1-2. Avyani vino mpindi zimwi vingalenga wamwi walola ngati e Yehova atakwasuka amapepo yawo?

 “E YEHOVA watulaya uwulayo uwuzima nkaninye uwakuti, “Vwambanga ichimwemwe chako ku Mfumu e Leza, alikupa chino ukalondesya.” (Amalu. 37:4) Uzye tuzipizile ukwenecela ukuti e Yehova wandi atucitila vyonsinye vino twamulenga paponye? Amulandu ci wuno lyo-o iwuzyo licindamizile? Lekani tulande pa vyakulolelako vimwi. E nkazi umusimbe wapepa ukuti ayize azanwe kwi Sukulu lya Kawizya wa Wufumu. Lelo papita imyaka imivule ukwasowa ukuti wamwite. Ne umwanawitu winji wapepa kwe Yehova ukuti amwavwe apole ku ndwala imbipisye yino walwala pa kuti angawombako imilimo nayinji mwi wungwe. Nomba kusi ukuti apole. Cinji acakuti awakwasi awina Klistu wapepa ukuti umwana wawo atiza afume mu cine. Lelo mukupita kwa mpindi umwana wawo wiza waleka ukuwombela Yehova.

² Ncepamwi namwemwenye mwapepelapo pe vimwi kwe Yehova lelo atani amyasuke. Co-o cingalenga mwalola ngati e Yehova akakwasuka vye amapepo ye wamwi ayinu pole. Cinji acakuti mungakwelenganya ukuti ncepamwi kwawa vyo mwaluvyanya kwe Yehova aco asikwasucila amapepo yinu. Wonye avino ne nkazi uwizina lya kuti Janice b wayivwanga. We-e nkazi nu mulume wavwambisyanga nkaninye ukuya mukuwombela pa Bethel. Acino wapefile kwe Yehova ukuti wize wawite. Walanzile ukuti: “Nasuwizile ukuti wandi watwite zuwanye.” Lelo vino welenganyanga asa vino vyacitisile, papisile imyaka imivule ukwasowa ukuti wawite. E Janice walanzile nu kuti: “Nivwile uwuwi nkaninye swinya co-o camvulunginye umutwe. Natalisile ukwelenganya ukuti, sipali vino naluvyanya kwe Yehova. Amuno napepelapo nkaninye pa kuya ku Bethel. Fwandi lyo amulandu ci wuno atasucila ipepo lyane?”

3. Avyani vino twandi tusambilile mwe co-o icipande?

 ³ Mpindi zimwi tungavwilika nga cakuti e Yehova akateyelezya ku mapepo yitu. Wonye avino na wonsi wacisinka awa ku nsizi wavwilikanga. (Job 30:20; Amalu. 22:2; Haba. 1:2) Nomba avyani vino vingalenga tusuwile ukuti e Yehova akateyelezya ku mapepo yitu? (Amalu. 65:2) Pakwasuka lyo iwuzyo, katetutalicile ukulanda pe ya-a amawuzyo yatatu yano yakonkapo. (1) Avyani vino Yehova akacita? (2) Avyani vino Yehova akalonda twacita? (3) Amulandu ci wuno mpindi zimwi tuzipizile ukupilula vino tukapepelapo nu kupepela pe vinji?

4. Ukulingana ne Jeremiya 29:​12, avyani vino Yehova walaya ukutucitila?

⁴ E Yehova watulaya ukuti wandi awateyelezya ku mapepo yitu. (Wazyani Jeremiya 29:12.) Pa mulandu wakuti e Yehova watukunda nkaninye, swinya tukamuwombela ni cisinka, cikalenga awateyelezya ku mapepo yitu. (Amalu. 10:17; 37:28) Lelo nanti ciwe wo-o, citakusula mu kuti wandi awatucitila vyonsinye vino twamulenga ukulingana na vino tukulonda. Tuzipizile ukwenecela ukuti vimwi vino tukapepelapo, mpindi zimwi angiza ayasuke munsi mpya.

