ICIPANDE CA KUSAMBILILAMO 23
ULWIMBO 28 Ukuwa Ciwuza wa kwe Yehova
E Yehova Akalonda Tuwe Mwitenti Lyakwe
“Ndiya nkikalange nawo [mwitenti] imbe ne Leza wawo.”—EZEK. 37:27.
VINO TWANDI TUSAMBILILE
Twandi tusambilile muno cikasula ukuwa mwitenti lya kwe Yehova na vino akatusakamala nga twawa mwenemo.
1-2. Avyani vino tukasambililako ku mazwi yano Davidi walanzile?
MUNGASUKA wuli nga wumwi wamikolowozya ukuti, Uzye e Yehova mulinawe wuli? Ncepamwi mungasuka ukuti, Amukwasi wane, we Leza wane nanti we Ciwuza wane.’ Kwawa amalumbo na yanji yano ncepamwi mungawomvya pa kulondolola e Yehova. Nomba uzye mukamulola nu kuti Amweneco witenti lino mungikalamo?
2 Imfumu Davidi yakolinye e Yehova ku mweneco witenti swinya wakapepa wacisinka wawakolinye ku weni wa kwe Yehova. E Davidi wakolowozizye ukuti: ‘We Mfumu Leza, ngawaweni wano waliyikala mwitenti lyako? Ngawaweni waliyikala pa mwamba wako uwutele?’ (Amalu. 15:1) Kwe ya-a amazwi tukasambililako ukuti tungawa swe weni wa kwe Yehova, akuli ukuti iviwuza vyakwe. Ukwasowa nu kuvwilika lwawa alongo nkaninye wo-o vino Yehova akalonda tuwe swe viwuza vyakwe.
E YEHOVA AKALONDA TUWE SWE VIWUZA VYAKWE
3. Weweni wino watalicizile ukuwa mwitenti lya kwe Yehova, swinya wonsinye wawili wayivwanga wuli?
3 E Yehova walinji wenganye pano atani apange icili consinye. Lelo wizile ayelewula Umwana wakwe e Yesu. We-e umwana wakwe, wizile awa ngati amweni mwitenti swinya e Yehova wivwile icete nkaninye ukumupocelela. E Baibolo yikati e Yehova walinji ni “chimwemwe” nkaninye pa mwana wakwe. Umwana wakwe nawenye walinji ni ‘chimwemwe pe Yehova.’—Imilu. 8:30.
4. Awaweni wanji wano wizile awawa mwitenti lya kwe Yehova?
4 Mukupita kwa mpindi e Yehova wizile ayelewula awangeli swinya nawonye wizile awawa mwitenti lyakwe. Awangeli wakakwitwa ukuti “awanakwe Leza” swinya wawalondolola ukuti wakakwivwa icete ukuwa ponga ne Yehova. (Job 38:7; Dan. 7:10) Pa myaka imivule, mwitenti lya kwe Yehova mwalinjivye ivyelewulwa vya ku muzimu. Lelo mukupita kwa mpindi wizile ayelewula awantu, wano nawo wizile awawa mwitenti lyakwe. Pe wa-a awantu palinji e Enoki, Nowa, Abrahamu, ne Job. E Baibolo yikalanda ukuti wa-a, walinji aviwuza vya kwe Yehova pa mulandu wakuti wamwivwilanga.—Inta. 5:24; 6:9; Job 29:4; Ayize. 41:8.
5. Avyani vino tukasambililako ku wusesemo wuno wawa pe Ezekiel 37:26, 27?
5 Pa myaka imivule e Yehova watwalilila ukwita iviwuza vyakwe ukwiza mwitenti lyakwe. (Wazyani Ezekiel 37:26, 27.) Ku cakulolelako, kuwusesemo wa kwe Ezekiel tukasambililako ukuti e Yehova akalonda wakapepa wakwe awa cisinka ukuwa na wuciwuza uwuwome na weliwe. Wawalaya ukupangana nawo ‘ilayano lya mutende.’ Wo-o uwusesemo wukalanda pa mpindi pano wano wawa ni suwilo lya kwikala kwi yulu na wano wawa ni suwilo lyakwikala munsi, walilemenkana ponga mwitenti lya kwe Yehova ilya mankolanya nu kuwa “uwufyo wonga.” (Yoha. 10:16) Swinya yo-o impindi, ayili yonye yino tufisilepo!
