1. Acani cino e Yesu walanzile pa vyuuma vya mwi yulu?

ASA vya wupe vyonsinye vino vikaloleka. Ivya wupe ivicindame nkaninye visiloleka nu kuloleka. Mwi Lyasi lyakwe ilya pa Mwamba, e Yesu walanzile pa vyuuma vya mwi yulu vino vyalusya indalama nanti icuuma icili consinye cino umuntu angalonka. Walunzilepo nu kuti: “Kuno kuli mboto yako nanti icuuma akuno nu mwezo wako awulanga wuli.” (Mat. 6:19-21) Umwezo wukavwambisya ukuwa na vilyanye vino twacindamika. Lelo nga twasolapo ukupanga izina lizima ne Leza lyo tukusunjisya ivyuuma vitu kwi yulu, kuno vitanga vyononeke swinya kusi wino angiwa.

2. (a) Ukulingana ne 2 Wakorinte 4:17, 18, avyani vino e Paulo watuwomelezizye ukuwika amano? (b) Avyani vino twandi tusambilile?

² Umutumwa e Paulo watuwomelezizye ukuwika amano pe “vino visiloleka.” (Wazyani 2 Wakorinte 4:17, 18.) Pe vino visiloleka pawa na mapaalo yonsinye yano tulipocelela mu nsi mpya. Nomba twandi tusambilile pa vya wupe 4 vino visiloleka. Wuciwuza witu nu Leza, ipepo, umuzimu uwutele, nu kwavwa kuno tukapocelela kwe Yehova, e Yesu na wangeli pano tukuwizya. Twandi tulole na vino tungalanjizya ukusalifya pa vya wupe vyonsinye vyo-o vino visiloleka.

3. Aca wupe ci icikulu cino tusilola, swinya acani cino calenga tuwe na co-o icawupe?

³ Wuciwuza witu ne Yehova acili ica wupe icicindame nkaninye cino tusilola. (Amalu. 25:14) Uzye acani cino cikalenga e Yehova umutele awe iciwuza na wantu wano watapwililika? Nanti  aca kuti e Yehova amutele, akawa iviwuza na wantu wano watapwililika, ukuwomvya inzuwi ya mwana wakwe amuno e Yesu “awino akasenda uluwembu lwa munsi!” (Yoha. 1:29) Na pano e Yesu atani atufwile nye e Yehova wamanyizile lya nkani ukuti e Yesu alitwalilila ukuwa ni cisinka mpaka ni mfwa pa kuti aluwule awantu ku luwembu ni mfwa. Awuli umulandu wuno wawelanga iciwuza na wantu nanti aca kuti e Klistu atani awafwile.​—Roma. 3:25.

4. Landani pa vyakulolelako vya wantu wano walinji iviwuza vya kwe Leza lyo Yesu atani ayize mu nsi.

⁴ Teyelenganyani pa wantu wano wizile awawa iviwuza vya kwe Leza lyo ne Yesu atani ayize munsi. E Abrahamu walinji amuntu wuno walinji ni suwilo iliwome. Pa nsizi ya myaka 1,000 lyo Abrahamu wafwa kali, e Yehova walanzile pe Abrahamu ukuti “umukundwe wane [‘e ciwuza wane. nwt].” (Ayize. 41:8) Co-o cikusula ukuti, e Yehova akatwalilila ukulola awantu ukuti aviwuza vyakwe nanti wangafwa. E Yehova acili akakwizuka Abrahamu. (Luka. 20:37, 38) Umuntu winji we Job. Pano kwalinji ukuwungana mwi yulu, e Yehova walanzile pe Job lyo na wangeli wonsinye wakwivwa, ukuti ‘umuntu umulungamane, wino akatiina Leza swinya wino wapata iviwipe.’ (Job 1:6-8) Nanti aca kuti awavule walesile ukuwombela Yehova mu mpindi ya kwe Daniel. E Daniel weni watwalilizile vye ukuwombela Yehova mupipi ni myaka 80. Uzye e Yehova wivwanga wuli pe we-e umuwomvi wakwe uwa cisinka? Pa miku yitatu awangeli wanenanga Daniel lyo we songo ukuti wino ‘wakundikwa nkaninye’ kwe Leza. (Dan. 9:23; 10:11, 19) Tutanga tuvwilike nanti katicinye ukuti e Yehova akalucila ukwizalola iviwuza vyakwe vyazyulupuka.​—Job 14:15.

