1-2. (a) Ampindi ci pano wamwi wakakwizuka sana umulowe wino wakunzile? (b) Acani cino Yesu watalisile pa wanda wakwe uwa kulecelezyako ukuwa munsi?

NGA CAKUTI wino twakunda wafwa, asa mulandu ni myaka yino yingapitapo, tukalanga tukumwizuka. Wamwi wakatalika nu kumwelenganyapo sana nga cakuti uwanda wuno wafwizilepo wafika.

² Imintapendwa ya wantu cila mwaka wakalongana ponga insi yonsinye kukwizucizya imfwa yamuntu wino twakunda sana. We-e umuntu we Yesu Klistu. (1 Pet. 1:8) Tukakwiza mukwizucizya imfwa ya muntu wino wapile uwumi wakwe pa kuti atutule ku luwembu ni mfwa. (Mat. 20:28) Swinya walondanga awasambilizi wakwe wakwizucizya imfwa yakwe. Pa wanda wakulecelezya ukuwa munsi pano watalisile ukuzevya ukuyiwele wanenile awasambilizi wakwe ukuti: “Chitanji awonye-woo ngamuwanjizuchila.”​—Luk. 22:19.

3. Avyani vino twandi tusambilile?

³ Pe wano wakazanwa ku Cizusyo, pakawa ni mpendwa vye yitici iye wano wawa ni suwilo lya kuya kwi yulu. Lelo awavule wano wakazanwako wawa nisuwilo lyakwikala mu nsi. Mwe co-o icipande twandi tulande pa milandu yino yikalenga wonsinye wa-a ukuzanwa ku Cizusyo cino cikawako cila mwaka. Swinya twandi tulande na pa vizima vino tukazanamo mukuzanwako. Katutalicile ukulanda pamilandu yino yikalenga awapakwe wazanwako.

4. Amulandu ci wuno awapakwe wakalila umukate nukumwa waini pa Cizusyo?

⁴ Cila mwaka awapakwe wano wakazanwa ku Cizusyo wakalya umukate nukumwako waini. Amulandu ci wuno wakalila umukate nukumwako waini? Pakwasuka lyo-o iwuzyo, lekani tetutalicile ukulola vino vyacitisile uwusiku pa wanda wakulecelezyako uwa kwe Yesu ukuwa mu nsi. Pa nsizi ya Cakupitililwa, e Yesu watalisile ukuzevya ukupya, kuno twiza twamanya ukuti Icakulya ca Manguzi ice Tatakulu. Wapile awatumwa wakwe awacisinka 11 umukate ne waini ukuti wamwe nukulya. Wawanenile pa vipangano viwili, icipangano cipya ni cipangano ca Wufumu. * (Luk. 22:19, 20, 28-30) Vyo-o ivipangano vyalenzile awatumwa na wantu vye watici, ukwiza ukuwa azya mfumu swinya wasimapepo mwi yulu. (Ukuwu. 5:10; 14:1) Awasyalepo * awatupunye, wano wawa mwe vyo-o ivipangano viwili, awano wangalyako umukate nukumwako waini iya pa Cizusyo.

5. Avyani vino awapakwe wamanya pi suwilo lino wawa nalyo?

⁵ Umulandu na wunji wuno wukalenga awapakwe wazanwa ku Cizusyo, awo-o: Nga wazanwako, wakatalika ukwelenganya pi suwilo lyawo. E Yehova wawapa isuwilo iliyiwele nkaninye. Teyelenganyanipo katici, waliwa nu wumi kwi yulu wuno wusifwa nanti ukuwola. Waliwatecela ponga ne Yesu Klistu na wa 144,000 awawuye. Ni cikulu nkani acakuti, waliwalola ne Yehova! (1 Kor. 15:51-53; 1 Yoh. 3:2) Awapakwe wamanya ukuti e Yehova wawita ukuya kwi yulu mukuyitopwa vyonsinyene vyo-o. Nomba pakuti wize wazumilizwe ukupocelela co-o icilambu, wazipizile ukutwalilila ukuwa awacisinka mpaka ni mfwa. (2 Tim. 4:7, 8) Awapakwe nga welenganye pe lyo-o isuwilo wakasecelela nkaninye. (Tait. 2:13) Nga pa “ng’onzi zinji” peni cawa wuli? (Yoha. 10:16) Amilandu ci yimwi yino yikalenga wazanilwako na ku Cizusyo?