E YEHOVA AKATUSAKAMALA KONSINYE KUNO TULI
6. Uzye wumwi akakwiza mukuwa wuli mwitenti lya kwe Yehova, swinya akwinye kuno kwawa lyonye itenti?
6 Mu mpindi pano walembanga e Baibolo, amatenti ya wantu vyalinji avifulo muno wapuzilanga nu kucinjililwa ukulingana na vino kucile. Umweni nga waya mwitenti wenecelanga umweneco we lyolyo itenti ukumusakamala. Nga twapa uwumi witu kwe Yehova, tukawa swe weni mwitenti lyakwe ilya mankolanya. (Amalu. 61:4) Twawa na vyonsinye vino vikalondekwa pakutwalilila ukuwa na wuciwuza uwuwome ne Yehova na wano wawa mwe lyo-o itenti. Wakapepa wa kwe Yehova watawavye ku cifulo conga. Ku cakulolelako, mufwile mwayapo na kunsi zinji, ncepamwi mwayile mukulongana kwa citungu ukuyiwele swinya mwayile amulolana na wantu wano wawa ni nsansa nkaninye pakuwa mwitenti lya kwe Yehova. Fwandi mukufupizya tungalandavye ukuti itenti lya kwe Yehova lyawa konsinye kuno kwawa wakapepa wakwe awa cisinka.—Ukuwu. 21:3.
7. Amulandu ci wuno tungalandila ukuti awafwe wonsinye wano walinji ni cisinka wacili wawa mwitenti lya kwe Yehova? (Lolani ni cikope.)
7 Uzye tungalanda ukuti awafwe wano walinji ni cisinka nawonye wawa mwitenti lya kwe Yehova? Nawonye amuno wawa! Amuno e Yehova acili akawizuka swinya kwe weliwe wawa ngati wacili wali nu wumi. E Yesu walondolozile ukuti: “Nu Musa-nye wapanichisizye kuno awafwe wakazyulupulwa kumfwa. Pano ichimpuza chakanga wavwanzile ku Mfumu e Leza ati ‘we Leza wakwe Abrahamu, e Leza wakwe Ayizeki, e Leza wakwe Yakobi.’ Chonye-choo chikusula ukuti we Leza wawawumi, asi we Leza wawafwe, amuno kwakwe weliwe vyonsinye avyawumi.”—Luk. 20:37, 38.
Nawalyanye wano wafwa wano walinji ni cisinka wacili wawa mwitenti lya kwe Yehova (Lolani paragrafu 7)
IVIZIMA NI VYAKUCITA VINO VYAWAMO
8. Avizima ci vino vyawa mukuwa mwitenti lya kwe Yehova?
8 Ndi wulyanye vino itenti likawomba ngati acisawu nanti icimpepwa swinya ngati acifulo cakupuzilamo, avino ni tenti lya kwe Yehova ilya mankolanya likacinjilila awawomvi wakwe kwe vino vingonona wuciwuza wawo na weliwe nu kuwapa isuwilo. Nga twatwalilila ukuwa ni cisinka, kusi icili consinye cino Satana angacita cino cingonona wuciwuza witu ne Yehova. (Amalu. 31:23; 1 Yoh. 3:8) Na munsi mpyanye e Yehova alitwalilila ukucinjilila awawomvi wakwe awa cisinka kwe vino vingonona wuciwuza wawo na weliwe na kumfwa.—Ukuwu. 21:4.
