1. Ukulingana ne 2 Wakorinte 3:1-3 tukayivwa wuli pe wano wakabatizwa? (Lolani icikope pa nkupo.)

UZYE mukakwivwa wuli nga cakuti wumwi mu cifulo cino iwungwe linu likawizizya wabatizwa? Ukwasowa nu kuvwilika mukasecelela nkaninye. (Mat. 28:19) Swinya mukacilapo ukuwa ni nsansa nga cakuti amwewano mwatungululanga lyolyo isambililo. (1 Tes. 2:19, 20) Wa-a awasambi we Baibolo awapya wasiwa vye “ama kalata” kwe wano wawasambilizyanga Baibolo, lelo wakawa amakalata kwe wonsinye mwi wungwe.​—Wazyani 2 Wakorinte 3:1-3.

2. (a) Aliwuzyo ci ilicindame lino tuzipizile ukuyikolowozya swinya amulandu ci? (b) Uzye isambililo lye Baibolo acani? (Lolani e futunoti.)

² Cila mwaka awasambi ukucila 280,000 wakabatizwa nu kuwa Inte zya kwe Yehova. Asa coco conga, mu myaka 4 yino yapitapo wakawizya insi yonsinye watungululanga amasambililo ye Baibolo * ukufika kwe 10,000,000. Nomba tungacita wuli pa kwavwa awasambi we Baibolo awavule wo-o ukulunduluka ukufika na kulubatizyo? Tuzipizile ukutwalilila ukuwombesya ukuwavwa ukuwa awasambi wa kwe Yesu amuno Yehova acili wapa awantu impindi yakuwa Inte zyakwe. Swinya impindi yino yisyazileko yicefile nkaninye.​—1 Kor. 7: 29a; 1 Pet. 4:7.

3. Avyani vino twandi tusambilile mwe co-o icipande?

³ Pa mulandu wakuti umulimo wa kupanga awasambi wucindime  sana. Iwumba Lino Likatungulula lyakolowozizye awa mu maofesi ya misambo pa kuti walande vino vingatwavwa ukutungulula amasambililo ye Baibolo icete. Awuli umulandu wuno mwe co-o icipande na cino cikonsilepo, twandi tulole vino tungasambililako kwa painiya, wa mishonari, na wakangalila wamiputule. * (Imilu. 11:14; 15:22) Wa-a awanawitu walondolola vino tungacita pa kwavwa awasambi ukulunduluka. Twatalicila ukusambilila ivintu 5 vino umusambi wino akulonda ukubatizwa azipizile ukucita pa kuti alunduluke ukufika na kulubatizyo.

4. Avyani vino muzipizile ukumanya pa masambililo yano mukatungulula lyo mwimilile pa mang’anda yawo?

⁴ Awanawitu na wankazi awavule wakasambilila na wasambi wawo awe Baibolo pa kampindi vye katici, impindi zimwi lyo wimilile vye pa mulyango wa ng’anda. Ilivule wasisambilila ne cila sabata. Kweni nanti aca kuti yo-o inzila yitawipa, tuzipizile ukuwombesya pa kwavwa umusambi ukukunda vino akusambilila. Acino awanawitu na wankazi wamwi wakasolapo ukusenda e foni namba ya musambi pa kuti wamutumila nanti ukumulembela ama meseji alya kuti walanzyanya nawe Amawaliko yamwi aya mu Baibolo. Lelo cino tufwile ukumanya aca kuti umusambi atanga alunduluke nga mutakusambilila nawe lyonsi.

5. Ukulingana ni waliko lya kwe Luka. 14:27-33, uzye e Yesu walanzile ukuti avyani vino tungacita pa kuti tuwakwavwa awasambi?

⁵ E Yesu wawonvizye ica kulolelako pa kulondolola vino wano wakulonda ukuwa awasambi wakwe wazipizile ukucita. Walondolozile pa muntu wino akulonda ukuzenga ulupungu. Swinya walanzile na pa mfumu yino yikulonda ukuya ku wulwi. Watili wino akulonda ukutalika ukuzenga ulupungu “akatela ayikala pansi pa kutalika awazye indalama” alole nga angakwanisya ukumalilicizya ukuzenga. Walanzile na pa mfumu ukuti “pa kutalika yazipila ayikala pansi iyipanzya ndi ili na maka ya kulwa ni mfumu mbuye” pano yitani yiye ku wulwi nu kulola nga ca kuti awasilikali wano yikweti wangakumanisya ukulwa. (Wazyani Luka. 14:27-33.) Ku kukolanako, e Yesu wamanyile ukuti umuntu wino akulonda ukuwa amusambi wakwe, azipizile ukwelenganyapo sana nu kumanya muno cikasula ukumukonka. Awuli umulandu wuno tuzipizile twawomelezya nkaninye awasambi ukusambilila cila sabata. Nomba tungacita wuli wo-o?