5. Uzye acani cino cikalondekwa pa kuti tuwe iviwuza vya kwe Yehova?

⁵ Ya-a amanda kwawa imintapendwa ya viwuza vya kwe Yehova. Pe yo-o imintapendwa pali, awonsi, awanaci, na wana awatici insi yonsinye wano wakalanjizya mwe vino wakacita ukuti aviwuza vya kwe Yehova. E Yehova we ciwuza wa wantu “awalungamane.” (Imilu. 3:32) Inzuwi ya kwe Yesu ayino yatupa ulongo lwa kuwa iviwuza vya kwe Yehova. Pa mulandu nayo-o inzuwi, tungawa iviwuza vya kwe Yehova, tungapa uwumi witu kwe weliwe nu kubatizwa. Nga twacita vyonsinye vyo-o tukakwiza mukuwa pa mintampendwa ye wano wayipa kwe Yehova, swinya wano wawa na wuciwuza nu muntu Umucindamisye mu nsi na mwi yulu!

6. Uzye tungalanjizya wuli ukusalifya pa wuciwuza witu ne Yehova?

⁶ Tungalanjizya ukuti tukasalifya pa wuciwuza witu nu Yehova nga twatwalilila ukuwa ni cisinka mpaka na ku nsilo ukukolanya Abrahamu ne Job. Tuzipizile ukucindamika wuciwuza witu nu Leza wulyanye vino e Daniel wawucindamisile. (Dan. 6:7, 10, 16, 22) E Yehova angatwavwa ukutwalilila ukucinvya amelezyo yano tukupitamo nu kutwalilila ukuwa iciwuza cakwe.​—Flpi. 4:13.

7. Ukulingana ni Imilumbe 15:8, uzye e Yehova akakwivwa wuli nga tukupepa? (b) Uzye akakwasuka wuli amapepo yitu?

⁷ Ipepo lyawa pa vya wupe vino tusilola. Waciwuza wano wakundana wasifisana nanti cimwi. Wonye avyo na wuciwuza witu nu Yehova wawa. Akawomvya Baibolo pakulanda na sweswe, swinya mwe Baibolo atafisa nanti cimwi, watunena amelenganyo yakwe na vino akayivwa. Ne naswe nga tukupepa lyo tukulanda nawe swinya tungamunena vyonsinye vino vili ku nsingo na vino tukwelenganya. Tutazipizile ukumufisa nanti cimwi. E Yehova akatemwa nkaninye ukwivwa ku mapepo yitu. (Wazyani Imilumbe 15:8.) Pa mulandu  wakuti watutemwa asikwivwa vye ku mapepo yitu lelo akatwasuka nu kutwasuka. Impindi zimwi angatwasuka paponye. Ne limwi cingasumba impindi pa kuti atwasuke. Lelo akakwasuka pa mpindi injanane swinya mu nzila nzima. Kweni limwi angasuka ipepo litu mu nzila yino tusakwenecela nu kwenecela. Ku cakulolelako, ukucila ukufumyapo uwelezyo e Yehova angasolapo ukutupa amano na maka ya “yakuzizimicizya.”​—1 Kor. 10:13.

