ICIPANDE CA KUSAMBILILAMO 43
ULWIMBO 90 Muwawomelezyanya
Vino Vingatwavwa nga Tukayivwa Uwuwi
“Yelezyani ivintu vyonsi.”—1 TES. 5:21.
VINO TWANDI TUSAMBILILE
Twandi tusambilile pe vino mungacita nga cakuti mukalanguluka pe vino mukawombela e Yehova.
1-2. (a) Avyani vino vingalenga mpindi zimwi awawomvi wa kwe Yehova wayivwa uwuwi? (b) Avyani vino twandi tusambilile mwe co-o icipande?
AWANTU wonsinye wakayivwa uwuwi mpindi zimwi. Ku cakulolelako, yelenganyani pa wacitici wino akavwilika nga cakuti e Yehova wamuwikako amano. Ukuyivwa kwa musango wo-o kungalenga awalanguluka ukubatizwa. Icakulolelako cinji, aca mwanawitu wino wapinguzilepo lyo acili amutici ukuwombela Yehova ukucila ukuya ku sukulu. Nomba pano wakula swinya atakukumanisya ukusakamala ulupwa, mpindi zimwi angalanguluka nga cakuti vino wapinguzilepo vyalinji icetenye. Ne winji we nkazi wino atakweti amaka. Mpindi zimwi angayivwa uwuwi pa mulandu wa kuti atakuwombesya ndi vino wawombesyanga kaali. Uzye mukatela amuyikolowozyapo ukuti: ‘Uzye e Yehova wambikako amano? Uzye vyonsinye vino napingulapo ukucita pakuti namuwombela akavilola ukuti vyacindama? Uzye ncili nacindama kwe Yehova?’
2 Nga cakuti tutazanile ivyasuko kwe ya-a amawuzyo tungaleka ukusuwila Yehova nu kumupepa. Acino mwe co-o icipande twandi tusambilile pe vino ukuwika amano ku visinka vya masundo ya mu Baibolo kungatwavwa nga cakuti tukulola ngati (1) e Yehova atatuwikako amano, (2) vino twapinguzilepo vitalinji icete, ne (3) e Yehova akalola ukuti tusiwombesya.
IVYAKUCITA PA KULEKA UKUYIVWA UWUWI
3. Acani cimwi cino cingatwavwa ukuleka ukuyivwa uwuwi?
3 Cimwi cino cingatwavwa akuvwamba ivyasuko mu Baibolo ku mawuzyo yano tukayikolowozya. Nga twacita wo-o, tulitwalilila ukusuwila Yehova na wuciwuza witu na weliwe wuliwomelako. Swinya ‘tuliyimilila icete mwi suwilo.’—1 Kor. 16:13.
4. Tungacita wuli ‘pakwelezya ivintu vyonsi’? (1 Watesalonika 5:21)
4 Wazyani 1 Watesalonika 5:21. E Baibolo yikatuwomelezya ukuti “Yelezyani ivintu vyonsi.” Tungacita wuli wo-o? Tungacita wo-o, ukupitila mukulinganya vino twamanya ukuti avya cisinka kwe vino Baibolo yikalanda. Ku cakulolelako, uzye uwacitici wino akayilola ngati atacindama kwe Yehova azipizile ukulekapovye ukwasowa ukucitapo icili consinye? Atazipizile ukulekapovye, lelo azipizile ‘ukwelezya ivintu vyonsi’ ukupitila mukuwazya Baibolo pakuti alole vino Yehova akakwelenganya.
5. Uzye tungacita wuli pakuzana ivyasuko ku mawuzyo yano twakwata?
5 Pano tukuwazya e Baibolo cikawa ngati tukulanda ne Yehova. Lelo pakuti tumanye vino akakwelenganya pe cimwi, tuzipizile ukuwikako amano. Twawazya amalyasi yano yangatwavwa ukuzana ivyasuko ku mawuzyo yano tukweti. Lelo tutazipizilevye ukupelela pakuwazya, tuzipizile twavwambilizya ivyewo na vinji pe lyolyo ilyasi ukuwomvya iviwombelo vino iwungwe lya kwe Yehova lyatupekanizizya. (Imilu. 2:3-6) Swinya tuzipizile ukupepa ukuti e Yehova atwavwe ukuzana ivyasuko vino vingatwavwa. Cinji acakuti, twavwamba ivisinka vya masundo ya mu Baibolo na malyasi yamwi yano yakoline na vino tukupitamo. Asa vyo-o vitupu, twawazya na malyasi ya wantu wa mu Baibolo wano welenganyanga nu kuyivwa ndi vino tukuyivwa.
