1. Avyani vino vikalenga tuwe awantu awazima nanti awawipe?

 SWENSINYE tuzipizile ukuzwala uwuntu wupya wuno Yehova wakunda asa mulandu nukuti apano twabatizizwe nanti twabatizwa kaali. Nomba pakuti tucite wo-o, tuzipizile twalama amelenganyo yitu. Amulandu ci? Amuno vino tukakwelenganya, avino vikalenga tuwe awantu awazima nanti awawipe. Nga cakuti lyonsinye tukwelenganya pavyakuyisecelesya swe weneco, lyo na vino tuliwalandanye nukucita viliwawa aviwipe. (Efes. 4:17-19) Lelo nga tukwelenganya pa vizima, tuliwalanda nukucita ivintu vino vikasecelesya e Yehova.—Gal. 5:16.

2. Amawuzyo ci yano twandi twasuke mwe co-o icipande?

² Ndi wulyanye vino twasambilizile mu cipande cino cafumako, tutanga tulecelele ukwelenganya pa viwipe. Lelo tungasolapo ukukanacita vino tukwelenganya. Icintu cakutalicila swinya icicindame cino tuzipizile ukucita pano tutani tubatizwe nu kubatizwa, akuleka ukulanda, nukucita vino Yehova wapata. Lelo pakusecelesya Yehova tuzipizile nukwivwila isundo lyakuti: ‘Mwazwala uwuntu wupya.’ (Kolo. 3:10) Mwe co-o icipande twandi twasuke ya-a amawuzyo: Uzye ‘uwuntu wupya’ acani? Tungazwala wuli uwuntu wupya? Swinya tungatwalilila wuli ukuwuzwala?

3. Ukulingana na Wagalatiya 5:22, 23, Uzye ‘uwuntu wupya’ acani? Swinya umuntu akawuzwala wuli?

³ Ukuzwala ‘uwuntu wupya’ akakwelenganya nukucita ivintu ukulingana na vino Yehova akalonda. Umuntu akazwala uwuntu wupya ukupitila mukuwa nivikomwa vya kumuzimu nukuleka umuzimu wa kwe Leza wamutungulula mwe vino akakwelenganya,  ukuyivwa nga nukucita. (Wazyani Wagalatiya 5:22, 23.) Ku cakulolelako, umuntu wino wazwala uwuntu wupya akakunda e Yehova na wantu wakwe. (Mat. 22:36-39) Akatwalilila ukuwa ni nsansa napano akupita mu ntazi. (Jemu. 1:2-4) Akapanga umutende. (Mat. 5:9) Akatekanizizya wanji swinya wawa nicikuku. (Kolo. 3:13) Wakunda ivizima swinya avino akacita. (Luk. 6:35) Akalanjizya ukuti wasuwila nkaninye Umukwasi wakwe uwa kwi yulu ukupitila mwe vino akacita. (Jemu. 2:18) Akatwalilila umufuuke pano wanji wamufyenga swinya akayilama nga cakuti welezwa.—1 Kor. 9:25, 27; Tait. 3:2.

4. Uzye pakuzwala uwuntu wupya tuzipizile ukuwa ni miwele yonsinye yino yawa pa Wagalatiya 5:22, 23, pa muku wonganye? Londololani.

⁴ Pakuzwala uwuntu wupya, tuzipizile ukuwa ni miwele yonsinye yino yalumbulwa pa Wagalatiya 5:22, 23 nimiwele yinji yino yalandwapo mwe Baibolo. * Yo-o imiwele yitawa ngati acizwalo cino tungazwala conga conga. Amuno yeni yakolana. Ku cakulolelako, nga wakunda umuwuyo uliwamutekanizizya swinya uliwa ni cikuku kwe weliwe. Nepakuwa umuntu umuzima, tuzipizile ukuwa awafuke nu kuyilama.

5. Uzye cikasula mwi ukuwa na ‘mano ya kwe Klistu? Swinya amulandu ci wuno tuzipizile ukusambilila pe weliwe? (1 Wakorinte 2:16)

⁵ Wazyani 1 Wakorinte 2:16. Pakuzwala uwuntu wupya, tuzipizile ukuwa na ‘mano ya kwe Klistu.’ Mu mazwi yanji tungalanda ukuti tuzipizile ukusambilila vino akakwelenganya nu kumukolanya. E Yesu akalanjizya icete nkaninye ivikomwa vya kumuzimu. Ngati awulyanye vino icilola icizima cikalanjizya, e Yesu wawa nimiwele yilyanye yino Yehova wakwata. (Hebe. 1:3) Nga tukwelezya na maka ukwelenganya ndi vino Yesu akakwelenganya tuliwawaya tukucita ivintu ngati weliwe swinya tuliwa ni miwele imizima ngati weliwe.—Flpi. 2:5.

