1. Amulimo ci wuno Yehova akalonda wuwombwe mwe ya-a amanda?

 MWE ya-a manda e Yehova akalonda ilyasi lizima pa Wufumu ukuwizwa ukuzinguluka insi yonsinye. (Mar. 13:10; 1 Tim. 2:3, 4) Wo-o amulimo wa kwe Yehova, swinya cazipa nkaninye wo-o vino wasola e Yesu Umwana wa kwe ukuti awino awatungulula. Tusakuvwilika nanti katicinye ukuti, pano insilo yakwe yo-o insi yitani yize, umulimo wakuwizya wandi wawombwa ukulingana na vino Yehova akulonda, ukupitila muwutunguluzi wa kwe Yesu.​—Mat. 24:14.

2. Avyani vino twandi tusambilile mwe co-o icipande?

² Mwe co-o icipande, twandi tulole vino e Yesu akuwomvya ‘umuzya wa cisinka swinya uwa mano’ pakutupekanizizya ivya kulya vya ku muzimu. Swinya twandi tusambilile na pe vino akatungulula awantu wakwe ukufumilila na kaali mwe wo-o umulimo uwucindame uwakuwizya. (Mat. 24:45) Twalanda na pe vino swensinye wenga na wenga tungacita pakutunjilila e Yesu nu muzya wa cisinka.

3. Amaka ci yano Yehova wapa e Yesu?

³ E Yesu awino akatungulula umulimo wakuwizya. Tungasuwila wuli ukuti awino akatungulula? Pano walinji mupipi nukunyocela kwi yulu, wizile asunkana nawasambilizi wakwe awa cisinka pa mwamba wa mu Galili. Pano wasunkine, wawanenile ukuti: “Amaka yonsi yapwa kwakwe nene mwi yulu na munsi moo.” Atapelezile vye pa-a, wakonkinyepo nukuwanena ukuti: “Achaleka yanji mukasambilizye imyiko yonsi muleke wawe awasambilizi wane.” (Mat. 28:18, 19) Fwandi pa vintu na vinji vino wapa e Yesu ukuwomba, pawa na maka yakutungulula umulimo wakuwizya.

4. Tungasuwila wuli ukuti e Yesu acili akatungulula umulimo wakuwizya?

 ⁴ E Yesu walanzile ukuti, umulimo wakuwizya nu kupanga awasambi walinji nukuwawizwa ‘kumyiko yonsi.’ Swinya e Yesu walinji nukuwawa na wasambilizi wakwe “penye, ukufika na ku nsilo ya nsi.” (Mat. 28:20) Amuno ya-a amazwi yano walanzile yakalanjizya apatiswenye ukuti walinji nukutwalilila ukutungulula umulimo wakuwizya ukufika na mweyanye amanda.

5. Uzye tukacita wuli pakuficilisyako uwusesemo wuno wawa pa Amalumbo 110:3?

⁵ E Yesu atasakamikwangapo ukuti mu manda yakulecelezya awakuwomba umulimo walicepa. Amuno wamanyile ukuti uwusesemo wuno wukazanwa pa Amalumbo walinji nukuficiliswa. Pe lyo-o iwaliko pakati: “Uwanda wuno uliwalwisya awalwani wako awantu [awantu wako] waliwayikatuchila.” (Amalu. 110:3) Nga cakuti na mwemwe mukuwombako umulimo wakuwizya, lyo mukutunjilila e Yesu nu muzya wa cisinka swinya lyo mukuficilisyako wo-o uwusesemo. Kweni umulimo wukutwalilila ukuwombwa lelo namonye mwawa intazi.

6. Antazi ci yimwi yino wano wakawizya pa Wufumu wakakwata mwe ya-a amanda?

⁶ Intazi yimwi yino wano wakawizya pa Wufumu wakakwata, akuwacuzya. Awasangu, intunguluzi zya mapepo nawa mu vikanza vya nsi, wakanena awantu ivintu vya wufi ivivule pa mulimo witu. Nomba nga cakuti wa lupwa, iviwuza na wano tukawomba nawo wakoncelela wo-o uwufi, wangatalika ukutupaticizya ukuleka ukuwombela Yehova nukuleka ukuwomba umulimo wakuwizya. Mu nsi zimwi awalwani witu wakatutinya, ukutusansa nga nukulema awanawitu na wankazi nukuwatwala mu vifungo. Tusizunguka nga twalola ivya musango wo-o vikucitika. E Yesu walandizile lya nkani ukuti: “Imyiko yonsi yiliwawavitilwa nanti ukuwafulilwa amuno alizina lyane.” (Mat. 24:9) Nga twalola vino awantu watupata, cikatulanjizya apatiswenye ukuti tukakolanya icakulolelako ca kwe Yesu swinya tukawombela Yehova ukulingana na vino akalonda. (Mat. 5:11, 12) E Satana awino akalenga watucuzya. Lelo e Yesu wakwatisyapo amaka ukumucila. Pamulandu na vino Yesu akatwavwa, ilyasi lizima likuwizwa insi yonsinye.