6. Uzye ukulongana kungatwavwa wuli?
6 Pano tukulongana cikawa ngati e Yehova akulanda na sweswe. Nga tukuzanwa lyonsinye mukulongana, tungivwa mwi lyasi nanti icasuko ukufuma ku mwanawitu nanti e nkazi cino cingatwavwa ukuleka ukuyivwa uwuwi. (Imilu. 27:17) Lekani tulande pe vimwi vino vingatwavwa ukwasuka amawuzyo yano tukayikolowozya.
NGA MUKULOLA NGATI E YEHOVA ATAMIWIKAKO AMANO
7. Aliwuzyo ci lino wamwi wangayikolowozya?
7 Uzye mukatela amuyikolowozyapo ukuti: ‘Uzye e Yehova wambikako amano?’ Nga cakuti mukuyilola ukuti mutacindama, citanga cipepuke ukuwa mwe viwuza ne Kelewula wa vintu vyonsi amuno mungalola nge mutafisilepo. Wonye avino calinji na kwe Davidi. Walolanga ngati aca kuzungusya nkaninye kwe Yehova ukuwika amano ku wantu. Watili: “Nga umuntu acani cino wamupecela, umuntu wavye wavyenye wino ukamulola?” (Amalu. 144:3) Akwinye kuno tungazana icasuko kwe lyo-o iwuzyo lyakuti, uzye e Yehova wambikako amano?
8. Ukulingana ne 1 Samueli 16:6, 7, 10-12, avyani vino e Yehova akalola mu wantu?
8 E Baibolo yikalanda ukuti e Yehova wawika amano nkaninye ku wantu wano wanji wakalola ukuti watacindama. Ku cakulolelako, watumile e Samueli ukuya mu kupaka umwana wa kwe Yese wenga, wino walinji nukwiza mukuwa Amfumu ya wina Israeli ku nkolelo. Acino e Yese wisile awana wakwe 7 nu kusya e Davidi wino walinji amutici pe wonsinye. a Lelo nanti ciwe wo-o, e Davidi nye wino atalinjipo awino e Yehova wasozile. (Wazyani 1 Samueli 16:6, 7, 10-12.) Wamusozile pa mulandu wa kuti waweni ukuti wamukunzile nkaninye.
9. Avyani vino vingalenga musuwile ukuti e Yehova wamiwikako amano? (Lolani ni cikope.)
9 Mwakwelenganya pe vino Yehova wamicitila pa kumilanjizya ukuti wamiwikako amano. Akamipanda amano amazima ukulingana na vino mukupitamo. (Amalu. 32:8) Akacita wo-o pa mulandu wa kuti wamimanya icete. (Amalu. 139:1) Nga mwawomvya vino e Yehova akumipanda amano swinya mwalola nu kuti vyamyavwa, mungasinincizya ukuti wamiwikako amano. (1 Imila. 28:9; Imili. 17:26, 27) Akalola vino mukawombesya ni miwele yinu imizima swinya akavwambisya nu kuwa we ciwuza winu. (Jere. 17:10) Fwandi akakwivwa icete nkaninye nga walola ukuti na mwemwe mukulonda ukuwa mwe ciwuza wakwe.—1 Yoh. 4:19.
“Ndi ukumuvwamba [e Yehova], ungamuzana.”—1 Imila. 28:9 (Lolani paragrafu 9) b
NGA MUKULOLA NGATI VINO MWAPINGUZILEPO VITALINJI ICETE
10. Nga cakuti twelenganya pe vino twapinguzilepo ku nsizi, amawuzyo ci yamwi yano ncepamwi tungayikolowozya?
10 Mpindi zimwi, wamwi wangavwilika nga cakuti vino wapinguzilepo ukucita mu wumi vyalinji icetenye. Ku cakulolelako, ncepamwi wamwi walesile incito nanti ukukana talika ivyawukazi pakuti wawombesya mu mulimo wa kwe Yehova. Nomba pe yo-o impindi, pangalanga papita imyaka imivule swinya wakulola na kuno awawuye wano wapinguzilepo ivipusaneko weni wakweti indalama izivule icakuti wakwikala icete. Na co-o cingalenga wayikolowozya ukuti: ‘Uzye wo-o vino napinguzilepo ukuti nawombela Yehova mu wumi calinji icetenye? Nanti uzye nazipizile ukupingulapo ukuwawombesya mu wumi pakuti nkwate indalama imvule?’