8. Uzye tungalanjizya wuli ukuti tukasalifya pa ca wupe ca kupepa cino twakwata?

⁸ Uzye tungalanjizya wuli ukusalifya pe wo-o uwupe uwucindame nkaninye? Cimwi cino tungacita akukonka vino e Yehova watunena ukuti “pepanji impindi zyonsi.” (1 Tes. 5:17) E Yehova asitupaticizya ukupepa amuno wacindika sana insambu zitu izya kuyisolela awuli umulandu wuno pa kutunena pi pepo akatuwomelezya vye ukuti “muwapepa nanti kulecelezya.” (Roma. 12:12) Fwandi nga tukupepa cila wanda lyo tukulanjizya ukuti tukasalifya pe co-o ica wupe. Tutazipizile twakwiwilila ukumusalifya nu kumulumbanya mu mapepo yitu.​—Amalu. 145:2, 3

9. Uzye umwanawitu wumwi akakwivwa wuli pi pepo, nga mwemwe mukakwivwa wuli?

⁹ Nga twatwalilila ukuwombela Yehova nu kulola vino akwasuka amapepo yitu apano tukatalika ukusalifya pe wo-o uwupe wuno Yehova watupa. Lolani ica kulolelako ca mwanawitu e Chris, wino wawomba umulimo wa mpindi zyonsi pa myaka 47. Watili; “Nkakwivwa icete ukulanda ne Yehova umutondo tondo. Amuno ku kamyalala icete swinya lyo nkutamba na kuno ilanzi likufuma lyo nu luumi lukulangalila pa mulandu ni nsansamwenje zyi lanzi! Co-o cikalenga namusalifya pa vyawupe vyonsinye vino akatupa, ukusanzyako ni ca wupe ca kupepa. Pano nkuya mukulala naponye nkapepa swinya nkalala na ku nsingo mpe.”

10. Amulandu ci wuno tuzipizile twalola umuzimu wa kwe Leza ukuti awupe uwucindame nkaninye?

¹⁰ Umuzimu uwutele awupe na wunji wuno tuzipizile twalola ukuti wacindama nkaninye. E Yesu walanzile ukuti twalenga kwe Leza pa kuti atupa umuzimu uwutele. (Luka. 11:9, 13)  E Yehova akawonvya umuzimu wakwe uwutele pa kutuwomya nu kutupa “amaka yano yacila pa wuntu.” (2 Kor. 4:7; Imili. 1:8) Umuzimu uwutele wungatwavwa ukucinvya uwelezyo uwuli wonsinye wuno tungapitamo.

11. Amu nzila ci muno umuzimu wa kwe Yehova ungatwavwa?

¹¹ Umuzimu uwutele wungatwavwa ukuwomba icete imilimo iyili yonsinye mu mulimo wa kwe Leza. Wungatwavwa nu kumanyilako ivya kuwomba imilimo yimwi yino twamanya. Tusivwilika nanti katicinye ukuti umuzimu wa kwe Yehova awuno wukalenga mu mulimo wakwe mwafuma ivizima .

12. Ukulingana na Amalumbo 139:23, 24, tungalenga ukuti umuzimu uwutele wutwavwe ukucita cani?

¹² Inzila yinji yino tungalanjizizyamo ukuti tukalola umuzimu uwutele ukuti wacindama, akupepa kwe Yehova ukumunena ukuti alole amelenganyo yitu. (Wazyani Amalumbo 139:23, 24.) Aliwomvya umuzimu wakwe uwutele pa kuti tumanye nga cakuti tuli na melenganyo amawipe nanti awe. Nga twazana ukuti vino tukwelenganya vitazifile, tufwile ukulenga umuzimu wa kwe Yehova paponye pa kuti tuwe na maka ya kukana amelenganyo amawipe. Nga twacita wo-o, lyo tukulanjizya ukuti tusilonda nanti katicinye ukucita vino vingalenga e Yehova atupoke umuzimu wakwe.​—Efes. 4:30.

