1-2. Amilandu ci yino yacindama ku Nte Zya Kwe Yehova?

KWAWA imilandu imicindame sana pe yo-o impindi yino yatukuma. Yo-o imilandu akumanya wino wayana ukuteka nga nukucindika izina lya kwe Yehova. Swe Nte zya kwe Yehova tukakunda nkaninye ukulanda pe ya-a amalyasi amacindame. Uzye amaka ya kwe Leza aya kuteka yapusana nu kucindika izina lyakwe? Awe.

² Swensinye twiza twalola ukuti izina lya kwe Leza lizipizile ukucindikwa. Swinya twiza twamanya nu kuti ivyelewulwa vyonsinye mu nsi na mwi yulu vizipizile ukusinilwa ukuti imitecele ya kwe Yehova ayino yazipa. Yonsinye yo-o imilandu yacindama nkaninye.

3. Uzye izina lya kuti Yehova lyasanzyamo vyani?

³ Izina lya kuti Yehova lyasanzyamo vyonsinye pe Leza witu. Mwawa ni mitecele yakwe. Acino nga tukuti ukucindika izina lyakwe Yehova akuno kwacindama sana, lyo tukulanda nu kuti awantu wonsinye wazipizile ukusinincizya ukuti e Yehova awino wayana ukuteka. Ne nga tukulanda pi zina lya kwe Yehova lyo tukuti awino wakulisya swinya awino wayana ukuteka.​—Lolani amazwi pa mutwe wakuti “ Imilandu Yino Yalemenkana nu Kucindika Izina lya kwe Yehova.”

4. Avyani vino iwaliko lya Amalumbo 135:13 likalanda pi zina lya kwe Leza, swinya amawuzyo ci yano twandi twasuke mwe co-o icipande?

⁴ Izina lya kuti Yehova lyayiwela nkaninye. (Wazyani Amalumbo 135:13.) Acani cino izina lya kwe Leza lyacindamila? Uzye lyakwelenguzilwe wuli mu Edeni? Uzye e Leza akalenga  wuli izina lyakwe ukuwa ilitele? Nga sweswe tungacindika wuli izina lyakwe? Lekani twasuke ya-a amawuzyo.

5. Uzye avyani vino wamwi wakawuzya nga wivwa ukuti izina lya kwe Leza lizipizile ukucindikwa?

⁵ “Izina linu licindikwe.” (Mat. 6:9) E Yesu walanzile ukuti ukupepela ukuti izina lya kwe Yehova licindikwe acili cintu icicindame sana. Uzye walozizye mwinye? Ukucindika kukasula ukulenga cimwi ukuwa icitele, icawusaka nanti iciswepe. Wamwi wangelenganya ukuti: “Nga ca kuti izina lya kwe Leza alitele, alya wusaka swinya lyasanguluka, lyo amulandu ci wuno lizipizile ukucindicilwa?” Pa kwasuka lyo-o iwuzyo tuzipizile ukumanya vino izina lyawa.

6. Acani cino cikalenga izina ukucindama?

⁶ Izina asa vilembo vye vino vingalembwa pi pepala nanti vino awantu wangalilumbula. E Baibolo yikati; “Ululumbi lwa miwele mizima lwazipa lwalusya amafuta yawuzi wukulu.” (Imilu. 22:1; Ekawi. 7:1) Amulandu ci wuno izina lyacindamila? Amuno lyasanzyamo vino Yehova wamanyikwa, na vino awantu wakakwelenganya pe weliwe. Ukucindama kwi zina kutawa mwe vino awantu wakalipunda nanti vino lingalembwa pi pepala. Cino cacindama avino awantu wakakwelenganya nga wivwa nanti walola izina.

7. Uzye awantu wakakwelengula wuli izina lya kwe Leza?

⁷ Nga ca kuti awantu wakulanda ivya wufi pe Yehova, lyo wakulonda wanji walola ngati wawipa. Ica kuti nawo wakatalika ukukwelengula izina lyakwe. Izina lya kwe Leza lyakwelenguzilwe umuku wakutalicilapo mu Edeni pano e Satana walanzile iviwipe pe weliwe. Lekani tulole vino tukasambilila kwe lyo-o ilyasi.

