1. Uzye Yehova akakwivwa wuli nga cakuti umutonte watalika ukumuwombela na swinya?

NDI VINO twasambilizile mu cipande cino cafumileko. E Yehova wayikolanya kwe kacema muzima wino akasakamala ing’onzi zyakwe nu kuvwamba insowe. Nawenye akavwamba nu kusakamala wano watonta. Wanenile awina Israeli wano walesile ukumuwombela ukuti, “Nyokani mwize kwenene, nani nandi nyoke kwemwemwe.” Twamanya ukuti napeyonye impindi acili akakwivwa icili conganye. Amuno ‘asipiluka.’ (Mala. 3:6, 7). E Yesu walanzile ukuti e Yehova na wangeli wakasecelela nkaninye nga ca kuti umutonte wanyocela mwi wungwe.​—Luka 15:10, 32.

2. Avyani vino twandi tusambilile mwe co-o icipande?

² Lekani tulole ivilanjililo vitatu ivicindame vino e Yesu walanzilepo. Vyo-o ivilanjililo vingatwavwa pano tukwavwa awatonte ukunyocela kwe Yehova. Twasambilila na pa miwele yino tuzipizile ukuwa nayo pano tukwavwa awatonte, ni nsansa zino tukazana nga tukuwombesya ukuvwamba wano wasowa.

3-4. Amulandu ci wuno umwanaci wino walumbulwa pe Luka 15:8-10, wawicizileko sana amano pa kuvwamba indalama ye drakima yino yasovile?

³ Tuzipizile ukuwombesya pakuti twavwe umutonte ukunyocela kwe Yehova. Co-o icisinka calandwapo mu cilanjililo cino calembwa mwi buku lya kwe Luka. Mwe co-o icilanjililo, e Yesu walanzile pa mwanaci wino wasovizye indalama iyicindame nkaninye yino witanga ukuti drakima. We-e umwanaci wawombesizye nkaninye pa kuti vye ayizane.​—Wazyani Luka 15:8-10.

⁴ E Yesu walondolozile vino umwanaci wayivwile pano wazanile indalama yino yasovile. Vino cawanga pe yo-o impindi awo-o, nga ca kuti umwana umwanaci akupisya uwinga. Impindi zimwi e mama wakwe wamusomelanga indalama zye drakima 10. Ncepamwi  yo-o indalama yonga iye drakima yino yasovile yalinji pe zyo-o 10 zino mama wakwe wamusomezile pa winga. We-e umwanaci wamanyile ukuti yaponezile mu ng’anda. Acino wakozizye ulukozyo pakuti avwambe kuno yaponezile. Nomba waposilwe ukuyizana. Ulukozyo luno wakweti lutalinji na maka yakumwavwa ukuzana indalama. Mukulecelezya wasusile wapyela mu ng’anda monsinye. Wizile alola vye kuno yalangalila. Teyelenganyani vino wayivwile! Wasecelezile nkaninye ica kuti wisile iviwuza vyakwe na wina mupalamano wakwe nu kuwasimicilako lyo-o ilyasi ilizima.

5. Amulandu ci wuno impindi zimwi cingatalila ukuzana wano watonta?

⁵ Cino tukasambilila kwe lyo-o ilyasi lya kwe Yesu aca kuti, nga twasovya cimwi tuzipizile ukuwombesya pa kuti tucizane. Wonye avino tuzipizile ukucita na pa kuvwamba awatonte. Cikapinda ukuwombesya nkaninye pa kuti tuwazane. Wamwi walesile kaali ukulongana nu kuwizya. Pamwi pe yo-o impindi wacintila na kunji kuno awanawitu na wankazi watawamanya. Tutakuvwilika ukuti awatonte wamwi pe yo-o impindi wakulondesya sana ukunyocela mwi wungwe lya kwe Yehova. Pa kuti wawombela ponga na wanawitu na wankazi wulyanye vino calinji pano watani watonte. Nomba kufwile ukuwa wumwi uwa kuwavwa.

6. Uzye awa mwi wungwe wangawombela wuli ponga pa kuvwamba awatonte?

⁶ Swensinye mwi wungwe twawa nu mulimo wakuvwamba wano watonta. Wa lupwa, wa eluda, wapainiya na wakawizyanye wangawombako wo-o umulimo. Fwandi asa wa eluda watupu. Uzye mwawa ne ciwuza nanti e lupwa, wino waleka ukuwizya nu kulongana? Avyani vino mungacita nga mwasunkanya umutonte pano mukuwizya ku ng’anda ni ng’anda? Mulondololelani ukuti nga angakunda ukuti wamwi wize wamutandalile, lyo mwandi mupeko wa eluda e foni namba ne adresi yakwe.

