ICIPANDE CA KUSAMBILILAMO 46
ULWIMBO 49 Tuwasecelesya Umwezo wa kwe Yehova
Wanawitu—Uzye Mukuwombesya Ukufikapo Ukuwa mwe Watumikila?
“Ukupa akwalongo wuli ukulusye ukupochelela.”—IMILI. 20:35.
VINO TWANDI TUSAMBILILE
Twandi tusambilile pe vino vingavwa awanawitu awabatizwe ukufikapo ukuwa awatumikila.
1. Avyani vino umutumwa Paulo wacisile ku watumikila?
AWATUMIKILA wakawombesya mu ma wungwe. Umutumwa Paulo wasalifizye nkaninye wa-a awonsi wacisinka. Ku cakulolelako, pano walembezile awina Klistu waku Filipi e kalata, walamusile nkani awatumikila na wa eluda.—Flpi. 1:1.
2. Uzye umwanawitu Luis akayivwa wuli pa mulimo wawutumikila wuno akawomba?
2 Awanawitu awavimo ivipusane pusane wakakwivwa icete ukuwomba uwutumikila. Ku cakulolelako, umwanawitu Devan wizile awamusonta ukuwa amutumikila lyo ali ni myaka 18. Ne Luis wamusonsile lyo ali ni myaka ukucila pe 50. We-e umwanawitu akakwivwa icete nkaninye ukuwomba wo-o umulimo. Walanzile ukuti, “Nkalola ukuti alongo ukuwa ne mutumikila, maka maka nga nelenganya pe vino awanawitu na wankazi wakalanjizya ukuti wankunda. Acino nanenenye nkalonda ukuwalanjizya ukuti nawakunda.” Wo-o vino umwanawitu walanzile avino awatumikila awavule wakayivwa.
3. Amawuzyo ci yano twandi twasuke mwe co-o icipande?
3 Nga cakuti mwe wanawitu awabatizwe, uzye mutanga mukunde ukufikapo ukuwa mwe watumikila? Acani cino cizipizile ukulenga mwavwambisya ukufikapo? Uzye e Baibolo yikalanda ukuti avyani vino vikalondekwa pakuti mufikepo? Twandi twasuke ya-a amawuzyo mwe co-o icipande. Lelo katetutalicile ukulanda pa milimo yino awatumikila wakawomba.
IMILIMO YINO AWATUMIKILA WAKAWOMBA
4. Amilimo ci yino awatumikila wakawomba? (Lolani ni cikope.)
4 Awatumikila, awanawitu awabatizwe wano wasontwa nu muzimu wutele ku kwavwa wa eluda ukuwomba imilimo imilekane lekane mwi wungwe. Wamwi wakasinincizya ukuti wakawizya wakweti ivifulo vyakuwombelamo na mabuku yakuwomvya mu mulimo. Ne wanji wakawombako umulimo wakuzifya nu kulunjisya vino vikononeka pa ng’anda ya wufumu. Swinya wamwi wakawombako wukapyunga, ku vilimba na kukutambisya amavidyo pa kulongana. Imilimo imivule yino awatumikila wakawomba ayakwavwa wanji ukupitila mwe vino wakacita. Ni cicindamisye acakuti wakunda e Yehova swinya wakakonka na masundo yakwe. Cinji acakuti wakunda nkaninye awanawitu na wankazi. (Mat. 22:37-39) Nomba uzye awanawitu awabatizwe wangacita wuli pakuti wafikepo ukuwa awatumikila?
Awatumikila wakakolanya e Yesu ukupitila mukuyikundila ukuwombela wanji (Lolani paragrafu 4)
5. Avyani vino umwanawitu azipizile ukucita pakuti afikepo ukuwa amutumikila?
5 E Baibolo yalanda pe vino umwanawitu azipizile ukucita pakuti afikepo ukuwa amutumikila. (1 Tim. 3:8-10, 12, 13) Mungafikapo ukuwomba wo-o umulimo nga cakuti mukuwazya mwe Baibolo pe vino vikalondekwa swinya mukwelezya na maka ukuvikonka. Lelo icakutalicila cino muzipizile ukucita, akumanya cino cilenzile mwavwambisya ukuwa mwe watumikila.
