ICIPANDE CA KUSAMBILILAMO 20
ULWIMBO 67 “Wizyanga Ilyasi Lizima”
Vino Ulukundo Lungatwavwa Ukutwalilila Ukuwizya
“Pakutalika ilandwe zima lile lize lilandwe kumyiko yonsi.” —MARKO 13:10.
VINO TWANDI TUSAMBILILE
Mwe co-o icipande twandi tusambilile pe vino ulukundo lungatwavwa ukutwalilila ukuwombesya mu mulimo wakuwizya.
1. Avyani vino watunenile pa kusunkana kwa pa mwaka ukwa mu 2023?
PA KUSUNKANA kwa pa mwaka ukwa mu 2023, a watunenile pa kwivwicisya ukupya mwe vino twazumilamo swinya wawilizizye na pakupiluka mwe vino tukatuma e lipoti ye vino twawomvile mu mulimo wakuwizya. Ku cakulolelako, twasambilizile ukuti wamwi wangiza wawe nu longo lwakuyilunda ku wantu wa kwe Yehova na pansizi ya kononwa kwe Babiloni Mukulu. Swinya watunenile nu kuti, ukutalika mu November 2023, wakawizya watandi watuma vyonsinye pe vino wawomvile mu mulimo wakuwizya. Nomba ko-o ukupiluka konsinye kutakusula mukuti tuzipizile ukuleka ukuwombesya mu mulimo!
2. Amulandu ci wuno umulimo wakuwizya wandi waya wukulondekwa sana ukuwombesya? (Marko 13:10)
2 Umulimo wakuwizya wandi waya vye wukulondekwa ukuwombesya nkaninye. Amulandu ci? Amuno impindi yikuya yikusila. Lekani tulande pe vino e Yesu walandizile lya nkani ukuti avino umulimo wakuwizya wuliwawombwa mu manda ya kulecelezya. (Wazyani Marko 13:10.) Ukulingana na vino vyawa mwi waliko lya kwe Mateyu, e Yesu watili ilyasi lizima liliwizwa ku wantu wonsinye munsi pano “insilo” yansi yitani yize. (Mat. 24:14) Ya-a amazwi yakalanda pa kusila kwa vintu vyonsinye iviwipe ivya mwe yo-o insi ya kwe Satana. E Yehova watantika ‘uwanda ni mpindi’ pano vyonsinye vyo-o vilicitika. (Mat. 24:36; 25:13; Imili. 1:7) Fwandi cila wanda tukaya tukupalamila ku wanda wa kwe Yehova. (Roma. 13:11) Pe yo-o impindi tuzipizilevye ukutwalilila ukuwizya ilyasi lizima mpaka na ku nsilo ya nsi.
3. Acani cino cikalenga twawizya?
3 Pano tukuwomba umulimo wakuwizya, tuzipizile twakwelenganya pi wuzyo ilicindame ilya kuti: Amulandu ci wuno wukalenga twawizya ilyasi ilizima? Mukufupizya, ulukundo aluno lukalenga twawizya. Vino tukacita pano tukuwizya vikalanjizya ukuti twakunda ilyasi lizima, awantu wanji, ni cicindamisye aca kuti twakunda e Yehova ni zina lyakwe. Lekani tulande pe vyo-o conga na conga.
TUKAWIZYA AMUNO TWAKUNDA ILYASI LIZIMA
4. Tukakwivwa wuli nga twapocelela ilyasi ilizima?
4 Uzye mukwizuka vino mwayivwile pano mwapocelezile ilyasi lizima limwi? Ku cakulolelako, ncepamwi e lupwa lwinu wumwi wakweti umwana nanti ncepamwi waminjizizye incito yino mwavwambisyanga sana. Ukwasowa nu kuvwilika, mufwile mwatemilwe nkaninye, icakuti mwavwambisyanga ukusimicilako wa lupwa lwinu ni viwuza pe vino vyacitisile. Uzye mungalanga avino mwayivwile na pano wamiwizizizye pilyasi ilizima lino lyalusya pe yonsinye, akuli ukuti ilyasi ilizima pa Wufumu wa kwe Leza?
5. Uzye mwayivwile wuli pano mwasambilizilevye icine? (Lolani ni cikope.)
5 Yizukani vino mwayivwile pano mwasambilizilevye icine. Mwasambilizile ukuti Umukwasi winu uwa kwi yulu wamikunda swinya akalonda muwe mu lupwa lwa kapepa wakwe. Mwizile amumanya vino watulaya ukuti alifumyapo uwulumila nu kuyimba, nu kuti mungawa ni suwilo lya kuti awakundikwe winu wano wafwa walizyulupuka munsi mpya, apano na pa vintu vinji. (Mar. 10:29, 30; Yoha. 5:28, 29; Roma. 8:38, 39; Ukuwu. 21:3, 4) Vyo-o ivisinka vyalenzile mwivwe icete nkaninye. (Luk. 24:32) Mwakunzile nkaninye vino mwasambililanga swinya mwavwambisyanga nu kunenako wanji.—Linganyaniko Jeremiya 20:9.