13. Acani cino cingatwavwa ukutalika ukusalifya nkaninye pa muzimu uwutele?

¹³ Nga tukulola vino umuzimu wa kwe Yehova wukucita pe yo-o impindi tukasalifya nkaninye. Pano e Yesu atani aye kwi yulu, wanenile awasambi wakwe ukuti: “Ukuwa muliyizuzwa na maka pano Muzimu mwimicile wiza kwa kwe mwemwe, mwize muwe mwe wakalola wane mwe Yerusalemu, na mwe Yudeya monsi, na mwe Samariya, ukufika na kuno insi yapakula.” (Imili. 1:8) Ya-a amazwi yakuficiliswa pe yo-o impindi. Ukupitila mukwavwa kwa muzimu uwutele pe yo-o impindi kuli awantu ukucila 8.5 milioni wano wasolapo ukutalika ukupepa Yehova. Asa coco conga umuzimu uwutele walenga awantu wa kwe Yehova ukulemenkana nkaninye. Wukalenga twawa ni miwele imizima ndi vino, ulukundo,  ukusecelela, umutende, ukutekanya, uluse, uwuzima, isuwilo, ukufuuka nu kuyilama. Yo-o imiwele yonsinye ayino yikapanga “icikomwa ca ku muzimu.” (Gal. 5:22, 23) Ala umuzimu uwutele aca wupe iciyiwele nkaninye!

14. Avya wupe ci vino visiloleka vino vikatwavwa pano tukuwomba umulimo wakuwizya?

¹⁴ Twawa ni cawupe icicindame nkaninye ica “kuwombela ponga” nu Yehova, e Yesu na wangeli. (2 Kor. 6:1) Tukawombela nawo ponga nga tuli mu mulimo. E Paulo walanzile pe wonsinye wano wakawomba mwe wo-o umulimo ukuti: “Swe wawomvi wawuye nu Leza.” (1 Kor. 3:9) Nga tuli mu mulimo tukawombela ponga ne Yesu. Pano watumanga awasambi wakwe ukuya mukupanga awasambi, wawanenile ukuti “Nandi ndawa namwe.” (Mat. 28:19, 20) Tukakwivwa icete nkaninye ukumanya ukuti awangeli awano wakatutungulula pano tukuwizya “ilandwe lizima . . . kwakwe wano wakakwikala munsi”!​—Ukuwu. 14:6.

15. Simikani pa cakulolelako ca mu Baibolo cino cikatwavwa ukumanya uluwali ulucindame luno e Yehova akawomba mu mulimo wa kuwizya.

¹⁵ Avyani vino tukamalilicizya pa mulandu wa kwavwa kuno tukapocelela kwe Yehova, e Yesu na wangeli? Pano tukutanda imbeyu zya Wufumu, imbeyu zimwi zikaponela pa myezo ya wantu wano wawa nu mwezo wa kusambilila. (Mat. 13:18, 23) Uzye tungati weweni wino akalenga zyo-o imbeyu ukumela nu kutalika ukukoma? E Yesu walondolozile ukuti kusi nanti wenga wino angawa umusambi wakwe nga cakuti ‘e Yisi . . . atamulesile.’ (Yoha. 6:44) E Baibolo yikatusimicilako na vino vyacitisile wanda wumwi. Impindi yimwi, e Paulo wawizizizye awanaci wamwi mu musumba wa Filipi. E Baibolo yikatunena pa mwanaci wumwi wino walinji pe wa-a, uwizina lya kuti Lydia ukuti: “E Yehova wiyuzile umwezo wakwe ku kwivwicisya icete ivintu vino Paulo wavwanganga.” (Imili. 16:13-15) Na pe yonye impindi awantu awavule wiza kwe Yehova.

16. Uzye weweni wino azipizile ukupocelela umucinzi pa vizima vyonsinye vino tungazana pano tukuwomba umulimo wa kuwizya?

