1. Avyani vino awakwasi wakavwambisya ukucita?

 TWAMANYA ukuti mwewakwasi mukalonda ukwavwa awana winu ukumanya Yehova nukumukunda. Nomba wo-o vino Yehova asiloleka, lyo-o mungacita wuli pakuwavwa ukulola Yehova ukuti Amuntu wakusimicila wino wangapalamila kwe weliwe?​—Jemu. 4:8.

2. Uzye awakwasi wangacita wuli pakusambilizya awana wawo pa miwele ya kwe Yehova?

² Icintu icicindame cino awakwasi wangacita pakwavwa awana wawo ukupalamila kwe Yehova, akuwasambilizya Baibolo. (2 Tim. 3:14-17) Lelo e Baibolo yalanda pa nzila na yinji yino yingavwa awacitici ukusambilila pe Yehova. Ibuku lya Imilumbe likalanda pa mukwasi waconsi wino wizusyangako umwana wakwe ukuti atazipizile ukwiwilila imiwele ya kwe Yehova, yino yikalolecela mwe vino welewula. (Imilu. 3:19-21) Mwe co-o icipande twandi tusambilile na pevino awakwasi wangawomvya ivyelewulwa pakwavwa awana wawo ukusambilila pa miwele ya kwe Yehova.

3. Uzye awakwasi wazipizile ukwavwa wuli awana wawo?

³ E Baibolo yikalanda ukuti ‘[Imiwele] yino yisiloleka iyakwe Leza yikuloleka palwenze, yilukwa kwakwe vino welewula.’ (Roma. 1:20) Ukwasowa nukuvwilika, mwewakwasi mufwile mukakwivwa icete ukupawulako impindi yakuwa ponga na wana winu ku vifulo vimwi. Mwawomvya yoyo impindi kukwavwa awana winu ukulola ukulemenkana kuno kwawa pa vintu ‘vino [Yehova] welewula’ na pa miwele yakwe iyakuzungusya. Lekani nomba tulole vino awakwasi wangasambililako kwe Yesu.

4. Uzye e Yesu wawomvizye wuli ivyelewulwa pakusambilizya awasambilizi wakwe? (Luka 12:24, 27-30)

 ⁴ Lolani vino e Yesu wawomvizye ivyelewulwa pakusambilizya. Impindi yimwi, wanenile awasambilizi wakwe ukuti walolecesye wacingowe namaluwa. (Wazyani Luka 12:24, 27-30.) E Yesu nga akulonda, nga wawomvizye ivyelewulwa ivili vyonsinye, lelo wasozilepo ukuwomvya ivinyunyi namaluwa vino awasambilizi wakwe wavulizile ukulola. Pano walandanga, awasambilizi wafwile walolanga na kuno wacingowe wakupupuka mupela navyo amaluwa yawaluzile mumpanga. Yelenganyani ukuti e Yesu akusonta wacingowe na maluwa pano akulanda na wasambilizi wakwe. Avyani vinji vino wacisile pansizi yakulanda pe vyo-o ivintu? Wasambilizizye awasambilizi wakwe isambililo ilicindame pe vino Yehova wawa nu mwezo wakupa na vino wawa nicikuku. Wawavwizye ukumanya ukuti e Yehova aliwapa awawomvi wakwe ivyakulya nivyakuzwala ngati awulyanye vino akasakamala wacingowe na maluwaya yamumpanga.

5. Uzye awakwasi wangawomvya wuli ivyelewulwa pakusambilizya umwana wawo pe Yehova?

⁵ Mwewakwasi, uzye mungakolanya wuli e Yesu pano mukusambilizya awana winu? Mungamukolanya ukupitila mukunenako umwana winu pe cimwi cino mwakunda sana mucinyama nanti mucimelwa. Nomba mutazipizile ukupelelavye pakumunena cino mwakunda, lelo muzipizile nukumulondololela na pevyo coco icintu cikatusambilizya pe Yehova. Ne mpindi zimwi mungakolowozyavye umwana ukuti amineneko pa cinyama nanti pa cimelwa cino wakunda. Nga cakuti mukulanzyanya mwe yo-o inzila, aliwateyelezya sana kwe mwemwe na palyanye pano mukumwavwa ukusambilila pamiwele ya kwe Yehova ukuwomvya ivyelewulwa.

