1. Avyani vino awina Klistu awabatizwe wazipizile ukucita?

UZYE mwabatizwa? Nga ca kuti mwabatizwa, mwalanjizya apatiswenye ukuti mwawa ni suwilo iliwome swinya mukalonda ukuwombela e Yehova ni wungwe * lyakwe. Acino mutwalilile ukuwomya isuwilo linu mwe weliwe, nu kusuwila ukuti acili watwalilila ukutungulula iwungwe lyakwe mwe ya-a manda.

2-3. Amiwele ci yino yikalanjizya ukuti e Yehova akatungulula iwungwe lyakwe mwe ya-a manda? Landani pa cakulolelako.

² Mwe ya-a manda e Yehova akatungulula iwungwe lyakwe mu nzila yino ikalanjizya vino wawa, vino akalonda ukucita nga na masundo yakwe. Lekani tulande pa miwele yakwe itatu yino ikalolecela mwe vino akatungulula iwungwe lyakwe.

³ Ica kutalicila e “Leza asisowolola.” (Imili. 10:34) Ulukundo aluno lwalenzile ukuti atume umwana wakwe ukwizatula “awantu wonsi.” (1 Tim. 2:6 Yoha. 3:16) E Yehova akawonvya awantu wakwe ukuwizya ilyasi lizima, pa kuti wonsinye wano wivwa nu kusuwila mu nzuwi ya kwe Yesu wize wawe nu wumi wa muyayaya. Icaciti wili, e Yehova asa we Leza wa cimvulunganya lelo awa mutende. (1 Kor. 14:33, 40) Co-o calenga na wantu wakwenye ukuwa nu mutende. Ica citi tatu aca kuti, e Yehova wakunda ukusambilizya. (Ayize. 30:20, 21) Awuli mulandu wuno awantu wakwe wakawonvezya Baibolo pano wakusambilizya mwi wungwe na pano wakuwizya. Uzye awina Klistu wakutalicila wakolanyanga wuli yo-o imiwele ya kwe Yehova yitatu? Nga wawonvi wakwe mwe ya-a amanda wakamukolanya wuli? Nga umuzimu wakwe, wungamyavwa wuli pano mu kumuwombela mwe ya-a amanda?

4. Ukulingana ni waliko lya Imilimo 1:8, avyani vino e Yesu wawuzizye awasambi wakwe swinya wawalaile cani?

⁴ Mu mpindi zya wina Klistu wakutalicilako. Ilyasi lizima lino Yesu wawizyanga lyalenzile awantu ukuwa ni suwilo. (Luka 4:43) Wawuzizye awasambi wakwe ukutwalilila ukuwomba wo-o umulimo ukufika “na mu vipya fyansi yonsi.” (Wazyani Imilimo 1:8.) Lelo watalinji nu kuwomba wo-o umulimo ku maka yawo. Acino walondekwanga umuzimu uwutele “e Kavwa” wino Yesu wawalaile.​—Yoha. 14:26; Zak. 4:6.

5-6. Uzye umuzimu wutele wavwizye wuli awasambi wa kwe Yesu?

⁵ Awasambi wa kwe Yesu wizile awapocelela umuzimu wutele pa Pentecosti mu 33 C.E. Walile wapocelelavye, paponye watalisile ukuwizya ica kuti awantu awavule wivwile ilyasi lizima. (Imili. 2:41; 4:4) Pano watalisile ukuwacuzya watalesile ukuwizya, lelo wapefile kwe Yehova ukuti: “Utuzumilizye swewazya wako ukuti tuwavwanga amazwi yako nu kusinga konsi.” Pano wamazilevye ukupepa wapocelezile umuzimu uwutele nu kutalika “ukuvwanga amazwi ya kwe Leza nu kusinga.”​—Imili. 4:18-20, 29, 31.

⁶ Awasambi wa kwe Yesu wizile awawa ni ntazi na zinjinye. Ku cakulolelako watakweti amawaliko amakumanile, swinya watakweti amabuku ya kuwavwa ukwivwicisya ivya mu Baibolo ndi vino sweswe twakwata pe yo-o impindi. Cinji aca kuti wakweti nu mulimo wa kuwizizya awantu wano walandanga ivitundu vinji. Lelo asa mulandu ni ntazi zyonsinye zyo-o, awasambi watwalilizile ukuwomba umulimo wa kuwizya mupipi ni myaka 30. Swinya wawizizye ilandwe zima ku “wantu wonsi mu nsi.”​—Kolo. 1:6, 23.

7. Ukucila pa myaka 100 yino yapita, amulimo ci wuno awawonvi wa kwe Yehova wizile awiluka ukuti awuno wazipizile ukuwomba, swinya wawuwonvile wuli?

