1-2. Nga cakuti mutani mufikepo ukubatizwa, amulandu ci wuno mutazipizile ukwivwa uwuwi? (Lolani icikope pa nkupo.)

 NGA CAKUTI mukalondesya ukubatizwa, lyo mwapingulapo ukucita icintu icicindame. Nomba iwuzyo alyakuti, uzye muyipekinye? Nga cakuti muyipekinye swinya na waeluda wazumilizizyeko, mutazipizile ukulema na kwisote, mwize mubatizwe pa kulongana kuno kukukonkapo. Nga cakuti mwabatizwa, muliyitopwa ivizima mu mulimo wa kwe Yehova.

² Nga mwemwe, uzye waminena ukuti temuzifyeko mumwi pano mutani mubatizwe? Nanti uzye amwemwenye mwe wano mwalola ukuti pali mumwi muno muzipizile ukuzifya? Nga vyo cawa mutazipizile ukwivwa uwuwi. Mwensinye mungafikapo ukubatizwa asamulandu mwe watici nanti mwe wasongo.

3. Aliwuzyo ci lino umwina Ethiopia wakolowozizye Filipi, swinya aliwuzyo ci lino tungakolowozya? (Imili. 8:36, 38)

³ Wazyani Imilimo 8:36, 38. Umwina Ethiopia wakolowozizye Filipi ukuti: “Ngafwandi pali chani chino chikundesya ukubatizwa?” We-e umonsi walondesyanga sana ukubatizwa. Nomba iwuzyo alyakuti, uzye molimonye wayipekinye ukubatizwa?

4. Uzye umwina Ethiopia walanjizizye wuli ukuti walondesyanga ukutwalilila ukusambilila?

⁴ Umonsi umwina Ethiopia “wayile kwe Yerusalemu mukupepa.” (Imili. 8:27) Pakuti aye ko-o, lyo afwile wapilusile nukuzumila mwe vino awaYuda wazumizilemo. Ukwasowa nukuvwilika wasambilizile pe Yehova ukupitila mu Mawaliko Matele aya ciHeberi. Lelo nanti acakuti wasambilizile pe Yehova, walondesyanga ukumanyilapo na vinji. Vino Filipi wazanile akucita pano wamusunkinye mu musewo, avyo vikalanjizya wo-o. Avyani vino wacitanga? Wawazyanga icimvungwa ca kwe kasesema Ayizeya. (Imili. 8:28) Mwe co-o icimvungwa mutalinji vye ivisinka ivipepuke. Fwandi co-o cikulanjizya apatiswenye ukuti we-e  umonsi umwina Ethiopia atalondanga vye ukupelela pakusambilila ivisinka vya mu Baibolo ivipepuke, lelo walondesyanga ukutwalilila ukusambilila.

5. Uzye umwina Ethiopia wacisilepo cani pevino wasambilizile?

⁵ Umonsi umwina Ethiopia walinji we cilolo kwe Namfumu Kandake swinya; “awino walinji we kasunga wansawo [ivyuuma.]” (Imili. 8:27) Fwandi ukwasowa nukuvwilika, afwile walinji nivyakucita ivivule. Lelo nanti ciwe wo-o, wapawuzileko impindi yakuya mukupepa Yehova. Swinya atapelezilevye pakusambilila icine; lelo wacisilepo cimwi pevino wasambilizile. Acino wapisile uwulendo ukufuma ku Ethiopia pakuti akapepe e Yehova mwi tempele ku Yerusalemu. Pakuti apite wo-o uwulendo uwutali, palondekwanga ukuwomvya ivintu ivivule ni mpindi. Lelo nanti ciwe wo-o, atasakamile pavintu vino walinji nukusumba, cino weni walondesyangavye akuya mukupepa Yehova.

6-7. Uzye umwina Ethiopia watwalilizile wuli ukukunda Yehova?

