ICIPANDE CA KUSAMBILILAMO 47
Mutaleka Icili Consinye Cimifumye kwe Yehova
“Isuwilo lyanye lili mwakwe wewe, Mfumu Leza.”—AMALU. 31:14.
ULWIMBO 122 Womani, Mutasyembuka!
VINO TWANDI TUSAMBILILE a
1. Twamanya wuli ukuti e Yehova akalonda ukupalamila kwe sweswe?
E YEHOVA akalonda ukuti tupalamile kwe weliwe. (Jemu. 4:8) Akalonda ukuwa we Leza, Umukwasi swinya e Ciwuza witu. Akakwasuka amapepo yitu nu kutwavwa pano tukupita mu ntazi. Swinya akawomvya iwungwe lyakwe pakuti atusambilizye nu kutucinjilila. Nomba avyani vino tuzipizile ukucita pakuti tupalamile kwe weliwe?
2. Tungapalamila wuli kwe Yehova?
2 Tungapalamila kwe Yehova ukupitila mukupepa kwe weliwe, ukuwazya Baibolo nukwelenganyapo. Nga twacita wo-o apano tukamukundilako nukumusalifya. Swinya ukucita wo-o kukalenga twavwambisya ukucita vino akalonda, akuli ukuti ukumwivwila nga nukumulumbanya. (Ukuwu. 4:11) Nga cakuti twamanya icete Yehova apano tulimusuwila nukusuwila iwungwe lyakwe lino wawikako ukuti lyatwavwa.
3. Uzye e Satana akacita wuli pakuti atufumye kwe Yehova, lelo avyani vino vilitwavwa ukukanasya Yehova ni wungwe lyakwe? (Amalumbo 31:13, 14)
3 E Satana akakwelezya na maka pakuti tuleke ukuwombela Yehova, maka maka pano tukupita mu ntazi. Uzye akacita wuli wo-o? Akalanga akutonsya katici katici isuwilo litu pakuti tuleke ukusuwila Yehova ni wungwe lyakwe. Lelo nanti ciwe wo-o tungayicinjilila ku viteyo vino akawomvya. Nga cakuti isuwilo litu lili aliwome swinya twatwalilila ukusuwila Yehova, tutalitela tumusye nanti ukufuma mwiwungwe lyakwe.—Wazyani Amalumbo 31:13, 14.
4. Avyani vino twandi tusambilile mwe co-o icipande?
4 Mwe co-o icipande, twandi tusambilile pa ntazi zitatu zino asa zya mwiwungwe, navino zyo-o intazi zingalenga tuleke ukusuwila Yehova ni wungwe lyakwe. Uzye zyo-o intazi zingatupawula wuli kwe Yehova? Swinya avyani vino tungacita pakuti tucimvye e Satana?
PANO TUKUPITA MU NTAZI
5. Uzye intazi zingatonsya wuli isuwilo litu mwe Yehova na mwiwungwe lyakwe?
5 Mpindi zimwi tukatwata intazi ponga ngati akutucuzya mu lupwa nanti incito ukusila. Uzye intazi zyamusango wo-o zingatonsya wuli isuwilo litu mwe Yehova, mwiwungwe lyakwe nga nukutufumya kwe weliwe? Nga cakuti tukusipicizya intazi zino zisakusila wangu, mpindi zimwi isuwilo litu lingacepa swinya tungasakamikwa. E Satana akawomvya yonye impindi pakuti tutalike ukwelenganya ukuti e Yehova atatukunda. Swinya akalonda twalola ukuti e Yehova nanti iwungwe lyakwe, awano wakulenga twacula. Ivya musango wo-o avino vyacitisile ku wina Israeli wamwi pano walinji mu Egypt. Pakutalika wasuwizile ukuti e Yehova awino watumile e Musa ne Aroni ukuti wawaluwula mu wuzya. (Ukuf. 4:29-31) Nomba mukupita kwa mpindi pano e Farao walenzile imikalile yawo ukuwomelako, wapile e Musa ne Aroni umulandu wakuti awano walenzile wapita mu ntazi. Wawanenile ukuti: ‘Amwewano mulenzile e Farao ni nkombe zyakwe watupata. Mwawalemeka ulupanga mu makasa yawo ulwakuti watukomele.’ (Ukuf. 5:19-21) Wapile awawomvi wa kwe Yehova umulandu. We cintu ukuwipa we! Nga cakuti mwafuma mukasipicizya intazi pa mpindi intali, mungacita wuli pakuti mutwalilile ukusuwila Yehova ni wungwe lyakwe?