⁷ Mwe ya-a manda. E Yehova watwalilila ukutungulula awantu wakwe nu kuwapa amaka pa kuti wacita ukulonda kwakwe. Akawatungulula ukuwonvya izwi lyakwe Baibolo yino yalenvilwe ukuwonvya umuzimu wakwe uwutele. Mu Baibolo amuno tukawazya pe vino e Yesu wawombanga umulimo wa kuwizya, ni sundo lino wapile awasambi wakwe ilya kutwalilila ukuwomba wo-o umulimo wuno watalisile. (Mat. 28:19, 20) Ulupungu lwa kwe Malonda ulwa mu July 1881 lwalanzile ukuti: “E Yehova atatusozile nanti ukutupaka pa kuti awantu watucindika nanti pa kuti tuwe ni cuuma. Lelo watusozile ukuti twawomba umulimo wa kuwizya nu kuwonvya vyonsinye vino twakwata ku kutunjilila wo-o umulimo.” E broshuwa yakuti To Whom the Work Is Entrusted yino yafumile mu 1919 muno mwalinji vino vyavwanga wakawizya ukuwomba icete umulimo wakuwizya, yalanzile ukuti: “Umulimo weni wucili awukulu, lelo pa mulandu wa kuti amulimo wa kwe Tatakulu, alitupa amaka ya kuwuwomba.” Wa-a awanawitu nawonye walinji awasipe swinya wawombesyanga wulyanye vino awina Klistu wakutalicila wacitanga. Wasuwizile ukuti umuzimu wutele walinji nu kuwavwa ukuwizizya wantu wonsinye. Na sweswenye twasuwila ukuti umuzimu wutele wulitwalilila ukutwavwa.

8-9. Anzila ci zino iwungwe lya kwe Yehova lyawikako izyakuwonvya pa kuwizya ilyasi lizima?

⁸ Ukufuma na ku nsizi iwungwe lya kwe Yehova lyatwalilila ukuwomvya iviwombelo ivilekane lekane pa kulundulula umulimo wa kuwizya. Pe vyo-o iviwombelo palinji, “E filimu yino witanga ukuti Photo​—Drama of Creation,” ivilimba vya maseleti, imyotoka zino zyakweti ivilimba papela, amaprogramu ya pa redyo, ukusanzyako na mabuuku amapulintwe. Pe yo-o mpindi twakwata na vinji vino wakatuwicila pa makompyuta na pa intaneti. Swinya iwungwe lya kwe Yehova likapiliwula amabuku mu ndimi imvule ukucila vino calinji kali pa kuti awantu wonsinye wivwe ilyasi lizima mu citundu cawo. E Yehova atawa na kapatulula; walandizile lyankani ukuti  ilyasi lizima liliwawizwa ku wantu wa “myiko yonsi, na kunko zyonsi, ni ndimi na wantu.” (Ukuwu. 14:6, 7) E Yehova akalonda awantu wonsinye ukwivwa ilyasi lizima pa Wufumu wakwe.

⁹ Iwungwe lya kwe Yehova lyapekanya iviwombelo vino vikalenga ilyasi lizima ukufika na kwe walyanye wano wikala mu mang’anda ama cinjililwe. Ku cakulolelako mu 2001, Iwumba Lino Likatungulula lyazumilizizye awanawitu na wankazi ku France ukutalika ukuwonvya utumasitandi ni viwombelo vinji vino wangawonvya ku cintu wavule. Mukupita kwa mpindi wazumilizizye ukuti watalike ukuwonvya yo-o inzila mu vifulo na vinjinye, ica kuti mwafumile ivizima ivivule. Ne mu 2011 ku United States wizile awawikako inzila iyipya yino watalisile ukuwonvya mwi tawuni lya New York City muno mwawa awantu awapanviwe nkaninye. Mwe wonye umwaka wapile awantu amabuku 102,129 na wamagazini 68,911. Swinya awantu ukufika kwe 4,701 walenzile ukuti wawasambilizya Baibolo. Ukwasowa nu kuvwilika e Yehova acili akawomvya umuzimu wakwe uwutele ukutunjilila wo-o umulimo. Mukupita kwa mpindi Iwumba Lino Likatungulula lyazumilizizye awanawitu ukuzinguluka insi ukutalika ukuwonvya utumasitandi ni nzila zinji zino zingawavwa ukupa awantu amabuku yitu.

10. Avyani vino tuzipizile ukucita pa kuti tuwe swe wakasambilizya awazima?

¹⁰ Vino tuzipizile ukucita. Muwawonvya vino Yehova akatusambilizya pa kulongana pa kuti muwawizya icete. Swinya muwawomba ponga ni wumba linu mu mulimo wakuwizya. Awanawitu na wankazi wangamyavwa ukuwa mwe wakasambilizya awazima, swinya mungasambilila ivivule kwe woliwo. Mutazipizile ukunyocela ku nsizi mu mulimo wa kuwizya. Amuno umuzimu wa kwe Leza awuno wukatwavwa ukuwomba wo-o umulimo, wulyanye vino iwaliko pano pafumile umutwe wisambililo likulandapo. (Zak. 4:6) Tusivwilika ukuti e Yehova alitupa amaka amuno lyo tukucita ukulonda kwakwe.