⁶ Umwina Ethiopia wasambilizileko ivintu ivivule ivipya kwe Filipi. Cimwi pe vino wasambilizile acakuti, e Yesu walinji we Mesiya. (Imili. 8:34, 35) Ukwasowa nukuvwilika, wivwile icete nkaninye ukusambilila pe vino Yesu wamucitizile. Nomba nga kulonda, avyani vino wanga cite pansizi yakusambilila pe vyo-o ivisinka? Wanga apelelevye pa kuzumila mwe vino awaYuda wazumizilemo, ampela cikome na mwiwe! Lelo asa vino wacisile, wizile akunda nkaninye e Yehova nu Mwana wakwe. Na co-o calenzile apingulepo ukucita icintu icicindamisye mu wumi, akuli ukuti ukubatizwa nukuwa amusambilizi wa kwe Yesu. Acino e Filipi wizile amubatizya amuno waweni ukuti wafisilepo.

⁷ Ukukolanya umonsi umwina Ethiopia kungamyavwa ukuyipekanya ukubatizwa. Namwemwenye mulilanda ukufuma pansi ya mwezo ukuti, “Ngafwandi pali chani chino chikundesya ukubatizwa?” Lekani tusambilile pe vino mungacita ndi vino umwina Ethiopia wacisile. Icakutalicila: watwalilizile ukusambilila, icaciti wili, wacisilepo cimwi pe vino wasambilizile, ni cakulecelezya watwalilizile ukukunda Yehova.

8. Uzye iwaliko lya kwe Yohani 17:3 likalanda ukuti avyani vino muzipizile ukucita?

⁸ Wazyani Yohani 17:3. Uzye ya-a amazwi yano yali pe lyo-o iwaliko, yamyavwa ukutalika ukusambilila Baibolo? Nga vino cili, lyo asa mwemwe mwenga, nasweswenye avino calinji. Nomba uzye yakatunena nukuti tuzipizile ukutwalilila ukusambilila? Ukwasowa nukuvwilika avino yakatunena. Amuno tutalitela tulekepo ‘ukumanya e Leza wakusimicila.’ (Ekawi. 3:11) Tulitwalilila ukusambilila umuyayaya. Pano tukuya tukusambilila, apano tuliwaya tukupalamila sana kwe Yehova.​—Amalu. 73:28.

9. Avyani vino muzipizile ukucita pansizi yakusambilila amasambililo ya mu Baibolo aya kutalicila?

 ⁹ Pakumanya Yehova, tukatalicila ukusambilila amasambililo ya mu Baibolo aya kutalicilako. Mwe kalata yino umutumwa Paulo walembezile awaHeberi, wisile ya-a amasambililo ukuti “amasambilizyo yakutalika aya wu Klistu” swinya wayakolinye kwisulu lino likalenga akanya ukukula icete. (Hebe. 5:12; 6:1) Wawomelezizye na wina Klistu ukuti watazipizile ukupelelavye pakumanya amasambililo yakutalicilako, lelo wazipizile ukutwalilila ukusambilila ivisinka ivikulu ivya mu Baibolo. Uzye mukavwambisya ukusambilila ivizike ivya mu Baibolo? Uzye mukalondesya ukutwalilila ukusambilila pe Yehova na pakulonda kwakwe?

10. Amulandu ci wuno wamwi cikawatalila ukuwazya?

¹⁰ Swe wavule cikatutalila ukuwazya. Nga mwemwe? Uzye pano mwalinji ku sukulu, mwasambilizile ivyakuwazya icete? Uzye mwivwanga icete pano mukuwazya nukulola ukuti mwasambilila ivintu ivivule? Nanti uzye mwazanile ukuti mutakunda ukuwazya amabuku? Nga vino cawa, lyo asa mwemwe mwenga, wonye avino awavule wakayivwa. Lelo muzipizile ukumanya ukuti e Yehova angamyavwa. We Kasambilizya umuzima swinya umufikepo pa kasambilizya wonsinye.

