Amawuzyo Ukufuma kwa Kawazya
Uzye amazwi yakuti ‘uliwasunga’ yano yakazanwa pa Amalumbo 12:7, yakalanda pa ‘walanda’ (vesi 5) nanti pa ‘mazwi ya kwe Yehova’ (vesi 6)?
Vino ilyasi lyonsinye likalandapo, vikalanjizya ukuti yo-o e vesi yikalanda pa wantu.
Pa Amalumbo 12:1-4, tukawazyapo ukuti “kusi kumwi kuno umusuwilwa wumwi angazanwa.” Nomba lekani tulande pa mazwi yano yawa pa Amalumbo 12:5-7, pano pafumile iwuzyo lino tukulanzyanyapo.
“‘Imfumu e Leza akuti kanonzi nandi njize,
Amuno awalanda wakunyonjelechezwa,
Nawano wakutiticizwa wakulweta kuwulumila.
‘Nandi mbatule ndimuno wakulondela!’
Ukulayilizya kwa mfumu e Leza akwa cisinka;
Kwawa ndivino silivara wino wengululwa mwilungu impindi munenulambali (7).
Uliwasunga umutende penye, we Mfumu Leza;
Uwachinjilile ku wantunye wawo.’
Amazwi yano yawa pa vesi 5 yakalanda vino Yehova alicita ‘kuwalanda’ ukuti aliwapususya.
Ne vesi 6 yalanda ukuti ‘ukulayilizya kwa Mfumu e Leza akwa cisinka,’ kwawa ngati we ‘silivara wino wengululwa.’ Vyo-o vikalanjizya vino tukayivwa pi zwi lya kwe Leza.—Amalu. 18:30; 119:140.
Nomba lekani tulande pa mazwi yano yawa pa Amalumbo 12:7: aya kuti ‘uliwasunga umutende penye, we Mfumu Leza; uwachinjilile ku wantunye wawo.’ Uzye ya-a amazwi yakalozya kwaweni?
Pa mulandu wa kuti pa vesi 6 patalicila na “mazwi ya kwe Yehova” apano pakonka amazwi ya mu vesi 7, wamwi wangakwelenganya ukuti izwi lya kuti ‘uliwasunga’ likasula ku mazwi ya kwe Leza. Cinji cino cingalenga wakwelenganya wo-o, apa mulandu wakuti e Yehova wacinjilizile e Baibolo kwe wano walondanga ukuti wayilovye.—Ayize. 40:8; 1 Pet. 1:25.
Lelo nanti ciwe wo-o, e Yehova akacinjilila na wantu wakwe ndi vino e vesi 5 yikalanda. Swinya alitwalilila ukwavwa nu kutula ‘awalanda’ na wano ‘wakanyonjelecezwa.’—Job 36:15; Amalu. 6:4; 31:1, 2; 54:7; 145:20.
Uzye ukufika pa-a, tungalanda ukuti awaweni wano izwi lyakuti uliwasunga lino lyawa mu vesi 7 likalandapo?
Vino vyalandwapo pe lyo-o iwaliko vyalenga tusinincizye ukuti lyo-o izwi likalanda pa wantu.
Pa Amalumbo 12:1, e Davidi watalicizile ukulanda pa wawomvi wa kwe Yehova wano wawawipa kwakacita waviwipe. Swinya mu mavesi yano yakonkapo tukazanamo amazwi yano yakalanjizya ukuti awantu wano wakalanda iviwipe, e Yehova ataliwalekapovye. E kimbila wilumbo watwavwa ukusinincizya ukuti tungasuwila e Yehova ukuti alicinjilila awantu wakwe amuno amazwi yakwe aya cisinka.
Fwandi cino e vesi 7 yikalandapo acakuti e Yehova, ‘alisunga nu kucinjilila’ awantu wano wakawayimvya ku wawipe.
Izwi lya kuti ‘alisunga’ lino wawomvya mwe lyo-o iwaliko walikopolola ukufuma kwi zwi lya ciHebere. Ivilembo vya kaali ivya ciGreek vyawomvya izwi lya kuti “sweswe” imiku yiwili mu vesi 7, cino cikalanjizya ukuti lyo-o izwi likalanda pa wawomvi wa kwe Yehova awalanda swinya wano wakawanyonjelecezya. Na mukulecelezya e vesi 7 yalanda ukuti e Yehova alicinjilila awawomvi wakwe wonsinye “wenga na wenga” [NWT] ku wantu awawipe ‘awamwatanye woo’ wano wakacita ivya luwembu. (Amalu. 12:7, 8) Ne mumawaliko ya ciAramaiki yano wapiliwula ukufuma mu ciHeberi e vesi 7 yalanda ukuti: “We, MFUMU LEZA, ulicinjilila awalungamane, uliwacinjilla ku wawipe penye.” Ya-a amazwi yakapa uwusinincizyo wakuti amazwi yano yawa pa Amalumbo 12:7, yakalanda pa wantu asa ku mazwi ya kwe Yehova.
Na co-o calenga “awantu wacisinka” wawe ni suwilo lyakuti e Yehova alicitapo cimwi kwe vino vikalenga wayimba