11. Uzye iwumba lino likatungulula ilya mu mpindi ya wina Klistu wakutalicilako, lyawombezile wuli ponga pa kulenga awantu wa kwe Yehova ukulemenkana?

¹¹ Mu mpimdi ya wina Klistu wakutalicilako. Iwumba lino likatungulula mu Yerusalemu lyawombezile ponga pa kwavwa awantu wa kwe Leza ukuwa awa mutende. (Imili. 2:42) Ku  ca kulolelako mu 49 C.E, awina Klistu watalisile ukupanzikana nga ca kuti wensinye wino akulonda ukuwombela Yehova azipizile ukuzembululwa. Acino iwumba lino likatungulula lisile pansi nu kulenga umuzimu uwutele ukuti wuwavwe pano wakupingula pe wo-o umulandu. Amuno yo-o intazi yanga yitwalilile, umulimo wa kuwizya nga wanyocezile insizi. Nanti aca kuti wa-a awatumwa walinji awaYuda, watakonsile intambi zya waYuda pano wapingulanga wo-o umulandu. Lelo wasintilizile pi Zwi lya kwe Leza Baibolo na pa muzimu wutele. (Imili. 15:1, 2, 5-20, 28) Cino cafumilemo aca kuti mwi wungwe mwatwalilizile ukuwa umutende nu kulemenkana. Swinya umulimo wa kuwizya watwalilizile ukulunduluka.​—Imili. 15:30, 31; 16:4, 5.

12. Avyani vino vikalanjizya ukuti mwi wungwe lya kwe Yehova mwawa umutende nu kulemenkana?

¹² Mwe ya-a manda. Iwungwe lya kwe Yehova likawombesya ukwavwa awantu wa kwe Leza ukuwa awalemenkane swinya awa mutende. Mu ma 1895, Ulupungu lwa kwe Malonda ulwa November 15 lwalinji ni cipande cino catinji, “Decently and in Order,” (Vyonsi Viwacitwa mu Muyano) wo-o umutwe wafumile pi waliko lye 1 Wakorinte 14:40. Co-o icipande calanzile ukuti, “Awatumwa walembezile awina Klistu wa kutalicilapo amakalata yano yalandanga pa kulemenkana. Cawa acicindame nkaninye ukutwalilila ukukonka vino vyalembwa amuno ‘vyawalisilwe ku kutusambilizya sweswe.’” (Roma. 15:4) Fwandi ukwasowa nu kuvwilika, iwungwe lya kwe Yehova likawombesya pa kuti mwi wungwe muwe ukulemenkana nu mutende ndi vino calinji ku wina Klistu wa kutalicila. Ku cakulolelako nga mwaya ku nsi yinji, muliya musambilile icipande icili conganye ica mu Ulupungu lwa kwe Malonda cino cikusambililwa mwe weyo sabata. Nga mwafikavye mungayivwa awapepucilwe nkaninye, amuno umuzimu wa kwe Leza awuno wukalenga kuwe ukulemenkana umusango wo-o.​—Zefa. 3:9.

13. Ukulingana ni waliko lya kwe Jemusi 3:17 amawuzyo ci yano tuzipizile ukuyikolowozya?

¹³ Vino muzipizile ukucita. E Yehova akalonda ukuti awantu wakwe wawe nu “mwezo uwuliwonga wuno umuzimu wawapa, nu mutende wuno wawalemanya apaliponga.” (Efes. 4:1-3) Acino muzipizile ukuyikolowozya ukuti: Uzye nkatunjilila umutende nu kulemenkana mwi wungwe? Uzye nkakwivwila wano wakatungulula?  Uzye wanji wangasintilila pe nene maka maka nga ca kuti nakwata imilimo yimwi mwi wungwe? Uzye nkayikundila ukwavwako wanji nanji? Uzye namanyikwa ukuti nkacelwa nanti nkakwandana?’ (Wazyani Jemusi 3:17.) Nga mwazana ukuti muli mumwi muno muzipizile ukuzifyako, muwalenga umuzimu uwutele kwe Yehova. Nga mwazumilizya ukuti umuzimu wamitungulula mu wumi winu, awanawitu na wankazi walimicindika nu kumikunda. Swinya waliwalola ukuti mwacindama mwi wungwe.