5. Avyani vino Yehova akawikako sana amano pano akuteyelezya ku mapepo yitu? Londololani.

⁵ E Yehova akalola nga cakuti vino tukupepelapo vilemenkine nu mulandu uwukulu. (Ayize. 55:​8, 9) Cimwi cino cawa mwe wo-o umulandu acakuti, e Yehova akalonda awantu wonsinye awacivwila watungululwa na weliwe. Lelo e Satana akalanda ukuti awantu wangawavye ni nsansa nga cakuti wakuyitungulula aweneco. (Inta. 3:​1-5) Acino pa kuti e Yehova asinile e Satana ukuti we cawufi, wazumilizya awantu ukuti wayitungulula aweneco. Nomba imitecele ya wantu yalenga intazi ukuvulilako munsi mwe ya-a amanda. (Ekawi. 8:9) Twamanya ukuti e Yehova atalifumyapo zyo-o intazi pe yo-o impindi. Amuno nga wazifumyapo, awantu nga wakakwelenganya ukuti wangayitungulula aweneco swinya apano wangawa ni nsansa.

6. Amulandu ci wuno tusiyilizyanizizya pe vino Yehova akakwasuka amapepo yitu?

⁶ E Yehova angasuka amapepo ya wawomvi wakwe ayali yonganye mu nzila impusane pusane. Ku cakulolelako, pano Imfumu Hezekiya yalwile nkaninye, yapefile kwe Yehova ukuti ayipozye. E Yehova wivwile ipepo lya kwe yo-o imfumu nu kuyipozya. (2 Izya. 20:​1-6) Lelo pano umutumwa Paulo wapefile kwe Yehova ukuti amufumye ‘umunga mu muwili,’ kuno kufwile kwalinji akulwalilila, e Yehova atamwasusile ukulingana na vino walenzile. (2 Kor. 12:​7-9) Lekani tulande na pe vino vyaciticizile umutumwa Jemusi ne Peter. Wonsinyene wa-a wawili walondanga ukuwakoma ku Mfumu Herodi. Pano awa mwi wungwe wapepelangako e Peter pe co-o, wafwile wapepelangako ne Jemusi nye. Lelo nanti ciwe wo-o, e Jemusi wamukomile lelo e Peter weni wamupususizye mu cizungusyo. (Imili. 12:​1-11) Ncepamwi mungayikolowozya ukuti, ‘Amulandu ci wuno e Yehova wapususizye vye e Peter wakana ukupususya ne Jemusi nye?’ Kweni e Baibolo yitalandapo icili consinye. c Lelo cino tungasuwilavye acakuti, e Yehova “wakunda uwulungamane.” (Amalu. 33:5) Swinya twamanya nu kuti wakunzile wonsinye wa-a wawili, e Peter ne Jemusi. (Ukuwu. 21:14) Mpindi zimwi e Yehova atanga ayasuke amapepo yitu ukulingana na vino tukwenecela. Lelo pa mulandu wakumanya ukuti atawa na kapatulula swinya wawa nu lukundo, tusitalikapo nu kuyilizyanya pe vino wasuka amapepo yitu.—Job 33:13.

7. Acani cino tukakwelezya na maka ukukanacita swinya amulandu ci?

⁷ Tukakwelezya na maka ukukana yilinganya kwe wanji. Ku cakulolelako, ncepamwi tungapepa kwe Yehova ukuti atwavwe pa cintu cimwi lelo  wakana ukutwasuka ukulingana na vino tukulonda. Mukupita kwa mpindi, twiza twazana ukuti kuli wumwi wino wapepezile pa cintu icili conganye na cino twapepezilepo lelo weni wamwasusile ukulingana na vino walondanga. Conye acino caciticizile ne nkazi uwizina lya kuti Anna. We-e nkazi wapefile kwe Yehova ukuti apozye umulume wino walwile e kansa. Pa mpindi iyili yonganye kwalinji na wankazi wawili wano walinji awasongo na pa mulume, wano nawo walwile kansa. Acino e Anna wapepezileko umulume nawanye wankazi wawili. Wa-a wankazi wapozile lelo umulume wafwile. Pa kutalika e Anna wayikolowozyanga nga cakuti molimonye e Yehova awino wapozizye wa-a wankazi. Nomba nga cakuti e Yehova awino wawapozizye lyo acani cino atapozizye nu mulumenye? Tutanga tutalike nu kukolowozya umulandu wuno Yehova atapozezizye umulume lelo wapozya wa-a wankazi wawili. Amuno twamanya ukuti e Yehova wawa na maka yakufumyapo vyonsinye vino vikalenga twayimba, swinya akalondesya nkaninye ukuzyulupula awakundikwe witu wano wafwa.—Job 14:15.