6. Avyani vino tukusambililako kwe kasesema Habakuku pevino tungasipicizya intazi? (Habakuki 3:17-19)
6 Mwapepa kwe Yehova nukumunena vyonsinye vino vili ku mwezo nukulola vino wandi amyavwe. E kasesema Habakuku wapisile mu ntazi izivule. Cikaloleka ngati impindi yimwi watalisile ukuvwilika nga cakuti e Yehova wamusakamalanga. Acino wapefile kwe Yehova nukumunena vyonsinye vino wayivwanga. Watili: ‘Iye, we Mfumu Leza, uzye nazipila ukukulilila ukuti uyivwe ukufika kwi? . . . Acani cino ukalolecesya vye pa wuwipe?’ (Haba. 1:2, 3) E Yehova wasusile ipepo lya muwomvi wakwe lino wapefile ukufuma pansi ya mwezo. (Haba. 2:2, 3) Pano e Habakuku welenginye pevino Yehova wapususizye awantu wakwe, watalisile ukusecelela naswinya. Wizile asinincizya ukuti e Yehova wamusakamalanga nukuti walinji nukumwavwa ukusipicizya intazi iyili yonsinye. (Wazyani Habakuki 3:17-19.) Tukusambililako cani? Nga cakuti mwawa ni ntazi, mwapepa kwe Yehova nukumunena vino mukuyivwa. Mwakwelenganya sana pe vino wamyavwizye ku nsizi. Nga mwacita wo-o, isuwilo linu mwe Yehova liliwomelako swinya mulisuwila ukuti wandi amyavwe ukusipicizya. Cinji acakuti nga mwalola vino wamyavwa, isuwilo linu mwe weliwe liliwomelako.
7. Avyani vino e lupwa lwa kwe Shirley walondanga ukuti Shirley awavwilika, swinya avyani vino vyamwavwizye ukutwalilila ukusuwila Yehova?
7 Twalililani ukucita vino vingalenga mupalamile kwe Yehova. Lolani vino ukucita wo-o kwavwizye e nkazi Shirley wino akakwikala ku Papua New Guinea, pano wakweti ntazi. b Ulupwa lwe we e nkazi lwalinji alupina swinya mpindi zimwi wasyupikanga nukukwata ivya kulya. E lupwa lwakwe wumwi umonsi welezizye ukutonsya isuwilo lino e Shirley wakweti mwe Yehova. Walanzile ukuti: “Ukulanda ukuti umuzimu wutele uwa kwe Leza wukukwavwa, avyani vino wukwavwizye? Vyo ulupwa lucili alupina. Mbali ukusumba vye impindi ukuya mukuwizya.” E Shirley watili “Nayikolowozizye ukuti: ‘Uzye e Yehova akutusakamala nanti pole?’ Acino paponye napefile kwe Yehova nukumunena vino nelenganyanga. Nsitela ndekepo ukuwazya Baibolo na mabuku yitu swinya natwalilizile vye ukuwizya nu kuzanwa mukulongana.” Patazimvile nukuzimba e Shirley wizile ayiluka ukuti e Yehova wasakamalanga ulupwa lwakwe. Ulupwa lusitela lwikalepo ninzala swinya lwatwalilizile vye ukuwa ni nsansa. E Shirley watili: “Naweni ukuti e Yehova wasukanga amapepo yane.” (1 Tim. 6:6-8) Nga cakuti namwemwenye mwawika vye amano kukucita vino vingalenga mupalamile kwe Yehova, mutalileka intazi nukuvwilika vilenge muleke ukusuwila Yehova.
PANO WAKUCUZYA AWANAWITU WANO WAKATUNGULULA
8. Avyani vino vingacitika ku wanawitu wano wakatungulula mwi wungwe lya kwe Yehova?
8 Awalwani witu wakawomvya e intaneti pakusalanganya uwufi nanti pakuwifya amazina ya wanawitu wano wakatungulula mwi wungwe lya kwe Yehova. (Amalu. 31:13) Awanawitu wamwi wawanyepa nu kuwapingula ngati avipondo. Wonye avino na wina Klistu wakutalicilako wapisilemo pano e Paulo wamuwipizizye nu kumunyepa. Uzye wa-a awina Klistu wacisile wuli?