9. Uzye e Yehova akalonda wano wawa mwitenti lyakwe ukuwa wuli?
9 Alongo ukuwa mwitenti lya kwe Yehova muno tukayitopwa wuciwuza uwuwome na weliwe umuyayaya. Avyani vino tuzipizile ukucita pakuti tutwalilile ukuwa mwitenti lyakwe? Nga cakuti wumwi wamita ku ng’anda mungelezya na maka ukucita vino vingamusecelesya. Ku cakulolelako, nga wakazula insapato pa kwinjila mu ng’anda, umweneco wa ng’anda angakwenecela ukuti namwemwe muzule pano mutani mwinjile. Wonye avino tukalonda ukumanya vino Yehova akalonda wano wawa mwitenti lyakwe wacita pakuti tutwalilile ukuwamo. E Yehova akakwenecela ukuti tumukunde swinya lonye ulukundo aluno luzipizile ukulenga twacita vyonsinye vino tungakumanisya “kukumusecelesya.” (Kolo. 1:10) Kweni we ciwuza witu, lelo tuzipizile twakwizuka nu kuti we Leza witu swinya Amukwasi. Fwandi tuzipizile twamucindika nu kuwa nakatina kwe weliwe amuno wayana ukupocelela umucinzi. (Amalu. 25:14) Kanye akatina akano kalenga tutacita vino vingalenga afulwe. Awuli umulandu wuno tukalondela ukuwa “awayicefye” kwe Leza.—Mika 6:8.
E YEHOVA ATALINJI NA KAPATULULA KU WINA ISRAELI
10-11. Uzye e Yehova walanjizizye wuli ukuti atawa na kapatulula pano awina Israeli walinji mumayonde ya ku Sinai?
10 E Yehova atawa nakaputulula ku viwuza vyakwe. (Roma. 2:11) Tungasinincizya co-o, kwe vino wacisile ku wina Israeli pano walinji mu mayonde ya ku Sinai.
11 Pano Yehova wafumizye awina Israeli mu wuzya mu Egypt, wasozile wasimapepo awakuwomba pi hema nanti pi tenti lyakwe ilyakupepelapo. Awina Levi nawo wawapile imilimo yinji pi tenti lyakupepelapo. Lelo nanti ciwe wo-o, e Yehova wasakamalanga awina Israeli wonsinye icili conganye asa mulandu wawombelenga pi tenti nanti pole. Amuno e Yehova atawa nakapatulula.
12. Avyani vino Yehova wacisile ku wina Israeli pano walinji mu mayonde pa kulanjizya ukuti atawa na kapatulula? (Ukufuma 40:38) (Lolani ni cikope.)
12 Umwina Israeli wensinye walinji nu longo lwakuwa we Ciwuza wa kwe Yehova asa mulandu wawombanga pi hema, wapalamizileko nanti pole. Ku cakulolelako, e Yehova wawisile intumba yi wingo ni ntumba ya mulilo pi hema papela pa kuti uluko lonsinye lwalola. (Wazyani Ukufuma 40:38.) Nga cakuti iwingo lyakatuka, na wano wikalilanga ukutalinye walilolanga, awazengulula amatenti yawo, awalonganika iviya nu kutalika uwulendo. (Impe. 9:15-23) Swinya wonsinye wivwanga nga cakuti amapenga yawili aye silivala yalila nu kumanya ukuti wazipizile ukutalikako uwulendo. (Impe. 10:2) Fwandi ukwikalila ukupipi ni hema kutasulanga mu kuti lyo umuntu wawa na wuciwuza uwuwome ne Yehova ukucila wano wikalila ukutali. Lelo uwili wensinye mwe lo-o uluko wamanyanga ukuti wino angamutungulula nu kumucinjilila we Yehova. Wonye avino cawa na kwe sweswenye mwe ya-a amanda, e Yehova watukunda, akatusakamala nu kutucinjilila asa mulandu na kuno tukakwikala.