8. Uzye e Adamu ne Eva wamanyile vyani, swinya amawuzyo ci yanji yano tungakolowozya?

⁸ E Adamu ne Eva wamanyile izina lya kwe Yehova. Wamanyile na vinjinye pe weliwe. Ku cakulolelako, watavwilikanga ukuti e Yehova awino wawelewuzile, wawapile uwumi ni nsi inzima swinya wonsinye wowili walinji awapwililike. (Inta. 1:26-28; 2:18) Uzye nomba watwalilizile ukwelenganya pe vyonsinye vino Yehova wawacitizile? Uzye  watwalilizile ukutemwa e Yehova nu kumusalifya pe vino izina lyakwe lyapiliwulanga? Icasuko cizile acimanyikwa pano umulwani wa kwe Leza wawelezizye.

9. Ukulingana ni Intaliko 2:16, 17 ne 3:1-5, uzye avyani vino e Yehova wanenile awantu wakutalicila, swinya e Satana wacisile cani pakuti watalike ukuvwilika vino Yehova wawanenile?

⁹ Wazyani Intaliko 2:16, 17 ne 3:1-5. E Satana walandizile mu nzoka. Wakolowozizye Eva ukuti: “Uzye e Leza wawanenile ati mutiza mulye ivikomwa vyonsi ivya mu calo?” Wo-o walinji awufi, e Satana walondanga vye ukuti e Eva atalike ukwelenganya iviwipe pe Leza. Amuno e Leza wawalesizye vye ukulya ku muti wonga. Lelo wawapile ivikomwa ivivule pa kuti watakwikala ni nzala. (Inta. 2:9.) Co-o calanjizyanga ukuti atawa ni cami. Ukwasowa nu kupita mu mbali vino e Satana walanzile walinji awufi uwufite fititi. E Eva watalisile ukulola ngati kwalinji vimwi vino e Yehova wawimile.

10. Uzye e Satana wawipizizye wuli e Leza, swinya avyani vino vyafumilemo?

¹⁰ E Eva wacilinji ni civwila kwe Yehova pano e Satana wamukolowozyanga amuno wasusile wulyanye vino Yehova walanzile. Walunzileko na mazwi yakuti, ‘tutazipizile nu kulemako.’ Wamanyile na cino calinji nukufumamo ukuti nga wakana ukwivwila Leza alifwa. Nomba e Satana watili: “Mutalifwa.” (Inta. 3:2-4) E Satana atanenanga vye e Eva ukuti Yehova we ca wufi. Lelo wamononezile ni zina. Calinji nge kunena e Eva ukuti e Yehova amufi sana. Ukufuma palyanye e Satana wizile awa we Ciwa nanti uwa lwambo. E Eva wamuwifile nkaninye ica kuti nawe wasuwizile. (1 Tim. 2:14) Ukusuwila uwufi wa kwe Satana kwalenzile Eva acite vino Yehova wa wakanizye. Walile ku cikomwa cino Yehova wawalesizye ukuti watiza walyeko. Na pakulecelezya wizile apako ne Adamu .​—Inta. 3:6.

11. Avyani vino awakwasi witu awakutalicila wacisile, swinya avyani vino waposilwe ukucita?

¹¹ Uzye vwilani nga calinji wuli wanga e Eva ayasuke Satana ukuti: “We ntakumanyile! Namanya vye umukwasi wane e Yehova! Namutemwa swinya namusuwila. Watupa vyonsinye vino tukalonda. Acani cino ukulandila ivya musango wo-o pa mukwasi witu? Fuma pa-a!” Ala mukwivwa vye, e Yehova nga wivwile icete ukulola kuno umwana wakwe umwanaci akulanda amazwi ya musango wo-o! (Imilu. 27:11) Lelo ku cawulanda, e Adamu ne Eva watalinji nu kutemwa kwa cisinka. Co-o calenzile wapotwe ukucinjilila izina lya mukwasi wawo ku mukwelengula wa kwe Satana.

