1. Uzye tuzipizile twakwivwa wuli wo-o vino Yehova watuzumilizya ukupepa kwe weliwe?

 E KAPANGA wi yulu ni nsi watupa icawila icicindame nkaninye, icakulanda nawe mwi pepo. Teyelenganyani pe co-o: Tunganena e Yehova vyonsinye vino vili ku mwezo, pa mpindi iyili yonsinye swinya mu citundu icili consinye ukwasowa nukulayilizya nanti ukuti tupangane ukuti twandi tuye mukulanda nawe. Tungapepa pano tuli mu cipatala nanti pano tuli mu cifungo nukusuwila ukuti Umukwasi witu uwa lukundo akutwivwa. Tukalola ukuti co-o icawila cacindama.

2. Uzye Imfumu David yalanjizizye wuli ukuti yacindamisile icawila ca kupepa?

² Imfumu David yacindamisile nkaninye icawila cakupepa. Wimbizile kwe Yehova ukuti: “Pochelela ipepo lyane ngati alifungo nunchile.” (Amalu. 141:1, 2) Mu mpindi zya kwe David, ivyifungo nuncile vino wasimapepo wawomvyanga mukupepa kwa cisinka, wawikangako sana amano pakuvipanga. (Ukuf. 30:34, 35) E David walondanga ukwelenganyapo sana pe vino walinji nukulanda mwipepo, ngati awulyanye vino wano wapanganga ivyifungo nuncile wawikangako amano pakupanga. Nasweswenye tukalonda ukuti amapepo yitu yasecelesya e Yehova.

3. Amiwele ci yino tuzipizile ukuwa nayo pano tukupepa kwe Yehova swinya amulandu ci?

³ Pano tukupepa kwe Yehova tuzipizile ukuwa nu mucinzi nkaninye. Teyelenganyani pa vilolwa vino e Ayizeya, e Ezekiel, e Daniel ne Yohani waweni. Vyo-o ivilolwa vyapusana conga na conga. Lelo kwawa cimwi cino cawa muvilolwa vyonsinye cino cakolana. Vyonsinye vikalanda pa cintu cimwi icicindame icakuti,  e Yehova Amfumu iyicindame. E Ayizeya waweni e Yehova ‘ayisile pa chilimba cha Wufumu papela-pela, apatumpuke.’ (Ayize. 6:1-3) Ezekiel waweni e Yehova ayisile pi celeta, lino lyazingulusilwe na vimwi ‘ivizikimile nkaninye . . . vino vyalolekanga ngati amulalafute.’ (Ezek. 1:26-28) E Daniel nawe waweni ‘Uwamanda na Manda’ azwite ivizwalo ivitiswe nivizikimile ngati amulilo vikufuma pacilimba ca Wufumu. (Dan. 7:9, 10) Swinya ne Yohani nawe waweni e Yehova ayisile pacilimba ca Wufumu cino cazingulusilwe nu mulalafute wuno walolekanga ngati aliliwe ilizikimile nkaninye ilya kuti emarodi. (Ukuwu. 4:2-4) Nga twelenganya pawukulu wa kwe Yehova, tukakwizuka pa longo ulukulu nkaninye luno twawa nalo ulwa kulanda nawe mwi pepo. Nomba avyani vino tuzipizile ukupepelapo?

4. Avyani vino tukasambililako ku mazwi yakutalicila mwi pepo lya cilanjililo, yano yakazanwa pe Mateyu 6:9, 10?

⁴ Wazyani Mateyu 6:9, 10. Mwi Lyasi lya pa Mwamba, e Yesu wasambilizizye awasambilizi wakwe ivyakupepa mu nzila yino yikasecelesya e Leza. Pa nsizi yakulanda ukuti “muwapepa wonye-woo muwati,” wizile atalicila ukulanda pa vintu ivicindame vino vyawa ukulingana nukulonda kwa kwe Yehova. Pe vyo-o ivintu palinji: ukulenga izina lya kwe Yehova ukucindikwa, ukupepa ukuti Uwufumu wize wuno wuliyonona awalwani wa kwe Leza wonsinye, apano na pamapaalo yano akalonda ukucitila awantu mu nsi kunkolelo. Nga cakuti mumapepo yitu tukuwikamo vyo vino twalandapo, lyo tukulanjizya ukuti twacindamika ukulonda kwa kwe Yehova.

