1-2. Avyani vino vikacitika pano awantu wakubatizwa, swinya avyani vino twandi tusambilile?

 UZYE mukatela amuzanwako pano wamwi wakubatizwa? Nga mukatela amuzanwako, lyo mwivwile vino wasukanga ukufuma pansi ya mwezo pano wawakolowozizye amawuzyo yawili lyo watani waye mukubatizwa. Mwaweni vino walupwa ni viwuza wasecelezile ukulola kuno wabatizwa. Ne pano wano wabatizwanga wafumile mu minzi, mwaweni vino ivinso vyawo vyalolekanga ukuti wali nicimwemwe swinya mwivwile nakuno awantu wakukoma nanti ukutota. Fwandi nga kusanzya ponga impendwa ye wonsinye wano wakabatizwa, tungalanda ukuti cila sabata awantu awavule nkaninye awano wakayipa nukabatizwa.

² Nga mwemwe, uzye mwabatizwa nanti apano mukwelenganya pa kubatizwa? Nga avino cili, muzipizile ukumanya ukuti mwe wantu awayileko mwe yo-o insi imbipe, amuno lyo ‘mukuvwamba Imfumu e Leza.’ (Amalu. 14:1, 2) Co-o icipande cikulanda sana pe mwemwe cingatenga mwewatici nanti mwe wasongo. Lelo na mwemwenye mwe wano mwabatizwa kaali muzipizile ukutwalilila ukuvwambisya ukuwombela e Yehova umuyayaya. Acino lekani tulande pa milandu yitatu yino yizipizile ukulenga twavwambisya ukuwombela Yehova

3. Amulandu ci wuno awawomvi wa kwe Yehova wakundila icisinka nuwulungamane? (Amalu. 119:128, 163)

³ E Yehova wanenile awantu wakwe ukuti wazipizile ‘ukukunda icisinka.’ (Zaka. 8:19) E Yesu nawe wawomelezizye awasambilizi wakwe ukuti wavwamba uwulungamane. (Mat. 5:6) Co-o cikusula mukuti pakuti wumwi acite icizima swinya icilungamane mu minso ya kwe Yehova, azipizile ukuwombesya. Nomba uzye mwakunda icisinka nu wulungamane? Ukwasowa nukuvwilika, mwavikunda. Mwapata uwufi na vyonsinye vino asavizima. (Wazyani Amalumbo 119:128, 163.) Umuntu wino akawipa uwufi lyo akakolanya e Satana e  kateka wa kwe yo-o insi. (Yoha. 8:44; 12:31) Cimwi cino e Satana akavwambisya, akusewanya izina lya kwe Yehova ilitele. Watalisile ukuwipizya Yehova uwufi ukufumilila pano wapondosilevye mu Edeni. Akalonda awantu wakwelenganya ukuti e Yehova wayikunda, we Kateka wa wufi wino akakwima awantu wakwe ivizima. (Inta. 3:1, 4, 5) Ivya wufi vino Satana akalanda vyalenga awantu wakwelenganya iviwipe pe Yehova. Nga cakuti awantu wasolapo ‘ukukanakunda icisinka,’ e Satana angawatungulula ku misango yonsinye imiwipe swinya yino yitalungamana.​—Roma. 1:25-31.

4. Uzye e Yehova walanjizya wuli ukuti “we Leza musuwilwa [uwacisinka]”? (Lolani ni cikope.)

⁴ E Yehova “we Leza musuwilwa [uwacisinka]” swinya akayikundila ukusambilizyako na wanji wano wamukunda. (Amalu. 31:5) Akacita wo-o ukupitila mukuwavwa pakuti watakawipwe ne Satana. Akasambilizya awawomvi wakwe ukuwa awacisinka swinya awalungamane. Na co-o cikalenga awantu wayilola ukuti wacindama nukuwa numutende wamumelenganyo. (Imilu. 13:5, 6) Uzye mwalola ukuti wonye avino e Yehova wamyavwizye pano mwasambililanga e Baibolo? Ukwasowa nukuvwilika mufwile mwalola. Amuno mwasambilila ukuti e Yehova akacita vino vikazipila awantu wonsinye ukuwikako na mwemwenye. (Ayize. 48:17) Acino mukalonda ukucita vino Yehova akalola ukuti avizima. (Mat. 6:33) Mukalonda ukutunjilila icisinka nu kwavwa wanji ukumanya ukuti vyonsinye vino Satana akalanda pe Yehova avya wufi. Nomba mungacita wuli wo-o?