11. Uzye Yehova walanjizya wuli ukuti we “Kasambilizya Mukulu”?

¹¹ E Yehova akayita umweneco ukuti “we Kasambilizya winu Umukulu” [NWT] (Ayize. 30:20, 21) Watekanya, awacikuku swinya we kasambilizya wino akamanya vino wanji wakuyivwa. Akalola ivizima mwe wano akusambilizya. (Amalu. 130:3) Cinji acakuti asikwenecela ukuti twacita vino tutanga tukumanisye. Mwakwizuka ukuti, welewula uwongo winu munzila yakuzungusya. (Amalu. 139:14) Swewantu tukavwambisya sana ukusambilila. Wonye avino ne Kelewula witu akalonda twasambilila umuyayaya nukwivwa icete pano tukucita wo-o. Fwandi cicindime nkaninye ukuwa “nulusala” lwakuvwambisa ukusambilila ivisinka vya mu Baibolo. (1 Pet. 2:2) Mwapanga ivyakucita vino mungaficilisya swinya mwawazya Baibolo lyonsinye ukulingana navino mwatantika. (Josh. 1:8) Nga cakuti Yehova wamyavwa, muliwakwivwa icete ukuwazya swinya muliwasambilila ivivule pe weliwe.

12. Amulandu ci wuno tuzipizile twayisambilizya sana pe Yesu na pa mulimo wuno wawombanga?

¹² Lyonsinye mwapawulako impindi yakwelenganya pe Yesu na pa mulimo wuno wawombanga. Ukukolanya Yesu akuno kungatwavwa ukuwombela Yehova maka maka mwe ya-a amanda amatale. (1 Pet. 2:21) E Yesu atapisile na mumbali, pakunena awasambilizi wakwe ukuti waliwapita mu ntazi. (Luk. 14:27, 28) Lelo nanti ciwe wo-o, wasuwizile ukuti walitwalilila ukuwa ni cisinka kwe Yehova ngati avino weliwe wacisile. (Yoha. 16:33) Mwawazya amalyasi yano yakalanda pa wumi wa kwe Yesu nukupanga ivyakucita pakuti mumukolanye.

13. Avyani vino muzipizile ukutwalilila ukulenga kwe Yehova, swinya amulandu ci?

¹³ Tutazipizile ukupelela vye pakuwa na mano. Lelo kwawa ivintu na vinjinye vino tuzipizile ukuwa navyo. Ku cakulolelako, amano yangatwavwa ukusambilila ivivule pe Yehova nukuwa ni miwele ponga ngati, akumukunda nukumusuwila. (1 Kor. 8:1-3) Pano mukuwazya, mwalenga Yehova ukuti amipe isuwilo iliwome. (Luk. 17:5) Asilema na kwisote ukwasuka amapepo ya musango wo-o. Swinya amano yakwe yano alimipa yalilenga muwe ni suwilo lya cisinka lino lilimyavwa ukutunguluka.​—Jemu. 2:26

14. Uzye umutumwa Peter wawomvizye cilanjililo ci pakutwavwa ukumanya umulandu wuno cacindamila ukuwomvya vino twasambilila? (Lolani ni cikope.)

¹⁴ Umutumwa Peter walanzile pa mulandu wuno cacindamila ku wina Klistu ukuwomvya  vino wasambilila. Pakulondolola wawomvizye ilyasi lya mu Baibolo lino likanda pe Nowa. E Yehova wanenile e Nowa ukuti walinji nukuwomvya intalala pakonona wano wacitanga iviwipe pe yoyo impindi. Ukupelela vye pakumanya ukuti intalala yalinji nukwiza, asa kuno kwalinji nukupususya e Nowa nu lupwa lwakwe. Nga muweni pa-a, e Peter walandanga pa mpindi pano intalala yitani yize “pano wawazanga uwato.” (1 Pet. 3:20) Fwandi e Nowa nu lupwa lwa kwe wacisilepo cimwi pano wamanyile ukuti kwalinji nukuwa intalala. Wakonsile vino Leza wawanenile ukuti wazenge uwato, wuno walinji uwukulu nkaninye. (Hebe. 11:7) Acino e Peter wakolinye ulubatizyo kwe vino Nowa wacisile, pano walemvile ukuti: ‘Nibatizyonye, alili lino likuwapususya kanonzi.’ (1 Pet. 3:21) Pe yo-o impindi tungakolanya vino mukacita pa kuyipekanizizya ku lubatizyo ku milimo yino e Nowa nu lupwa lwakwe wawomvile pa myaka imivule pa kuzenga uwato. Avyani vino muzipizile ukucita pa kuyipekanizizya ku lubatizyo?

