UZYE cikamitalila ukuwazya Baibolo lyonsinye? Uzye mukayitopwa pano mukuwazya nanti kukamivwisya uwukata? Swe wavule ivya musango wo-o vikatuciticila. Nomba yelenganyani pa vintu vimwi vino tukacita cila wanda, ndi vino ukusamba. Pakucita wo-o pakalondekwa ukuwomvya impindi na maka, lelo nga twasamba tukakwivwa icete. Wonye avino ukuyisambilizya lyonsinye kungalenga twivwe icete. Kungawa ngati ‘kwatupwizya na minzi’ ya mwi Zwi lya kwe Leza. (Efes. 5:26) Lekani tulandeko pe vimwi vino vingatwavwa:

• Mwatantika impindi. Ukuyisambilizya Baibolo kwawa pa vintu ‘iviyane’ vino umuntu atazipizile ukulecelezya. (Flpi. 1:10) Pakuti mutakwiwilila impindi, mungalemba pa kapepala nu kukawika pano cingamipepucila ukulolapo nanti mungateya e alamu iyakumizusyako.

• Mwapima impindi yino mungakumanisya. Uzye cikamipepucila ukuwazya pa mpindi intali nanti pa mpindi intici? Mwe weneco amwe wano mwamanya ukulingana na vino ivintu vyawa mu wumi winu. Pano mukutantika, mwakwelenganya pe vyo-o. Nga cakuti mwivwa uwukata pano impindi yakuwazya yafika, cingazipa ukuwazyako nanti amaminetivye 10. Nga cakuti mwayisambilizya pe yanye ama mineti yatici, mungasambilila ivivule ukucila ukwikalavye. Nga mukucita wo-o, muliwavwambisya ukutwalilila ukuwazya.—Flpi. 2:13.

• Mwasolela lyankani ivyakuyisambilizya. Nga cakuti impindi yakuwazya yafika apano mwatalika ukuvwamba vino mwandi muyisambilizye, mutanga “mwawomvya icete impindi yinu.” [NWT] (Efes. 5:16) Fwandi cingazipa ukulemba ivipande na malyasi yano mungatemwa ukuyisambilizyapo. Nga cakuti kuli iwuzyo nanti vimwi vino mutivwicisizye, cingazipa ukulemba pamwi. Pano mukumala ukuyisambilizya vino mwatantisile, mungazana na vinji vino mungiza muyisambilizyepo.

• Mwapilulako muno mukulondekwa. Nga mwalola ukuti mutakukumanisya, mungapilulako vino mwatantika ponga ngati ampindi yino mukasumba na malyasi yano mukasola. Mwakwizuka ukuti impindi, uwutali, na vino mukayisambilizyapo asa vino vyacindama nkani, lelo cino cacindama akuyisambilizya lyonsinye.

Mukafuma ivizima mukuyisambilizya cila wanda. Tukapalamila kwe Yehova, tukapingula icete pa vintu swinya tukakwivwa icete.—Josh. 1:8