6. Amulandu ci wuno ing’onzi zinji zikazanilwako ku Cizusyo?

⁶ Ing’onzi zinji wakazanwako ku Cizusyo, lelo cino cikapusanako acakuti weni wasilyako umukate nu kumwako waini. Nanti ciwe wo-o, nawonye wakawa sana ni nsansa nga wazanwako. Umwaka wakutalicilapo wuno wisile ing’onzi zinji ukuzanwako ku Cizusyo, amu 1938. Ulupungu lwa kwe Malonda ulwa March 1, 1938 mu Cizungu, lwatili: “Cingazipa nkaninye ukuti [ing’onzi zinji] nawonye wazanwako pe ko-o ukulongana pakuti walola vino vikacitika. . . . Yizipizile ukuwa ampindi yakuti nawonye wazewela.” Wulyanye vino wano walalisile ku winga wakakwivwa icete ukutamba kuno uwinga wukupita, avino ni ng’onzi zinji nawonye wakayivwa ndi wazanwako ku Cizusyo.

7. Amulandu ci wuno ing’onzi zinji wakalucila ukwivwa kwi lyasi lya Cizusyo?

⁷ Ing’onzi zinji nawonye, wakatalika ukwelenganya pi suwilo lyawo. Wakalucila sana ukwivwa kwi lyasi ilya Cizusyo.  Amuno likalanda pe vino e Yesu na wano aliwateka nawo wa 144,000 walicitila awantu wacisinka mu myaka 1,000 iyakuteka kwawo. Mu mpindi yakuteka kwa kwe Yesu, wa 144,000 walilenga insi yonsinye ukuwa paradise nukwavwa awantu wacivwila ukupwililika. Imintapendwa ye wano wawa ni suwilo lya kwikala mu nsi wakakwivwa icete nkaninye ukuzanwa ku Cizusyo. Wakakwivwa icete ukwelenganya vino ya-a amasesemo ya mu Baibolo aya pe Ayizeya 35:5, 6; 65:21-23; nu Ukuwumbulika 21:3, 4 yaliwaficiliswa. Ukwelenganya ukuti wali ni viwuza vyawo mu nsi mpya, kukawomya isuwilo lyawo swinya wakasolapo ukutwalilila ukuwombela Yehova.​—Mat. 24:13; Gal. 6:9.

8. Amulandu ci na wunji wuno ing’onzi zinji wakazanilwa ku Cizusyo?

⁸ Umulandu na wunji wuno ing’onzi zinji wakazanilwa ku Cizusyo awakuti, wakalonda ukulanjizya vino wakunda awapakwe navino wakavwambisya ukuwatunjilila. E Baibolo yalandila lya nkani ukuti awapakwe ni ng’onzi zinji waliwawombela ponga mukupalamisya. Amunzila ci? Lekani tulole ivya kulolelako vimwi.

9. Uzye uwusesemo wuno wukazanwa pe Zakariya 8:23 wukalanjizya ukuti ing’onzi zinji wakakwivwa wuli pawapakwe?

⁹ Wazyani Zakariya 8:23. Wo-o uwusesemo wukalondolola uwusaka sana vino ing’onzi zinji zikayivwa pa wapakwe. Yonsinye ya-a amazwi yawili, ilyakuti “umuYuda” ni lyakuti “ali nawe” yakalanda pa wasyalepo. (Roma. 2:28, 29) “Amakandi ikumi (10),” ang’onzi zinji. ‘Wakaya,’ akuli ukuti wakatwalilila ukuwombela ponga na wapakwe mukupepa kwa cisinka. Fwandi awa mu ng’onzi zinji nga wazanwako ku Cizusyo, wakalanjizya apatiswenye ukuti wakunda nkaninye awapakwe.

