Swensinye twatantika impindi yakuwa ni sambililo lya palwitu. Nomba tungacita wuli pa kuti twawomvya icete yo-o impindi? Ica kutalicila, mwawika amano kwe vino mukuwazya. Muliwazanamo ivizima ivivule nga cakuti mukuwazya vye ivyewo vitici, ukucila ukuwazya ivivule muluwilo swinya pamuku wonganye.

Mwatalicila ukucita ivicindamisye (Efes. 5:15, 16) Vyo-o vino vyakonkapo vingamyavwa ukucita wo-o:

• Mwawazya Baibolo cila wanda. (Amalu. 1:2) Cingazipa ukutalika ukuwazya ivipandwa vya mu Baibolo vino vikawa mu kalibuku ka Mikaliile cila sabata.

• Mwapekanizizya ukulongana kwa Ulupungu lwa kwe Malonda nu kwa Mikaliile kuno kukawako mu kasi ke sabata. Mwakwasukapo.​—Amalu. 22:22.

• Nga cakuti mwakwata impindi, mwacitako na vinji ivya kuwomya wuciwuza winu ne Yehova, ponga ngati akuwazya ama magazini ya kucintu wavule, ukutamba ama vidyo, nga ni vipande vinji ivya pa jw.org.

• Mwavwambilizya ivyewo na vinji. Mungavwambilizya pa ntazi yino mukweti, pi wuzyo lino mukavwambisya ukumanya icasuko, nanti pi lyasi vye linji lino mukavwambisya ukwivwicisya.