ACANI CINO CILENZILE MWAVWAMBISYA UKUWA MWE WATUMIKILA?
6. Acani cino cingalenga mwavwambisya ukwavwa wanji? (Mateyu 20:28; lolani icikope pankupo.)
6 E Yesu wacitanga vyonsinye pa mulandu wakukunda Yehova na wantu. Ulukundo lwalenzile awawombesya nu kucita vino wanji walolanga ukuti avyapansi. (Wazyani Mateyu 20:28; Yoha. 13:5, 14, 15) Nga muli nu lukundo e Yehova alimipaala swinya alimyavwa ukufikapo ukuwa mwe watumikila.—1 Kor. 16:14; 1 Pet. 5:5.
E Yesu akupizya awasambi wakwe kumanama, pakuwasambilizya ukuti wazipizile ukuwa awayicefye, lelo watazipizile wavwambisya ukuwa ni vifulo vya papela. (Lolani paragrafu 6)
7. Amulandu ci wuno umwanawitu atazipizile awalonda ukuwa amutumikila pakuti vye wamulola ukuti wacindama?
7 Awantu mwe yo-o insi wakakumbwa wano wakayilola ukuti wacindama pamulandu na vino wakawomba. Lelo wo-o asa vino cawa mwi wungwe lya kwe Yehova. Amuno umwanawitu wino wakunda awantu ndi vino Yesu, asilonda ukuwatungulula wanji nanti ukuwayilola ukuti wacindama ukuwalusya. Swinya umwanawitu wino akuyilola ukuti wacindama nga wamusonta ukuwa amutumikila, atanga awawomba imilimo yimwi mwi wungwe yino yikuloleka ngati aya pansi pakusakamala awantu wa kwe Yehova. (Yoha. 10:12) E Yehova asipa imilimo ku wantu wano wayikunda swinya awacilumba.—1 Kor. 10:24, 33; 13:4, 5
8. Avyani vino Yesu wanenile awatumwa wakwe?
8 Impindi zimwi ni viwuza vya kwe Yesu nye walondanga ukuwa ni vifulo pa mulandu ni vintu vye vinji. Lekani tulande pe vino calinji ku watumwa wa kwe Yesu wawili, e Jemusi ne Yohani. Walenzile e Yesu ukuti ayize awape ivifulo vyapapela mu Wufumu wa mwi yulu. Lelo e Yesu wawanenile ukuti cino walenganga citalinji icete. Swinya walondololezile awatumwa wonsinye 12 ukuti: “Ndiwumwi akulonda ukuwa amukulu, wazipila awa amuwomvi wawawuye wonsi. Ndi wumwi akulonda ukuwa awakutalika wazipila ukuwa amuzya wawawuye wonsi.” (Mar. 10:35-37, 43, 44) Awanawitu wano wakavwambisya ukufikapo ukuwa awatumikila pakuti wawombela awanawitu na wankazi, wakakwavwa awa mwi wungwe mu vintu ivivule.—1 Tes. 2:8.
AVYANI VINO VINGAMYAVWA UKUWAVWAMBISYA UKUWA MWE WATUMIKILA?
9. Avyani vino mungacita pakuti mwavwambisya ukuwa mwe watumikila?
9 Ukwasowa nu kuvwilika mwakunda e Yehova swinya mukalonda ukuwombela wanji. Lelo nanti ciwe wo-o, ncepamwi musilonda ukuwombako imilimo yino awatumikila wakawomba. Avyani vino vingamyavwa ukuwavwambisya ukuwa mwe watumikila? Mwakwelenganya pa nsansa zino mungawa nazyo nga cakuti mukuwombela awanawitu na wankazi. E Yesu watili: “Ukupa akwalongo wuli ukulusye ukupochelela.” (Imili. 20:35) Wonye avino wacitanga. Walinji ninsansa pa mulandu wakuti wawombelanga wanji. Namwemwenye avino cingawa.
