KU MYAKA ya kunsizi, kwalinji wankazi wamwi watatu wano wawombelanga sana ponga pa cilila icitici cino cawela ku Sangir Besar mu Indonesia. Wa-a wankazi wamanyikwa nkaninye kwe yo-o incende pa mulandu na vino wakawombesya mu mulimo wakuwizya uwakwavwa awantu ukusambilila Baibolo. Lelo pe yoyo impindi wawombanga umulimo wunji.

Wa-a wankazi winjilanga mu luzi mukuvwamba amawe nu kuyatwala kumulundu. Amawe yamwi yano wanyamulanga yawanga amakulu ngati we bola. Nga wayakolonganika, wikalanga nu kutalika ukufwanta ne sando ayasyala amatici ni lyenza lya nkonko lyakula. Nga wamala ukufwanta walonganga mwa baketi nu kuyatwala kuno wikalanga. Pa kuya ko-o kumwawo watumbikanga umulundu, ko-o lyo wanyamuzile na mabaketi ya mawe. Nga wafisya ku ng’anda walonganga mu masaka ayakulu pa kuti e traki yize yinyamule. Ya-a mawe wayawomvyanga ukupanjilako umusewo.

Pe wa-a wankazi wano wasolanga amawe palinji ne nkazi Hulda. We-e nkazi wasumbanga impindi inkulu ukuwomba wo-o umulimo ukulusya na wanji, pa mulandu wakuti ulupwa lwakwe lwalinji alupina. Pakutalika, wawomvyanga kwela indalama zyonsinye zino wawanga nazyo kukukalilamo vino vyalondekwanga pa ng’anda. Acino wasozilepo ukuwawombesya nkaninye. Cino calenzile awawombesya wo-o, apa mulandu wakuti kwalinji cimwi cino wavwambisya sana ukukala. Acani coconye? Walondanga ukukala e tablet pa kuti ayize awikemo e JW Library^® app. E nkazi Hulda wamanyile ukuti ama vidyo na vinji vino vyawa pa JW Library vingamwavwa mu mulimo wakuwizya nga nu kwivwicisya vino vyawa mu Baibolo.

Ukulunda pa maawala yano wawombanga lyonsinye, wizile atalika ukuwomba amaawala na yanji ya wili cila wanda pa mwezi wonga ne hafu pa kuti vye ayizuzye e tilela ya kwe traki iyitici. Icakuti wizile akumanisya ukukala e tabuleti yino walondanga.

Walanzile ukuti, “Nanti acakuti natontanga nkaninye swinya nayifwantanga nu kuyifwanta pano nkupandula amawe, niwilizile vyonsinye vyo-o pano natalisile ukuwomvya e tabuleti. Amuno yanjavwanga nkaninye mu mulimo wakuwizya nga na pakupekanya ukulongana.” Walanzile nu kuti yonye e foni yamwavwizye na pano korona yatalisile vye. Amuno peyoyo impindi pakuwizya nu kulongana konsinye kwawanga ukuwomvya e intaneti. Twivwa icete nkaninye wo-o vino e nkazi Hulda wakumanisizye ukucita vino walondanga.