11. Avyani vino vyalenzile e kalemba Wilumbo 73 awayivwa uwuwi?
11 Nga cakuti namwemwenye mukayikolowozya amawuzyo ndi vino yano yali mwe paragrafu yino yafumako, lolani vino e kimbila Wilumbo 73 nawe wayivwile. Walolanga kuno awantu wano watawombelanga e Yehova wakutunguluka, wali ni vyuuma swinya wakwikala icete. (Amalu. 73:3-5, 12) Nga walola vyo-o vikucitika, calenganga awalola ukuti ukupingulapo ukuwombela Yehova kutacindime. Wayimbanga na ya-a amelenganyo “uwanda wonsi nuwusiku.” (Amalu. 73:13, 14) Acani cino camwavwizye ukuleka ukuyivwa wo-o?
12. Ukulingana na Amalumbo 73:16-18, uzye e kimbila Wilumbo wacisile wuli pakuleka ukuyivwa uwuwi?
12 Wazyani Amalumbo 73:16-18. E kimbila Wilumbo wizile aya kwi tempile lya kwe Yehova nu kuwa ponga na wakapepa wawuye. Na co-o calenzile apiluke mwe vino welenganyanga. Wizile alola ukuti nanti acakuti wamwi imikalile yalolekanga ngati yili icete, watakweti isuwilo lyakwikala umuyayaya ku nkolelo. Co-o calenzile awe nu mutende wa mumelenganyo, nu kumanya ukuti ukuwombela Yehova acili icintu icicindame cino wapinguzilepo ukucita. Na cino cafumilemo acakuti, watwalilizile ukuwombela Yehova.—Amalu. 73:23-28.
13. Mungacita wuli pakuti muwe nu mutende wa mumelenganyo nga cakuti mukalanguluka pe vino mwapinguzilepo ukucita? (Lolani ni cikope.)
13 Nga tukuwazya Baibolo, tungawa nu mutende wa mumelenganyo ngati awulyanye vino calinji kwe kimbila Wilumbo. Tungawa nawo wuli? Mwakwelenganya pa vizima vino mwawa na vyo pa mulandu wakusolapo ukuwombela Yehova nu kuvilinganya kwe vino awa munsi wakwata. Nga mwelenganyapo sana, mungazana ukuti weni weyamila pe vino wawa navyo pe yo-o impindi, pa mulandu wakuti watawa ni suwilo lya ku nkolelo. Lelo mwemwe mwawa ni vizima ivivule pe yo-o impindi, swinya e Yehova wamilaya ukumicitila ivizima na vinji ivivule ku nkolelo. (Amalu. 145:16) Teyelenganyani pe co-o: Uzye uwumi winu nga wawa wuli mwanga mutapingulapo ukuwombela Yehova? Icisinka acakuti wo-o vino mwapingulapo ukuwombela Yehova pa mulandu wa kumukunda nu kukunda awantu wanji, mulitwalilila ukuwa ni nsansa ni vizima ivivule mu wumi.
Mwawika amano kwe vino Yehova wamilaya (Lolani paragrafu 13) c
NGA MUKAYIVWA NGATI E YEHOVA AKALOLA UKUTI MUSIWOMBESYA
14. Avyani vino wamwi wakapitamo, swinya vingalenga wayikowozya liwuzyo ci?
14 Awawomvi wa kwe Yehova wamwi, wakapotwa ukuwombesya mu mulimo wa kwe Yehova pa mulandu wa kukota, ukulwalilila nanti ukulemala. Na co-o cikalenga wayilola ngati watacindama kwe Yehova. Mpindi zimwi wangayikolowozya ukuti, ‘Uzye e Yehova akalola ukuti ningamuwombela?’
