E Yesu wasambilizyanga awantu ukuti wazipizile ukuwa nu mutende na wantu wanji. Lelo impindi yimwi wanenile awatumwa wakwe ukuti: ‘Mutize muwakwelenganya muwati niza mukuleta umutende munsi; awe ntiza mukuleta umutende, ukuwa alisumo. Niza mukupatania awanachonsi kwewayisi nawo awanachanachi kwewanyina, wanyinavyala wana kwewanyinavyala.’ (Mat. 10:34, 35) Uzye e Yesu wasulanga mwinye pakulanda wo-o?

E Yesu atalondanga awa mu ndupwa ukupawunkana, lelo wamanyile ukuti vino akasambilizya vyalinji nukulenga indupwa zimwi ukupawunkana. Fwandi wano wakulonda ukubatizwa nukuwa awasambilizi wa kwe Yesu, wazipizile ukumanya ukuti, asa we wonsi mu lupwa wano walikunda pe vino walipingulapo ukucita. Amuno mpindi zimwi waliwawacuzya kwa lupwa nanti kwe wano watwalwako nanti ukutwala, naco-o ciliwalenga ciwawawomela ukutwalilila ukukonka vino Yesu akasambilizya.

E Baibolo yikawomelezya awina Klistu “ukwikala umutende na wantu wonsi.” (Roma. 12:18) Lelo vino Yesu akasambilizya vingawa ngati “alisumo” mu ndupwa zimwi. Co-o cikacitika nga cakuti wumwi mu lupwa watalika ukukonka vino e Yesu akasambilizya apano walupwa lwakwe wakumucuzya nukumulesya. Nga cawa wo-o, awa mulupwa wakakwiza mukuwa “awalwani” kwe wino wasolapo ukumanya icinsinka.​—Mat. 10:36.

Awasambilizi wa kwe Klistu wamwi wano wawa mu ndupwa muno asa wewonsi wano Ante zya kwe Yehova, mpindi zimwi wakapita mu ntazi zino zikakwelezya wuciwuza wawo ne Yehova ne Yesu. Ku cakulolelako, walupwa wano asa wakapepa wangawapaticizya ukuzevyako ama holide ya mu vipepelwe. Nga cawa wowo, aweneco awano wazipizile ukusolapo wino wakulonda ukusecelesya. E Yesu watili: “Wensi wino wakunda yisi nanti wenyina walusya nene atazipila nene.” (Mat. 10:37) Lelo nanti ciwe wo-o, e Yesu atasulanga mukuti wino akulonda ukuwa amusambilizi wakwe atazipizile ukukunda nkani awakwasi. Cino wasambilizyangapo awasambilizi wakwe acakuti, wazipizile ukumanya ivyakusolapo ukucita icintu icicindame mu wumi. Fwandi nga cakuti walupwa wano asa wakapepa wakutulesya ukuwombela Yehova, tusileka ukuwakunda, lelo twamanya ukuti, ukukunda Yehova akuno kuzipizile ukuwa pa nkolelo.

Ukwasowa nukuvwilika ukutucuzya kwa lupwa kungalenga twakwivwa uwuwi nkaninye. Lelo nanti ciwe wo-o awasambilizi wa kwe Yesu wazipizile wakwizuka amazwi yano Yesu walanzile ayakuti: ‘Wensi wino asinakusenda icimuti cakuculilapo nukunkonka munzila zyane atazipila nene.’ (Mat. 10:38) Mu nzila yinji tungalanda ukuti, awina Klistu wakalola ukuwacuzya kwa lupwa ukuti antazi yimwi yino awasambilizi wa kwe Klistu wazipizile ukusipicizya. Lelo wakasuwila ukuti, imiwele yawo imizima yingalenga wa lupwa ukupilula amelenganyo yawo nukutalika ukusambilila Baibolo.​—1 Pet. 3:1, 2.