Pano mwasambilizilevye icine, mwivwile icete swinya mwavwambisyanga nu kunenako wanji! (Lolani paragrafu 5)
6. Avyani vino mukusambililako kwe Ernest ne Rose?
6 Lekani tulande pa cakulolelako cimwi. Pano umwanawitu Ernest b walinji ni myaka mupipi ne 10 e tata wakwe wafwile. We-e umwanawitu watili: “Nayikolowozyanga ukuti: ‘Uzye e tata ayile kwi yulu? Nanti uzye casila walala wafwa?’ Nakumbwanga awacitici wanji wano wacilinji wali na watata wawo.” Umwanawitu e Ernest wayanga lyonsinye pa nkungwe ye tata wakwe nu kufukama atalika ukupepa ukuti: “Nazina nkulonda ukumanya kuno kwawa e tata.” Pano papisile imyaka mupipi ne 17 ukufumilila pano tata wakwe wafwizile, wa Nte wamwi wamukolowozizye nga ca kuti angakunda ukusambilila Baibolo swinya wazumizile. Pano wasambilizile ukuti awafwe watamanya nanti cimwi, wawavye ngati walazile utulo swinya e Baibolo yalanda nu kuti walizyulupuka, wivwile icete nkaninye. (Ekawi. 9:5, 10; Imili. 24:15) Na mukulecelezya wizile azana ivyasuko ku mawuzyo yano wayikolowozyanga pa myaka imivule. Umwanawitu Ernest wivwanga icete nkaninye pe vino wasambililanga mu Baibolo. Swinya umuci e Rose wizile atalika ukusambilila Baibolo ponga nawe. Acino mu 1978 wizile awabatizwa. Wakakwivwa icete sana ukuwizizyako wa lupwa, iviwuza na wantu wanji wano wakulonda ukwivwa. Ica kuti ukufika pe yo-o impindi wavwa awantu ukucila pe 70 ukufikapo ukubatizwa.
7. Avyani vino vikacitika nga ca kuti twakunda vino twasambilila mu Baibolo? (Luka 6:45)
7 Ukukunda vino twasambilila mu Baibolo, kukalenga twavwambisya ukunenako wanji. (Wazyani Luka 6:45.) Tukakwivwa ngati awasambi wa kwe Yesu awa mu mpindi zya wina Klistu wakutalicila wano watili: “Tutanga tuleke chino twayilolela naminso yitu twivwa namakutwi yitu.” (Imili. 4:20) Twakunda nkaninye icine cino twasambilila, ica kuti tukavwambisya ukunenako na wanji.
TUKAWIZYA AMUNO TWAKUNDA AWANTU
8. Acani cino cikalenga twawizizyako wanji ilyasi lizima? (Lolani akambokosi ka kuti “ Kundanji Awantu Mwawasambilizya.”) (Lolani ni cikope.)
8 Twakunda awantu ndi wulyanye vino e Yehova ne Yesu wawakunda. (Imilu. 8:31; Yoha. 3:16) Tukakwivwila awantu inkumbu wano ‘watamanya Leza’ swinya wano ‘watawa ni suwilo.’ (Efes. 2:12) Wa-a awantu wawa ngati wakumwela pa mulandu ni ntazi zino wakapitamo. Lelo cawa ngati sweswe twawa ni cakuwazuwulilako, akuli ukuti ilyasi lizima pa Wufumu wa kwe Leza. Pa mulandu wa kuti twawakunda swinya tukawivwila inkumbu, tukakwelezya ukufika pano papelezile amaka yitu ukuya mukuwawizizya. Nga wasambilila, wangawa ni suwilo swinya cingawavwa ukuwa nu wumi uwuzima pe yo-o impindi. Cinji acakuti wangawa nu longo lwakwizawa “nuwumi wakusimichila,” akuli ukuti uwumi wamuyayaya munsi mpya.—1 Tim. 6:19.