7. Avyani vino vikulanjizya ukuti vino vyawa pa Ukuwumbulika 14:6, 7 vikuficiliswa?

⁷ Intazi yinji yino tukapitamo pano tukuwizya, akukanamanya ivitundu vyonsi vino awantu wakalanda. Mucilolwa cino e Yesu wasokololezile umutumwa e Yohani, walandizile lyankani ukuti ilyasi lizima lilimala yo-o intazi. (Wazyani Ukuwumbulika 14:6, 7.) Amunzila ci? Amuno pano tukuwizya, tukapa awantu ulongo lwakuyisolelapo aweneco ukuteyelezya kwi lyasi lya Wufumu. Mwe ya-a amanda, awantu ukuzinguluka insi yonsinye wangawazya amabuku yano yakalanda pa vya mu Baibolo pa webusayiti yitu iya jw.org, amuno yawa mu ndimi ukucila pe 1,000. Iwumba Lino Likatungulula lyazumilizizye ukuti wangapiliwula ibuku lyakuti Ungikala Amanda Pe! mu vitundu ukucila pe 700 lino tukawomvya pa kupanga awasambi. Swinya peyo-o impindi amavidyo yaciwulu na mabuku ya ntonko yano yakalanda pa vya mu Baibolo yatalika ukufuma. Tukulola vino amasesemo yamu Baibolo yakuficiliswa. Awantu “ukufuma mundimi ni nko izilekane lekane” wakusambilila ivya kulanda “ululimi ulweneco lweneco” akuli ukuti icisinka ca mu Baibolo. (Zaka. 8:23; Zefa. 3:9, NWT) Vyonsinye vyo-o, vyacitika ukupitila mu wutunguluzi wa kwe Yesu Klistu.

8. Avyani vino vyafumamo mu mulimo wakuwizya?

⁸ Pe yo-o impindi awantu ukucila pe 8,000,000 mu nsi 240 wiza mwi wungwe lya kwe Yehova. Swinya cila mwaka awantu ukucila pe 100,000 wakubatizwa. Nomba kwawa na cinjinye cino cacindama ukucila napawukulu wa  mpendwa. Co-o icintu, akulola vino awasambi awapya wakupilula imiwele yawo nukuzwala ‘uwuntu wupya.’ (Kolo. 3:8-10) Ku cakulolelako, awavule waleka ukuwa nu wunkalwe, akapatulula, ukutemwa vye insi yakumwawo nukupata insi zinji apano nimiwele yinji imiwipe. Uwusesemo wuno wawa pe Ayizeya 2:4 wukuficiliswa. Amuno wa-a awantu ‘wasilwa inkondo na swinya.’ Fwandi nga twatwalilila ukuzwala uwuntu wupya, tukakwavwa awantu awavule ukwiza mwi wungwe lya kwe Yehova swinya tukalanjizya ukuti tukakolanya e Klistu Yesu intunguluzi yitu. (Yoha. 13:35; 1 Pet. 2:12) Acani cino cikulenga vyonsinye vyo-o vyacitika? Amuno e Yesu akatwavwa.

9. Ukulingana ne Mateyu 24:45-47, avyani vino e Yesu walandizile lya nkani ukuti avino viliwacitika mu manda ya kulecelezya?

⁹ Wazyani Mateyu 24:45-47. E Yesu walandizile lya nkani ukuti mumanda yakulecelezya, alisonta ‘umuzya wa cisinka swinya uwamano’ uwakupekanizizya awantu wakwe ivya kulya vya ku muzimu. Fwandi tutakuvwilika nanti katicinye ukuti umuzya wacisinka akuwombesya nkaninye mwe ya-a amanda. Swinya wonye wo-o, avino akucita. E Yesu intunguluzi yitu, akawomvya iwumba ilitici ilya wapakwe ukupekanizizya awantu wa kwe Leza na wantu wanji wano wakuvwambisya ukusambilila icine ivya kulya vya ku muzimu “pa mpindi nzipile.” Wa-a awonsi wasilola ukuti awakapitawo pi suwilo lye wanji. (2 Kor. 1:24) Lelo wamanya ukuti e Yesu Klistu awili e ‘nankolelo swinya e songo wavita’ uwa wantu wakwe.​—Ayize. 55:4.