6. Avyani vino tuzipizile ukwizuka pano tukwelezya na maka ukuzwala uwuntu wupya?

⁶ Ncepamwi tungalola ngati tutanga tukumanisye ukukolanya Yesu. Tungakwelenganya ukuti: ‘E Yesu wapwililika, ntanga nkumanisye ukumukolanya ndi wulyanye vino wawa.’ Nga avino mukayivwa, mwakwizuka vyo-o ivisinka. Icakutalicila acakuti, mwelewuzilwe mu nzila yakuti muwe ngati we Yehova ne Yesu. Fwandi mweweneco amwewano muzipizile  ukusolapo ukuwakolanya. Swinya mungakumanisya, nanti acakuti mutanga muwe ndi wulyanye vino wawa. (Inta. 1:26) Icaciti wili acakuti, umuzimu wa kwe Leza wawa namaka nkaninye ukucila icili consinye munsi. Ungamyavwa ukucita ivintu vino mutanga mukumanisye ukucita pa lwinu. Icaciti tatu acakuti e Yehova asikwenecela ukuti mwalanjizya ivikomwa vya kumuzimu ngati mwapwililika. Awuli umulandu wuno wapela wano wawa ni suwilo lya kwikala munsi imyaka 1,000 pakuti wize wapwililike. (Ukuwu. 20:1-3) Fwandi cino Yehova akalondavye kwe sweswe pe yo-o impindi, akwelezya na maka ukumukolanya nukweyamila pe weliwe.

7. Avyani vino twandi tusambilille?

⁷ Amuvyani maka maka muno tungakolanya Yesu? Lekani tusambilile pa vikomwa 4 vino umuzimu wa kwe Leza wukalenga tuwe navyo. Twandi tusambilile vino e Yesu walanjizizye icikomwa ca ku muzimu conga na conga. Pano tukusambilila twandi tulole na mawuzyo yano yandi yatwavwe ukuyiweweta nukulola vino twazwala uwuntu wupya.

8. Uzye e Yesu walanjizizye wuli ukuti wawa nulukundo?

⁸ Pa mulandu wa kuti e Yesu wakunda nkaninye e Yisi, wayipelesizye ukucita ivintu ivivule pa mulandu wa kwe Yisi na pa mulandu witu. (Yoha. 14:31; 15:13) Walanjizizye apatiswenye ukuti wakunzile awantu pe vino wawomvizye uwumi wakwe pano walinji munsi. Cila wanda walanjizyanga ulukundo nicikuku nanti acakuti wamwi wamulwisyanga. Inzila yimwi iyicindamesye yino walanjizizye ukuti wakunzile awantu akupitila mukuwasambilizya pa Wufumu wa kwe Leza. (Luk. 4:43, 44) E Yesu walanjizizye nu kuti wakunzile e Leza na wantu pano wayikundizile ukucula nukumukoma ku wantu awawembu. Wo-o vino wacisile, walenga tuwe nu longo lwakuwa nu wumi wamuyayaya.

9. Uzye tungakolanya wuli e Yesu vino walanjizyanga ulukundo?

⁹ Twayipile kwe Yehova nukubatizwa pamulandu wakuti twakunda Umukwasi witu awa kwi yulu. Fwandi nasweswenye tuzipizile twalanjizya ukuti twakunda e Yehova mwe vino tukacita we wanji. Umutumwa Yohane walemvile ukuti: “Ndi wumwi akuti nakunda Leza ukuwa wapata umunyina we chawufi amuno atanga akunde Leza wino atalola ndi atakunda umunyina wino akamulola.” (1 Yoh. 4:20) Acino tungayikolowozya ukuti: ‘Uzye nakunda nkaninye awantu? Uzye nkalanjizya icikuku kwe wanji napano weni wankalalizile? Uzye ulukundo lukalenga ukuti ndawomvya impindi yane navino nakwata pakwavwa wanji ukusambilila pe Yehova? Uzye nkatwalilila ukulanjizya ulukundo napano awavule wasakunsalifya pe vino nkucita nanti nga wakuncuzya? Uzye ningalolako inzila zimwi ningawombesezyamo mu mulimo wakupanga awasambi?’—Efes. 5:15, 16.

