, wakolana ni liwe lino likulangalila, wawa ngati acela cino cikuzikimila cino wosile mu mulilo swinya wawa ngati amulala mfute. (Ezek. 1:26-28) Wo-o vino walondolola Yehova, mpindi zimwi vingatwivwisya intete nu kulenga twayilola ukuti tutayana ukuwa swe viwuza vyakwe.
2. Acani cino cingalenga wamwi walola ngati watanga wapalamile kwe Yehova?
2 Wo-o vino tutalolapo e Yehova, cingatuwomela ukusuwila ukuti watukunda. Ne wamwi wakalola ngati e Yehova atange awakunde pa mulandu ni viwipe vino vyawaciticizilepo mu wumi. Ku cakulolelako, ncepamwi wasitela wawepo nu mukwasi wa consi wino akatela awalanjizyapo ukuti wawakunda. E Yehova akamanya vino tukayivwa na vino vikalenga twalola ngati tutanga tupalamile kwe weliwe. Acino pakutwavwa ukumumanya icete cete, wayilondolola mwi Zwi lyakwe e Baibolo.
3. Amulandu ci wuno tuzipizile ukuwicila sana amano pa lukundo lwa kwe Yehova?
3 Ulukundo aluno lukalondolola icete sana vino Yehova wawa.(1 Yoh. 4:8) E Baibolo yikamwita ukuti, we lukundo. Swinya akacita ivintu vyonsinye pa mulandu nu lukundo. Ulukundo lwa kwe Yehova lwazipa nkaninye swinya lwawa na maka, icakuti akalulanjizya na kwe walyanye wano watamukunda. (Mat. 5:44, 45) Acino mwe co-o icipande, twandi tulande sana pe Yehova na pa lukundo lwakwe. Pano tukusambilila pe weliwe, apano twandi twaya tukumukundilako.
E YEHOVA WATUKUNDA NKANINYE
4. Uzye inkumbu zya kwe Yehova zikalenga mwayivwa wuli?(Lolani ni cikope.)
4 E Yehova “awili wankumbu-nkumbu.” (Jemu. 5:11) E Baibolo yamukolanya ku mukwasi wacanaci uwacikuku. (Ayize. 66:12, 13) Umukwasi wacanaci akasakamala icete nkaninye umwana wakwe. Swinya akamulela nu kumuvwanzya mwi zwi lya pansi swinya ilitepwe. Ne nga cakuti pali cino cikuluma nanti nga akulila, akasinincizya ukuti wamupa cino akulonda. Nasweswenye nga cakuti tusakamisilwe, tuzipizile ukumanya ukuti e Yehova wandi atwavwe pa mulandu wakuti watukunda. E kimbila wa malumbo walanzile ukuti: “Pano mpangamile nanti nsakamisilwe nkuluwaluwa, ukansansamusya uleka nsankana.”—Amalu. 94:19.
“Ndiwasansamusya ndi vino nyina-mwana akasansamusya umwanakwe” (Lolani paragrafu 4))
5. Avyani vino vikacitika pa mulandu nu lukundo luntasila luno Yehova wawa nalo?
5 E Yehova wawa nu lukundo luno lusisila. (Amalu. 103:8) Asilekapo ukutukunda nga cakuti twaluvyanya. Ku cakulolelako, uluko lwa wina Israeli lwapondocelanga e Yehova imiku ni miku. Lelo nga cakuti wamwi walapila, watwalililanga ukuwakunda. Wawanenanga ukuti: ‘wazipa nkaninye, wacindama swinya nakukunda.’ (Ayize. 43:4, 5) Na peyonye impindi, e Yehova atapiluka. Watukunda swinya tungeyamila pe weliwe. Nanti acakuti twacita uluwembu ulukulu, asitusya. Nga twalapila nu kunyocela kwe weliwe, tulilola ukuti acili watukunda. Watulaya ukuti ‘alitutetela.’ (Ayize. 55:7) E Baibolo yalanda ukuti ko-o ukutetela kukaleta ‘ukupupwa . . . kuno kukafuma ku Mfumu.’—Imili. 3:19.