10. Alibuku ci pe ya-a yano yali pa cikope lino lyamyavwizye ukutalika ukuwombela Yehova?

¹⁰ Ukufuma mu 1919, umuzya wa cisinka wapekanya amabuku amalekane lekane yano yavwa awantu awavule wano wakavwambisya ukusambilila icisinka ca mu Baibolo. Mu 1921, umuzya wizile afumya ibuku lya kuti The Harp  of God ilya kuwomvya pakwavwa wano wakulondesya ukumanya icine ukusambilila amasambililo yakutalicila. Mukupita kwa mpindi kwizile akufuma amabuku nayanji. Alibuku ci pe ya-a lino lyamyavwizye ukumanya nukukunda Umukwasi witu uwa kwi Yulu? Uzye ali buku lyakuti “Lekeni Lesa Abe Uwa Cine,” Icine Icitungulula ku Bumi bwa Ciyayaya, Kuti Waikala Kuli Pe na Pe Muli Paradaise Pe Sonde, Ukwishiba Uko Kutungulula ku Mweo wa Muyayaya, Bushe Cinshi Baibolo Isambilisha?, Acani Cino Baibolo Ikasambilizya? nanti alibuku lya kuti, Ungikala Amanda Pe!, lino lyafumile nombanye? Ya-a amabuku yawezileko kukutwavwa ukupanga awasambi. Swinya yafumanga pa mpindi yilyanye pano yakulondekwa.

11. Amulandu ci wuno cacindamila kwe swensinye ukusambilila pe Yehova na pe Baibolo?

¹¹ Asawapya vye watupu wano wazipizile ukusambilila navinji pe Yehova na pe Baibolo. Swensinye tuzipizile ukusambilila. Umutumwa e Paulo walemvile ukuti: “Ichakulya icikale, cheni achakwe wasongo.” Wakonkinyepo nukulanda ukuti ukukonka vino tukusambilila mu Baibolo kulitwavwa “ukupawula ivizima mu viwipe.” (Hebe. 5:14) Pamulandu wakuti imiwele ya wantu yiwifile nkaninye mu nsi, cingatutalila ukukonka amasundo ya kwe Yehova. Lelo nanti ciwe wo-o, e Yesu akasinincizya ukuti twasambilila vino vikulondeka pakuti tutwalilile ukuwa ni suwilo iliwome. Tukapocelela vyo-o ivya kulya ukupitila mwi Zwi lya kwe Leza e Baibolo. Umuzya wa cisinka akapekanya nukusalanganya vyo-o ivya kulya ukupitila muwutunguluzi wa kwe Yesu.

12. Uzye tukacindika wuli izina lya kwe Leza ngati avino Yesu wacitanga?

¹² Tukacindika izina lya kwe Leza ukulingana navino akalonda ngati avino Yesu wacitanga. (Yoha. 17:6, 26) Ku cakulolelako, mu 1931 twatalisile ukwitwa ukuti Inte zya kwe Yehova. Co-o cikalanjizya vino twacindika izina lya  kwe Leza navino tukalonda ukumanyicilwa pi zina lya Mukwasi witu uwa kwi yulu. (Ayize. 43:10-12) Swinya ukufuma mu October mwe wulyanye umwaka, izina lya kwe Yehova watalisile ukuliwika pa nkupo ya Ulupungu lwa kwe Malonda. Cinji acakuti, mwe Baibolo ya Baibolo ya Malembo ya Calo Cipya wanyocezyamo izina lya kwe Leza monsinye muno lizipizile ukuwa. Wo-o vino wacita vyapusanako nkaninye navino awa mu macalici ye wano wakati awina Klistu wakacita, wano wafumya izina lya kwe Leza mu ma Baibolo yawo.