6. Avyani vino tungasambililako kwe mama wa kwe Christopher?

⁶ Uzye awakwasi wazipizile ukusumba nimpindi ukuya mukuvwamba icinyama nanti icimelwa nukulola vino cikuwasambilizya pe Yehova, apano waye mukusambilizya awana wawo? Awe mukwai! Amuno ne Yesu nye pano walandanga atalondolozile nivivule pe vino wacingowe wakalya nanti pe vino amaluwa yakakula. Fwandi nanti acakuti umwana winu angalanga akakwivwa icete ukumulondololela ivyewo ivivule pe vino Yehova welewula, mpindi zimwi ukuwomvyavye amazwi amapepuke nanti iwuzyo, avino vingazipa pakuti ayivwicisye icisinka cino mukulandapo. Umwanawitu uwizina lyakuti Christopher acili akakwizuka vino e mama wakwe wacitanga pakuwasambilizya lyo wacili awatici. Watili: “E mama wawomvyanga vye amazwi amapepuke pakutusambilizya pavyeluwulwa vino vili mupipi na kuno tuli. Ku cakulolelako, nga twafika mupipi nimyamba, watinji: ‘Lolani imyamba uwukulu swinya yikuloleka icete! Uzye yitakulanjizya apatiswenye ukuti e Yehova we Leza wakuzungusya?’ Ne nga twafika mupipi ne sumbi, watunenanga ukuti: ‘Lolani vino amang’wimbi yakukatuka na maka! Uzye yatakulanjizya vye ukuti e Yehova wawa namaka?’” E Christopher walanzile nukuti: “Ya-a amazwi amapepuke yano e mama wawomvyanga yalenganga twakwelenganyapo sana.”

7. Mungacita wuli pakwavwa awana winu ukwelenganya pa vyelewulwa?

⁷ Pano awana winu wakuya wakukula, mungawasambilizya ukwelenganyapo sana pa vyelewulwa nukulola vino vikuwasambilizya pe vino Yehova wawa. Ku cakulolelako, mungalandako pe cimwi cino Yehova welewula nukuwakolowozya ukuti, “Uzye co-o cikumisambilizya cani pe Yehova?” Ncepamwi cingamizungusya ukwivwa ivyasuko ukufuma ku wana winu.​—Mat. 21:16.

8. Alongo ci luno awakwasi awina Israeli wawanga nalo ‘pano wakupita mumisewo’?

⁸ Awakwasi awina Israeli wawanenile ukuti wazipizile ukusambilizya awana wawo pe Yehova ‘pano wakupita [mumisewo].’ (Amasu. 11:19) Mu mpindi zya wina Israeli, imisewo yitapisile muno mwalinji amang’anda. Acino awantu nga wakupitamo walolanga ivintu ivilekane lekane ponga ngati avinyama, utunyunyi na maluwa. Fwandi pano  awina Israeli wapitanga mumisewo ni ndupwa zyawo, awakwasi wawanga nulongo lwakulanzyanya na wana wawo pe vino Yehova welewula. Wonye avino na wakwasi mwe ya-a amanda wangacita pakusambilizya awana wawo pavyelewulwa. Lekani tulande pa wakwasi wamwi wano wacita wo-o.

9. Uzye mukusambililako cani kwe Punitha ne Katya?

⁹ E Punitha, umukwasi wacanaci wino akakwikala ku India, watili: “Nga cakuti twatandalila wa lupwa wano wakakwikala mutwaya, tukalola ukuti lonye aluli ulongo ulwa kwavwa awana witu ukusambilila pe Yehova ukuwomvya ivyelewulwa. Twazana ukuti nga cakuti twafuma mu tauni swinya twaya mumisewo muno musipita nkani awantu, apano awana wakakwivwicisya icete nga tukuwasambilizya pe Yehova ukuwomvya ivyelewulwa.” Mwewakwasi mwakwizuka ukuti asa cipepuke ku wana winu ukwiwilila vino mukuwasambilizya pano muli ponga kuncende izizima. E nkazi Katya, uwaku Moldova, watili: “Ivicindamisye vino nkakwizuka sana, ampindi pano twayanga mutwaya ponga na wakwasi wane lyo incili ne mutici. Nkasalifya nkaninye awakwasi wane pe vino wansambilizya ukufuma kuwutici, ukulola ivyelewulwa nukwelenganyapo pe vino vikunsambilizya pe Yehova.”

10. Avyani vino awakwasi wangacita nga cakuti watanga wakumanisye ukufuma mu tauni nukuya mutwaya? (Lolani akambokosi kano kakuti “ Vino Vingavwa Awakwasi.”)