6. Uzye iwaliko lya kwe Zakariya 2:8 likatusambilizya cani pe Yehova?
6 Wazyani Zakariya 2:8. Ilinso acilundwa cakumuwili icicindame nkaninye swinya cino tukawikako sana amano. Pe lyo-o iwaliko, cili ngati Yehova akulanda ukuti ‘Uwili wensinye wino wacita iciwipe kwe mwemwe, lyo wacita iciwipe na kwe nenenye.’ Pa mulandu wakuti e Yehova watukunda, akamanya vino tukuyivwa swinya akavwambisya ukutucinjilila. Nga kuli cimwi cino citusakamisile, nawenye akakwivwa uwuwi. Fwandi tungapepa ukufuma pansi ya mwezo ukuti: “Nchinjilila ndivino ungachinjilila inkandawa nanti imboni zyaminso yako.”—Amalu. 17:8
7. Avyani vino Yehova akalonda tusuwile?
7 E Yehova akalonda tusuwile ukuti watukunda wenga na wenga. Lelo wamanya nu kuti, vino twapitamo mu wumi, vingalenga twavwilika nga cakuti watukunda. Swinya vino tukupitamo pe yo-o impindi, navyonye vingalenga twalola ngati e Yehova atatukunda. Nomba acani cino cingatwavwa ukumusuwila? Ukusambilila pe vino wakunda e Yesu, awapakwe na swe wantu wonsinye, akuno kungatwavwa.
VINO YEHOVA AKALANJIZYA UKUTI WATUKUNDA
8. Acani cino calenzile e Yesu asinincizye ukuti umukwasi wakwe wamukunda?
8 Pa myaka imivule e Yehova ne Yesu wapanzile wuciwuza uwuwome swinya wakundana nkaninye. Kutawa iviwuza vyo vyakundana, vino vyamala imyaka imivule ngati woliwo. Amazwi yano yawa pe Mateyu 17:5 yakalanjizya vino Yehova wakunda e Yesu. E Yehova nga akulonda nga walanzile ukuti, ‘We-e awili wino nazumilizya.’ Lelo pa mulandu wakuti walondanga tumanye ukuti wamukunda, wamwisile ukuti “Wee a Mwanane umukundwe.” E Yehova wakunda nkaninye e Yesu, maka maka wo-o vino wayikundizile ukupa uwumi wakwe. (Efes. 1:7) Ne Yesu nye, wamanyile ukuti umukwasi wakwe wamukunda swinya atavwilikanga nanti katicinye. Cinji acakuti, wanyocezizyepo imiku imivule ukulanda ukuti e Tata wankunda.—Yoha. 3:35; 10:17; 17:24.
9. Alizwi ci lino likalondolola vino Yehova wakunda awapakwe? Londololani. (Waroma 5:5)
9 E Yehova walanjizya na vino wakunda awapakwe. (Wazyani Waroma 5:5.) Lekani tulande pi zwi lya kuti “lwitilwa.” Ibuku limwi lino likalanda pa vya mu Baibolo lyalondolola ukuti “lwiza pe sweswe ngati akaluzi kano kakukonkoloka.” Lyo-o izwi likalanjizya vino Yehova wakunda awapakwe. Awapakwe nawonye wamanya ukuti “wakundwa nu Leza.” (Yud. 1) Umutumwa Yohani walanzile pe vino awapakwe wakayivwa pano walemvile ukuti: ‘Silolani vino Umukwasi watukunda! Ulukundo lwakwe lwakulisya achino tukakwitwa swewanakwe Leza.’ (1 Yoh. 3:1) Lelo nanti ciwe wo-o, e Yehova atakundavye awapakwe, lelo watukunda swensinye.
10. Acani cino Yehova wacita co calenga tusinincizye ukuti watukunda?
10 Acani cino Yehova wacita pa kulanjizya ukuti watukunda? Watupa inzuwi. Inzuwi yawa acawila icikulu nkaninye cino Yehova watucitila co umuntu nanti wenganye atanga acicite. (Yoha. 3:16; Roma. 5:8) Watupile Umwana wakwe wino wakunda nkaninye ukwiza mukutufwila pa kuti atuluwule ku luwembu na pa kuti citupepucile ukuwa swe viwuza vyakwe. (1 Yoh. 4:10) Ukwelenganya sana pe vino e Yehova ne Yesu watucitila, kungalenga twaya tukwivwicisya vino watukunda wenga na wenga. (Gal. 2:20) E Yehova atapile inzuwi pa mulandu vye wakuti walondanga ukulipila pe cino e Adamu wasovizye, lelo acawila cino watupa pa mulandu vye na vino watukunda. Wazumilizizye e Yesu umwana wakwe wino wakunda nkaninye ukwiza munsi mukucula nu kufwa pa mulanduvye nasweswe. Wo-o vino wayikundizile ukutupa icintu icicindame nkaninye, calenga tutavwilika ukuti watukunda.
11. Avyani vino tungasambililako kwi waliko lya kwe Jeremiya 31:3?
11 E Yehova asipelelavye pakulanda ukuti watukunda, lelo akacitapo vimwi. (Wazyani Jeremiya 31:3.) Ku cakulolelako, watupalamika kwe weliwe. (Linganyaniko Amasundo 7:7, 8.) Kusi nanti cimwi nanti uwili wensinye wino angatupawula kwe lo-o ulukundo. (Roma. 8:38, 39) Uzye mukayivwa wuli pe wo-o vino Yehova wamikunda? Wazyani Amalumbo icipandwa 23, pakulola vino Yehova walanjizizye ulukundo ni nkumbu kwe Davidi na vino sweswe tungasambililako.