8. (a) Ukulingana ne Ayizeya 43:​2, uzye e Yehova akatwavwa wuli? (b) Uzye ipepo lingatwavwa wuli pano tukupita mu ntazi? (Lolani e vidyo ya kuti Ipepo Likatwavwa Ukusipicizya.)

⁸ E Yehova wandi awatwavwa lyonsinye. Pa mulandu wa kuti amukwasi walukundo asikwivwa icete nga tukuyimba. (Ayize. 63:9) Kweni atanga afumyepo intazi zyonsinye zino tukapitamo zino zyawa ngati anduzi nu mulilo. (Wazyani Ayizeya 43:2.) Lelo watulaya ukuti wandi awatwavwa pano “tukupita” mwe zyozyo intazi. Atalileka zilenge wuciwuza witu naweliwe ukusila. Cinji acakuti akatupa umuzimu wakwe uwutele uwakutwavwa ukusipicizya. (Luk. 11:13; Flpi. 4:13) Na co-o cingalenga tusuwile ukuti aliwatupa vyonsinye vino vikulondekwa pa kuti tutwalilile ukusipicizya nu kuwa ni cisinka kwe weliwe. d

9. Ukulingana ne Jemusi 1:​6, 7, amulandu ci wuno tuzipizile ukusuwila Yehova ukuti alitwavwa?

⁹ E Yehova akalonda tumusuwile. (Hebe. 11:6) Mpindi zimwi tungalola ngati intazi zino tukupitamo ziwomile nkani, icakuti zili ngati aviwumba ivitali vino tutanga tuciluke. Na co-o cingalenga tutalike ukuvwilika nga cakuti Yehova angatwavwa. Lelo e Baibolo yalenga tusuwile ukuti ku maka ya kwe Leza ‘tungacimvya amalinga.’ (Amalu. 18:29) Fwandi ukucila ukutalika ukuvwilika, tuzipizile vye twapepa kwe Yehova nu kusuwila ukuti aliyasuka amapepo yitu.—Wazyani Jemusi 1:​6-8.

10. Avyani vino tuzipizile ukucita nga twapepela pe cimwi? Lanjililani.

¹⁰ E Yehova akalonda atucitapo vimwi pe vino twapepelapo. Ku cakulolelako, ncepamwi umwanawitu wapepa kwe Yehova ukuti amwavwe wize wamupeko impindi kwe wino wamwinjizya incito, iya kuti akalongane icitungu. Uzye e Yehova angasuka wuli lyolyo ipepo? Ncepamwi angamwavwa ukusipa pa kuti akalande na wino wamwinjizya incito. Fwandi pa kuti wamuzumilizye, we-e umwanawitu atazipizile ukwikala vye, azipizile ukuya kwe wino wamwinjizya incito nu kulanda nawe. Swinya atazipizile ukuleka ukuya mu kulenga nga wamukanya umuku wakutalicila. Ncepamwi angelezya ukulanda na wino akawomba nawe pa kuti ayize amuwombeleko wowo uwanda. Swinya nga cingamupepucila angayipelesya ukuti watiza wamufolesye.