¹⁰ Mungacita wuli nga cakuti mutanga mukumanisye ukuya mutwaya? E Amol, wino nawe akakwikala ku India, watili: “Kuno nkakwikalila, awakwasi wakasumba mpindi nkulu ku ncito, swinya pakufuma mu tauni pangalondekwa ukuwomvya indalama izivule. Lelo ukuya kuno wakasunjila ivinyama nanti mu ncende muno wakapuzila akuno kungazipa ukuya mukutamba ivyelewulwa nukulanzyanya pa miwele ya kwe Yehova.” Ukwasowa nukuvwilika, namwemwenye nga cakuti mwazingulusyavye aminso mulizana ukuti mupipi na pa ng’anda yinunye pawa ivyelewulwa vino mungalanjizya awana winu. (Amalu. 104:24) Mulilola ivintu ponga ngati, avinyunyi, utuzizi, ivimelwa apano ni vintu vye vinji. E Karina, uwa ku Germany, watili: “E mama  wakunda nkaninye amaluwa, acino pano nalinji ne mutici, lyonsinye pano tukutandala wansontelanga amaluwa ayazima yano walolanga.” Mwewakwasi, namwemwenye mungawomvya amabuku na mavidyo yano iwungwe lya kwe Yehova lyatupekanizizya, yano yakalanda pa vyelewulwa pakusambilizya awana winu. Fwandi asamulandu nukuli konsinye kuno mwikalila, mungavwa awana winu ukusambilila pe Yehova ukuwomvya vino welewula. Lekani nomba tulande pa miwele ya kwe Yehova yino mungasambilizyapo awana winu.

11. Uzye awakwasi wangavwa wuli awana wawo ukulola vino Yehova watukunda?

¹¹ Nga mukulonda ukwavwa awana winu ukulola vino Yehova wawa nulukundo, mungawalanjizya vino ivinyama ivivule vikacita pakusakamala utwana. (Mat. 23:37) Mungawalanjizya ni vintu ivizima ivilekanelekane vino tukalola mu vyelewulwa swinya vino vikalenga twakwivwa icete. E Karina wino tulanzilepo kaali watili: “Nga cakuti tukutandala ne mama, wambomelezyanga ukulola nukwelenganyapo pe vino cila liluwa lyapusananako niliwuye, nape vino ukuyemba kwa kwe lyolyo iluwa kukulanjizya vino Yehova watukunda. Acino pa myaka yonsinye yino yapita, ncili nkawikako sana amano kumaluwa, ukulola vino cila liluwa lyapusanako niliwuye, imipanjilwe apano ni milolecele. Amaluwa yatwalilila ukunjizusyako pe vino Yehova watukunda.”

12. Uzye awakwasi wangavwa wuli awana wawo ukulola ukuti e Yehova wawa na mano? (Amalumbo 139:14) (Lolani ni cikope.)

¹² Mwakwavwa awana winu ukulola vino Yehova wawa namano. E Yehova wawa na mano nkaninye ukucila pe yano twawa nayo. (Roma. 11:33) Ku cakulolelako, mungalondololelako awana winu pevino aminzi yakafuma munsi nukuya mukupanga amawingo mupela, apano na pevino amawingo yawa namaka yakusalanganya aminzi ukufumya kucifulo cimwi nukuyatwala kucifulo cinji. (Job 38:36, 37) Cinji acakuti mungawalondololela na pe vino umuwili wapangwa munzila yakuzungusya. (Wazyani Amalumbo 139:13, 14.) Lolani vino umukwasi waconsi wumwi uwizina lyakuti Vladimir wacisile. Walanzile ukuti: “Wanda wumwi umwana witu umonsi waponile pa njinga nukuyicisa. Nomba patilivye papita amanda yatici, wizile apola. Acino nene ne wakwane twizile atumulondololela ukuti e Yehova welewula umuwili munzila yakuti wayipozya uweneco. Twamulondololezile nukuti ivintu vyamusango wo-o, visicitika ku vintu vino awantu wakapanga. Ku cakulolelako, e motoka yisiyilunjisya iyeneco nga cakuti yononeka  pano kwacitika uwusanso. Co-o icakulolelako, cavwizye umwana witu ukulola ukuti e Yehova wawa na mano.”

13. Uzye awakwasi wangavwa wuli awana wawo ukulola ukuti e Yehova wawa namaka? (Ayizeya 40:26)

¹³ E Yehova akatuwomelezya ukupunamila mupela nukwelenganya pa maka yakuzungusya yano yakalenga intanda ukutwalilila ukuwa muno zizipizile ukuwa. (Wazyani Ayizeya 40:26.) Namwemwenye mungawomelezyako awana winu ukupunamila mupela nukwelengayapo pe vino wakulola. E nkazi Tingting uwa ku Taiwan, acili akakwizuka vino vyacitisile lyo acili amutici. Walanzile ukuti: “Impindi yimwi e mama wansezile mukutandala swinya twatambanga icete nkaninye intanda, amuno twafumile mutauni muno mwalinji amalaiti yano yalenganga twapotwa ukutamba icete. Pano twayile ko-o, lyo nkasakamikwa pe vino wano twasambililanga nawo wacitanga swinya navwilikanga nga cakuti nalinji nukutwalilila ukuwombela Yehova nicisinka. Acino e mama wambomelezizye ukwelenganyapo sana pa maka yano Yehova wawomvizye pakwelewula zyozyo intanda. Swinya wanjizusizyeko nu kuti angawomvya yalyanye amaka yano wawomvizye, pakunjavwa ukucimvya intazi iyili yonsinye yino ningapitamo. Pansizi yakwelenganyapo sana pa vyelewulwa vino naweni kuno twayile, calenzile ndavwambisya sana ukumanya ivivule pe Yehova nukutwalilila ukumuwombela.”