UZYE MUKAYIVWA WULI PE WO-O VINO YEHOVA WAMIKUNDA?
12. Avyani vino vyawa mu Amalumbo icipandwa 23?
12 Wazyani Amalumbo 23:1-6. Mu Amalumbo 23 mwawa amazwi yano yakalanjizya vino Yehova watukunda na vino akatusakamala. E Davidi wino walemba lyo-o ilumbo, walondolola pa wuciwuza uwuwome wuno walinji pe weliwe ne Kacema wakwe e Yehova. E Davidi wayivwanga umucinjililwe pa mulandu wakuti weyamizile sana pe Yehova nu kuleka ukuti awino awamutungulula. Swinya wasuwizile nu kuti e Yehova walinji nu kutwalilila ukumukunda uwumi wakwe wonsinye. Acani cino calenzile asuwile wo-o?
13. Avyani vino Davidi wasuwizile?
13 “Akampa ivintu vyonsi vino nkasowelwa.” E David wamanyile ukuti walinji amucinjililwe pa mulandu wakuti e Yehova wamupanga vyonsinye vino walondekwanga. Swinya wamanyile nu kuti e Yehova walinji we ciwuza wakwe. Vyo-o, avino vyalenzile e Davidi asuwile ukuti e Yehova walinji nu kutwalilila ukumwavwa, asa mulandu na vino vyalinji nu kucitika ku nkolelo. Pa mulandu wakuti wasuwizile ukuti e Yehova wamukunzile swinya wamusakamalanga, calenzile ateke umwezo nu kukana sakamikwa.—Amalu. 16:11.
14. Uzye Yehova akatusakamala wuli?
14 Nasweswenye e Yehova akatusakamala, maka maka nga cakuti iviwipe vyatuciticila. Ku cakulolelako, e nkazi Claire a wino wawombela pa Bethel ukucila pa myaka 20, atamanyile ivyakucita pano awa mu lupwa lwakwe wakweti intazi inkulu nkaninye. E tata wakwe walwile indwala yino wakakwita ukuti sitroko, ne umuzuna wakwe wizile awingwa, wizile awaleka ukukazya tuno wakazyanga swinya awa ku banki wawaposile ing’anda. Uzye e Yehova wawasakamile wuli? E Claire watili: “E Yehova watwavwanga mwe vyonsinye cila wanda. Swinya watupanga ivivule ukucila na pe vino twalondekwanga! Lyonsinye nkakwelenganya pe vino Yehova walanjizizye ulukundo pa kutwavwa, swinya ntalitela njiwilile. Vyonsinye vyo-o, vyalenga ntwalilile ukuwombela Yehova ni nsansa, asa mulandu ni ntazi zino zingiza.”
15. Acani cino calenzile e Davidi ukuwa na maka naswinya? (Lolani ni cikope.)
15 “Akampa maka mapya.” Mpindi zimwi e Davidi wasakamikwanga nkaninye pa mulandu ni ntazi zino wapitangamo. (Amalu. 18:4-6) Lelo e Yehova wamulanjizyanga ukuti wamukunzile swinya wamusakamalanga, na co-o calenzile awakwivwako icete. E Yehova watungululanga we-e ciwuza wakwe wino watonsile ‘kumulemvwe wuzima’ swinya ‘kuvifula vyaminzi masengame.’ Co-o cawomizye nkaninye e Davidi swinya calenzile atwalilile ukuwombela Yehova ni nsansa.—Amalu. 18:28-32.
Pano Davidi wasakamikwanga, e Yehova wamulanjizyanga ukuti wamukunzile swinya wamusakamalanga ukupitila mukumupa amaka (Lolani paragrafu 15)
16. Uzye e Yehova akatuwomya wuli mwe ya-a manda?
16 Wonye avino cawa na peyonye impindi. Nga twawa ni ntazi tukatwalilila ukusipicizya pa mulandu wa kuti,“ulukundo luntasila lwa Mfumu e Leza ninkumbu zyakwe vyalandalila.” (Ukulo. 3:22; Kolo. 1:11) Lekani tulande pe cino caciticizile e Rachel. We-e nkazi wayivwile uwuwi nkaninye pano umulume wamusile nu kuleka ukuwombela Yehova, mu mpindi ye Kolona. Uzye Yehova wamwavwizye wuli? Watili: “E Yehova wandanjizizye ukuti wankunda. Wampile iviwuza wano wambomelezyanga, wandetelanga ivyakulya, wantumilanga amameseji, wambazizyanga amawaliko, wamwentulilanga swinya wambuzyanga ukuti e Yehova akansakamala. Nkasalifya nkaninye e Yehova pakuwa mu lupwa luno lwakundana.”