6. Avyani vino tuzipizile ukucita nga tukulonda ukuti umusambi atemwe ukusambilila?

 ⁶ Muwalundako impindi yino mukasumba na wano mukasambilila nawo lyo mwimilile pa mulyango wa ng’anda yawo. Mungacita wo-o ukupitila mukulanzyanya nawo nanti amawaliko yawili. Nga ca kuti umusambi angakunda, mungamukolowozya nga kuli kumwi kuno mungakwikala pano mu kusambilila. Imyasucile yilimilanjizya nga ca kuti akulonda mutwalilile ukusambilila nawe. Swinya nga ca kuti mukulonda ukumwavwa ukulunduluka zuwa, mungamukolowozya nga angakunda ukusambilila nawe imiku yiwili mwe sabata. Lelo kwawa na cinji cino calusya na pakucita wo-o.

7. Uzye e kasambilizya angapekanizizya wuli icete isambililo pano atani aye mukutungulula?

⁷ Wakasambilizya, muzipizile ukupekanya cila cipande cino mukuya mukusambilila nu musambi. Muwawazizya lyankani vino mukuya mukusambilila na mawaliko yonsinye yano yalimo. Swinya muzipizile ukwivwicisya ivisinka ivikulu vino vili mwi sambililo, ukwelenganya pa mutwe uwukulu nu tumitwe ututici tuno tuli mu cipande. Asa vyo-o vitupu, muzipizile nu kwelenganya pa mawuzyo, amawaliko yano watili “wazyani,” ivikope, nu kulola amavidyo yano yangamyavwa ukulondolola vino mukusambililapo. Cinji aca kuti pano mukupekanizizya isambililo muzipizile ukuwika umusambi mu cikope, nu kulola vino mungamulondololela ivyewo mu nzila impepuke swinya iyivwike pa kuti ayivwicisye nu kuwaviwonvya.​—Nehe. 8:8; Imilu. 15:28a.

8. Uzye iwaliko lye Wakolose 1:9, 10, likatwizusya ukuti avyani vino tuzipizile ukupepelako umusambi?

⁸ Pano mukupekanizizya isambililo muzipizile ukupepa kwe Yehova nu kupepelako umusambi mwe vino akukawila. Muwapepa kwe Yehova ukuti awamyavwa ukusambilizya icete ivya mu Baibolo mu nzila yino yingalenga vifike umusambi pa mwezo. (Wazyani Wakolose 1:9, 10.) Muzipizile ukumanya nga ca kuti kuli vimwi vino umusambi angapotwa ukwivwicisya nanti ukuzumila. Swinya lyonsinye mwakwizuka ukuti uwuyo winu awakwavwa umusambi ukulunduluka ukufika na kulubatizyo.

9. Uzye e kasambilizya angavwa wuli umusambi ukupekanizizya isambililo? Londololani.

⁹ Tusakuvwilika ukuti ukusambilila imiku iyivule kuliyavwa awasambi ukuwasalifya pe vino e Yehova ne Yesu watucitila. Swinya waliwalondesya nu kumanyilapo na vinji.  (Mat. 5:3, 6) Lelo pa kuti umusambi awayitopwa, azipizile ukumanya uwucindami wuno wawa mukupekanizizya lyankani, nu kumanya vino angawonvya ivyewo vino akusambilila. Nomba mungamwavwa wuli? Muzipizile ukupekanizizya nawe ponga pa kumwavwa ukumanya vino tukacita pa kupekanya. * Muzipizile ukumwavwa ukuzana ivyasuko ku mawuzyo yano yali mu cipande, nu kumwavwa ukumanya ivya kusila mu visinka pa kuti awavizuka zuwa. Mu kulecelezya mufwile ukumunena ukulanda coco icasuko mu mazwi yakwe. Nga wacita vyonsinyene vyo-o, cilimipepucila ukumanya nga ca kuti ayivwicisizye vino temukusambilila. Lelo kuli na cinjinye cino muzipizile ukuwomelezya umusambi ukucita.