5. Mungatunjilila wuli icisinka nuwulungamane?

⁵ Mungasolapo ukucita ivintu vino vikulanjizya ku wantu wonsinye ukuti mwakana uwufi wa kwe Satana lelo mwasolapo ukukonka icisinka. Mukalonda e Yehova ukuwa we kateka winu swinya mukalonda nukucita vino akalola ukuti avizima. Nomba mungacita wuli wo-o? Mungapepa kwe Yehova nukuyipa kwe weliwe swinya nukulanjizya ku cintu wavule ukuti mwayipa ukupitila mukubatizwa. Ukukunda ivizima ni cisinka akuno kungalenga mupingulepo ukubatizwa.

6. Ukulingana na Amalumbo 45:4, amilandu ci yino yizipizile ukulenga mukunde e Yesu Klistu?

⁶ Amulandu ci wuno mwakundila e Yesu Klistu? Lolani imilandu yimwi imizima nkaninye yino yikazanwa pa Amalumbo 45:4. (Wazyani.) E Yesu walanjizizye ukuti wayicefya swinya wakunzile icisinka nu wulungamane. (Mat. 11:29) Fwandi nga cakuti mwakunda icisinka nuwulungamane, ukwasowa nukuvwilika lyo ne Yesu Klistu nye mwamukunda. Teyelenganyani pe vino e Yesu wawombesyanga na maka yakwe yonsinye ukutunjilila icisinka ni cizima. (Yoha. 18:37) Nomba uzye tungasambililako cani kwe Yesu pakuwa awayicefye?

7. Acani cino mwakundapo sana pakuyicefya kwa kwe Yesu?

 ⁷ Vino Yesu wacitanga vyalanjizyanga ukuti walinji amuyicefye. Ku cakulolelelako, asitela ayicindamikepo umweneco lelo akalenga ilumbo nu mucinzi ukuya ku Mukwasi wakwe. (Mar. 10:17, 18; Yoha. 5:19) Uzye mukayivwa wuli pe wo-o vino Yesu wayicefya? Ukwasowa nukuvwilika ukuyicefya kwakwe kwalenga mumukunde nu kuvwambisya ukumukolanya. Nomba vwilani, amulandu ci wuno Yesu wayicefezya? Amuno wakunda Yehova swinya akakolanya vino wayicefya. (Amalu. 18:35; Hebe. 1:3) Uzye musakuvwambisya ukukolanya Yesu wino akakolanya imiwele ya kwe Yehova yonsinye?

8. Amulandu ci wuno tukavwambila ukuti e Yesu Klistu awino awatuteka?

⁸ Tukalonda e Yesu Klistu awino awatuteka, amuno we Kateka muzima. E Yehova wasambilizizye Umwana wakwe ivyakuwomba swinya awino wamusonta nukuwa we Kateka. (Ayize. 50:4, 5) Teyelenganyani na pevino e Yesu walanjizya ukuti watukunda. (Yoha. 13:1) Pamulandu wakuti Amfumu yinu, wayana ukumukunda. Walondolozile ukuti akakwita wano wamukunda ukufuma pansi ya mwezo ukuti iviwuza vyakwe. Swinya wa-a wano aviwuza vyakwe wakalanjizya ukuti wamukunda ukupitila mukwivwila vino akuwanena. (Yoha. 14:15; 15:14, 15) Ala alongo uluyiwele ukuwa iviwuza vya Mwana wa kwe Leza!

