ICIPANDE CA KUSAMBILILAMO 25
ULWIMBO 7 E Yehova Awino Akatuwomya
Mwakwizuka Ukuti e Yehova we “Leza Mumi”
“Imfumu e [Yehova] Leza amumi!”—AMALU. 18:46.
VINO TWANDI TUSAMBILILE
Twandi tusambilile pa vizima ivivule vino tukazanamo mukwizuka ukuti e Yehova we “Leza wumi.”
1. Avyani vino vikatwavwa ukutwalilila ukupepa Yehova asa mulandu ni ntazi zino tukapitamo?
E BAIBOLO yikakwita amanda yano tufisilepo ukuti “impindi zyawuyimvi.” (2 Tim. 3:1) Awawomvi wa kwe Yehova wasipitavye muntazi zino awantu wonsinye wakapitamo, lelo weni wakawacuzya nu kuwacuzya pa mulandu na vino wazumulamo. Acani cino cikalenga tutwalilile ukupepa Yehova asa mulandu ni ntazi zino tukapita? Cimwi icikulu nkani acakuti e Yehova akatwavwa swinya twamanya ukuti we “Leza mumi.”—Jere. 10:10; 2 Tim. 1:12.
2. Avyani vino twamanya pe Yehova vino vingatuwomya?
2 E Yehova akuno wawa. Akalola intazi zyonsinye zino tukupitamo swinya akavwambisya ukutwavwa. (2 Imila. 16:9; Amalu. 23:4) Ukumanya icisinka cakuti e Yehova we Leza wa wumi, kungatwavwa ukuwasipicizya intazi zino tukupitamo. Lekani tulande pe vino ukumanya co-o icisinka kwavwizye e Davidi.
3. Uzye e Davidi wasuzile mwinye pano walanzile ukuti “Imfumu e Leza amumi”?
3 E Davidi wamanyile e Yehova swinya wamusuwizile. Wapefile kwe Yehova ukuti amwavwe pano awalwani wamulwisyanga pano palinji ni Mfumu Sauli. (Amalu. 18:6) Pano Yehova wasusile ipepo lyakwe nu kumupususya, walanzile ukuti: “Imfumu e Leza amumi!” (Amalu. 18:46) Uzye wasuzile mwinye pakulanda wo-o? Ibuku limwi likalanda ukuti walanjizyanga vino wasuwizile e Yehova ukuti “we Leza wawumi wino akakwavwa awawomvi wakwe.” Fwandi vino vyamuciticilanga avino vyalenzile amanye ukuti e Yehova walolanga vino wapitangamo swinya wavwambisyanga ukumwavwa. Conye acino calenzile atwalilile ukuwombela Yehova nu kumusecelesya.—Amalu. 18:28, 29, 49.
4. Avizima ci vino tukazanamo mukusinincizya ukuti e Yehova we Leza wa wumi?
4 Ukusinincizya ukuti e Yehova we Leza wa wumi, kungalenga twawombesya mu mulimo wakwe. Swinya kungalenga tuwe na maka ya kusipicizya intazi nu kuvwambisya ukutwalilila ukuwombesya mu mulimo wakwe. Cinji acakuti, tuliwavwambisya ukutwalilila ukuwa iviwuza vyakwe.
E YEHOVA ALIMIWOMYA
5. Acani cino cingalenga tusuwile ukuti tungasipicizya intazi zino tukupitamo? (Wafilipi 4:13)
5 Nga tukwizuka ukuti e Yehova we Leza wa maka yonsi swinya akatwavwa, tuliwasipicizya intazi zino tukupitamo. Ni cizima acakuti, kutawa intazi yino yakula kwe Yehova yino angapotwa ukutwavwa ukusipicizya. We Leza wa maka yonsi swinya angatupa amaka yakusipicizya. (Wazyani Wafilipi 4:13.) Fwandi nga twawa ni ntazi tutazipizile twalola ngati tungapotwa ukusipicizya. Cinji acakuti, nga twalola vino Yehova akutwavwa pano tuli ni ntazi izitici, tungasuwila ukuti alitwavwa na pano tuliwa ni zikulu.
6. Avyani vino vyaciticizile e Davidi vino vyalenzile asuwile sana e Yehova?
6 Lekani tulande pa vintu viwili vino vyalenzile e Davidi asuwile sana e Yehova. Pano Davidi wacemanga ing’onzi zya kwe yisi lyo acili amutici, e bere yalemile yonga ni cimbwi naco calemile yonga. Pa miku yonsinye yiwili pano vyo-o vyacitisile, e Davidi wasifile nu kukonka vyo-o ivinyama apoka ni ng’onzi. Lelo nanti ciwe wo-o, atelenganyanga ukuti wacisile wo-o ku maka yakwe. Wamanyile ukuti e Yehova awino wamwavwanga. (1 Sam. 17:34-37) Swinya asitela ayiwilile vyo-o vino vyacitisile. Welenganyangapo sana. Na co-o, calenzile asuwile ukuti e Yehova alimwavwa na ku nkolelonye.