15. Avyani vino e kalemba Wilumbo 71 wasuwizile?
15 E kalemba Wilumbo 71 nawenye avino wayivwanga. Acino wapefile ukuti: ‘Utize undecelezye muno amaka yane yasila.’ (Amalu. 71:9, 18) Lelo nanti ciwe wo-o, we-e e kimbila Wilumbo wasuwizile ukuti nga watwalilila ukuwombela Yehova ni cisinka, walinji nu kuwamutungulula nu kumutunjilila. Wamanyile ukuti e Yehova akasecelela muwawomvi wakwe wano wakawombesya ukufika pano papelezile amaka yawo asa mulandu na vino wakupitamo.—Amalu. 37:23-25.
16. Anzila ci zimwi zino awakote wangawombelamo e Yehova? (Amalumbo 92:12-15)
16 Mwe wakote mwalola ivintu ndi vino Yehova akavilola. Angamyavwa ukutwalilila ukumuwombela ni cisinka asa mulandu ni ntazi zino zingiza pa mulandu nu kukota. (Wazyani Amalumbo 92:12-15.) Fwandi ukucila ukuwika amano kwe vino musipo na maka, mwawika amano kwe vino mungakumanisya. Ku cakulolelako, mungawomelezya wanji, ukupitila mukutwalilila ukuwa ni cisinka nu kuwawikako amano. Mungawasimicilako vino Yehova wamyavwa pa myaka yonsinye yino mwikala munsi na pe vino isuwilo lya ku nkolelo likamiwomya. Swinya mwakwizuka ukuti ipepo lyawa na maka nkaninye. Acino mwapepelako wanji. (1 Pet. 3:12) Asa mulandu na vino tukupitamo, swensinye twawa na vino tungacitila e Yehova na wanji.
17. Amulandu ci wuno tutazipizile twayilinganya kwe wanji?
17 Nga mukayivwa uwuwi pa mulandu wakulola ngati musiwombesya mu mulimo wa kwe Yehova, mwakwizuka ukuti e Yehova akasalifya pe vyovyonye vino mukakumanisya ukucita. Mutazipizile mwayilinganya kwe vino wanji wakawomba. Amulandu ci? Amuno e Yehova asi milinganyapo kwe wanji. (Gal. 6:4) Ku cakulolelako, e Mariya wapasile e Yesu amafuta amanuncile swinya ayamutengo. (Yoha. 12:3-5) Ne mukamfwilwa wasanguzile utuma koyini ututici tuno tutalinji atucindame na nkani. (Luk. 21:1-4) E Yesu atatalisile ukulinganya wa-a awanaci wawili, lelo waweni ukuti wonsinye walinji ni suwilo. Wo-o vino Yesu wacisile cikalanjizya apatiswenye ukuti e Yehova akalola vino mukamucitila pa mulandu ni suwilo na vino mwamukunda. Swinya akavilola ukuti vyacindama asa mulandu nu kuti avitici nanti avikulu.
18. Avyani vino vingatwavwa ukuleka ukuyivwa uwuwi? (Lolani na kambokosi kakuti “ Izwi lya kwe Leza Lingamyavwa Ukuleka Ukuyivwa Uwuwi.”)
18 Mpindi zimwi swensinye tukayivwa uwuwi. Lelo ndi vino tusambilizile, Izwi lya kwe Leza lingatwavwa ukuleka ukuyivwa wo-o. Acino mwakwelezya na maka ukuzana ivyewo vino vingamyavwa ukuleka ukuyivwa uwuwi. Na co-o cililenga mwawa ni nsansa. Mwakwizuka ukuti Yehova wamiwikako amano wenga na wenga. Akasalifya nkaninye pe vino mukacita pakuti mwamuwombela swinya alimilambula. Manyani ukuti e Yehova wakunda awawomvi wakwe wonsinye awa cisinka swinya akawasakamala.
ULWIMBO 111 Vino Vikatuletela Insansa
a Nanti acakuti e Baibolo yitalanda mu kulungatika imyaka yino Davidi walinji nayo pano Yehova wamusozile ukuwa Amfumu, ukuwa kweni walinji amutici.—Lolani Ulupungu lwa kwa Kalinda ulwa September 1, 2011, ifwa 29, para. 2.
