E LISA * watili “Pakutalika, icikuku cino awanawitu na wankazi wandanjizizye acino camfisile sana pa mwezo.” Cino walandangapo acakuti, icikuku acino camwavwizye ukuti asambilile icine. Wonye avino calinji na kwe Anne, watili, “Icikuku cino Inte zya kwe Yehova wandanjizizye acino calenzile intemwe sana icine, ukucila na pevino wansambilizyanga.” Wonsinye wa-a wankazi wakakwivwa icete sana ukuwazya Baibolo nukwelenganya pe vino wakuwazya, lelo cino cikawafika sana pa mwezo acikuku.

Tungacita wuli pakuti twalanjizya ulukundo luno lungafika awantu pa mwezo? Twalanda panzila ziwili: ukupitila mwevino tukalanda namwevino tukacita. Apano twandi tusambilile wano tungalanjizyako conye icikuku.

Umuci wino walumbulwa pa Imilumwe icipandwa 31, aweyo wino akawomvya ‘isundo lya cikuku’ pano akulanda. (Imilu. 31:26) Akaleka ‘isundo’ alimwavwa ukumanya vino wandi alande na vino wandi avilande. Awalume na wakwasi awonsi nawonye wazipizile ukuwomvya lyo-o ‘isundo’ pano wakulanda. Awakwasi awavule wamanya ukuti nga cakuti wakulanda muwukali, watanga walanzyanya icete na wana wawo. Swinya na wana wawonye watanga wakwivwa kwe vino wakulanda. Lelo nga cakuti awakwasi wakulanda mu cikuku, ciliwapepucila na wana wawonye ukwivwa vino wakulanda nukuvikonka.

Nampo nga mwe wakwasi nanti pole, mungacita wuli pakuti mwalanda mu cikuku? Ukwavwa kumwi tukakuzana pa Imilumbe 31:26 pano pakati: “Akuvwanganga [umwanaci] namano mazima.” Co-o casanzyamo ukusola amazwi yakulanda ni nzila yakuyalandilamo. Nomba co cingatwavwa, akuyikolowozya ukuti, ‘Uzye amazwi yano nkulonda ukulanda yandi yalenge wino inkulandako ukukalipa nanti uzye yandi yalenge tupange umutende?’ (Imilu. 15:1) Muzipizile ukwelenganyapo sana pano mutani mulande icili consinye.

Umulumbe wunji wukalanda ukuti: “Amazwi mawipe yakachisa ayasonkontela ngati alupanga.” (Imilu. 12:18) Nga cakuti tukwelenganya pe vino wanji wangivwa pa mazwi yano tukulonda ukulanda ni nzila yino tukuyalandilamo, cingalenga tuzifyeko mwe vino tukalanda. Ukuwomvya ‘isundo lya cikuku’ kungatwavwa ukukana landa amazwi yano yangalumisya wanji umwezo. (Efes. 4:31, 32) Cinji acakuti tuliwakwelenganya ivizima nukuwomvya amazwi ya cikuku swinya amazima nukuteka umwezo pano tukulanda. E Yehova walanjizizye ukuti akawomvya zyo-o inzila zino twalandapo pano walandanga ne Eliya umuwomvi wakwe wino walinji ni ntete nkaninye. Umungeli wino wimililangako e Yehova walanzile ‘nizwi itichi imyalale.’ (1 Izya. 19:12) Lelo nanti ciwe wo-o ukuwa nicikuku, kusipelelavye pakulanda mucikuku. Tuzipizile nukucita vino vikulanjizya ukuti twawa ni cikuku. Nomba tungacita wuli wo-o?

Tukalanjizya ukuti tukukolanya e Yehova nga cakuti tuli nicikuku mwe vino tukulanda na vino tukucita. (Efes. 4:32; 5:1, 2) E Lisa wino tulanzilepo kaali walondolozile pe vino wa Nte wamulanjizizye icikuku. Watili: “Pano wanenile ulupwa lwitu ukuti wazipizile ukucinta ukwasowa nukusumba impindi, awina mupalamano wa Nte 4 awatwalane, waposile ulusa ku ncito pakuti wize watwavwe ukulonga. Pe yoyo impindi lyo ntani ntalike nukusambilila Baibolo!” Wo-o vino awanawitu na wankazi  walinji ni cikuku calenzile e Lisa awavwambisya sana ukusambilila icine.

E Anne wino tulanzilepo pakutalika, nawenye wasalifizye pe vino wa Nte walinji ni cikuku kwe weliwe. Walanzile ukuti: “Pa mulandu na vino awantu wali mu nsi, nivwanga intete swinya cambomezile ukusuwila umuntu uwili wensinye. Fwandi pano nasunkinye Inte zya kwe Yehova ntawasuwizile. Nayikolowozyanga ukuti, ‘Amulandu ci wuno wambicizileko sana amano?’ Lelo wino wansambilizyanga e Baibolo walinji ni cikuku nkaninye na co-o calenzile imusuwile.” Cani cafumilemo? E Anne watili “Mukupitwa kwa mpindi nizile intalika ukuwikako sana amano kwe vino nasambililanga.”

Ndi vino muweni, cino cafisile sana e Lisa ne Anne pa mwezo, acikuku cino awanawitu na wankazi mwi wungwe wakweti. Swinya conye, acino calenzile e Lisa ne Anne watalike ukuvwambisya sana ukusambilila icine. Icikuku cino awa mwiwungwe wawalanjizizye, calenzile watalike ukusuwila sana e Yehova nawantu wakwe.