11. Amulandu ci wuno tutazipizile ukuleka ukupepela pe vimwi?

¹¹ E Yehova akalonda twapepela pa vintu ivicindame ukwasowa ukuleka. (1 Tes. 5:17) Ukulingana na vino Yesu walanzile, vimwi vino tungalenga vitanga vicitike paponye ukulingana na vino tukulonda. (Luk. 11:9) Acino mutanenuka, mwapepa vye ukufuma pansi ya mwezo winu swinya ukwasowa ukuleka. (Luk. 18:​1-7) Nga cakuti twatwalilila ukupepela pa cintu cimwi, lyo  tukulanjizya Yehova ukuti tukucilondesya nkaninye. Cinji acakuti lyo tukumulanjizya ukuti twamusuwila angatwavwa.

12. (a) Aliwuzyo ci lino tuzipizile ukuyikolowozya pe vino tukupepelapo swinya amulandu ci? (b) Tungalanjizya wuli ukuti tucindisile e Yehova pano tukupepa? (Lolani akambokosi kakuti “ Uzye Vino Nkapepelapo Vikalanjizya Ukuti Nacindika e Yehova?”)

¹² Nga cakuti vino twapepezilepo vitacitisile, kuli amawuzyo yatatu yano tuzipizile ukuyikolowozya. Ilya kutalicila alyakuti, ‘Uzye vino nkupepelapo avicindame?’ Ilivule tungakwelenganya ukuti twamanya vino vingatuzipila. Mpindi zimwi vino twapepelapo vingawa avizima pa kampindi vye katici. Ne ngatwapepela pa ntazi yimwi, tungazana ukuti kuli inzila yinji yino yingamala yoyo intazi ukucila na pe yino tupepezilepo. Vinji vino tungapepelapo vitanga viwe ukulingana nu kulonda kwa kwe Yehova. (1 Yoh. 5:14) Pa kuti tusinincizye co-o, lekani tulande pa wakwasi wano tetulanzilepo pa kutalika. Wa-a wakwasi walenzile kwe Yehova ukuti umwana wawo atiza afume mu cine. Co-o cino wapepezilepo citawifile. Lelo icisinka acakuti, e Yehova asitupaticizya ukumuwombela. Akalonda swensinye ukuwikako na wananye ukuyisolelapo swe weneco ukumuwombela. (Amasu. 10:​12, 13; 30:​19, 20) Fwandi cino awakwasi wazipizile vye ukucita, akulenga kwe e Yehova ukuti awawavwa wafika awana wawo pa mwezo pano wakuwasambilizya. Co-o cingalenga wamukunde nkaninye nu kutwalilila ukuwa iviwuza vyakwe.—Imilu. 22:6; Efes. 6:4.

13. Ukulingana na 1 Peter 5:​6, 7, ampindi ci pano Yehova angatwavwa? Londololani.

¹³ Iwuzyo lya citi wili alya kuti, ‘Uzye yo-o ayili impindi iyiyane iya kuti Yehova ayasucilepo ipepo lyane?’ Mpindi zimwi tungalonda ukuti e Yehova atwasuke paponye nga cakuti twapepavye. Lelo e Yehova awino wamanya impindi iyizima iya kutwasucilapo nga twapepa. (Wazyani 1 Peter  5:​6, 7.) Nomba nga cakuti atasusile paponye ndi vino tetukulonda, tungalola ngati e Yehova ‘wakana’ ukwasuka. Lelo wo-o asa vino cingalanga cili nu kuwa. Ncepamwi icasuko ukufuma kwe Yehova cingawa acakuti ‘impindi yitani yifike’ iya kuti ayasucilepo. Ku cakulolelako, yizukani umwanawitu wino tetulanzilepo, wino wapefile ukuti e Yehova amupozye ku ndwala imbipisye yino walwile. E Yehova wanga apozye we-e umwanawitu mu cizungusyo, e Satana ncepamwi wanga alande ukuti we-e umwanawitu watwalilizile ukuwombela Yehova pa mulandu vye wakuti wamupozizye. (Job 1:​9-11; 2:4) Cinji acakuti, e Yehova watantika impindi pano aliyiza afumyepo indwala zyonsinye. (Ayize. 33:24; Ukuwu. 21:​3, 4) Acino pano tukulindilila ukuti yo-o impindi yize yifike, tutazipizile twakwenecela e Yehova ukutupozya mucizungusyo. Fwandi we-e umwanawitu wanga apepe kwe Yehova ukuti amupe umutende wa mumelenganyo na maka yakusipicizya pano akulwala nu kumwavwa ukutwalilila ukumuwombela ni cisinka.—Amalu. 29:11.