5. Uzye cawa icetenye ukupepela na pa vya palwitu?

⁵ Vino e Yesu wakonkinyepo ukulanda mwe lyo-o ipepo vikalanjizya ukuti, cawa icetenye ukupepela na pa vya palwitu. Tungalenga Yehova ukuti atupe ivyakulya mwe wowo uwanda, atutetele amawembuko yitu, atucinjilile ku melezyo nukutupususya ku muwipe. (Mat. 6:11-13) Nga cakuti tukulenga e Yehova vyo-o ivintu, lyo tukulanjizya ukuti tukalonda awatwavwa swinya tukalonda ukumusecelesya.

6. Uzye tuzipizile ukupepela vye pa vintu vino vyalumbulwapo mwi pepo lya cilanjililo? Londololani.

⁶ E Yesu atalondanga awasambilizi wakwe walanda vye amazwi yalyanye yano yawa mwi pepo lya cilanjililo. Mu mapepo yanji yano  wapefile walanzile pavintu ivipusane pusane vino vyawanga avicindame ukulingana ni mpindi yino wafikapo. (Mat. 26:39, 42; Yoha. 17:1-26) Nasweswenye tungapepela pa vintu ivili vyonsinye vino vikutusakamika. Ku cakulolelako, nga cakuti tukulonda ukupingulapo pe cimwi, tungapepa kwe Yehova ukuti atupe amano nukwiluka. (Amalu. 119:33, 34) Swinya nga cakuti tuli mukutalika ukuwomba umulimo wumwi uwuwome, tungapepa ukuti e Yehova atwavwe ukumanya ivya kuwuwomba. (Imilu. 2:6) Awakwasi wangapepelako awana wawo ne awana wangapepelako awakwasi. Swinya swensinye tuzipizile ukupepelako amasambililo ye Baibolo na wano tukawizizyako. Lelo tutazipizile vye ukupelela pakulenga ukuti e Yehova awatwavwa.

7. Amulandu ci wuno tuzipizile ukulumbanizizya e Yehova mu mapepo yitu?

⁷ Pano tukupepa tuzipizile twakwizuka ukulumbanya Yehova. Kutawa nanti wumwinye wino wayana ukumulumbanya ukucila pe Yehova. Amuno ‘amuzima, akatetela, wawanikumbu swinya awalukundo. Asisamalila ukufulwa, wawa nuluse swinya wasuwilwa penye.’ (Amalu. 86:5, 15) Twawa ni milandu imivule iyakulumbanizizyapo e Yehova pa mulandu na vino wawa na vino akacita.

8. Avyani vino tungasalifizyapo e Yehova? (Amalumbo 104:12-15, 24)

⁸ Ukulunda pakulumbanya e Yehova mu mapepo yitu, tuzipizile twamusalifya na pa vintu vyakuzungusya vino akatucitila. Ku cakulolelako, tungamusalifya pamaluwa amazima yano yawa mumisango imilekane lekane, pavyakulya ivizima vino visisila nukusila, na paviwuza vino vikalenga twawa ni nsansa. Umukwasi witu uwalukundo akatupa vyonsinye vyo-o ni vintu vinji pakutivye twawa ni nsansa. (Wazyani Amalumbo 104:12-15, 24.) Ni cicindamisye acakuti, tukasalifya nkaninye e Yehova pa vyakulya vya ku muzimu vino akatupekanizizya, na pi suwilo lya vintu ivizima vino vilicitika ku nkolelo.

9. Acani cino cingatwavwa ukwizuka ukusalifya e Yehova? (1 Watesalonika 5:17, 18)

⁹ Cingawa acipepuke ukwiwilila ukusalifya Yehova pe vyonsinye vino watucitila. Nomba acani cino cingatwavwa ukwizuka? Mungalemba nukutantika vino mwapepelapo, nukulola  vino Yehova wasuka amapepo yinu. Apano mupepe ipepo lya kumusalifya pe vino wamyavwa. (Wazyani 1 Watesalonika 5:17, 18.) Teyelenganyani pe co-o: Tukawa ni nsansa swinya tukayivwa ukuti twakundikwa nga cakuti wamwi watusalifya. Fwandi nasweswenye nga cakuti tukwizuka ukusalifya Yehova pe vino wasuka amapepo yitu, tuliwalenga awawa ni nsansa. (Kolo. 3:15) Amulandu ci wunji uwucindame wuno tuzipizile ukusalifizyapo e Leza?