14. Uzye awakwasi wangavwa wuli awana wawo ukulola ukuti e Yehova we Leza wa nsansa?

¹⁴ Ivyelewulwa vikalanjizya ukuti e Yehova we Leza wansansa. Wa sayantisiti wazana ukuti ivinyama ivivule vikacena, ukuwikako ninswi nivinyunyi. (Job 40:20) Uzye awana winu wakatela awasekapo pano wakutamba kuno ivinyama vikucena? Ku cakulolelako, ncepamwi walolapo kuno akambuzi kakuciluka ciluka nanti pano twasimbwa ututici tukucena. Fwandi impindi yinji nga mwiza mwalola wakuseka pano wakulola vino ivinyama vikucita, mwize muwizusyeko ukuti tukawombela e Leza wansansa.​—1 Tim. 1:11.

15. Acani cino cingavwa awakwasi ukumanya vino awana wawo wakwelenganya? (Imilumbe 20:5) (Lolani ni cikope.)

¹⁵ Mpindi zimwi awakwasi cingawawomela ukulanzyanya na wana wawo pa ntazi zino wakupitamo. Nga cakuti avino cawa na kwe mwemwe, muzipizile ukwelezya na maka ukumanya vino awana winu wakwelenganya (Wazyani Imilumbe 20:5.)  Awakwasi wamwi wazana ukuti cikawapepucila ukulanzyanya na wana wawo pano wali ku cifulo cimwi wakutamba ivyelewulwa. Amulandu ci? Amuno ku ncende zya musango wo-o, kusiwa ivyakuwapumvyanya ivivule. Umukwasi waconsi ku Taiwan uwizina lyakuti Masahiko walanzilepo umulandu wuno ukucitila wo-o kwacindamila. Watili: “Nga cakuti tuyile mukutandala na wana witu, tukukwela imyamba nukupita mu mbali yasumbi, apano tukalola ukuti wakawa awapepucilwe ukulanda vino wakuyivwa. Fwandi tukawomvya yonye impindi pakumanya vino wakuyivwa na vino wakwelenganya.” E Katya, wino tulanzilepo kaali watili: “Ilivule nganinuka ku sukulu, e mama wantwalanga mukutandala kuno wakateka ivinyama. Nga twaya ko-o, campepucilanga nkaninye ukumulondololela vino tevicitisile ku sukulu na vino vikunsakamika.”

16. Uzye vino Yehova welewula vingavwa wuli awa mu ndupwa?

¹⁶ Ivyelewulwa visikwavwavye awana watupu lelo vikakwavwa na wa mu ndupwa nye. Ku cakulolelako, vikalenga awa mu ndupwa wakwivwa icete ukuvitamba nukukwatako impindi yakupuza. E Baibolo yalanda ukuti kwawa “nimpindi zyachimwemwe . . . ni mpindi zyakuchina.” (Ekawi. 3:1, 4.) E Yehova welewula ivifulo ivizima munsi kuno tungaya tucitile ivintu vino twatemwa. Indupwa izivule zyatemwa ukuwa ponga ni ndupwa zyawo kuvifulo kuno kwawa ivyakutamba ponga ngati, amumyamba na kunduzi. Ne wana wamwi nawo, wakakwivwa icete nga waya mukwizya kuvifulo kuno wakasunjila inyama nanti ukuya kunduzi mukucowa. Ukwasowa nukuvwilika, kwawa inzila izivule zino zingalenga twayitopwa ukutamba vino Yehova welewula.

17. Amulandu ci wuno awakwasi wazipizile ukwavwa awana wawo ukulola vino Yehova welewula?

¹⁷ Munsi mpya, awakwasi na wana waliwayitopwa ukutamba vino Yehova welewula ukucila na pe vino cawa pe yo-o impindi. Amuno tutaliwatina nanti ivinyama ukututina ngati avino cawa pe yo-o impindi. (Ayize. 11:6-9) Cinji acakuti, tuliwayitopwa ukutamba vino Yehova welewula umuyayaya. (Amalu. 22:26) Lelo co-o citakusula mukuti mwe wakwasi muzipizile ukutalika ukulindilila insi mpya, apano mwize mutalike ukuwomelezya awana winu ukutamba ivyelewulwa. Nga mukusambilizya awana winu pe Yehova ukuwomvya vino welewula, walizumila amazwi yano Imfumu David walanzile ayakuti: “Mfumu Leza, pasi nanti wenga wino angachita vino ukachita.”​—Amalu. 86:8.