14. Mukusambililako cani kwe Janice?

¹⁴ Lekani tulande na pe nkazi Janice wino tetulanzilepo na pakutalika, wino walondanga ukuwombela pa Bethel. Papisile imyaka 5 ukwasowa ukuti amanye ukuti e Yehova wasuka ipepo lyakwe. Watili: “E Yehova wawomvizye yo-o impindi kukunsambilizya ivintu ivivule nu kunjavwa pa kuti imbe ne muntu umuzima. Ku cakulolelako, nalondekwanga ukumusuwila sana. Swinya nalondekwanga ukumanya ivyakuyisambilizya Baibolo nu kwelenganyapo. Cinji acakuti, nalondekwanga ukumanya ukuti ningawa ni nsansa asa mulandu nu kuli konsinye kuno nkuwombela Yehova.” Mukupita kwa mpindi e Janice nu mulume wizile awawatuma mukuwomba wukangalila wamuputule. Nga cakuti e Janice wizuka pe vyonsinye vino vyamuciticila mu wumi akalanda nu kuti: “E Yehova wasuka amapepo yane nanti acakuti yamwi atasuka ukulingana  na vino nenecelanga. Papisileko impindi pa kuti njize njiluke ukuti e Yehova wasuka amapepo yane mu nzila inzima nkaninye. Lelo nanti ciwe wo-o nkasalifya pe vino wankunda na vino wandanjizya icikuku.”

15. Amulandu ci wuno mpindi zimwi tutazipizile ukulungatika nkani pano tukupepa? (Lolani ni vikope.)

¹⁵ Ilya citi tatu alyakuti, ‘Uzye ningapepelako na pa vintu vinji?’ Cawa icetenye ukulumbula vino mukulonda mukulungatika, lelo mpindi zimwi pa kulanjizya ukuti mukuvwamba ukulonda kwa kwe Leza akuno kucitike, cingazipa ukukanalungatika nkani. Lekani tulande pe nkazi umusimbe wino tetulanzilepo ukuti akupepela pakuya kwi Sukulu lya Kawizya wa Wufumu. We-e nkazi akulonda ukuzanwa kwe lyo-o isukulu pa kuti ayize aye mukuwombela kuno wakawizya wacepa. Fwandi pano akulindilila ukuti wamwite, angapepa kwe Yehova ukuti amwavwe ukulola inzila zino zingalenga awawombesya mu mulimo wakuwizya. (Imili. 16:​9, 10) Cinji acakuti, pakulanjizya ukuti akuwombela pe cino apepezilepo, angakolowozya e kangalila wa muputule ukuti amulanjizye iwungwe kuno wakawizya wacepa ko angaya mukwavwilizya. Nga asa wowo angalembela awa kwi ofesi lya musambo ukuti wamuneneko kuno kukulondeka Wakawizya wa Wufumu. e

16. Avyani vino tungasuwila?

¹⁶ Ndi vino tusambilizile, tungasuwila ukuti e Yehova angasuka amapepo yitu mu nzila iyizima pa mulandu wakuti awa lukundo swinya walungamana. (Amalu. 4:3; Ayize. 30:18) Mpindi zimwi atanga atwasuke ukulingana na vino tetukwenecela. Lelo co-o lyo cisakusula mukuti akanile ukutwasuka. Watukunda nkaninye. Swinya atalitela atulecelezyepo. (Amalu. 9:10) Acino twalililani ‘ukumusuwila impindi zyonsi,’ nu kumunena vyonsinye vino vili ku mwezo.—Amalu. 62:8.