10. Avyani vino Yehova wacita pakuficilisya uwusesemo wuno wawa pe Ezekiel 37:15-19, 24, 25?

¹⁰ Wazyani Ezekiel 37:15-19, 24, 25. E Yehova waficilisya wo-o uwusesemo pano walenga awapakwe ni ng’onzi zinji ukuti wawombela ponga mukulemenkana. Wo-o uwusesemo walumbula insonzo ziwili. Wano wawa nisuwilo lya kwi yulu wawakolanya ku nsonzo ya kwe “Yuda” (umwiko muno mwafumanga izya mfumu zya mu Israeli). Ne wano wawa nisuwilo lya kwikala mu nsi wawakolanya ku nsonzo ya kwe Efulemu.” * E Yehova alilemenkanya ya-a amawumba yawili ponga, ukuwa “ansonzo yonga.” Co-o cikusula mukuti wakatungululwa ni Mfumu yawo yonga, e Klistu Yesu pano wakuwombela ponga mukulemenkana. Cila mwaka awapakwe ni ng’onzi zinji wasilongana payo Icizusyo, lelo wakalongana ponga ngati “awufyo wonga” mwisika lye “kachema wenga.”​—Yoha. 10:16.

11. Uzye “ing’onzi” zino walumbula pe Mateyu 25:31-36, 40 zikalanjizya wuli ukuti zikatunjilila awapakwe?

¹¹ Wazyani Mateyu 25:31-36, 40. “Ing’onzi” zino Yesu walanzilepo mwe co-o icilanjililo, zikakwimililako awantu awalungamane mu mpindi yakulecelezya wano wawa ni suwilo lya kwikala munsi. Wa-a, ang’onzi zinji. Wakatwalilila ukwavwilizya awanyina wa kwe Klistu awapakwe pano wakuwomba umulimo uwukulu wuno wapwa, uwakuwizya nu kupanga awasambilizi insi yonsinye.​—Mat. 24:14; 28:19, 20.

12-13. Amuvyani vinji muno wano wawa ni suwilo lyakwikala mu nsi wakakwavwilamo awapakwe?

 ¹² Cila mwaka nga kwasyala amasabata matici ukuti kuwe, Cizusyo, ing’onzi zinji wakalanjizya ukuti wakatunjilila awapakwe ukupitila mukuwombako mwe kampeni yakwitako awantu ku Cizusyo. (Lolani akambokosi kano kakuti “ Uzye Mwatalika Kali Ukuyipekanizizya ku Cizusyo?”) Wakasinincizya nu kuti wapekanya icete vyonsinye vino vikalondekwa pa Cizusyo nanti acakuti mpindi zimwi mwi wungwe lyawo watawa nu mupakwe. Wakakwivwa icete sana ukutunjilila awapakwe mwe yo-o inzila. Wamanya ukuti e Yesu akalola vyonsinye vino wakacitila awapakwe swinya cawa ngati wakucitila weliwe.​—Mat. 25:37-40.

¹³ Amilandu ci na yinji yino yikalenga swensinye twazanwa ku Cizusyo asa mulandu ni suwilo lino twawa nalyo?

14. Uzye e Yehova ne Yesu walanjizya wuli vino watukunda?

¹⁴Tukasalifya pe vino e Yehova ne Yesu walanjizya ukuti watukunda. E Yehova walanjizya ukuti watukunda mu nzila imvule. Lelo inzila yonga inkulu yino walanjizizyamo ukuti watukunda nkaninye, akutuma Umwana wakwe wino wakundisya ukwizacula nukutufwila. (Yoha. 3:16) Ne Yesu nye walanjizizye ukuti watukunda pano wayikundizile ukwiza mukutufwila. (Yoha. 15:13) Kusi nanti conganye cino tungacita pakunyosezya e Yehova ne Yesu pe vyo-o vino watucitila. Lelo tungalanjizya ukuti tukasalifya mwe vino tukacita cila wanda. (Kolo. 3:15) Swinya tukazanwa ku Cizusyo amuno tukalonda ukwelenganya pa lukundo luno watulanjizya nga nukulanjizya vino twawakunda.