9. Avyani vino awina Klistu wamwi wacisile pano umutumwa Paulo walinji mucifungo?
9 Awina Klistu wakutalicilako wamwi wakanile ukutunjilila umutumwa Paulo pano walinji mu cifungo ku Roma. (2 Tim. 1:8, 15) Amulandu ci? Uzye wivwanga insoni pamulandu wakuti awantu walolanga e Paulo ngati acipondo? (2 Tim. 2:8, 9) Nanti uzye watinanga ukuti nawonye wangawacuzya? Asamulandu nicili consinye cino calenzile, teyelenganyani pe vino Paulo wayivwile? Peyo impindi lyo wasipicizya intazi izivule swinya impindi zimwi wawikanga nuwumi wakwe muwusanso pamulandu vye nawoliwo. (Imili. 20:18-21; 2 Kor. 1:8) Kusi ukwelezya nanti katicinye ukuwa ngati awa wantu wano wakanile ukwavwa e Paulo pano walondekanga awakumwavwa. Avyani vino tuzipizile twakwizuka nga cakuti wakucuzya awanawitu wano wakatungulula?
10. Avyani vino tuzipizile twakwizuka nga cakuti wakucuzya awanawitu wano wakatungulula, swinya amulandu ci?
10 Mwakwizuka umulandu wuno wakatucuzizya na wino akalenga. Pe 2 Timoti 3:12 pakati: “Wonsinye wano wakulonda ukukonka Leza nukupita ne Klistu Yesu wandi wayimvwa.” Fwandi citazipizile ukutuzungusya nga twalola ukuti Satana awisile sana amano kukucuzya awanawitu wano wakatungulula. Amuno akalonda ukuti wa-a awanawitu waleke ukuwa nicisinka kwe Yehova nukututinya swensinye.—1 Pet. 5:8.
Nanti acakuti e Paulo walinji mu cifungo, e Onesiforasi wamutunjililanga. Mwe ya amanda awanawitu na wankazi wakatunjilila awina Klistu wawuye wano wanyepwa ndivino icikope cikulanjizya (Lolani amaparagrafu 11-12)
11. Avyani vino tukusambililako ku cakulolelako ca kwe Onesiforasi? (2 Timoti 1:16-18)
11 Twalililani ukutungilila awanawitu wano wakatungulula nukupalamila sana kwe woliwo. (Wazyani 2 Timoti 1:16-18.) Umwina Klistu wakutalicilako uwizina lyakuti Onesiforasi walanjizizye vino weni watunjilizile e Paulo pano walinji mu cifungo. E Paulo watili “Ativwanga insoni ku chingololo cane.” E Onesiforasi wavwambilizizye kuno kwalinji e Paulo swinya pano wamuzanile wavwamvile inzila zino angamwavwilamo pakuti amutunjilile. Wo-o vino e Onesiforasi wacisile wawisile uwumi wakwe mu wusanso. Tukusambililako cani? Tukusambililako ukuti tutazipizile ukulenga ukutina awantu kwa tuzakazya nanti ukutulesya ukutunjilila awanawitu wano wakuwacuzya. Lelo lekani twawatunjilila nukucita ivili vyonsinye vino tungakumanisya pakuwavwa. (Imilu. 17:17) Amuno wakalondeka ukuwalanjizya ulukundo nukuwatunjilila.
12. Tukusambililako cani ku wanawitu na wankazi awaku Russia?
12 Katulande pevino awanawitu na wankazi ku Russia wakwavwa awina Klistu wawuye wano wawa mu vifungo. Nga cakuti icilye cikuluwulusya awanawitu wamwi, awanawitu na wankazi awavule wakaya ku cilye mukuwatunjilila. Tukusambililako cani? Nga cakuti awanawitu wano wakatungulula wawawifizya amazina, wawanyepa nanti ukuwacuzya, mutazipizile ukutina. Lelo muzipizile ukuwapepelako, ukusakamala indupwa zyawo nga nukulola inzila zinji zino mungalanjizya ukuti mukuwatunjilila.—Imili. 12:5; 2 Kor. 1:10, 11.