10. Amulandu ci wuno cacindamila ukuwazya Baibolo lyonsi, swinya avyani vino umusambi azipizile ukucita pa kuti awakwivwicisya vino akuwazya?

¹⁰ Ukulunda pa kusambilila cila sabata, kuli na cinjinye cino umusambi azipizile ukucita pa kuti awaitopwa. Azipizile awalanda nu kwivwa kwe Yehova. Mu nzila ci? Angivwa kwe Yehova nga ca kuti Akuwazya Baibolo cila wanda. (Josh. 1:8; Amalu. 1:1-3) Mulanjizyani ivya kuwonvya uluwali lwa kuti “Ukutantika Ukuwazya Baibolo” luno wawika pa jw.org. * Lelo nga mukulonda ukwavwilizya umusambi ukwivwicisya vino akuwazya, muzipizile ukumuwomelezya ukwelenganya pe Yehova, na pe vino angawonvya ivyewo vino akuwazya mu wumi wakwe.​—Imili. 17:11; Jemu. 1:25.

11. Uzye umusambi angasambilila wuli ukupepa icete, swinya amulandu ci wuno cacindamila ukupepa cila wanda?

¹¹ Mwawomelezya awasambi ukulanda ne Yehova ukupitila mu kupepa cila wanda. Mwapepa ukufuma pansi ya mwezo pano mutani mutalike ukusambilila na pano mwaleka ukusambilila. Swinya pano mukupepa muwalumbulako nu musambi. Nga ca kuti wivwa kuno mukupepa, alisambilila ivya kupepa kwa kwe Yehova Leza ukufuma pansi ya mwezo wakwe, ukupitila mu mwana wakwe e Yesu Klistu. (Mat. 6:9; Yoha. 15:16) Ukwasowa nu kuvwilika, ukuwazya Baibolo cila wanda (ukukutika kwe Yehova) ni pepo (kulanda ne Yehova) kuliyavwa umusambi ukupalamila nkaninye kwe Yehova. (Jemu. 4:8) Nga ca kuti umusambi akucita vyonsinye vino twalandapo, cilimwavwa ukulunduluka zuwa ukufika na kulubatizyo. Avyani vinji vino vingamwavwa?

12. Uzye e kasambilizya angavwa wuli umusambi ukuwomya wuciwuza wakwe ne Yehova?

¹² Ivyewo vino tukusambilizya umusambi vizipizile viwamufika pa mwezo. Amuno umwezo muno mwasanzyamo vino tukalonda ukucita na vino tukayivwa awuno wukalenga umuntu ukuvwambisya ukuwonvya vino akusambilila. E Yesu wasambilizyanga awantu mu nzila yino yalenganga wakunda sana pano wakuteyelezya kwe vino akuwasambilizya. Lelo icicindamisye cino wamukoncelanga acakuti vino wawasambilizyanga vyawafikanga pa mwezo. (Luka. 24:15, 27, 32) Umusambi azipizile ukulola ukuti e Yehova amuntu wakucisimicila wino wangapanga wuciwuza nawe. Swinya azipizile nu kumulola ukuti Amukwasi wakwe, we Leza wakwe nu kuti amuwuye. (Amalu. 25:4, 5) Pano mukutungulula isambililo muzipizile muwalenga umusambi ukuwika amano ku miwele ya kwe Yehova asa mulandu ni sambililo lino mukulanzyanyapo. (Ukuf. 34:5, 6; 1 Pet. 5:6, 7). Muzipizile ukumwavwa ukulola imiwele mizima yino Yehova wawa nayo ndi vino lukundo, icikuku, ni nkumbu. E Yesu walanzile ukuti “isundo kulu ukulusye yonsi” alya kuti “uwakunda e Yehova e Leza wako.” (Mat. 22:37, 38) Fwandi na mwemwenye muzipizile mwakwelezya na maka ukwavwa umusambi ukukunda e Yehova nu mwezo wakwe wonsinye.