10. Uzye e Yesu wapapanganga wuli umutende?

¹⁰ E Yesu wapanganga umutende. Atalandulanga nanti awantu wamucuzye wulinye. Asa co-o conga kwalinji na vinjinye vino wacitanga. Wayikundilanga ukupanga umutenda swinya wawomelezyanga nawanji ukucita icili conganye. Ku cakulolelako, wawasambilizizye nu kuti wazipizile ukupanga umutende na wino wapusine nawe pakuti e Yehova apocelele ukupepa kwawo. (Mat. 5:9, 23, 24) Ilivule wavwanga awasambi wakwe ukuleka ukupokotela pewino walinji we songo pe woliwo.—Luk. 9:46-48; 22:24-27.

11. Uzye tungacita wuli pakuwa awamutende?

¹¹ Mukuwa uwamutende musanzyamo ivivule, asakupelela vye pakukanapusana na wanji. Tuzipizile ukuwombesya ukupanga umutende nawanji nukuwomelezya awanawitu na wankazi ukuti wapanga umutende nga wapusana.  (Flpi. 4:2, 3; Jemu. 3:17, 18) Tungayikolowozya ukuti: ‘Avyani vino ningayikundila ukuyipusula pakuti mpange umutende nawanji? Uzye nkatwalilila ukupita ni cikonko ku nsingo nga wumwi wanduvyanya? Uzye nkalindilila ukuti wanji awano wize mukulenga itetelwa kwe nene, nanti nkayitalicilapo ukuya mupanga umutende nanti acakuti awano wanduvinye? Uzye nga cayana nkawomelezya wano wapusine ukupanga umutende?’

12. Uzye e Yesu walanjizizye wuli ukuti walinji nicikuku?

¹² Yesu walinji nu luse. (Mat. 11:28-30) Walanjizyanga ukuti walinji nuluse pano wayikundilanga ukupiluka, napano ivintu vitamizyenye. Ku cakulolelako pano umwanaci umwina Fonike wamulambilizizye ukuti amupozezyeko umwana wakwe umukazyana. Pakutalika atacisile vino we-e umwanaci walenzile, lelo pano we-e umwanaci walanjizizye ukuti walinji ni suwilo, e Yesu wamupozezizye umwana. (Mat. 15:22-28) Nanti acakuti e Yesu walinji nu luse, atakananga ukusunda wanji, wawasundanga. Impindi zimwi atapitanga na mumbali pakuwasunda. Ku cakulolelako pano e Peter welezizye ukumukanya pakuti atacita ukulonda kwa kwe Yehova, wamusunzile lyo na watumwa wanji wakulolako. (Mar. 8:32, 33) Cino calenzile ukuti amusundile pa watumwa wanji amuno walondanga ukusoka na wasambilizi wanji ukuti watazipizile ukuyitutumula. Atamusundizile pa wawuye pakuti amwivwisye insoni. Ukwasowa nukuvwilika cepamwi e Peter wivwile insoni, lelo ko-o ukusunda kwamwavwizye.

13. Uzye tungalanjizya wuli icikuku?

¹³ Pakulanjizya icikuku kwe wano twakunda, impindi zimwi cingalondekwa ukuwasunda. Pano mukuwasunda mwakolanya Yesu ukupitila mukuwomvya ivisinka vya mwi Zwi lya kwe Leza. Mwawa nicikuku. Mwasuwila ukuti nawonye wakalonda ukucita ivizima nu kuti wano wakunda Yehova nu kumikunda, walipocelela ko-o ukusunda. Yikolowozyani ukuti: ‘Uzye nkasipa nukulandilapo nga cakuti nalola wino nakunda akucita iviwipe? Uzye nkalanda amazwi amazima pano nkuwasunda nanti nkawakalipila? Amulandu ci wuno nkasundila wanji? Uzye nkasunda wumwi pa mulandu wakuti nkulonda ukumwavwa nanti pa mulandu vye wakuti namupata?’