Awantu wamwi pamulandu na vino wawakuzya nanti pamulandu ni ncende kuno  wakakwikala, cikawapepucila ukulanda amazwi yacikuku nukumwentula. Acizima nkaninye ukuzana ukuti awantu wamwi wawa awafuke pamulandu vye ni ntambi zyawo nanti vino wawakuzya. Lelo nga cakuti twawa nicikuku pamulanduvye watambi nanti pamulandu na vino watukuzya, lyo cisakusula mukuti tukukolanya icikuku ca kwe Leza.​—Linganyaniko Imili. 28:2.

Icikuku ca cisinka cawa pavikomwa vya kumuzimu ivya kwe Leza. (Gal. 5:22, 23) Fwandi pakuwa na co-o icikuku kano umuzimu wa kwe Leza awuno watwavwa ukuwa naco, mwe vino tukalanda nu kucita. Nga cakuti umuzimu wa kwe Leza watwavwa, apano tungakolanya e Yehova ne Yesu. Swinya pa mulandu wakuti swe wina Klistu, tukawika sana amano ku wantu wanji. Fwandi cino cikalenga twawa nicikuku ca cisinka, apamulandu wakuti twakunda e Yehova na wantu wanji. Acino icikuku ca cisinka acoco cino cikafuma pansi ya mwezo swinya cino Yehova akatwavwa ukuwa naco.

Cingawa acipepuke nkaninye ukuwa nicikuku kuwantu wano wakatulanjizya icikuku nanti kwe wano twamanya. (2 Sam. 2:6) Inzila yonga yino tungacitilamo wo-o, akuwasalifya. (Kolo. 3:15) Nomba tungacita wuli nga cakuti twalola ukuti wumwi atakulondeka ukumulanjizya icikuku?

Teyelenganyani pe co-o: e Yehova wawa acakulolelako icizima nkaninye kukulanjizya icikuku ku wantu wonsinye asamulandu wakulondekwa ukuwalanjizya nanti pole. Swinya Izwi lyakwe e Baibolo likatunena umulandu uwucindame uwakulanjizizya icikuku. Izwi lyakuti “Inkumbu” waliwomvya imiku imivule mu Mawaliko ya ciGreek aya wina Klistu. Lyo-o izwi lingasula na mukupa umuntu wumwi cimwi pamulandu vye wakuti mwawa nu mwezo wakupa, asapamulandu wakuti atekucilonda. Uzye e Leza akatulanjizya wuli icikuku?

Teyelenganyani pa wantu ukuvula wano Yehova walanjizya icikuku ukupitila mukuwapa vino wakulonda pakuti watwalilile ukuwa nu wumi. (Mat. 5:45) E Yehova watalisile ukutulanjizya icikuku lyo tutani tumumanye nukumumanya. (Efes. 2:4, 5, 8) Ku cakulolelako, wapile awantu wonsinye Umwana wakwe wenganye wino wakundisya. Umutumwa Paulo walemvile ukuti e Yehova wapile inzuwi ukulingana ‘ninkumbu zyakwe izikulu.’ (Efes. 1:7) Cinji acakuti, nanti acakuti tukawembuka nukumulumisya umwezo, weni akatwalililavye ukutucinjilila nu kutusambilizya. Ivya kukonka vino akatunena na mazwi yakwe vyawa ngati “amvula yino ikasansa.” (Amasu. 32:2) Pasi nanti cimwinye cino tungakumanisya ukumupa pakumulipila pe vino akatulanjizya icikuku. Swinya wanga Yehova atatulanjizya icikuku, nga tutakwatapo ni suwilo lya ku nkolelo.​—Linganyaniko ne 1 Pet. 1:13.

Ukwasowa nukuvwilika, icikuku ca kwe Yehova cikatusansamusya swinya cikalenga twayivwa ukuti twakundikwa. Fwandi na swenye tuzipizile ukuwombesya pakuti twakolanya e Yehova ukupitila mukukana sola wano tuzipile ukulanjizya inkumbu na wano tutazipizile ukulanjizya. Swinya tuzipizile ukutwalilila ukucita wo-o mu mikalile yitu iye cila wanda. (1 Tes. 5:15) Nga tuli nicikuku lyonsinye tukawa ngati acilungula ca mulilo mu mpindi ya mpepo. Cinji acakuti, nga tukucita wo-o, tukawomelezya awanawitu na wankazi, wano tukawomba nawo, wano tukasambilila nawo na wina mupalamano.

Teyelenganyani pe wamwi mu lupwa lwinu nanti pa wantuvye wanji wano wazanamo ivizima pamulandu ni milandile ni micitile yinu iya cikuku. Ku cakulolelako, ncepamwi mwi wungwe muno mwawa mungalanga muliko wamwi wano wakulondeka ukuwavwa ukuzifya pa ng’anda, ku vyalo nanti imilimo yinji ndi vino ukuwakalilako vino wakulonda. Cinji acakuti, nga cakuti pano muli mu mulimo wakuwizya mwazana wumwi wino akulondeka ukumwavwa, Uzye mungamwavwa?

Lekani tutwalilile ukukolanya e Yehova mwe vyonsinye vino tukalanda nu kucita, ukupitila mukukonka ‘isundo lya cikuku.’