10. Ukulingana ne 1 Peter 2:21, amulandu ci wuno tukasalifizya e Yehova pakutuma Umwana wakwe mu nsi?

¹⁰ Wazyani 1 Peter 2:21. Tuzipizile ukusalifya e Yehova pakutuma Umwana wakwe wino wakunda ukwiza mukutusambilizya. Ukusambilila pa wumi wa kwe Yesu kukatwavwa ukumanya ivivule pe Yehova na pe vino tungacita pakuti twamusecelesya. Nga cakuti twasuwila mu nzuwi ya kwe Klistu tuliwa na wuciwuza uwuwome ne Yehova swinya tuliwa pa mutende na weliwe.​—Roma. 5:1.

11. Amulimo ci wuno e Yesu akawomba mu mapepo yitu yano tukapepa kwe Yehova?

¹¹ Tukasalifya e Yehova pakutuzumilizya ukupepa kwe weliwe ukupitila mu Mwana wakwe. E Yehova akawomvya e Yesu pakutupa vino twalenga mwi pepo. Swinya akateyelezya nukwasuka amapepo yano twalenga ukupitila mwe Yesu. E Yesu walanzile ukuti: “Ndiwachitila chonsi chino mwiza mwalenjela mwizina lyane alyakuti uwukankala wa Mukwasi wize wuchindamichilwe Mumwana.”​—Yoha. 14:13, 14

12. Amulandu ci wuno tuzipizile ukusalifizya e Yehova pa Mwana wakwe?

¹² E Yehova akatetela amawembuko yitu ukupitila mu nzuwi ya kwe Yesu. Amawaliko yakalanda ukuti ‘tuli ne simapepo mukulu wee, [Yesu] wino wikala kwikasa lya kwe ndilo ilyacilimba ca Wufumu icawucindami kwiyulu.’ (Hebe. 8:1) Swinya twawa ne Yesu wino “akutulambilizizya ku Mukwasi.” (1 Yoh. 2:1) Tukasalifya e Yehova pakutupa e Simapepo Mukulu uwacikuku wino wamanya uwutonte witu swinya “wino akatulambilizizyako kwe Leza”! (Roma. 8:34; Hebe. 4:15) Tutapwililika, fwandi wanga kutawa inzuwi ya kwe Yesu nga tutakwatapo nulongo lwakulanda ne Yehova mwipepo. Ukwasowa nukuvwilika, namwemwenye mukuzumila ukuti pasi nanti cimwinye cino tungacita pakulanjizya ukusalifya pa cawila cino Yehova watupa, akuli ukuti Umwana wakwe.

13. Uzye uwusiku pano e Yesu walinji mupipi nukufwa walanjizizye wuli ukuti wakunzile awasambilizi wakwe?

¹³ Uwusiku pano e Yesu walinji mupipi nukufwa, wapepezileko awasambilizi wakwe pa mpindi ntali, ukulenga Umukwasi wakwe ukuti “uwawachinjilila ku muwipe.” (Yoha. 17:15) Naco-o calanjizizye apatiswenye ukuti e wawakunzile. Nanti acakuti wamanyile ukuti walinji nukumucuzya nkaninye, wasakamile na pawatumwa wakwe.

14. Tungalanjizya wuli ukuti twakunda awanawitu na wankazi?

¹⁴ Ndi wulyanye vino e Yesu wacitanga, nasweswenye tusiwikavye amano pe vino tukulonda. Lelo tukapepelako awanawitu na wankazi. Nga tukucita wo-o, lyo tukulanjizya ukuti tukwivwila isundo lya kwe Yesu ilya kuti tuzipizile ukukundana. Swinya lyo tukulanjizya ne Yehova vino twakunda awanawitu na wankazi. (Yoha. 13:34) Ukupepelako awanawitu na wankazi kutawa akusumbavye impindi. Izwi lya kwe Leza likatunena ukuti “ipepo lya muntu umuzima likachita ivikalambane.”​—Jemu. 5:16.

15. Amulandu ci wuno tuzipizile ukupepelako awanawitu na wankazi?

¹⁵ Tuzipizile ukupepelako awanawitu na wankazi, amuno wakapita mu ntazi izivule.  Tungawalenjelako kwe Yehova ukuti awavwe pano walwile, pano waponelwa na masanso, inkondo, ukuwacuzya nintazi zinji. Mungapepelako na wanawitu na wankazi wano wakakwavwilizya wo waponezilwe na masanso. Ncepamwi na mwemwenye mwamanyako wamwi wano wakupita mu ntazi zya musango wo-o. Nga cakuti mumanyileko wamwi, muwawalumbula mu mapepo. Tukalanjizya ukuti twakunda awanawitu na wankazi nga tukulenga Yehova ukuti awavwe ukusipicizya.