10. Uzye e Yesu walanjizizye wuli ukuti walondesyanga ukwavwa wanji? (Marko 6:31-34)
10 Lekani tulande pe vino vikalanjizya ukuti ukuwombela wanji kwalenzile e Yesu ukuwa ni nsansa. (Wazyani Marko 6:31-34.) Impindi yimwi e Yesu na watumwa wakwe watonsile. Acino wakatusile ukuti waye ku ncende yimwi kuno kusi awantu pakuti wapuze. Lelo wazanile ukuti awantu wano wasile ku nsizi wafisile kaali, amuno walonda ukuti awasambilizye. E Yesu nga akulonda nge wakanile, amuno weliwe na watumwa wakwe watonsile watakweti “nimpindi ya kulya.” Swinya nga akulonda nge wawasambilizizye vye ivisinka vitici awanene nu kuti wapite. Lelo ulukundo aluno lwalenzile ‘awasambilizye ivintu ivivule.’ Swinya watwalilizile ukuwasambilizya ‘mpaka linjila.’ (Mar. 6:35) Atacisile wo-o pa mulandu wakuti avino wazipizile ukucita, lelo apa mulandu wakuti “wawivwizile uluse.”[NWT]. Co-o cikulanjizya ukuti walondanga ukuwavwa pa mulandu wakuti wawakunzile. Ukuwombela wanji kwalenzile e Yesu awawa ni nsansa.
11. Avyani vino e Yesu wacisile pakwavwa wanji? (Lolani ni cikope.)
11 E Yesu atapelezilevye pa kwavwa awantu ukupitila mu kuwasambilizya pe Leza. Lelo wawapile na vino vyalondekwanga mu wumi. Wa panzile ivya kulya mu cizungusyo nu kupa awasambi wakwe ukuti wankanye iwumba. (Mar. 6:41) Wo-o vino wacisile, walanjizizye awasambi wakwe ivya kwavwa wanji. Swinya wawalanjizizye nu kuti ukuwomba imilimo yimwi ndi yino awatumikila wakawomba pa kwavwa wanji kwacindama nkaninye. Ukwasowa nu kuvwilika awasambi wa kwe Yesu wivwile icete sana ukuwomba umulimo wakwankanya awantu ivya kulya vino Yesu wapekinye mu cizungusyo mpaka “awantu wonsi awalya awikuta.” (Mar. 6:42) Atapelezilevye pa kucita wo-o, lelo impindi yonsinye pano walinji munsi, wawikanga amano kwe wanji ukucila ukuwika amano ku vya palwakwe. (Mat. 4:23; 8:16) E Yesu walinji ni nsansa nkaninye wo-o vino wasambilizyanga wanji nu kuwasakamala. Na mwemwenye muliwa ni nsansa nga mukucita vino vingalenga mufikepo ukuwa mwe watumukila.
Ukukunda Yehova nu kuvwambisya ukwavwa wanji kulilenga mwawombela awa mwi wungwe asa mulandu nu mulimo uwuli wonsinye wuno wamipa (Lolani paragrafu 11) a
12. Amulandu ci wuno mutazipizile mwalola ngati mutanga muwombe imilimo iyili yonsinye mwi wungwe?
12 Nga mukulola ukuti mutafisilepo ukuwa mwe watumikila mutazipizile ukuyivwa uwuwi. Ukwasowa nu kuvwilika, kwawa vimwi vino mungacita pa kwavwa awa mwi wungwe. Mungawazya pe vino Paulo walanzile pe 1 Wakorinte 12:12-30 nu kwelenganyapo swinya munganena Yehova ukuti amyavwe ukulola vino mungawomvya vyo-o ivyewo. Amazwi yano Paulo walanzile yakalanjizya ukuti awawomvi wa kwe Yehova wonsinye wawa na vino wangacita pa kwavwa awa mwi wungwe. Fwandi nga cakuti pe yo-o impindi mutani mufikepo ukuwa mwe watumikila, mutanyocela insizi. Lelo mwacita vino mungakumanisya pa kuwombela Yehova nu kwavwa wanji. Mwamanya ukuti pano mutani muwe mwe watumikila, wa eluda waliyelenganyapo nu kulola imilimo yimwi yino wangamipa swinya yino mungakumanisya ukuwomba.—Roma. 12:4-8.