15. Amulandu ci wuno awapakwe ni ng’ozi zinji wakasalifizya sana pa nzuwi?

¹⁵Tukasalifya nkaninye pa nzuwi ya kwe Yesu. (Mat. 20:28) Awapakwe wacindamika nkaninye inzuwi. Amuno yalenga wawe nulongo lwakuya kwi yulu. E Yehova akawalola ukuti walungamana swinya awana wakwe pamulandu wakuti wasuwila mu nzuwi ya kwe Yesu. (Roma. 5:1; 8:15-17, 23) Ing’onzi zinji nawonye wakasalifya nkaninye pa nzuwi. Amuno inzuwi yalenga e Yehova awawalola ukuti awalungamane, wangamuwombela swinya wawa ni suwilo lyakwiza “mukupusuka pawucuzi wukulu.” (Ukuwu. 7:13-15) Inzila yonga yino awapakwe ni ng’onzi zinji wakalanjizizyamo ukuti wakasalifya pa nzuwi, akuzanwa ku Cizusyo cila mwaka.

16. Amulandu ci na wunji wuno tukazanilwa ku Cizusyo?

¹⁶ Umulandu wunji wuno tukazanilwa ku Cizusyo, awakuti tukalonda ukwivwila e Yesu. Asa mulandu ni suwilo lino twawa nalyo, swensinye tukalonda ukwivwila isundo lya kwe Yesu lino walanzile pa wanda wuno watalisile Icizusyo. Watili: “Chitanji awonye wo-o nga muwanjizuchila.”​—1 Kor. 11:23, 24.

17. Uzye ukuzanwa ku Cizusyo kukatwavwa wuli ukupalamila kwe Yehova?

¹⁷Tukapalamila nkaninye kwe Yehova. (Jemu. 4:8) Ndi vino tusambilizile, ukuzanwa ku Cizusyo kukalenga twakwelenganya pi suwilo lino Yehova watupa na pa lukundo lwakwe ulukulu luno watulanjizya. (Jere. 29:11; 1 Yoh. 4:8-10) Nga twelenganya pi suwilo lya kunkolelo na pe vino  Yehova watukunda, tukamukundilako sana swinya tukawelako iviwuza vyakwe.​—Roma. 8:38, 39.

18. Uzye ukwelenganya pe Yesu kukalenga twavwambisya ukucita cani?

¹⁸Tukatalika ukuvwambisya ukukolanya e Yesu. (1 Pet. 2:21) Nga cakuti Icizusyo cati capalamila tukawika sana amano pa malyasi ya mu Baibolo yano yakalanda pe sabata wakulecelezya kwe Yesu ukuwa munsi, pa mfwa yakwe, na pa kuzyulupuka kwakwe. Ne pa Cizusyo, ilyasi lino likawako likatwizusyako pe vino Yesu watukunda. (Efes. 5:2; 1 Yoh. 3:16) Ukuwazya pa cakulolelako ca kwe Yesu nu kwelenganyapo, kukalenga twavwambisya “ukuwapita ndi vino weliwe wapitanga.”​—1 Yoh. 2:6.

19. Tungacita wuli pakuti tutwalilile ukuwa iviwuza vya kwe Yehova?

¹⁹Tukasolapo ukutwalilila ukuwa iviwuza vya kwe Yehova. (Yud. 20, 21) Tukatwalilila ukuwa iviwuza vya kwe Yehova nga tukumwivwila, tukucindika izina lyakwe nu kumusecelesya. (Imilu. 27:11; Mat. 6:9; 1 Yoh. 5:3) Ukuzanwa ku Cizusyo kukalenga tuwacita ivintu cila wanda nge tukunena e Yehova ukuti, ‘nkulonda ukutwalilila ukuwa ciwuza wako umuyayaya!’

20. Amilandu ci imicindame yino yikalenga tuwazanwa ku Cizusyo?

²⁰ Nampo nga isuwilo litu alya kwi yulu nanti alya monye munsi, swensinye twawa ni milandu imicindame yino yikalenga twazanwa ku Cizusyo. Cila mwaka nga twalongana ponga pe wo-o uwanda, tukakwizuka imfwa ya muntu wino twakunda sana, e Yesu Klistu. Ni cikulu nkani aca kuti, tukakwizuka vino Yehova walanjizizye ukuti watukunda nkani nkaninye. Wasozilepo nu kutuma Umwana wakwe ukwiza tufwila. Wo umwaka Icizusyo ciliwako amanguzi pe Cisano, pa 15, April 2022. Twakunda nkaninye e Yehova nu Mwana wakwe e Yesu. Fwandi pe wo-o uwanda kusi nanti cimwinye cino cilicindama cilusye ukuzanwa ku Cizusyo.