PANO WAKUTUPUMYA
13. Uzye ukutupumya kungatonsya wuli isuwilo litu mwe Yehova na mwi wungwe lyakwe?
13 Wa lupwa lwitu wano asa Nte zya kwe Yehova, wano tukawomba nawo nanti wano tukasambilila nawo, wangatupumya pa mulimo witu uwakuwizya nanti wo-o vino tukakonka amasundo ya kwe Yehova. (1 Pet. 4:4) Wangalanda ukuti: “Wewe nakukunda, lelo kuno ukapepa wakawomya nkani ivintu swinya akwa kaali nkaninye. Ne wamwi wangatulengulula pevino tukacita ku wawingwe. Wangalanda ukuti: “Amulandu ci wuno mungalandila nukuti mwakundana?” Awantu nga wakulanda ivya musango wo-o, cingalenga twavwilika nga cakuti amasundo ya kwe Yehova yawa icetenye. Mpindi zimwi tungatalika nukuyikolowozya ukuti: ‘Uzye e Yehova akakwenecela ivicilemo kwe nene? Uzye iwungwe lyakwe likawomya nkani ivintu?’ Nga cakuti mukupita muvyamusango wo-o, mungacita wuli pakuti mupalamile kwe Yehova na kwi wungwe lyakwe?
E Job wakanile ukuzumila uwufi pano wano walolekanga ngati aviwuzya vyakwe wamupumyanga. Lelo watwalilizile vye ukuwa nicisinka kwe Yehova (Lolani paragrafu 14)
14. Tungacita wuli wo-o vino awantu wakatupumya pamulandu wakuti tukakonka amasundo ya kwe Yehova? (Amalumbo 119:50-52)
14 Mwavwambisya ukukonka amasundo ya kwe Yehova. E Job watwalilizile ukukonka amasundo ya kwe Yehova asamulandu nukuti wamupumyanga. Wenga pe wano walolekanga ngati aviwuza vyakwe, walondanga e Job asuwile ukuti e Yehova atawikangako na mano nampo nga wakonkanga amasundo yakwe nanti awe. (Job 4:17, 18; 22:3) Lelo e Job atasuwizile wo-o uwufi. Amuno wamanyile ukuti amasundo ya kwe Yehova yano yakalanda pa vizima ni viwipe, aya cisinka swinya walondesyanga nu kuyakonka. Atalesile uwili wensinye ukumulenga aleke ukuwa uwacisinka kwe Yehova. (Job 27:5, 6) Tukusambililako cani? Mutazipizile ukuleka ukumipumya kulenge mutalike ukuvwilika amasundo ya kwe Yehova. Teyelenganyani pevino yamyavwa mu wumi. Ukwasowa nukuvwilika mwayisinincizizya mwe weneco ukuti ivintu vikazipa mu wumi nga cakuti mwakonka vino Yehova akalola ukuti avizima. Fwandi lyonsinye mwavwambisya ukutunjilila iwungwe lya kwe Yehova lino likakonka ya-a amasundo. Swinya asamulandu navino awantu wangatupumya, tutalitela tulekepo ukuwombela Yehova.—Wazyani Amalumbo 119:50-52.
15. Acani calenzile e Brizit wamupumya?
15 Lekani tulande pa cakulolelako ce nkazi e Brizit uwa ku India. We-e nkazi walupwa lwakwe wamupumyanga pamulandu ni suwilo lyakwe. Swinya umulume atalinji Ante ya kwe Yehova. Acino pano we-e umulume incito yasizile, wapinguzilepo ukuti weliwe numuci na wana wawo awakazyana wacintile kuwakwasi wakwe wano wikalanga mu musumba wunji. Vyo-o vyacitisile lyo apano e Brizit wabatizwa vye mu 1997. Lelo nanti ciwe wo-o, e nkazi Brizit walinji nukupita mu ntazi izikulu ukucila na pe zyo-o. Pamulandu wakuti umulume atawombanga, walinji nukuwawomba amanda yonsinye pakuti awasakamala ulupwa. Cinji acakuti, pano pawezile Ing’anda ya Wufumu yino yalinjiko mupipi patalimfile amakilomita 350. Ne kucawulanda walupwa wa mulume wamucuzyanga pamulandu ni suwilo lyakwe. Ivintu vyayanga vikuwipilako vye icakuti e Brizit nu lupwa lwakwe walinji mu kucinta naswinya. Swinya ukwasowa nu kwenecela umulume wizile afwa. Ne mukupita kwa mpindi umwana wakwe wenga wizile afwa ku ndwala yekansa, lyo alivye ni myaka 12. Asa vyo-o vitupu, walupwa lwakwe wizile awamupa numulandu wakuti weliwe walenzile vyo-o ukucitika. Wamunenile ukuti wanga atawa Ante ya kwe Yehova vyonsinye vyo-o nga vitacitisile. Lelo nanti ciwe wo-o, e Brizit watwalilizile vye ukusuwila mwe Yehova nukutwalilila ukupalamila kwi wungwe lyakwe.