7. Avyani vino Davidi wawisileko amano, swinya vyamwavwizye wuli?
7 Impindi yinji pano e Davidi walinji amutici, wayile ku nkambi ya wasilika awina Israeli. Pano wafisile ko-o, wazanile awina Israeli wali ni ntete pa mulandu wakuti umufilisiti uwa maka e Goliati wawanenile ukuti “nkusonkomola nanti nkukwelengula isumo lya wa Israeli.” (1 Sam. 17:10, 11) Cino calenzile awina Israeli wawe ni ntete, apa mulandu wakuti wawisile amano kwe vino walolekanga na ku mazwi yakutinya yano wawanenile. (1 Sam. 17:24, 25) Lelo e Davidi atawisile amano kwe vyo-o. Wamanyile ukuti vino e Goliati walanzile wakwelengulanga e Yehova e “Leza mumi.” (1 Sam. 17:26) Cino calenzile awalola wo-o, apa mulandu wakuti welenganyanga sana pe Yehova. Wasuwizile ukuti wulyanye vino Yehova wamwavwanga pano walinji we kacema, avino walinji nu kumwavwa ukucimvya e Goliati. E Davidi wasifile nu kuya mukulwa ne Goliati. Swinya wacimvizye, amuno e Yehova wamwavwizye.—1 Sam. 17:45-51.
8. Avyani vino vingalenga tusinincizye ukuti e Yehova alitwalilila ukutwavwa pano tukupita mu ntazi? (Lolani ni cikope.)
8 Nasweswenye tungasipicizya intazi zino tukupitamo nga cakuti tukwizuka ukuti e Yehova wayipekanya ukutwavwa. (Amalu. 118:6) Tungatwalilila ukusuwila nkaninye ukuti e Yehova alitwavwa nga tukwelenganya pe vino watucitizile ku nsizi. Mwawazyako na malyasi ya wantu wa mu Baibolo wano Yehova wapususizye. (Ayize. 37:17, 33-37) Cinji acakuti mwawazya nanti ukutamba ama lipoti yapa jw.org yano yakalanjizya vino Yehova akakwavwa awanawitu na wankazi mwe ya-a amanda. Swinya mwakwelenganya na pe vino Yehova wamyavwizye. Mpindi zimwi mungakwelenganya ukuti e Yehova atamicitilapo icizungusyo cino cingawa ngati ukumipususya ku cimbwi ne bere. Lelo icisinka acakuti e Yehova wamicitila ivizima ivivule nkaninye! Ku cakulolelako, walenga muwe mwe viwuza vyakwe. (Yoha. 6:44) Swinya wamyavwa ukutwalilila ukumuwombela. Acino cingazipa ukumulenga ukuti awamyavwa ukwizuka vino wasusile amapepo yinu, vino wamyavwizye pano mwalondekwanga ukwavwa na vino wamisakamile pano mwalinji ni ntazi. Ukwelenganya sana pe vyo-o, kungamyavwa ukusinincizya ukuti e Yehova alitwalilila ukumyavwa.
Vino tukacita nga twawa ni ntazi vikakuma vino Yehova akakwivwa (Lolani amaparagrafu 8-9)
9. Avyani vino tuzipizile ukuwakwizuka nga cakuti twawa ni ntazi? (Imilumbe 27:11)
9 Ukuwalola ukuti e Yehova amuntu wakusimicila, kulitwavwa ukusipicizya intazi zino tukupitamo. Nga twawa ni ntazi, tuzipizile ukuwika amano ku cintu icicindame. E Satana akakwelenganya ukuti nga twawa ni ntazi tungaleka ukuwombela Yehova. Fwandi vino tukacita nga twawa ni ntazi, vikakuma vino Yehova akayivwa. (Job 1:10, 11; wazyani Imilumbe 27:11.) Nga cakuti twatwalilila ukuwa ni cisinka kwe Yehova pano tuli ni ntazi, tukalanjizya ukuti twamukunda nu kusinila Satana ukuti awawufi. Uzye kuno mwikalila uwuteko wukacuzya awantu wa kwe Yehova? Uzye mukasowezya indalama mumikalile? Uzye awantu wakakana ukwivwa kwi lyasi lizima nga mukuwawizizya? Nanti uzye kwawa intazi zinji zino mukapitamo? Nga avino cawa, mwakwizuka ukuti vino mukacita nga cakuti mwawa ni ntazi vingalenga e Yehova ukusecelela. Mwakwizuka nu kuti atanga alenge intazi ukumiciticila zino mungapotwa ukusipicizya. (1 Kor. 10:13) Alimipa amaka ya kusipicizya.