13. Amulandu ci wunji wuno wungalenga umwanawitu afikepo ukuwomba imilimo?
13 Umulandu wunji wuno wungalenga umwanawitu afikepo ukuwa amutumikila awakuti, vimwi vino vikalondekwa pakuti afikepo avino na wina Klistu wonsinye wazipizile ukucita. Ku cakulolelako, awina Klistu wonsinye wazipizile ukuwa iviwuza vya kwe Yehova, ukuwa nu mwezo wakupa nu kuwa icakulolelako icizima kwe wanji. Lekani nomba tulande na pe vinji vino umwanawitu azipizile ukucita pakuti afikepo ukuwa amutumikila.
VINO MUZIPIZILE UKUCITA PAKUTI MUFIKEPO
14. Uzye cikasula mwinye “ukuwika amano ku vintu”? (1 Timoti 3:8-10, 12)
14 Lekani tulandeko pe vimwi vino vingalenga mufikepo vyo vyawa pe 1 Timoti 3:8-10, 12. (Wazyani.) Awatumikila wazipizile “ukuwika amano ku vintu.” [NWT] Ya-a amazwi yangapiliwulwa na mukuti “ukucindikwa,” “ukuyicindika” nanti “ukucita vino vingalenga wanji ukumicindika.” Co-o citakusula mukuti mutazipizile ukuseka nanti ukucita ivyakusesya. (Ekawi. 3:1, 4) Lelo cikusula mukuti muzipizile ukuwombesya pakuti mwaficilisya ukuwomba imilimo yino wamipa. Nga cakuti mukukumanisya ukuwomba imilimo yino wamipa swinya mukuyiwomba icete, awanawitu na wankazi walimisuwila nkaninye swinya walimicindika.
15. Amwinye muno mwasula amazwi yakuti ukukanawa “ni ndimi ziwili” na yakuti “mutavwambisya ukuwa ni vyuuma vya mu wucenjezi”?
15 Amazwi yakuti “Watize wawa ni ndimi ziwili” yakasula mukuwa ni cisinka, uwufuma cumi nu kusuwilwa. Mutazipizile mwalanda vino mutalicita nanti ukuyilanjizya kwe wanji vino mutawa. (Imilu. 17:20) Amazwi yakuti “Mutavwambisya ukuwa ni vyuuma vya muwucenjezi” [NWT] yakasula mukuwa ni cisinka pano mukuwomba ivyawukazi nanti pano mukuwomba ni vya ndalama izili zyonsinye. Swinya mutazipizile mwapanjila indalama mu wanawitu na wankazi pa mulanduvye wakuti mwamanyana nawo.
16. (a) Uzye amazwi yakuti ‘watize wawamwa nkani ipala’ yakasula mwinye? (b) Uzye cikasula mwinye “ukuwa ne kampingu umusanguluke”?
16 Amazwi yakuti ‘watize wawamwa nkani ipala’ yakasula mukukanacilamo ukumwa ipala nanti ukumanyikwa ukuti mwe wa cakolwa. Ne amazwi yakuti “ukuwa ne kampingu umusanguluke” [NWT] yakasula mukwikala ukulingana na vino Yehova akalonda. Nanti acakuti mutapwililika, mungayitopwa umutende wuno wukafuma mukuwa na wuciwuza uwuzima ne Yehova.