16. Uzye Yehova wapaazile wuli e Brizit pakutwalilila ukupalamila kwe weliwe na kwi wungwe lyakwe?
16 Pamulandu wakuti kuno Brizit wikalilanga kwalinji akutali na kuno kwawezile Ing’anda ya Wufumu, e kangalila wa muputule wamuwomelezizye ukuti awawizizya kulyanye kuno wikalilanga nukutungulula ukulongana pa ng’anda yakwenye. Pakutalika wivwile intete. Lelo wakonsile vino umwanawitu wamunenile. Wawizizyangako wanji ilyasi lizima, walonganilanga pa ng’anda yakwenye swinya lyonsinye wakwatanga amapepo yalupwa na wana wakwe. Avyani vino vyafumilemo? E Brizit watalisile ukutungulula amasambililo ye Baibolo amavule swinya awavule wizile awabatizwa. Mu 2005 watalisile ukuwomba wupayiniya wampindi zyonsi. E Yehova wamupaazile pakutwalilila ukumusuwila nukutwalilila ukuwa nicisinka kwi wungwe lyakwe. Awana wakwe wakawombela Yehova ni cisinka. Swinya peyo-o impindi kwe yo-o incende kuli amawungwe yawili. E Brizit wasinincizya ukuti e Yehova awino wamupile amaka yakutwalilila ukusipicizya intazi. Swinya wamwavwizye nukusipicizya pano walupwa wamupumyanga.
TWALILILANI UKUWA NI CISINKA KWE YEHOVA NA KWI WUNGWE LYAKWE
17. Avyani vino tuzipizile twavwambisya ukucita?
17 E Satana akalonda tusuwile ukuti e Yehova akatusya pano tukupita mu ntazi. Nukuti ukutunjilila iwungwe lyakwe kukalenga vye ivintu ukuwomelako mu wumi. E Satana akalonda twatina nga cakuti awanawitu wano wakatungulula wawawifizya amazina, wakuwacuzya nanti wawanyepa. Swinya akawomvya ukutupumya pakuti tuleke ukusuwila amasundo ya kwe Yehova ni wungwe lyakwe. Lelo nanti ciwe wo-o, twamanya iviteyo vya kwe Satana swinya tusiwipwa. (2 Kor. 2:11) Mwavwambisya ukukana uwufi wa kwe Satana nukutwalilila awa cisinka kwe Yehova na kwi wungwe lyakwe. Mwakwizuka ukuti e Yehova atalitela amisye. (Amalu. 28:7) Acino mutakaleke icili consinye cimifumye kwe Yehova!—Roma. 8:35-39.
18. Avyani vino tulisambilila mu cipande cino cikonsilepo?
18 Mwe co-o icipande tusambilizile pa ntazi zino tukakwata zino asa zya mwiwungwe. Lelo mpindi zimwi tungatalika ukuvwilika Yehova ni wungwe lyakwe napano twapita mu ntazi zino azya mwiwungwe. Tungacita wuli pakuti tucimvye intazi zyamusango wo-o? Vyo-o avino tulisambilila mu cipande cino cikonsilepo.
ULWIMBO 118 “Kuzya Isuwilo Litu”
a Pakuti twasipicizya intazi mwe ya-a manda ayakulecelezya, tuzipizile ukutwalilila ukusuwila Yehova ni wungwe lyakwe. E Satana akakwelezya ukuwomvya intazi pakuti ayonone lyo-o isuwilo lino twakwata. Mwe co-o icipande, twandi tusambilile pavintu vitatu vino Satana akawomvya pakuti acite wo-o. Swinya twandi tusambilile navino tungacita pakuti tutwalilile ukuwa nicisinka kwe Yehova na kwi wungwe lyakwe.
b Amazina yamwi yapiluzilwe.