14. Uzye e Yesu walanjizizye wuli uwuzima?

¹⁴ E Yesu atapelela vye pakumanya uwuzima lelo akawulanjizya. Pa mulandu wakuti wakunda e Yisi, akacita ivizima pa milandu imizima. Umuntu umuzima, lyonsinye akavwambilizya inzila zyakwavwilamo wanji nukuwacitila ivizima. Tuzipizile twacita ivizima nukumanya cino cikulenga twacita ivizima. Pamwi tungelenganya ukuti, ‘Uzye kweni umuntu angacita ivizima pa mulandu uwuwipe?’ Cingacitika. Ku cakulolelako, e Yesu walanzile pe wano wapanga awapina ivya wupe munzila yakuti wanji wawalole swinya watalike ukuwacindika pe vino wacisile. E Yehova atakunzile, nanti acakuti vyo-o vino wacitanga vyalinji icetenye.—Mat. 6:1-4.

15. Uzye tungawa wuli awazima?

¹⁵ Tungawa swe wantu awazima nga cakuti vye tukucita ivizima pamulandu wa lukundo asa pa mulandu wakuti tuyisecelesye. Mungayikolowozya ukuti: ‘Uzye nkapelelavye pakumanya uwuzima, nanti nkacita vino namanya ukuti avizima? Amulandu ci wuno nkacitila ivizima?’

16. Acani cino tuzipizile twacita cila wanda swinya amulandu ci?

¹⁶ Tutazipizile twakwelenganya ukuti nga twabatizwa, lyo calala casila nu wuntu wupya  twawuzwala. Uwuntu wupya wawa ngati “acizwalo icipya” cino tuzipizile twasunga pakuti citwalilile ukuloleka icete. Tuzipizile twalanjizya ivikomwa vya kumuzimu cila wanda. Amulandu ci? Amuno pano tukuwombesya ukulanjizya yo-o imiwele apano umuzimu wa kwe Yehova wuliwatwavwa. Nu mulandu wakuti Yehova asiwomvya umuzimu wakwe uwutele apavye, akawuwomvya pakuti kuwe ivintu. (Inta. 1:2) Fwandi ukucitapo cimwi kwacindama nkaninye. Ku cakulolelako, umutumwa Jemusi walemvile ukuti: “Nisuwilonye nga cakuti lisi nimilimo alitela lyafwa.” (Jemu. 2:26) Wonye avyo tungalanda na ku vikomwa vya ku muzimu vyonsinye. Nga cakuti tuli navyo lyo tukulanjizya ukuti tukutungululwa nu muzimu wa kwe Leza.

17. Tungacita wuli nga cakuti twapotwa ukulanjizya ivikomwa vya ku muzimu?

¹⁷ Na wina Klistunye wano wabatizwa kaali, nawonye impindi zimwi wakapotwa ukulanjizya ivikomwa vya ku muzimu. Lelo nga cawa wo-o tutazipizile ukunenuka, tuzipizile twakwelezya na maka. Ku cakulolelako, uzye mungasumba icizwalo cino mwakundisya paponye pano calepuka? Awe! Ilivule tukacisuma, nga cakuti citononesile nkani. Nga twacisuma, tukawikako sana amano pakuti citiza cilepuke na swinya amuno cingononeka. Wonye vino tukacita ku cizwalo, avino tutazipizile ukunenuka nga cakuti impindi zimwi twacita vino visakulanjizya icikuku, ukutekanya nanti ulukundo kwe wanji. Nga mwacita wo-o mwalenga ukufuma pa nsi ya mwezo winu ukuti wamiteteleko pakuti mutwalilile ukwivwana na wino temuluvinye. Swinya muzipizile ukuwombesya pakuti kunkolelo mutiza munyocezyepo icili conga.

18. Avyani vino tungasuwila?

¹⁸ Tukasalifya nkaninye pakuwa ni cakulolelako ca kwe Yesu! Nga cakuti tukukolanya vino akakwelenganya na vino akalola ivintu, apano cilitupepucila ukukolanya vino wawa. Ne nga tukumukolanya apano cilitupepucila ukuzwala uwuntu wupya. Mwe co-o icipande twasambilila vye pa vikomwa vya ku muzimu 4. Cingazipa nga cakuti mwatwalilila ukusambilila ivikomwa vya ku muzimu vino tutalanzilepo mwe co-o icipande pakuti mulole vino mukuvilanjizya mu wumi winu. Mulizana ivipande navinji pewo-o umutwe mu kalibuku ka mu Ciwemba akakuti Icakwavwa Inte zya kwe Yehova Ukuzana Ivyewo. Pa mutwe wakuti “Awina Klistu.” Apano muye pano watili, “Ivikomwa vya ku Muzimu.” Nga cakuti mukwelezya na maka ukuzwala uwuntu uwupya nu kutwalilila ukuwa nawo, e Yehova alimyavwa.