17. Amulandu ci wuno Davidi walandizile ukuti, “ntandi ndatina”?
17 “Ntandi ndatina . . . amuno uli nani.” Uwumi wakwe Davidi walinji mu wusanso swinya kwalinji awalwani awa maka wano wamulwisyanga. Lelo nanti ciwe wo-o, e Yehova wamulanjizizye ulukundo swinya walenzile awayivwa umucinjililwe. E Davidi wasuwizile nkaninye e Yehova, amuno wamwavwanga mwe vyonsinye vino wapitangamo. Na co-o calenzile alande ukuti: “[Yehova] antula kuntete zyane zyonsi.” (Amalu. ) Nanti acakuti e Davidi walinji ni ntete, wazicimvizye pa mulandu wa kuti e Yehova wamwavwanga. 34:4
18. Uzye ukumanya ukuti e Yehova watukunda kungatuwomya wuli pano tuli ni ntete?
18 Uzye ukumanya ukuti e Yehova watukunda kukatuwomya wuli pano tukupita mu ntazi yino yikututinya? E nkazi uwizina lya kuti Susi walondolozile vino wayivwile nu mulume pano umwana wawo wayinyonzile. Watili: “Nga cakuti iviwipe vyakuciticila mu wumi kukawa ukuyivwa uwuwi nkaninye nu kulola ngati pasi icili consinye cino ungacita. Lelo inkumbu zya kwe Yehova zikalenga twayivwa awacinjililwe.” E Rachel wino tulanzilepo kaali watili: “Wanda wumwi uwusiku pano nalinji nu wulanda ni ntete swinya pano nasakamisilwe, napefile kwe Yehova ko-o lyo nkufumyako ni lizwi. Pano napefile e Yehova wantesile umwezo, ngati awulyanye vino e nyina akasusuntizya umwana swinya nizile ndala nu kulala. Ntalitela njiwilile vyo-o vino vyacitisile.” E eluda wumwi uwizina lya kuti Tasos wamunyefile mu cifungo pa myaka 4 pa mulandu wakukana ukwinjila uwusilika. Uzye Yehova walanjizizye wuli ukuti wamukunda swinya wamusakamile? Watili: “E Yehova wansakamalanga mwe vyonsinye ukucila na pe vino nalondanga. Na co-o calenzile musuwile nkaninye. Umuzimu wakwe walenzile nasecelela nanti acakuti mu cifungo mutazifile swinya mwacitikanga iviwipe.”
PALAMILANI KWE YEHOVA E LEZA WA NKUMBU
19. (a) Uzye ukumanya ukuti e Yehova watukunda kungalenga twapepa wuli? (b) Amazwi ci yano yakalondolola ulukundo lwa kwe Yehova yano yakamifika sana pa mwezo? (Lolani na kambokosi kakuti “Amazwi Yano Yakatwavwa Ukumanya Vino Yehova Watukunda.”)
19 Vyo-o ivyakulolelako vino twalandapo vikulanjizya ukuti e Yehova, “e Leza walukundo,” wawa naswe! (2 Kor. 13:11) Watuwikako sana amano wenga na wenga. Swinya twasuwila ukuti ‘twachinjililwa nulukundo lwakwe uluntasila.’ (Amalu. 32:10) Pano tukwelenganya sana pe vino akalanjizya ukuti watukunda, apano tukaya tukupalamila sana kwe weliwe nu kulola vino akatusakamala. Tungapepa kwe weliwe ukwasowa nu kwivwa intete nu kumunena vyonsinye vino tukulonda. Tungamunena vino vikutusakamika, nu kusuwila ukuti wandi ayivwe swinya akuvwambisya ukutwavwa.—Amalu. 145:18, 19.
20. Uzye ulukundo lwa kwe Yehova lukatupalamika wuli kwe weliwe?
20 Ndi wulyanye vino tukapalamila ku mulilo nga kutalile, avino nu lukundo lwa kwe Yehova lukatusansamusya pano tukupita mu ntazi. Fwandi mwaleka ulukundo lya kwe Yehova lwamyavwa ukupitila mukuminsansamusya nu kumipa umutende. Swinya lekani swensinye twalanjizya ukuti tukakwivwa icete pe lo-o ulukundo ukupitila mukulanda ukuti: “Nakunda Imfumu e Leza”!—Amalu. 116:1.
UZYE MUNGASUKA WULI?
-
Uzye mungalondolola wuli ulukundo lwa kwe Yehova?
-
Avyani vino vingalenga musuwile ukuti e Yehova wamikunda?
-
Uzye ulukundo lwa kwe Yehova lukalenga mwayivwa wuli?
ULWIMBO 108 Ulukundo lwa kwe Leza Uluntasila
a Amazina yamwi yapiluzilwe.