9. Uzye ulubatizyo lwa kwe Yesu lwakolana wuli nulwawasambi wakwe?

⁹ Cimwi cino e Yesu akanena awasambilizi wakwe ukucita, acakuti wazipizile ukubatizwa. (Mat. 28:19, 20) Atatunenilevye ukuti tuzipizile ukubatizwa, lelo watusizile ni cakulolelako. Kweni kwawako mumwi muno ulubatizyo lwa kwe Yesu lwapusana nulubatizyo lwa wasambilizi wakwe. (Lolani akambokosi kakuti “ Vino Ulubatizyo lwa kwe Yesu​—Lwapusanako Nulubatizyo lwa Wasambilizi Wakwe.”) Lelo nanti ciwe wo-o, kwawako mumwi muno vyakolana. Ku cakulolelako, pano e Yesu wabatizizwe walanjizizye ukuti wayipile ukucita ukulonda kwa kwe Yisi. (Hebe. 10:7) Wonye avino cawa na ku wina Klistu, nga cakuti wayipa nu kubatizwa, lyo walanjizya ukuti wakuvwamba ukucita ukulonda kwa kwe Yehova asa kulonda kwawo. Fwandi tungalanda ukuti wakakolanya e Yesu.

10. Amilandu ci yino yingalenga mukunde e Yesu swinya koko ukumukunda kungalenga mucitepo cani?

¹⁰ Mwazumila ukuti e Yesu amwana wa kwe Yehova umukundikwe wino wasontwa ukuwa Imfumu ya kututeka. Mwamanya nukuti e Yesu wayicefya swinya wapwililika ngati Amukwasi wakwe. Cinji acakuti wapile wano walinji ni nzala ivyakulya, wasansamusizye wano walinji nu wulanda swinya wapozizye awalwale. (Mat. 14:14-21) Asa vyo-o vitupu, mwalola na vino akatungulula iwungwe lyakwe mwe ya-a manda. (Mat. 23:10) Ukwasowa nukuvwilika, aliwomba ivivule ku nkolelo pano aliwa Amfumu mu Wufumu wa kwe Leza. Uzye mungalanjizya wuli ukuti mwamukunda? Mungalanjizya ukuti mwamukunda ukupitila mukumukolanya. (Yoha. 14:21) Icintu cimwi cino mungacita, akuyipa kwe Yehova nukubatizwa.

11. Acintu ci icicindame cino cizipizile ukulenga mubatizwe?

¹¹ Amulandu ci uwucindame wuno wuzipizile ukulenga mubatizwe? E Yesu wasokolozile isundo ilikulu pa masundo yonsinye pano walanzile ukuti: ‘Uwakunda Imfumu e Leza wako numwezo wako wonsi, nuwumi wako wonsi, namano yako yonsi, namaka yako yonsi.’ (Mar. 12:30) Uzye wo-o vino Yesu walanzile avino mwakunda Yehova?

12. Amulandu ci wuno mwakundila e Yehova? (Lolani ni cikope.)

¹² Kwawa imilandu imivule yino yingalenga tukunde e Yehova. Ku cakulolelako, mwiza mwamanya ukuti “we ntaliko ya wumi wonsi” swinya awili Ekapa wavyawila “vyonsi ivizima ni vilambu vyonsi.” (Amalu. 36:9; Jemu. 1:17) Fwandi ivintu vyonsinye ivizima vino mukalola vyafuma kwe Yehova e Leza wa lukundo.