15. Avyani vino muzipizile ukucita pa kulanjizya ukuti mulapizile ukufuma pansi ya mwezo?

¹⁵ Icintu conga cino muzipizile ukucita, akulapila. (Imili. 2:37, 38) Nga cakuti twalapila ukufuma pansi ya mwezo tulipiluka mu vintu vyonsinye. Uzye mwaleka ukucita ivintu iviwipe vino visisecelesya Yehova ponga ngati awuzelele, ukupepa fwaka nukulanda imvwango imbipe nanti izyamusalula? (1 Kor. 6:9, 10; 2 Kor. 7:1; Efes. 4:29) Nga cakuti mutani muleke ukucita vyonsinye vyo-o, muzipizile ukutwalilila ukwelezya na maka ukupiluka. Mungalanda nawino akamisambilizya Baibolo nanti mungakolowozya waeluda mwiwungwe muno mwawa pakuti wamyavwe nukumipandako amano pe vyo mungacita. Ne nga cakuti mwe wacitici swinya mukakwikala na pa wakwasi, muzipizile ukuwakolowozya ukuti wamyavwe ukuleka imisango miwipe yino yikulenga mukane ukufikapo ukubatizwa.

16. Avyani vino tuzipizile ukucita pakuti twapepa Yehova lyonsinye?

¹⁶ Cacindama nkaninye ukucita vyonsinye vino vikalondekwa pa kupepa Yehova. Pe vyo-o pangawa akuzanwa mukulongana, ukuficilisya imbali nu kwasukapo. (Hebe. 10:24, 25) Swinya nga cakuti mwafikapo ukuwa mwe wakawizya, mwawombako lyonsinye mu mulimo. Pano mukuya mukuwombesya, apano muliwaya mukwivwa icete ukuwomba. (2 Tim. 4:5) Ne nga cakuti mwe watici swinya mucili mukakwikala na  pa ng’anda pa wakwasi winu, mungayikolozya ukuti: ‘Uzye awakwasi wane wakampaticizyavye pakuti nje mukulongana nanti mu mulimo wakuwizya? Nanti uzye nkayikatucila vye?’ Nga cakuti mukayikatucila vye, lyo mukalanjizya apatiswenye ukuti mwawa ni suwilo, mwakunda Yehova swinya mukasalifya pe vino akamipa. Vyonsinye vyo-o, avyawila vino mukapa Yehova pakulanjizya ukuti ‘mwayipa kwe weliwe.’ (2 Pet. 3:11; Hebe. 13:15) Amuno ivyawila vino tukapa mukuyikundila swinya ukwasowa ukuti watupaticizye, vikasecelesya Yehova. (Linganyaniko 2 Wakorinte 9:7) Cinji acakuti tukacita wo-o, amuno tukawa ni nsansa nga cakuti twapa Yehova ukufika pano papelezile amaka yitu.

17-18. Acintu ci icicindame cino cingamyavwa ukulunduluka ukufika na kulubatizyo, swinya amulandu ci? (Mateyu 22:37)

¹⁷ Kweni, pano mukuwombesya ukuti mufikepo ukubatizwa, mwandi mwapita mu ntazi. Awantu wamwi wangamicuzya swinya wangamiseka nanti ukumipumya pe vyo muzumizilemo. (2 Tim. 3:12) Nanti ncempamwi mungafupuka nukuyivwa uwuwi pa mulandu wakulola ukuti vino mwapanga ukucita visakuwomba zuwa. Acani cino cingamyavwa ukusipicizya? Icintu icicindame cino cingamyavwa, akukunda Yehova.

¹⁸ Ukukunda Yehova acili cintu icicindame cino mwacita. (Wazyani Mateyu 22:37.) Ukukunda Yehova kungamyavwa ukutwalilila ukusipicizya intazi. Imiku imivule, e Baibolo yikawomvya izwi lyakuti ulukundo uluntasila nga cakuti yikulanda pevino Yehova wakunda awawomvi wakwe. Ulukundo uluntasila lukasula mukuti, e Yehova atalitela asye awawomvi wakwe nanti ukuleka ukuwakunda. (Amalu. 100:5) Mwakwizuka ukuti mwelewulwa mumukola wa kwe Leza. (Inta. 1:26) Nomba mungacita wuli pakuti muwe nu lukundo lwa musango wo-o?