12. Uzye Satana wacisile wuli pa kuti e Eva atalike ukuvwilika e Yehova, Swinya avyani vino e Adam ne Eva waposilwe ukucita?

¹² Ndi vino twalola e Satana pa kuti asovye e Eva, watalicizilepo ukulanda amazwi yano yalenzile e Eva atalike ukuvwilika nga cakuti e Yehova walinji amukwasi umuzima. Icakuti  e Adamu ne Eva waposilwe ukucinjilila izina lya kwe Yehova ku musewanya wuno e Satana umulwani wa kwe Yehova walesile. Namwe yanye amanda acili akawomvya inzila iyili yonganye pa kusewanya Yehova. Awantu wano wasuwila uwufi we Satana wakakana uwutunguluzi uwulungamane uwa kwe Yehova.

13. Uzye iwaliko lya kwe Ezekiel 36:23 lyalondolola wuli cino Baibolo yikalandapo sana?

¹³ E Yehova asisulako vye ku wufi wuno wakamuwipizya. Akacinjilila izina lyakwe ku mukwelengula, swinya asizumilizya ukuti umusewanya wutwalilile pi zina lyakwe. E Baibolo yalanda nkaninye pe vino e Yehova wacita pakulanjizya ukuti vino e satana walanzile mu Edeni vyalinji awufi. (Inta. 3:15) Tungalanda ukuti e Yehova akalenga izina lyakwe ukuwa ilitele ukupitila mu wufumu wa mwi yulu wuno wukatekwa numwana wakwe Yesu. Swinya watulaya uwumi wamuyayaya nu mutende mu nsi. E Baibolo yalanda pa vintu ivivule vino vikalenga tusinincizye ukuti e Yehova akalenga izina lyakwe ukucindikwa.​—Wazyani Ezekiel 36:23.

14. Uzye vino Yehova wacita pa wucipondoka wa mu Edeni vikalanjizya wuli vino wacindika izina lyakwe?

¹⁴ E Satana akakwelezya na maka ya kwe yonsinye ukucilicila ukulonda kwa kwe Yehova. Nomba wapotwa ukukwanisya. E Baibolo yalanda pe vino Yehova wacita swinya yalenga tusinincizye ukuti awacisinka nu kuti awino wayana ukuteka awantu. Ala wucipondoka wa kwe Satana na wano wakamukoncelela wukalumya nkaninye umwenzo wakwe Yehova. (Amalu. 78:40) Lelo akawonvya amano, ukutekanya nu wulungamane pa kucinjilila izina lyakwe. Swinya akalanjizya amaka yakwe mu nzila invule. Icicindamisye aca kuti akalanjizya ukuti wawa nu kutemwa mwe vyonsinye vino akacita. (1 Yoh. 4:8) E Yehova watwalilila ukulenga izina lyakwe ukucindikwa.

15. Uzye Satana akasewanya wuli izina lya kwe Yehova, swinya vyani vyafumamo?

¹⁵ E Satana acili watwalilila ukusewanya  izina lya kwe Leza. Akalenga awantu wavwilika nga ca kuti e Leza wawa na maka, amano nu kutemwa. Kucakulolelako, akakwelezya na maka yakwe yonsinye pa kuti awantu wasuwile ukuti kutawa Kelewula. Nga walola ukuti wapotwa ukuwipa awantu ukuti Leza kutawa, akaselela pa wufi wunji. Akatalika ukuwawipa ukuti amasundo ya kwe Yehova yakawapusula ku vizima swinya yawoma. Akasambilizya awantu nu kuti e Yehova wakalala. Amunkalwe. Akakoca awantu mu mulilo. Wano wazumila mwe co-o icisambilizyo ca wufi wakatalika ukukana uwutunguluzi wa kwe Yehova uwulungamane. E Satana alitwalilila vye ukukwelengula e Yehova swinya atalitela aleke ukupondola awawomvi wa kwe Yehova. Ukuficila wize wamonone. Uzye mulimuzumilizya ukuti amifumye ku mukwasi winu?