¹⁶ Weweni wino tuzipizile ukucindika pa vizima vyonsinye vino vikafuma mu mulimo wa kuwizya? E Paulo wasusile lyo-o iwuzyo mu mazwi yano walemvile pi wungwe lya mu Korinti ukuti: “Nenji nalembeka, Apolo witilila, ukuwa Leza awino wamezya. E kalembeka nu kwitilila wonsinye awavye. Nkandi e Leza, amuno awino akamezya.” (1 Kor. 3:6, 7) Naswenye tuzipizile ukupa umucinzi kwe Yehova pa ivili vyonsinye vino tungazana mu mulimo wa kuwizya.

17. Uzye tungalanjizya wuli ukusalifya pa longo luno twakwata ulwa kuwombela ponga ne Leza, e Klistu na wangeli?

¹⁷ Uzye tungalanjizya wuli ukusalifya pa longo luno twakwata ulwa “kuwombela ponga” ne Leza, e Klistu na wangeli? Tungalanjizya ukusalifya nga tukuwomvya inzila indekane ndekane ukuwizizyako wanji pi landwe lizima. Tungacita wo-o nga tukuwomba “ku cintu wavule na ku ng’anda ni ng’anda.” (Imili. 20:20) Awavule wakawizyako nu wunte wa mwi lyasi. Nga wasunkanya wino watamanya, wakamulamuka ni nsansa nu kwelezya ukulanzyanya nawe. Mu mucenjelo wakatalika ukulanda nawe pi lyasi ilizima ilya mu Baibolo nga cakuti walola ukuti angakunda ukwivwa.

18-19. (a) Uzye tukakwitilizya wuli imbeyu zya wufumu? (b) Simikani ica kulolelako cino cikulanjizya vino e Yehova wavwizye umusambi wumwi uwe Baibolo ukupiluka.

¹⁸ Tutazipizile ukupelela vye pa kukomela imbeyu zya Wufumu pano ‘tukuwombela ponga’ ne Yehova lelo tuzipizile twakwitilizya nu kwitilizya. Nga cakuti wano tukuwizizya watemwa  icine tufwile ukunyocelako nanti ukunenako winji ukuti ayize anyocele kweneko pa kuti wize watalike ukusambilila. Tukasecelela nkaninye ukulola kuno e Yehova akwavwa wino tukatungulula isambililo ukupiluka nu kuwa ni miwele mizima.

¹⁹ Teyelenganyani pa cakulolelako ca kwe Raphalalani uwa ku South Africa, wino walinji we sing’anga pano atani asambilile e Baibolo. Wakunzile nkaninye vino wasambililanga mwe Baibolo. Lelo camuwomezile ukuzumila vino e Baibolo yikalanda pa kwivwana na wafwe. (Amasu. 18:10-12) E Yehova wamwavwizye ukupiluka katici katici. Mukupita kwa mpindi, e Raphalalani walesile wusing’anga, nanti aca kuti amuno wazanilanga indalama. Pe yo-o impindi ali ni myaka 60. E Raphalalani walanda ukuti: “Manyi na vino ningalanda pa kulanjizya ukusalifya pe vyonsinye vino wa Nte wancitizile, wanjavwizye ukuzana incito ya kuwomba. Swinya nkasalifya nkaninye e Yehova pa kunjavwa ukupiluka vino nalinji. Pe yo-o impindi nabatizwa swinya nawa nu longo lwa kuwomba umulimo wa kuwizya.”

20. Acani cino mukulonda ukutwalilila ukucita?

²⁰ Mwe co-o icipande, tusambilizile pa vya wupe 4 vino visiloleka. Lelo ica wupe icikulu pe vyonsinye vyo-o, awuciwuza wuno twakwata ne Yehova. Amuno nga tuli nu wuciwuza ne Yehova tungawa nu longo lwa kulanda nawe mwi pepo, angatupa umuzimu wakwe uwutele swinya tungawombela ponga nawe, ne Klistu na wangeli. Fwandi lekani lyonsinye tutwalilile ukulanjizya ukusalifya pa vya wupe vyo-o vino visiloleka. Swinya tutize tuleke ukusalifya e Yehova pakuwa e ciwuza witu umuzima.