13. Mungavwa wuli umusambi ukusambilila pa miwele mizima iya kwe Yehova?

¹³ Pano mukulanzyanya nu musambi mwamulondololela umulandu wuno mwakundila e Yehova. Co-o cilimwavwa ukuvwambisya ukuwa we ciwuza wakwe nu kumukunda nkaninye. (Amalu. 73:28) Ku cakulolelako, nga ca kuti kwawako amazwi yamwi ukufuma mu mabuku yitu nanti iwaliko lino mwatemwa sana lino likalanda pa lukundo, amano, umulinganya na maka ya kwe Yehova, munganenako umusambi pa kuti amanye umulandu wuno mwakundila Umukwasi winu uwa kwiyulu. Lelo kuli na cinjinye cino umusambi azipizile ukucita pa kuti afikepo ukubatizwa.

14. Avyani vino iwaliko lya Waheberi 10:24, 25, likatuwomelezya ukucita nga tukulonda ukwavwa umusambi ukulunduluka?

¹⁴ Swensinye tukalonda awasambi ukulunduluka ukufika na kulubatizyo. Lelo inzila yonga yino tungawavwilamo, akuwawomelezya ukuzanwa mu kulongana. (Amalu. 111:1) Wumwi wino wamanya ivya kutungulula icete amasambililo walanzile ukuti; awasambi wano wavulila ukuzanwa mu kulongana wakalunduluka  zuwa. Wakasambilizya wamwi wakalondololela awasambi wawo ukuti nga ca kuti wakuzanwa mu kulongana walisambilila ivivule ukulusya na pe vino wakasambilila pi sambililo lye Baibolo. Wazyani Waheberi 10:24, 25 ponga nu musambi, nu kumulondololela uwucindami wuno wawa mu kuzanwa mu kulongana. Mutambisyani e vidyo yino yikati; Uzye Acani Cino Cikacitika pa Ng’anda ya Wufumu? * Asa co-o conga, yavwani umusambi ukumanya ukuti ukuzanwa mu kulongana acintu icicindame nkaninye mu wumi wakwe.

15. Avyani vino mungacita pa kuti mwavwe umusambi ukuwazanwa lyonsi mu kulongana?

¹⁵ Mungacita wuli nga ca kuti umusambi asizanwa mu kulongana nanti nga akazanwavye manda yamwi? Mungamusimicilako vino mwayitofilwe nanti vino mwasambilizile pano mwazanilwe mu kulongana pa muku wakutalicila. Nga ca kuti mwamusimicila, nawenye aliwavwambisya ukuzanwako. Mungamupako Akalibuku ka Mikalile nu Mulimo Wuno Tukawomba nanti Ulupungu lwa kwe Malonda vino tukawovnya pa kulongana. Swinya mungamulanjizya na pano muliwasambilila e sabata wino akonsilepo, nu kumukolowozya nga ca kuti kuli uluwali lumwi luno watemwa sana. Vino alilola nu kwivwa pa kulongana vilizipa nkaninye ukucila pe vino walolanga ku macalici yanji. (1 Kor. 14:24, 25) Cinji alizana awantu awa miwele mizima wano angakolanya swinya wano wangamwavwa ukulunduluka ukufika na kulubatizyo.

16. Uzye tungacita wuli pa kuti twavwe umusambi ukulunduluka ukufika na kulubatizyo, swinya avyani vino tulisambilila mu cipande cino cikonsilepo?

¹⁶ Uzye mungavwa wuli umusambi ukulunduluka ukufika na kulubatizyo? Muzipizile ukwavwa umusambi ukucindamika isambililo ukupitila mukusambilila nawe cila sabata nu kupekanizizya lyankani pano mutani mwize mukusambilila. Swinya muzipizile ukumuwomelezya ukulanda ne Yehova cila wanda mwi pepo nu kuwomya wuciwuza wakwe na weliwe. Cinji aca kuti, muwamuwomelezya ukuzanwa lyonsi mu kulongana. (Lolani akambokosi kano kakuti “ Vino Awasambi Wazipizile Ukucita pa Kuti Walunduluke Ukufika na Kulubatizyo.”) Icipande cino cikonsilepo cililanda pa vintu na vinji 5 vino ekasambilizya azipizile ukucita pa kwavwa umusambi ukulunduluka ukufika na kulubatizyo.