Pa mulandu wa kuti twakunda awantu swinya tukawivwila inkumbu, tukakwelezya ukufika pano papelezile amaka yitu ukuya mukuwawizizya (Lolani paragrafu 8)
9. Avyani vino tukasokako awantu, swinya amulandu ci wuno tukacitila wo-o? (Ezekiel 33:7, 8)
9 Ukukunda awantu akuno kukalenga twawasoka ukuti insilo ya kwe yo-o insi yipalamizile. (Wazyani Ezekiel 33:7, 8.) Tukakwivwila uluse walupwa ni viwuza wano wasilongana. Amuno awavule wakawikavye amano ku mikalile yawo ukwasowa ukumanya vino vili mukucitika nombanye. Akuli ukuti ‘uwucuzi wukulu wuno wuliwa awakutinya, wuno wusitela wuweko, ukutalichila pano insi yalile yelewulilwa nu kufika ilelo. Nanti akwiza wutalitela wize swinya.’ (Mat. 24:21) Acino tukalonda wamanye vino vilicitika peyoyo impindi ya wupinguzi, pano walitalicila ukonona imipepele ya wufi yonsinye nu kufumyapo iviwipe vino vikacitika munsi pa Armagedoni. (Ukuwu. 16:14, 16; 17:16, 17; 19:11, 19, 20) Tukupepa ukuti awantu awavule wivwe kwe ko-o ukusoka nu kupingulapo ukutalika ukuwombela Yehova. Nomba ciliwa wuli kwe wawo wano wakakana ukwivwa ukuwikako na walupwa lwitunye?
10. Amulandu ci wuno cicindamizile ukutwalilila ukusoka awantu pe vino vyandi vicitike nombanye?
10 Ndi vino twasambilizile mu cipande cino cafumileko, e Yehova akalonda ukupususya awantu wano wangiza wapiluke pa nsizi yakulola kuno Babiloni Mukulu wononwa. Fwandi cicindime nkaninye ukuti tutwalilile ukusoka awantu. Mwakwizuka ukuti: Vino tukuwasambilizya pe yo-o impindi wangiza wavizuke ku nkolelo. (Linganyaniko Ezekiel 33:33.) Ncepamwi wangiza wavizuke nu kupingulapo ukutalika ukuwombela Yehova ponga na sweswe pano ni mpindi yitani yisile. Ndi wulyanye vino e malonda wa mu cifungo ca mu Filipi wapilusile pano waweni “ichizumanzi chikulu,” ncepamwi avino wamwi wangiza wapiluke pa nsizi yakulola vino Babiloni Mukulu wononwa.—Imili. 16:25-34.
TUKAWIZYA AMUNO TWAKUNDA E YEHOVA NI ZINA LYAKWE
11. Uzye tukalanjizya wuli ukuti uwukankala ,amaka, nu mucinzi avya kwe Yehova? (Ukuwumbulika 4:11) (Lolani ni cikope.)
11 Icicindamisye cino cikalenga twawizya ilyasi lizima, apa mulandu wa kuti twakunda e Yehova ni zina lyakwe. Tukalola umulimo wakuwizya ukuti anzila ya kumulumbanizizyamo. (Wazyani Ukuwumbulika 4:11.) Tukazumilizyako ku mazwi yakuti e Yehova Leza awino uwukankala, umucinzi na maka avyakwe. Tukalanjizya ukuti uwukankala nu mucinzi avyakwe ukupitila mukunenako wanji cino calenga tusinincizye ukuti “awino welewula ivintu vyonsi” nu kuti twawa nu wumi pa mulandu na weliwe. Swinya tukalanjizya ukuti amaka ayakwe, ukupitila mukuwomvya impindi, amaka yitu na vino twakwata kukutunjilila umulimo wakwe. (Mat. 6:33; Luk. 13:24; Kolo. 3:23) Mukufupizya vye tungalanda ukuti twatemwa ukulanda pe Yehova amuno twamukunda. Swinya tukakwivwa icete ukunenako wanji pi zina lyakwe na muno likasula. Amulandu ci?
Tukalanjizya ukuti amaka aya kwe Yehova, ukupitila mukuwomvya impindi, amaka yitu na vino twakwata kukutunjilila umulimo wakwe (Lolani paragrafu 11)
12. Uzye tukalenga wuli izina lya kwe Yehova ukucindikwa?
12 Ukukunda Yehova kukalenga twalenga izina lyakwe ukucindikwa. (Mat. 6:9) Tukalonda ukunenako awantu ukuti vyonsinye ivya mukwelengula vino Satana walanda pi zina lya kwe Yehova, avya wufi. (Inta. 3:1-5; Job 2:4; Yoha. 8:44) Fwandi pano tuli mu mulimo, tukalandilako e Yehova swinya tukalonda ukuwizizya wonsinye wano wakulonda ukusambilila pe weliwe. Tukalonda wonsinye wamanye ukuti e Yehova wawa nkaninye nu lukundo, nu kuti imitecele yakwe yalungamana swinya yazipa. Cinji acakuti, Uwufumu wakwe wandi wufumyepo ukuyimba nu kuleta umutende ni nsansa munsi. (Amalu. 37:10, 11, 29; 1 Yoh. 4:8) Fwandi nga tukulanda ivizima pe Yehova pano tuli mu mulimo, lyo tukulenga izina lyakwe ukucindikwa. Swinya twawa ni nsansa, amuno tukacita ivintu ukulingana ni zina litu ilya kuti Inte zya kwe Yehova. Amulandu ci wuno twalandila wo-o?