Ihema lino lyawezile pa kasi ka nkambi lyalanjizyanga vino Yehova atawa na kapatulula (Lolani paragrafu 12)
E YEHOVA ATAWA NA KAPATULULA NA MWEYANYE AMANDA
13. Anzila ci yimwi yino Yehova akalanjizizyamo ukuti atawa na kapatulula?
13 Awantu wa kwe Leza wamwi wakakwikalila mupipi na ma ofesi makulu aya Nte zya kwe Yehova na ku misambo. Ne wamwi apano wakawombela. Na co-o cikalenga wawomba imilimo imipusane pusane yino yikacitika pe zyo-o incende swinya wakawa nu longo lwakuwa ponga na wano wakatungulula. Ne wanji wakawomba umulimo wa mpindi zyonsi uwuyiwele nanti wukangalila wa muputule. Nga cakuti mutikalila ukufupi nakuno kwawela amaofesi ya Nte zya kwe Yehova swinya asa kuno mukawombela, muzipizile ukumanya ukuti e Yehova wakunda wonsinye wano wawa mwitenti lyakwe. Swinya akawasakamala mwe vino wakalondekwa. (1 Pet. 5:7) Cinji aca kuti, kutawa umuwomvi wakwe nanti wumwinye wino akasyala ukwasowa ukumupa ivya kulya vya ku muzimu, ivya kukonka ni vya kumucinjilila vino vikulondekwa.
14. Anzila ci na yinji yino Yehova akalanjizizyamo ukuti atawa na kapatulula?
14 Inzila na yinji yino Yehova akalanjizizyamo ukuti atawa nakapatulula, awo vino walenga awantu ukuzinguluka insi yonsinye ukuwa ne Baibolo. Pano Baibolo yalembwanga, yalinji vye mu vitundu vitatu: iciHebere, iciAramaiki, ni ciGreek. Nomba uzye wano wakawazya Baibolo mu vitundu vino yalembezilwemo, awano wawavye na wuciwuza uwuwome ne Yehova ukucila wano watamanya vyo-o ivitundu? Awe! Asa vino cawa.—Mat. 11:25.
15. Avyani vino vyalenga tusinincizye ukuti e Yehova atawa na kapatulula? (Lolani ni cikope.)
15 E Yehova asituzumilizya ukuwa swe viwuza vyakwe pa mulandu wakuti twasambilila sana nanti pa mulandu wa kuti twamanya ivitundu vino walembezilemo e Baibolo. Lelo akapa amano kwe wonsinye munsi, awasambilile na wano watasambililanye. Walenga e Baibolo ukupiliwulwa mu vitundu ivivule. Na co-o calenga awantu ukuzinguluka insi yonsinye wazanamo ivizima mwe vino wakusambilila nu kumanya ivya kucita pakuti wawe iviwuza vyakwe.—2 Tim. 3:16, 17.
Wo-o vino awantu ukuzinguluka insi yonsinye wawa ne Baibolo, cikalanjizya ukuti e Yehova atawa na kapatulula (Lolani paragrafu 15)
TWALILILANI UKUWA MWITENTI LYA KWE YEHOVA
16. Ukulingana ni Imilimo 10:34, 35, avyani vino tuzipizile ukucita pakuti tutwalilile ukuwa mwitenti lya kwe Yehova?
16 Lwawa alongo ulukulu nkaninye ukuwa mwitenti lya kwe Yehova ilya mankolanya. Amuno Umweneco we lyo-o itenti wawa nkaninye ni nkumbu, ulukundo nu mwezo wakupocelela. Cinji aca kuti, atawa nakapatulula. Akapocelela wonsinye, asa mulandu na kuno wakakwikala, inkulilo, amasambililo, inkanda, umutundu ni cimo. Lelo nanti ciwe wo-o, akapocelelavye wano wakamwivwila.—Wazyani Imilimo 10:34, 35.
17. Akwinye kuno tulizana ivyewo na vinji vino vikalanda pakuwa mwitenti lya kwe Yehova?
17 Pa Amalumbo 15:1, e David wakolowozizye ukuti: ‘We Mfumu Leza, ngawaweni wano waliyikala mwitenti lyako? Ngawaweni waliyikala pa mwamba wako uwutele?’ E Yehova wawomvizye e David nye ukulemba icasuko kwe lyo-o iwuzyo mu Amalumbo icipandwa 15. Mu cipande cino cikonsilepo tulilanda pe vimwi vino tuzipizile ukucita pakuti twasecelesya e Yehova nu kutwalilila ukuwa iviwuza vyakwe.
ULWIMBO 32 Wani ku Luwali lwa kwe Yehova!