17. Uzye amazwi yakuti “watela awelezwa” yakasula mwinye? (1 Timoti 3:10; lolani ni cikope.)
17 Amazwi yakuti “watela awelezwa” yakasula mukuti wa eluda walola kaali ukuti mukawomba icete imilimo swinya wamisuwila. Fwandi nga cakuti wamipa imilimo, mwakonka vino waminena na vino iwungwe lya kwe Yehova lyatupekanizizya. Mwasinincizya ukuti mwamanya umulimo wuno wamipa nu kumanya impindi yakuwumalilapo. Nga cakuti mukuwikako amano pano mukuwomba awa mwi wungwe waliwalola swinya waliwamisalifya pe vino mukuwombesya. Wa eluda mwasambilizyako awanawitu awacitici imilimo. (Wazyani 1 Timoti 3:10.) Uzye mwi wungwe linu muliko awanawitu awacitici wano wali ni myaka 10 ukufika ku 14 awabatizwe? Uzye wakakwata isambililo lya palwawo swinya wakapekanya icete ukulongana? Uzye wakakwasukapo lyonsinye pa kulongana nu kuwombako mu mulimo wakuwizya? Nga cakuti amuno wali wano wakacita wo-o, mwawapako imilimo yino wangakumanisya ukuwomba ukulingana ni cimo. Nga mukucita wo-o, “muliwelezya” ukulola nga cakuti wangakumanisya ukuwomba. Swinya nga wakulako, wangasotwa ukuwomba uwutumikila.
Wa eluda ‘wangelezya’ awanawitu awabatizwe ukupitila mukuwapa imilimo yino wangakumanisya ukuwomba (Lolani paragrafu 17)
18. Uzye amazwi yakuti “wasi na kasinza” yakasula mwinye?
18 Amazwi yakuti “wasi na kasinza” yakasula mukuti pasi uwili wensinye wino azipizile ukumulandila iviwipe. Kweni mpindi zimwi awina Klistu wangawawipizya. Amuno ne Yesu nye wamuwipizyanga, swinya walandizile lyankani ukuti na wasambilizi wakwenye waliwawawipizya. (Yoha. 15:20) Lelo nga cakuti muli ni miwele imizima ndivino Yesu, awa mwi wungwe waliwamilandila ivizima.—Mat. 11:19
19. Uzye mukutwala “umwanaci wenga” mwasanzyamo vyani?
19 “Ukutwala umwanaci wenga.” Nga mwatwala muzipizile ukukonka isundo lya kwe Yehova lino likalanda pakutwala umwanaci wenga. (Mat. 19:3-9) Umwina Klistu atazipizile ukucita uwuzelele. (Hebe. 13:4) Mwe co-o icisinka mwasanzyamo ivivule. Akuli ukuti muzipizile ukuwa ni cisinka kwe wakwinu nu kukanalanjizya ulukundo uluyiwele kwe wino ase wakwinu.—Job 31:1.
20. Uzye umwanawitu angalanjizya wuli ukuti akatungulula ‘awana wakwe nichiwanza chakwe chonsi ichete’?
20 ‘Wino wamanya ukutungulula awana wakwe nichiwanza chakwe chonsi ichete.’ Nga cakuti mwe mutwe wa lupwa muzipizile ukuwikako sana amano ukuwomba umulimo winu. Mwatungulula amapepo ya lupwa lyonsinye. Ilivule mwawombako ne wakwinu na wana mu mulimo wakuwizya. Mwakwavwa awana winu ukuwomya wuciwuza wawo ne Yehova. (Efes. 6:4) Nga mukusakamala awa mu lupwa lwinu lyo mukulanjizya ukuti na wa mwi wungwe nye mungawasakamala.—Linganyaniko ne 1 Timoti 3:5.
21. Nga cakuti mutani muwe mwe watumikila, avyani vino muzipizile ukucita?
21 Wanawitu nga cakuti mutani muwe mwe watumikila, tukumiwomelezya ukuti mupepelepo sana nu kuwazya vino vili mwe co-o icipande. Mwawazya vino vikalondekwa pakuti mufikepo ukuwa mwe watumikila nu kwelezya na maka ukuviwomvya. Mwakwelenganya pe vino mwakunda e Yehova na wanawitu na wankazi. Swinya mwavwambisya sana ukuwawombela. (1 Pet. 4:8, 10) Nga mwacita wo-o, muliyitopwa insansa zino zikafumamo mukuwombela wanji. Tukuti e Yehova atwalilile ukumipaala pano mukuwombesya ukufikapo ukuwa mwe watumikila.—Flpi. 2:13.
ULWIMBO 17 “Nkulonda”
a UKULONDOLOLA IVIKOPE : Kwe kamani e Yesu ayicefizye pano akuwombela wanji; kwe ndilo, umutumikila akwavwa umwanawitu umukote