13. Amulandu ci wuno tukakwivwila icete ukwitwa ukuti Inte zya kwe Yehova? (Ayizeya 43:10-12)
13 E Yehova watusola ukuwa “inte” zyakwe. (Wazyani Ayizeya 43:10-12.) Imyaka yino yapita twapocelezile e kalata ukufuma kwi Wumba Lino Likatungulula yino yatinji: “Cimwi cino catucindamika sana, akwitwa ukuti Inte zya kwe Yehova.” Amulandu ci wuno twalandila wo-o? Lekani tulanjilile. Tuti wamiwipizya ukuti mwapanga umulandu wumwi, swinya wamitwala na ku koti, amuntu wamusango ci wino mungasola ukuti awe wekamboni winu? Ukwasowa nu kuvwilika, mungasola umuntu wino mwasuwila swinya wino wamimanya icete, wino angalanda icisinka pe mwemwe. Wonye avino ne Yehova wacita kwe sweswe. Pakuti atusole ukumwimililako, cikalanjizya ukuti watusuwila swinya wamanya ukuti tungalanda icisinka pe weliwe. Tukakwivwa icilumba ukwitilwa pi zina lyakwe. Acino tukawomvya ulongo ululi lonsinye luno lwaloleka ku kulenga wanji wamanye ukuti vino Satana walanzile pe Yehova, avya wufi. Nga tukucita wo-o, lyo tukulanjizya ukuti swe Nte zya kwe Yehova.—Amalu. 83:18; Roma. 10:13-15.
TULITWALILILA UKUWIZYA MPAKA NA KU NSILO
14. Avizima ci vino vili nu kucitika nombanye?
14 Tukakwivwa icete nkaninye ukumanya ukuti kuli ivizima vino vili nu kucitika nombanye. Tukwenecela ukuti e Yehova nga watwavwa, awantu awavule walitalika ukuwombela Yehova lyo nu wucuzi wukulu wutani wutalike. Swinya tukakwivwa icete ukumanya ukuti na mu wucuzi wukulunye pano ivintu vilitala, awantu awavule walipiluka nu kutalika ukupepa Yehova.—Imili. 13:48.
15-16. Avyani vino tuzipizile ukutwalilila ukucita, swinya tulileka mpindi ci?
15 Pe yo-o impindi twawa nu mulimo wakuwizya ilyasi lizima, swinya wo-o umulimo tutalitela tuwuwombepo na swinya. Pa mpindi iyili yonganye, tukasoka na wantu pe vino vyandi vicitike nombanye. Awantu wazipizile ukumanya ukuti insilo ya kwe yo-o insi yipalamizile. Nga cakuti yo-o impindi yiza yafika, wonsinye walimanya ukuti vino twawawizizyanga vyafumanga kwe Yehova.—Ezek. 38:23.
16 Avyani vino tuzipizile ukutwalilila ukucita? Tuzipizile ukutwalilila ukuwizya ni myezo yitu yonsinye, pa mulandu wakuti twakunda ilyasi lizima na wantu. Ni cicindamisye acakuti, twakunda e Yehova ni zina lyakwe. Swinya tulitwalilila ukuwomba wo-o umulimo mpaka e Yehova ayize atunene ukuti, “Casila!”
ULWIMBO 54 “Inzila Yo-o”
a Ukusunkana kwa pa mwaka kwalinjiko pa 7 October, 2023, mu cikulwa cikulu ica Nte zya kwe Yehova mu New York ku U.S.A, cino wakakwita ukuti Newburgh Assembly Hall. Swinya mukupita kwa mpindi, e programu yonsinye wizile awayiwika pa ma programu ya JW Broadcasting®—Uluwali 1 waluwisile mu November 2023 ne Uluwali 2 waluwisile mu January 2024.
b Lolani icipande ca kuti “Baibolo Ilaalula Abantu, pa mutwe wakuti “Nalitemenwe Sana pa Kusanga Ifyasuko Muli Baibolo,” cino calinji mu Ulupungu lwa kwa Kalinda ulwa February 1, 2015.