E YEHOVA ALIMILAMBULA
10. Avyani vino e Leza alicitila wonsinye wano wakamupepa?
10 E Yehova akalambula wano wakamupepa. (Hebe. 11:6) Akatupa umutende ni nsansa pe yo-o impindi swinya alilenga tuwe nu wumi wa muyayaya kunkolelo. Twasuwila ukuti e Yehova alitulambula, amuno wawa na maka swinya akalondesya ukucita wo-o. Na co-o cikalenga twatwalilila ukumuwombela ukufika pano papelezile amaka yitu, ndi wulyanye vino awawomvi wakwe awa kunsizi wacitanga. Wumwi pe wa-a, we Timoti.—Hebe. 6:10-12.
11. Acani cino calenzile e Timoti awawombesya mwi wungwe? (1 Timoti 4:10)
11 Wazyani 1 Timoti 4:10. E Timoti wasuwizile nkaninye e Yehova. Na co-o calenzile awawombesya mu mulimo nu kwavwako wanji. Avyani vimwi vino walinji nu kucita? Umutumwa Paulo wamuwomelezizye ukuti azipizile ukuwa we kasambilizya muzima pano akuwomba umulimo wakuwizya na pano akusambilizya mwi wungwe. Swinya wamunenile ukuti azipizile ukuwa acakulolelako icizima ku wina Klistu wawuye wasongo na waticinye. Cinji acakuti, e Timoti walinji ni milimo na yinji imiwome, pano palinji nu kusunda wanji mu cikuku. (1 Tim. 4:11-16; 2 Tim. 4:1-5) Kweni nanti acakuti mpindi zimwi awantu watawikangako amano kwe vino wawombesyanga swinya watamusalifyanga, weni wasuwizile vye ukuti e Yehova alimulambula.—Roma. 2:6, 7.
12. Acani cino cingalenga wa eluda wawombesya? (Lolani ni cikope.)
12 Na mwe yanye amanda, wa eluda wangasuwila ukuti e Yehova akalola swinya akasalifya pe vino wakawombesya. Ku cakulolelako, wa eluda wasiwombavye umulimo wakutungulula mu mawungwe, ukusambilizya nanti ukuwizya, lelo wamwi wakawombako na muwuzengo, nu kwavwilizya wano waponezilwe na masanso. Ne wanji wawa mu mawumba ye Wano Wakatandalila Awalwale nanti mwe Komiti wa Kwivwanilamo ni Vipatala. Wano wakawomba yo-o imilimo, wamanya ukuti iwungwe alya kwe Yehova asa lya muntu. Na co-o calenga wawomba ni myezo yawo yonsinye nu kusuwila ukuti e Yehova aliwalambula.—Kolo. 3:23, 24.
Nga mukuwombesya mwi wungwe, e Yehova alimilambula (Lolani amaparagrafu 12-13)
13. Uzye e Yehova akakwivwa wuli pe vino tukamuwombela ukufika pano papelezile amaka yitu?
13 Kweni tutanga tuwe swe wa eluda swensinye. Lelo cila muntu wawa na vino angapa e Yehova. Swinya e Yehova akasalifya nga tukumuwombela ukufika pano papelezile amaka yitu. Akalola vino tukayikundila ukusangulako ku mulimo wansi yonsi, asa mulandu nu kuti twasangula katici. Cinji acakuti, akakwivwa icete ukulola tukwasukapo pa kulongana asa mulandu nu kuti twawa ni nsoni. Swinya akasecelela nga twatetela wino watuluvyanya. Fwandi nga cakuti mwatalika ukuyilola ukuti mutakuwombesya, mwakwizuka ukuti e Yehova akasalifya pe vino mukakumanisya ukumuwombela. Amuno vyovyonye avino vyalenga amikunde swinya alimilambula.—Luk. 21:1-4.
