E kolido yalinji pa mulyango wakwinjilila mu muputule Uwutele uwi tempile. Ukulingana ne Baibolo iyipitulukwemo iye New World Translation of the Holy Scriptures yino yafumile mu myaka ya kunsizi pano tutani tufike mu 2023 yatili, “Ulukungu lwang’anda lwalinji imikono amakumi yawili [20] muwutali, avilingana nuwupapatale wang’anda; nichimo chang’anda imikono umwanda nimikono amakumi yawili (120).” (2 Imila. 3:4) Ne ama Baibolo yanji yakalanda ukuti ulukungu lwa ng’anda lwalinji “imikono umwanda nimikono amakumi yawili (120)” mu wutali akuli ukuti amamita 53 (175-ft).

Lelo e Baibolo ye New World Translation yino yafumile mu 2023 yalanzile pe kolido yi tempile lya kwe Solomoni ukuti: “Yalinji imikono amakumi yawili 20” muwutali nanti amamita mupipi ne 9 (30 ft). a Lekani tulande pa milandu yino kwawela ko-o ukupiluka mu vipimo.

E 1 Izyamfumu 6:​3, yitalandapo pa wutali we kolido. Pe yo-o vesi e Jeremiya walanzilevye pa wupapatale nu kuzika, lelo atalanzile pa wutali. Ne mu cipande cino cakonkapo, walanzile pe vino vyalinji palonde pi tempile, ponga ngati ali beseni ilya mukuwa, amaceleta 10 ni mpanda ziwili izye golide zino zyatunjilizile e kolido. (1 Izya. 7:​15-37) Nga cakuti e kolido yatalimfile amamita ukucila pe 50 mu wutali ukulusya uwutali wi tempile, lyo acani cino e Jeremiya wapotezilwe ukulanda pe vino lyatalimfile? Pa myaka imivule yino yapita, awa Yuda wano wasambilila ivyakali watili, e kolido yitatalimfile ukulusya itempile.

Wano wasambilila sana wakavwilika nga cakuti iviwumba vitempile vyatunjilizilwe ne kolido yino yatalimfile imikono 120. Ivikulwa vino wazenganga na mawe ni njelwa ku kaali vyawanga nu lufula ulukulu swinya vyayanga vikucepa kupela. Wonye avino ni mpongolo yi tempile lya ku Egypt yalinji. Lelo itempile lya kwe Solomoni lyeni lyapusineko. Awasambilile wazanile ukuti iviwumba vitatimvile ukucila ku mikono 6 nanti amamita 2.7 (9 ft). Umusambilile sana ivya kuzenga uwa kaali e Theodor Busink watili: “Nga ciza mu kutimba kwa viwumba ivya pamulyango wi tempile, e kolido yitazipizile ukutalimpa ukufika ku mikono 120.”

Wafwile waluvinye pa kukopolola amazwi yano yawa pe 2 Imilandu 3:4. Nanti acakuti ama manuscripti yamwi nga yakulondolola pe yo-o e vesi yakalanda ukuti yatalimfile imikono “120,” amakope yanji amasuwilwe sana ndi vino e kope ya kuti Codex Alexandrinus yino yafumile papita imyaka ukucila pe 1,500 ni ya kuti Codex Ambrosianus yino papita imyaka ukucila pe 1,400 pano wayalembezile, yeni yakati yatalimfile “imikono 20.” Amulandu ci wuno wa-a wakakopolola watalembezile impendwa iyili yonganye? Izwi lyakuti “handiredi” ni lyakuti “imikono” yakakolanako imilolecele mu ciHeberi. Fwandi e kakopolola afwile walemvile izwi lya kuti “handiredi” mu cifulo cakulemba ukuti “imikono.”

Kweni cawa icetenye ukuvwambisya umumanya ivisinka vyonsi pe vino itempile lya kwe Solomoni lyazenzilwe. Lelo icicindamisye cino tuzipizile ukuwikako sana amano, ape vino limililangako akuli ukuti itempile lya ku muzimu ilya mankolanya. Tukakwivwa icete nkaninye wo-o vino Yehova watwita ukuwamupepala mwe lyo-o itempile lyakwe.—Hebe. 9:​11-14; Ukuwu. 3:12; 7:​9-17.