13. Amulandu ci wuno inzuwi yawela acawila icicindamisye?

 ¹³ Inzuwi cawa acawila icicindame nkaninye cino e Yehova watupa. Amulandu ci wuno tungalandila wo-o? Teyelenganyani pakulemenkana kuno kwawa pe Yehova nu Mwana wakwe e Yesu. E Yesu watili: “E Tata wankunda” swinya nanenenye “Nakunda e Tata.” (Yoha. 10:17; 14:31) E Yehova ne Yesu wizile awalemenkana nkaninye pa mulandu wakuti wisile ponga pa myaka imivule. (Imilu. 8:22, 23, 30) Nomba teyelenganyani pa wulumila wuno Yehova wayivwile pano wazumilizizye Umwana wakwe ukucula nukutufwila. Ukwasowa nukuvwilika, e Yehova wakunda nkaninye awantu wonsinye ukuwikako namwemwenye icakuti wapile Umwana wakwe ukuwa anzuwi pakuti vye mwemwe na wantu wanji mwize muwe nu wumi wamuyayaya. (Yoha. 3:16; Gal. 2:20) Wo-o awuli umulandu uwukulu wuno wuzipizile ukulenga tukunde e Yehova.

14. Acintu ci icicindame cino mungasolapo ukucita mu wumi?

¹⁴ Mwakundilako e Yehova pamulandu wakuti mwasambilila ivivule pe weliwe. Ukwasowa nukuvwilika, mukalonda wuciwuza winu naweliwe ukutwalilila ukuwa awuwome umuyayaya. Cino Yehova akamiwomelezyavye ukucita, akulenga umwezo wakwe ukusecelela. (Imilu. 23:15, 16) Mungalenga umwezo wakwe ukusecelela ukupitila na mwe vino mukucita asa mwe vino mukulandavye. Vino mukacita mu wumi winu vililanjizya apatiswenye ukuti molimonye mwakunda e  Yehova. (1 Yoh. 5:3) Ukusolapo ukucita ivintu vino vikasecelesya Yehova, acili icintu icicindame cino mungacita mu wumi.

15. Mungalanjizya wuli ukuti mwakunda e Yehova?

¹⁵ Avyani vino mungacita pakulanjizya ukuti mwakunda e Yehova? Icakutalicila, muzipizile ukupepa ipepo iliyiwele akuli ukuti ipepo lyakuyipa kwe Yehova. (Amalu. 40:8) Cinji cino muzipizile ukucita, akubatizwa pakulanjizya ku cintu wavule ukuti mwayipa kwe Yehova. Ndi vino tulanzilepo kaali, uwanda walubatizyo wukawa awanda wansansa swinya uwucindame mu wumi winu. Nga cakuti umuntu wabatizwa imikalile yikapiluka, kukawa ukuleka ukuyikalila pa lwakwe lelo akakweyamila sana pe Yehova. (Roma. 14:8; 1 Pet. 4:1, 2) Nga mwivwavye wo-o, ncepamwi mungalola ngati acintu cakutinya. Kweni icisinka acakuti nga avino mukulonda ukupingulapo, muzipizile ukumanya ukuti co-o acintu icicindame nkaninye. Lelo acino cikalenga atuwa nulongo lwa kuwa nu wumi uwuzima. Amunzila ci?

16. Ukulingana na Amalumbo 41:12, uzye e Yehova alilambula wuli wano wasolapo ukumuwombela?

¹⁶ E Yehova awino wawa numwezo wakupa ukulusya pa wantu wonsinye. Asamulandu na vino mwamupa, weni aliminyosezya ivivule nkaninye ukucila pe vino mwamupile. (Mar. 10:29, 30) Nga cakuti mwasolapo ukumuwombela, alimilambula nukumipa ivintu ivizima, swinya aliwamipa vyonsinye vino mukulondekwa na mwe yonye insi inkote. Vyo-o vino twalandapo welyonkovye nga kuvilinganya kwe vino alimicitila. Fwandi nga cakuti mwabatizwa, mutazipizile ukupelela pa nzila mwe wo-o uwulendo wuno mwatalika ne Yehova. Mungatwalilila ukuwombela Umukwasi winu uwalukundo umuyayaya. Wuciwuza winu ne Yehova wuliwomelako. Swinya mulitwalilila ukuwako umuyayaya ngati we Yehova nye.​—Wazyani Amalumbo 41:12.