16. Avyani vino e Adamu nu Eva waposilwe ukucita vino sweswe tungacita?

¹⁶ Nanti aca kuti tutapwililika e Yehova watupa ulongo lwa kucindika izina lyakwe. Mwemwe mungacita vino e Adamu nu Eva waposilwe ukucita. Tukakwikala na wantu wano wakakwelengula Yehova nu kulanda iviwipe pe weliwe. Sweswe twawa nu longo lwa kunena awantu ukuti e Yehova wazipa, amutele, awalukundo swinya walungama. (Ayize. 29:23) Mungatunjilila uwutunguluzi wa kwe Yehova nga mukunenako wanji ukuti kusi uwuteko wuno wungaleta umutende ni nsansa ukulusye pa wa kwe Yehova.​—Amalu. 37:9, 37; 146:5, 6, 10.

17. Uzye e Yesu walenzile wuli izina lya kwe Yisi ukumanyikwa?

¹⁷ Nga tukulanda ivizima pi zina lya kwe Yehova lyo tukukolanya e Yesu. (Yoha. 17:26.) E Yesu walenzile izina lya kwe Yisi ukumanyikwa. Atalandangavye pi zina lya kwe Leza. Wasambilizyanga na pe vino e Yehova wawa. Ku cakulolelako, wasinizile awa Falise wano watinji e Yehova wakalala, atawa nuluse, asitusakamala swinya watinji akalonda vimwi kwe sweswe. E Yesu wavwizye awantu ukumanya ukuti e Yisi asilonda ivicilemo, watekanya, wawa nu lukundo swinya akatetela. Vino wacitanga cila wanda vyalenzile awantu wamanye icete Yehova.​—Yoha. 14:9.

18. Avyani vino tungacita pakuti ciloleke apatiswenye ukuti vino awantu wakalanda pe Yehova avya wufi?

 ¹⁸ Tunganenako wanji vino twamanya pe Yehova. Nu kuwasambilizya pa kuti wamumanye icete. Nga tukucita wo-o lyo tukufumyapo umukwelengula nu wufi wuno Satana wawipa pi zina lya kwe Yehova. Tukalenga ni zina lyakwe ukucindikwa ku wantu. Nanti aca kuti tutapwililika, tungakolanya Yehova. (Efes. 5:1, 2) Tukacindika izina lya kwe Yehova nga ca kuti tukumukolanya mu milandile yitu na mwe vino tukucita. Cinji aca kuti, nga tukusambilizya wanji icisinka pe Leza lyo tukucindika izina lyakwe. Asa coco conga tukalenga na wanji ukumanya ukuti nawonye wangatwalilila ni cisinka kwe Yehova asa mulandu nu kukanapwililika.​—Job 27:5.

19. Uzye iwaliko lye Ayizeya 63:7, likatwavwa wuli ukumanya umulandu wuno tukasambilizizya wanji pe Yehova?

¹⁹ Cinji cino tungacita pa kulenga izina lya kwe Yehova ukucindamikwa, akusambilizya wanji icisinka ca mu Baibolo nu kulanda sana pa mitecele yakwe. Tungawasambilizya ukuti awino wayana ukuteka mu nsi na mwi yulu, swinya imitecele yakwe yalungama. Kweni cacindama nkaninye ukusambilizya wanji pa masundo ya kwe Yehova. Lelo cino tukawikako sana amano, akuwavwa ukukunda Umukwasi witu. Nu kuwavwa ukutwalilila ukuwa ni cisinka kwe weliwe. Fwandi tuzipizile twalanda sana pa miwele ya kwe Yehova pano tukuwasambilizya. Nu kulanda sana muno mwasula izina lyakwe. (Wazyani Ayizeya 63:7.) Ala nga tukucita wo-o, tuliwavwa ukukunda Yehova. Swinya waliwamwivwila pa mulandu wakuti wakulonda ukutwalilila ukuwa ni cisinka kwe weliwe.

20. Avyani vino tulisambilila mu cipande cino cikonsilepo?

²⁰ Uzye tungacita wuli pa kuti twalanjizya ukuti tukakolanya e Yehova mwe vino tukalanda nu kucita? Icipande cino cikonsilepo cilitwavwa ukumanya icasuko kwe lyo-o iwuzyo.