Awavule wano wakawazya lyo-o ilyasi mu luwilo avino wakayikolowozya. Lelo lyo-o iwaliko likalanda pa wonsi wawili wano witwanga ukuti Mefibosheti. Swinya tungasambililako cimwi nga cakuti twamanya icete cete vino vyacitisile.

Imfumu Sauli wakweti awana 9, awonsi 7 na wanaci wawili. E katote walinji we Yonatani. Ne mukupita kwa mpindi wizile akwata e Mefibosheti mwe Rizipa. Ne Yonatani umwana wakwe nawe wizile akwata e Mefibosheti. Fwandi Imfumu Sauli wakweti umwana uwizina lyakuti Mefibosheti, nu mwizikulu uwizina lya kuti Mefibosheti.

Impindi yimwi Imfumu Sauli wapasile nkaninye awina Gibioni, ica kuti walondanga nukuwakoma wonsinye. Swinya awavule wawakomile. Wo-o vino wacisile vitazifile. Amulandu ci? Amuno ku nsizi mu mpindi ya kwe Joshua wasongo wa mu Israeli walayine ilayano lya mutende na wina Gibioni.—Josh. 9:3-27.

Lyo-o ilayano lino awina Israeli wapangine na wina Gibioni lyacilinji likuwomba na mumpindi ya kwe Sauli nye. Nomba ku cawulanda, e Sauli atakonsile lyo-o ilayano, walondanga ukukoma awina Gibioni wonsinye. Wo-o vino wacisile calenzile ‘weliwe ni kwata lyakwe’ ukuwa numulandu wa wazi. (2 Sam. 21:1) Mukupita kwa mpindi e David wizile awa amfumu. Awina Gibioni wano wapususile wizile awamunena pe wo-o umulandu. E David wizile akolowozya awina Gibioni pe vino angacita pakuti afute pe lo-o uluwembu luno Sauli wacisile napa kuti Yehova atwalilile ukupala insi ya wina Israeli. Ukucila ukuti awina Gibioni wanene e David ukuti awalipile indalama, wamunenile ukuti awape awana 7 wamwana Sauli wino ‘walondanga ukuti awalovye’ pakuti nawo wawakome. E David wacisile ukulingana navino wamunenile.—2 Sam. 21:2-6; Impe. 35:30, 31.

Imfumu Sauli nu mwana wakwe e Yonatani wizile awafwa mu nkondo. Nomba e Mefibosheti weni e mwana Yonatani atakonsile yisikulu pano wayile mukulwisya awina Gibioni. Amuno weni walemazile lyo acili amutici. Conye acino camupususizye. Ne cinji acakuti e David walayine ilayano ne Yonatani ilya kutwalilila ukuwa aviwuza. Mwe lyo-o ilayano mwasanzizye nawana wawonye ukuwikako ne Mefibosheti e mwana Yonatani. (1 Sam. 18:1; 20:42) E Baibolo yikalanda ukuti: “Ukuwa muno akulayana kwa muzilo kuno weliwenye [David] walayine nu Jonathani, David apunga uwumi wakwe Mefibosheti [awa nicikuku kwe Mefibosheti] umwanakwe Jonathani, wino walinji amwizikulu wakwe Sauli.”—2 Sam. 21:7.

Lelo nanti ciwe wo-o e David wacisile vino awina Gibioni wamunenile ukucita. Wa wapile awana wawili awakwe Sauli, pewa wawili wenga walinji we Mefibosheti. Awapa na wizikulu wa kwe Sauli 5. (2 Sam. 21:8, 9) Wo-o vino wacisile calenzile amale umulandu wa wazi wuno Sauli walesile.

Lyo-o asa lilyasi vye lya kaali lelo tungasambililako cimwi. Izwi lya kwe Leza lyalanzile mukulungatika ukuti: “Nawananye nawo watanga wafwile kuluwembu luno awakwasi wawo wachita.” (Amasu. 24:16) Fwandi cino cacitisile pe wo-o uwanda cikulanjizyavye ukuti, wa mwana Sauli wawili na wizikulu wakwe 5, watalinji awakaele. Amuno wanga wawe awakaele e Yehova nga atazumilizizye ukuti wawakome. Lyo-o isundo lyalunzilepo nukuti: “Umuntu wazipila afwila kuluwembu lwakwenye.” Cikaloleka ngati wa-a walupwa lwa kwe Sauli awali 7 nawonye amuno walinji mwe wo-o umulandu. Kufwile kwalinji vimwi vino wacisile pe wowo vino Sauli walondanga ukulovya umwiko wa wina Gibioni. Co-o calenzile wafwile pa luwembu luno wacisile.

Lyo-o ilyasi likutusambilizya ukuti, umuntu atanga alande nanti ukwelenganya ukuti cino calenzile aluvyanye amuno wakonkanga vye vino wamunenile ukucita. Umulumbe wumwi uwa mano wukati: “Uwasimichila chino ukuchita, nachonsinye chiliwa ichete.”—Imilu. 4:24-27; Efes. 5:15