13. Acani cino calenga tusuwile ukuti e Yesu akawomvya ‘umuzya wa cisinka swinya uwa mano’ mwe ya-a amanda? (Yohani 6:68)

¹³ Ukupitila ‘mumuzya wa cisinka swinya uwa mano,’ e Yesu wawikako iwungwe mu nsi lino likatunjilila ukupepa kwa cisinka. Uzye mukakwivwa wuli pe lyo-o iwungwe? Pano mukwasuka, mufwile mwizuka na vino umutumwa Peter wakolowozizye e Yesu ukuti: “Nganaswe twandi tuye kweweni? Vino wewenye awemuntu uli namazwi yano yakapa uwumi wamuyayaya.” (Yoha. 6:68) Uzye nga twawa kwinye wanga tutawa mwi wungwe lya kwe Yehova? Ukupitila mwe lyonye iwungwe, e Klistu akasinincizya ukuti tuli na vyonsinye vino vikulondekwa pakuti tutwalilile ukuwa awa cisinka kwe Yehova. Swinya akatusambilizya nivya kuwomba icete umulimo wakuwizya. Cinji acakuti, akatwavwa ukuzwala “uwuntu wupya” pakuti twasecelesya e Yehova.​—Efes. 4:24.

14. Avizima ci vino muzanilemo mukuwa mwi wungwe lya kwe Yehova mu mpindi ye Corona?

¹⁴ E Yesu akatupekanizizya ivya kukonka nga cakuti kwawa intazi iyili yonsinye. Swinya co-o cizile aciloleka apatiswenye mu mpindi ye Corona. Awantu awavule watamanyile ivyakucita, lelo e Yesu watunenile ivyakukonka pa kuti tutwalilile ukuyicinjilila. Watuwomelezizye ukuzwala  ama masiki pano tuli ku cintu wavule nukukana palamana nkani na wantu wanji. Swinya wa eluda wawacinkuzileko ukuti walanzyanya lyonsinye na wa mwi wungwe nukulola nga cakuti wali awacinjililwe lwa ku muwili na lwa ku muzimu. (Ayize. 32:1, 2) Cinji acakuti, watuwomelezyanga nukutunena ivya kukonka ukupitila mu malipoti Ayiwumba Lino Likatungulula.

15. Awutunguluzi ci uwakukonka wuno watupile mu mpindi ye Corona pa vyakulongana nukuwomba umulimo wakuwizya, swinya avizima ci vino vyafumilemo?

¹⁵ Mu mpindi ye Corona, watunenile ivyakukonka pa vyakulongana ni vyakuwomba umulimo wakuwizya. Patazimvile twizile atutalika ukuwomvya intaneti pakulongana ukulongana kwa piwungwe, ukwamuputule nukwa citungu. Swinya twatalisile ukuwizya ukuwomvya amakalata na ma foni. E Yehova watulambuzile pakuwombesya kwitu. Awa mu misambo watuma amalipoti yano yakulanjizya ukuti wakawizya wavulizileko. Awavule wazanilemo ivintu ivizima nkaninye pe yo-o impindi.​—Lolani akambokosi kano kakuti “ E Yehova Akapaala Umulimo Witu Uwakuwizya.”

16. Avyani vino tuzipizile ukusuwila?

¹⁶ Mu mpindi ye Corana wamwi wafwile welenganyanga ukuti iwungwe likuwomyavye ivintu. Lelo mukupita kwa mpindi awavule wizile wasinincizya ukuti vino iwungwe lya tunenanga ukukonka avya cisinka. (Mat. 11:19) Swinya nga twelenganya pe vino e Yesu akutungulula awantu wakwe pe yo-o impindi, tukasuwila ukuti asamulandu nivili vyonsinye vino tungiza tupitemo ku nkolelo, e Yehova nu Mwana wakwe umukundikwe waliwawa naswe.​—Wazyani Waheberi 13:5, 6.

17. Mukakwivwa wuli ukutungululwa ne Yesu?

¹⁷ Tukakwivwa icete nkaninye ukutungululwa ne Yesu. Twawa mwi wungwe muno mutawa akapatulula ka nkanda, aka nsi ni ndimi. Tukapocelela ivya kutwavwa ukupitila mwi Zwi lya kwe Leza Baibolo nu kusambilila ivya kutwavwa pa kuwomba icete umulimo wa kuwizya. Swensinye wakatusambilizya ivya kuzwala uwuntu wupya swinya tukasambilila ni vya kukunda awantu wanji. Twawa ni milandu imivule iyakwivwilapo icilumba pa ntunguluzi yitu e Yesu!