TWALILILANI UKUWA NA WUCIWUZA UWUWOME NE YEHOVA
14. Uzye ukutwalilila ukuwa na wuciwuza uwuwome ne Yehova kungatwavwa wuli? (Lolani ni cikope.)
14 Nga twawa na wuciwuza uwuwome ne Yehova, apano ciliwatupepucila ukutwalilila ukuwa ni cisinka kweliwe. Swinya wonye avino calinji kwe Jozefu. Wakanile ukucita uwuzelele pa mulandu wakuti walinji na wuciwuza uwuwome ne Yehova swinya atalondanga ukumulumisya umwezo. (Inta. 39:9) Nasweswenye pakuti wuciwuza witu wutwalilile ukuwa awuwome, tuzipizile twapawula impindi yakupepa nu kuwazya Izwi lyakwe e Baibolo. Swinya ndi wulyanye vino calinji kwe Jozefu, tutaliwacita vino vingalumisya e Yehova umwezo.—Jemu. 4:8.
Ukuwa na wuciwuza uwuwome ne Yehova kulimyavwa ukutwalilila ukuwa ni cisinka (Lolani amaparagrafu 14-15))
15. Avyani vino tukusambililako kwe vino vyacitisile ku wina Israeli pano walinji mu mayonde? (Waheberi 3:12)
15 Awantu wano wakavwilika e Yehova ilivule wakaleka ukuwa ni cisinka kwe weliwe. Yizukani vino vyacitisile ku wina Israeli pano walinji mu mayonde. Wamanyile ukuti e Yehova akuno wawa, lelo watalisile ukuvwilika nga cakuti angawasakamala. Impindi yimwi wakolowozizye nu kuti: “Wuzye Imfumu e Leza ali naswe pamwi pole?” (Ukuf. 17:2, 7) Swinya mukupita kwa mpindi wizile awapondocela e Yehova. Ukwasowa nu kuvwilika sweswe tusilonda ukuwa ngati awoliwo, amuno wawa acilanjililo ca kutusoka.—Wazyani Waheberi 3:12.
16. Acani cino cingalenga isuwilo litu ukwelezwa?
16 Vino vikacitika munsi vingalenga catuwomela ukutwalilila ukuwa na wuciwuza uwuwome ne Yehova. Awavule wakakana ukuzumila ukuti e Yehova akuno wawa. Swinya ilivule awantu wano wakacita iviwipe awano cikaloleka ngati ivintu vikawazipila mu wumi. Nga cakuti twalola vyonsinye vyo-o, isuwilo litu likakwelezwa. Kweni sweswe tutanga tulande ukuti e Leza atawako, lelo tungatalikavye ukuvwilika nga cakuti akatusakamala. Impindi yimwi e kalemba Wilumbo 73 watalisile ukuvwilika nga cakuti e Yehova wamusakamalanga. Nga walola ivizima mu wumi vikuciticila wano watakonkanga amasundo ya kwe Yehova, watalikanga ukuyikolowozya nga cakuti mwawa uwuzima uwuli wonsinye mu kuwombela Yehova.—Amalu. 73:11-13.
17. Avyani vino vingatwavwa ukutwalilila ukuwombela e Yehova?
17 Acani cino cavwizye e kalemba wilumbo ukupiluka mwe vino welenganyanga? Welenginye sana pe vino vikaciticila wano wakaleka ukusuwila e Yehova. (Amalu. 73:18, 19, 27) Swinya welenginye na pa vizima vino vikafumamo mu kuwombela e Yehova. (Amalu. 73:24) Nasweswenye tungelenganyako pa vizima vino Yehova watucitila, na pevino uwumi witu wungawa nga cakuti tusakumuwombela. Ukucita wo-o kungalenga tutwalilile ukuwa ni cisinka kwe Yehova swinya tungalanda ndi vino e kimbila Wilumbo walanzile ukuti: “Ukupalamila kwe Leza acili icizima kwe nene.” [NWT] —Amalu. 73:28.
18. Acani cino cingalenga tutatina vino vilicitika ku nkolelo?
18 Tungasipicizya intazi zyonsinye zino tungawa nazyo mwe ya-a amanda ya kulecelezya, amuno tukawombela “e Leza wakusimichila e Leza mumi.” (1 Tes. 1:9) E Yehova akatusakamala swinya lyonsinye wandi awatwavwa. Ndi wulyanye vino wavwanga awawomvi wakwe awa ku nsizi, avino nasweswenye wandi awatwavwa mwe ya-a amanda. Nombanye uwucuzi wukulu wandi wutalike. Lelo twamanya ukuti tutaliwa swenga, e Yehova alitwavwa. (Ayize. 41:10) Acino ‘lekani tuvwange mukusipa tuti: ‘Imfumu wekavwa wane, ntandi ndatina.’’—Hebe. 13:5, 6.
ULWIMBO 3 Wewe we Maka Yitu Swinya Isuwilo Litu