17. Acani co mungapa e Yehova cino atakwata?

¹⁷ Nga cakuti mwayipa nukubatizwa, mukawa nulongo ulwakupa Umukwasi winu icintu cimwi icicindame nkaninye. Wamipa ivintu ivizima vyonsinye swinya mwayitopwa utumpindi utuzima tuno musitela muzanepo ukuli konsinye. Na mwemwenye pakulanjizya ukusalifya mungapa e Kelewula wansi ni yulu cimwi cino atakwata, akuli kuti ukuyikundila nu kuyipelesya. (Job 1:8; 41:11; Imilu. 27:11) Co-o acilivye icintu icicindame cino mungapingulapo ukucita muwumi. Ukwasowa nukuvwilika,  ukukunda Yehova akuno kuzipizile ukulenga mubatizwe.

18. Amawuzyo ci yano mungayikolowozya?

¹⁸ Mukakwasuka wuli wumwi ndi wamikolowozya ukuti, Ulibatizwa mpindi ci? Kweni pasi wino angamyasucila, lelo cino muzipizile ukutalicilapo ukucita pano mutani mwasuke, akuyikolowozya ukuti, ‘Nga nkulindilila cani?’ (Imili. 8:36) Izukani imilandu yitatu yino tulanzilepo. Icakutalicila, mwakunda icisinka nu wulungamane. Fwe mungayikolowozya ukuti: ‘Uzye nkalonda ukwiza mukulolako pano wensinye munsi aliwalanda icisinka nukucita ivizima?’ Ne cinji, mwakunda e Yesu Klistu. Naponye mungayikolowozya ukuti: ‘Uzye nkalonda ukutekwa nu Mwana wa kwe Leza? Uzye nkalonda ukumukolanya?’ Ni cakulecelezya icicindamisye sana cino mwacita kaali aco-o, mwakunda e Yehova. Fwandi yikolowozyani ukuti: ‘Uzye nkalonda ukumuwombela pakuti namusecelesya?’ Nga cakuti kwe yonsinye ya-a amawuzyo mwazumilizyako ukuti avino mukalonda, lyo mufisilepo ukubatizwa, suka vye nga pali cinji cino mukulindilila!​—Imili. 16:33

19. Amulandu ci wuno mutazipizile ukuwayayaya ukubatizwa? Lanjililani. (Yoha. 4:34)

¹⁹ Lekani tulande pa cilanjililo co e Yesu wawomvizye cino cingamyavwa nga cakuti mukawayawaya ukupingulapo ukubatizwa. (Wazyani Yohani 4:34.) E Yesu wakolinye ukucita ukulonda kwa kwe Yisi kuvyakulya. Amulandu ci? Amuno ivyakulya vyacindama nkaninye kwe sweswe. Fwandi wo-o vino wavikolinye kwi Zwi lya kwe Leza, cikalanjizya apatiswenye ukuti vyonsinye vino Yehova akatunena ukucita vikawa avyakutuzipila. E Yehova asilonda twacita vino vingalenga ivintu ukutuwipila. Nomba uzye e Yehova akalonda ukuti mubatizwe? Emukwai, avino akalonda. (Imili. 2:38) Fwandi muzipizile ukumanya ukuti nga mwivwila isundo lya kubatizwa, mulizanamo ivizima. Nga cakuti musilema na kwisote ukuya mukulya ivyakulya ivinone, lyo-o acani cino cikulenga mwazinguluka ukubatizwa?

20. Avyani vino tulisambilila mu cipande cino cikonsilepo?

²⁰ Uzye muyipekinye ukubatizwa? Awavule wangasuka ukuti, “awe ntani njipekanye.” Icisinka acakuti, ukuyipa kwe Yehova nukubatizwa acili cintu icicindame cino muzipizile ukupingulapo ukucita mu wumi. Fwandi pakuti muyipekanye pakasumba impindi, pakalondeka ukwelenganyapo sana nga nu kuwomvya amaka yinu. Nomba nga cakuti mukuvwambisya ukubatizwa, avyani vino mungacita pa kuti muyipekanye? Lyo-o alili iwuzyo lino tuliyasuka mu cipande cino cikonsilepo.