16. Amulandu ci wuno tuzipizile ukupepelako wano wakatungulula?

¹⁶ Tuzipizile twapepelako awanawitu wano wapwa imilimo imivule mwi wungwe lya kwe Yehova. Wonye avino nu mutumwa Paulo wayivwanga. Wamanyile ukuti atanga atunguluke nga cakuti wanji wasakumupepelako. Walemvile ukuti: “Naninye mpepelanji, alyakuti Leza ampe amazwi, pano nati ndavwanga, alyakuti mfumpule umulomo wane nukusinga imbumbule ivyankama vyilandwe zima.” (Efes. 6:19) Na peyonye impindi twawa na wanawitu awavule wano wakatungulula swinya wano wakawombesya. Tukalanjizya ukuti twawakunda nga cakuti tukuwapepelako ukuti e Yehova awawavwa nu kuwapaala pa milimo yino wakawomba.

17-18. Ampindi ci pano wangatunena ukuti twimilileko wanji mwipepo, swinya avyani vino tuzipizile twakwizuka?

¹⁷ Mpindi zimwi wangatunena ukuti twimilileko wanji mwipepo. Ku cakulolelako, e nkazi wino ayile mukuntungulula isambililo, anganena e nkazi wino wayile nawe ukuti apepe. Nomba nga cakuti e nkazi wino asa mweneco wi sambililo atamanyile icete cete umusambi, ncepamwi umweneco wisambililo angapepa ipepo lya kutalicila apano weni ayize apepe ilya kulecelezya. Na co-o cingalenga amanye ivya kulanda pakupepelako umusambi.

¹⁸ Ne umwanawitu wangamunena ukuti apepe pakusunkana kwa kuya mu mulimo nanti pakulongana. Awanawitu wano wakawapa amasyuko yamusango ndi wo-o wazipizile wakwizuka umulandu wuno kukawela ukulongana. Ipepo asanzila yakuwomvya pakusambilizya, ukusunda nanti ukumanyisya awa mwiwungwe vimwi. Pakulongana ukuvule, amamineti 5 wayawicilako ku lwimbo nipepo. Fwandi umwanawitu wino akupepa, atazipizile  ukupepa “amapepo .  . . amatali” maka maka pakutalika ukulongana.​—Mat. 6:7

19. Acani cino cilitwavwa ukuwa awayipekanye mu wanda wa kwe Yehova uwawupinguzi?

¹⁹ Tuzipizile twalola ukuti ipepo acili icintu icicindame mu wumi witu. Amuno uwanda wa kwe Yehova uwawupinguzi wupalamizile. E Yesu walanzilepo pe co-o icisinka ukuti: ‘Mwenji lolanji mbali nukupepa amanda nuwinji alyakuti muwe namaka alyakuti mwize mupusuke kuvintunye vyoo vyonsi vino vilipona.’ (Luk. 21:36) Nga cakuti tukupepa lyonsinye isuwilo litu liliwoma, swinya uwanda wa kwe Leza uwawupinguzi wulizana lyo swe wayipekanye.

20. Uzye amapepo yitu yangawa wuli ngati acena icifungo nuncile?

²⁰ Avyani vino twasambilila? Tukasalifya nkaninye pa longo lwa kupepa luno twawa nalo. Nicicindamisye acakuti, ivintu vino tuzipizile ukupepelapo vizipizile ukuwa ukulingana nu kulonda kwa kwe Leza. Cinji acakuti tukasalifya pa Mwana wa kwe Leza, napa Wufumu wakwe. Swinya tukapepelako na wanawitu na wankazi. E Yehova akalonda twamulenga vino tukulonda mwe wowo uwanda. Akalonda nukuti twamulenga ukuti atwalilile ukutwavwa ukuwa ni suwilo iliwome. Acino tungalanjizya ukuti twacindika lo-o ulongo lwakupepa nga cakuti tukwelenganizya lya nkani pa mazwi yano tukulonda ukulanda mwi pepo. Nga tukucita wo-o, amazwi yitu yaliwawa ngati acena icifungo nuncile kwe Yehova swinya ‘yaliwamusecelesya.’​—Imilu. 15:8.