14. Ukulingana ne Wakolose 1:9, 10, uzye e Yehova wavwizye wuli awantu wakwe ukwivwicisya amawaliko matele?

¹⁴ Mu mpindi ya wina Klistu wa kutalicilako. E Yehova wakunda ukusambilizya awantu wakwe. (Amalu. 32:8) Akalonda ukuti wamumanye, wamukunde swinya wize wikale umuyayaya. Lelo vyonsinye vyo-o vitange viweko ukwasowa ukusambilila pe weliwe. (Yoha. 17:3) Kali e Yehova wawonvyanga iwungwe lya wina Klistu ukusambilizya awantu wakwe. (Wazyani Wakolose 1:9, 10.) Umuzimu wutele nawo, akuli ukuti e “kavwa” wino e Yesu walaile awasambi wakwe wawonvile uluwali ulucindame. (Yoha. 14:16) Amuno wawavwizye ukwivwicisya amawaliko nu kuwavwa ukwizuka vino Yesu walandanga na vino wacitanga. Ica kuti amalyasi yakwe yonsinye yawalisilwe mu mabuku ya ma Landwe. Vyo-o ivyewo vino walenvile vyawomizye sana awina Klistu wa kutalicila, swinya vyalenzile wakunde sana e Leza, e Yesu na wina Klistu wawuye.

15. Avyani vino vikalanjizya ukuti amazwi yano yawa pe Ayizeya 2:2, 3 yakuficiliswa?

¹⁵ Mwe ya-a manda. E Yehova walandizile lyankani ukuti “mu manda ya kulecelezya,” awantu wa mitundu yonsi waliya ku mwamba wakwe pa kuti awawasambilizya. (Wazyani Ayizeya 2:2, 3.) Ko-o ukusesema ku kuficiliswa mwe ya-a manda, amuno ukupepa kwa cisinka ku kulunduluka nkaninye ukucila imipepele yonsinye iya wufi. E Yehova akapekanizizya awawonvi wakwe  ivyewo ivivule vino vyasimpwa pe Baibolo. (Ayize. 25:6) Akawonvya “Umuzya wacisinka swinya uwa mano,” ku kutupekanizizya vino vikatwavwa ukupalamila sana kwe weliwe. Ku cakulolelako, twawa na mavidyo, amalyasi amakopwe, na mabuku amavule. (Mat. 24:45) Tukayivwa ngati we ciwuza wa kwe Job e Elihu, wino walanzile ukuti: “E [Leza] awili musambilizya mukulu mulusye wonsi.”​—Job 36:22.

16. Uzye avyani vino muzipizile ukucita pa kuti tuwanoncelamo mwe vino Yehova akatusambilizya?

¹⁶ Vino muzipizile ukucita. Umuzimu wa kwe Leza uliwamyavwa ukuwomvya vino mukusambilila mwe Baibolo. Muwapepa ndi vino e kimbila wa malumbo wapefile ukuti: “Nsambilizya, mfumu Leza, cino ukalonda nene ndacita, ndakutontela nanti kukwinuluka, nsambilizya ukuti ndakupakata nu mwezo wonsi.” (Amalu. 86:11) Acino twalililani ukuwazya Baibolo na mabuku yano iwungwe lya kwe Yehova likatupekanizizya. Nga mukucita wo-o apano muliyisinincizizya mwe weneco vino mukuyisambilizya swinya muliwaviwomvya. Swinya umuzimu wa kwe Yehova wulimyavwa ukuwomvya vino mukusambilila. Cingazipa sana nga mukuviwomvya na mukuwomelezya awanawitu na wankazi. (Hebe. 10:24, 25) Amuno awalupwa lwinu. Cinji aca kuti, muwapepa kwe Yehova ukumipa umuzimu wakwe pa kuti wamyavwa ukwasukapo icete pa kulongana nu kulanda icete amalyasi. Nga mukucita wo-o lyo mukulanjizya kwe Yehova nu Mwana wakwe ukuti mwakunda sana “ing’onzi” zino wacindamika.​—Yoha. 21:15-17.

17. Anzila ci zimwi zino mungalanjizyamo ukuti mukatunjilila iwungwe lya kwe Yehova?

¹⁷ Kwasyala vye katici lyo imipepele ya wufi yonsinye yasowa na pano yalyata. Acino twalililani ukuwombela ponga ni wungwe lino likatungululwa ne Yehova. Muwalanjizya ukuti mwakunda awantu wonsinye, ukupitila mu kuwawizizya ilyasi lizima. Muwatunjilila umutende nu kulemenkana vino Yehova wakunda. Muwalanjizya ukuti mukakwivwila e Kasambilizya Mukulisye ukupitila mu mukuwomvya vino akatupekanizizya. Nga mukucita wo-o, mutalizakaza nanti cimwi pano insi ya kwe Satana yiliwalowa. Lelo mulisipa nu kwimilila ponga na wantu wano wakatwalilila ukuwombela ponga ni wungwe lya kwe Yehova.