19. Mungacita wuli pakuti mwasalifya sana Yehova pe vyonsinye vino akamicitila? (Wagalatiya 2:20)

¹⁹ Pano mukupepa kwe Yehova, mwatalicila ukumusalifya. (1 Tes. 5:18) Cila wanda mwayikolowozya ukuti, ‘Avyani vino Yehova ancitizile ilelo vino vikulanjizya ukuti wankunda?’ Nga mwavizana, mwalumbula conga na conga pano mukupepa nukumusalifya. Mwakwizuka ukuti e Yehova akamicitila ivizima pa lwinu pa mulandu wakuti wamikunda. Wonye avino numutumwa Paulo wizile ayiluka pe Yehova. (Wazyani Wagalatiya 2:20.) Acino mwayikolowozya ukuti, ‘Uzye nanenenye nkalonda ukulanjizya ukuti namukunda ngati avino wankunda?’ Ukukunda  Yehova kulimyavwa ukutwalilila ukucimvya amelezyo nu kusipicizya intazi. Swinya kulilenga mwapepa kwe Yehova cilawanda nukulanjizya ukuti mwamukunda.

20. Avyani vino muzipizile ukucita pakuti muyipe kwe Yehova, swinya amulandu ci wuno ukucita wo-o kwacindamila?

²⁰ Mukupita kwa mpindi, ukukunda Yehova kulilenga mupepe ipepo iliyiwele ilyakuyipa kwe weliwe. Swinya nga mwacita wo-o, muliwa nisuwilo lya kuti mungatwalilila ukuwa e ciwuza wa kwe Yehova umuyayaya. Cinji acakuti, nga mwapepa ipepo lyakuyipa, lyo mwalaya e Yehova ukuti mulitwalilila ukumuwombela pano ivintu vizifile na pano vitazifilenye. Kutawa ukupepa ipepo lyakuyipa imiku yiwili, amuku wonganye lyo casila. Fwandi lyo-o ipepo asa cintu cakwizizya, lelo acintu icicindame cino muzipizile ukuwikako sana amano. Kweni mwandi mwapingulapo ukucita ivintu ivivule mu wumi, swinya vimwi pe vyo-o vyandi vyawa avizima nkaninye. Lelo icisinka acakuti, kusi nanti cimwinye cino mulitela mupingulepo muwumi cino ciliwa acicindame ukulusya pakuyipa kwe Yehova. (Amalu. 50:14) E Satana aliwakwelezya na maka ukucita vino vingalenga muleke ukukunda Yehova, nukwenecela ukuti mwandi muleke ukumusuwila. Mutazipizile ukuleka Satana amicimvye! (Job 27:5) Ukukunda Yehova kulimyavwa ukuficilisya umulapo winu uwakuyipa swinya kulilenga mupalamile sana ku Mukwasi winu uwa kwi yulu.

21. Amulandu ci wuno tungalandila ukuti ulubatizyo asayili insilo yakuwombela Yehova lelo ayili intalicilo?

²¹ Pansizi yakuyipa kwe Yehova, muzipizile ukunena wa eluda mwiwungwe muno mwawa ukuti mukulonda ukubatizwa. Lyonsinyye mwakwizuka ukuti, ulubatizyo asayili insilo yevyonsinye lelo ayili intaliko. Nga cakuti umuntu wabatizwa lyo apano watalika ukuwombela Yehova. Fwandi peyonye impindi apano muzipizile ukukundilako sana Umukwasi winu. Mwapanga ivyakucita mu wumi pakuti ulukundo lwinu lwakulilako cila wanda. Ukucita wo-o, kulilenga mubatizwe. Ala wo-o wuliwa awanda wansansa! Lelo ayili intaliko yakuwombela Yehova. Acino twalililani ukukunda e Yehova nu Mwana wakwe umuyayaya.