7. Uzye mwasambililako vyani ku mwanawitu e Thomas?

⁷ Wa eluda awano wazipizile ukuwa pa nkolelo ukwavwa awatonte ukunyocela kwe Yehova. Nomba wangacita wuli wo-o? Umwanawitu e Thomas * uwa ku Spain wino wavwa wa Nte awatonte ukucila pe 40 watili: “Nkatalicila ukuwuzya awanawitu na wankazi nga ca kuti wangamanya kuno awatonte awa mwi wungwe litu wacintila. Impindi zimwi nkawawuzya vye nga cakuti wasunkanyapo umutonte pano wakuwizya. Awavule mwi wungwe wakatemwa sana nga nkuwakolowozya amuno wakalola ukuti nawonye wangawombako wo-o umulimo. Ne nga nafika pa ng’anda ya mutonte nkatela inkolowozya pa wana wawo na lupwa. Awatonte wamwi wizanga na wana wawo mukulongana. Wamwi pe wanye wana wakalanga walinjipo awakawizya pa mpindi imwi. Nawonye nkawavwa ukunyocela kwe Yehova na kwi wungwe lyakwe.”

8. Ukulingana ni waliko lya kwe Luka 15:17-24, avyani vino umukwasi wacitizile umwana wakwe pano wanyosile pa ng’anda?

⁸ Amiwele ci yino tuzipizile ukuwa nayo pano tukwavwa awatonte wano wakulonda ukunyocela kwe Yehova? Tungasambililako pa miwele yino tuzipizile ukuwa na yo mu cilanjililo cino e Yesu walanzilepo pa mwana umusowe. (Wazyani Luka 15:17-24.) E Yesu walondolozile vino umwana umusowe wizile apingulapo ukunyocela kwe yisi. Na vino walapizile. Pano wanyosile, e yisi wamusamalizile nu kumukumbatila, ica kuti umwana wakwe waweni nukulola ukuti e yisi wamukunzile nkaninye. Umwana wakwe watwalilizile ukwivwa uwuwi pe vino wacisile swinya wayilolanga ngati atayine ukwitwa ukuti amwana. E yisi atapelezilevye pakukumbatila umwana wakwe, lelo wamucitizile navinji pa kumulanjizya vino wamukunzile.  Wamupekanizizye umwana wa ng’ombe nu kumupa ivizwalo ivizima pa kuti wazevye.

9. Amiwele ci yino tuzipizile ukuwa nayo pano tukwavwa awatonte ukunyocela kwe Yehova? (Lolani akambokosi kano ka kuti “ Vino tungavwa awatonte ukunyocela kwe Yehova.”)

⁹ E Yehova wawa ngati amukwasi wa mucilanjililo cino twalandapo. Watemwa sana awanawitu na wankazi wano watonta, swinya akalonda wanyocele kwe weliwe. Ukukolanya e Yehova na sweswenye tungavwa awatonte ukunyocela kwe Yehova. Lelo tuzipizile ukuwa ni cikuku, ukutekanya, ukutemwa nu luse. Amulandu ci wuno ukuwa na yo-o imiwele kwazipila, swinya tungacita wuli pa kuti tuwe nayo?

10. Amulandu ci wuno tuzipizile ukutekanizizya pano tukwavwa awatonte ukuwa iviwuza vya kwe Yehova?

¹⁰ Tuzipizile ukuwa ni miwele ya kutekanya pano tukwavwa awatonte amuno cikasumba impindi pa kuti wumwi atalike ukuwombela Yehova na swinya. Awatonte awavule wano watalika ukuwombela Yehova na swinya wakalanda ukuti wa eluda na wanawitu wa watandalilanga imiku imivule. E nkazi e Nancy wino akakwikala ku Asia watili: “E ciwuza wane wumwi uwa mwi wungwe wanjavwizye nkaninye. Wankunzile swinya wansenzile vye ngati ne songo wakwe. Ilivule wanjizusyangako vino cawanga pano twawombelanga e Yehova ponga. Wawikangako sana amano nga nkumulondololela vino nayivwanga ku mwezo. Ningati vye walinji we ciwuza wacisinka. Wanjavwanga palyanye pano nkulonda uwa kunjavwa.”

11. Amulandu ci wuno tuzipizile twalangulucilako wano wacisika ku mwezo?

¹¹ Ukupunuzwa kwawa ngati acilonda. Lelo ukulangulucilako kwawa ngati amulembo. Awatonte wamwi wakayivwa ngati wakwata icilonda. Pa mulandu navino umwanawitu nanti e nkazi wumwi wa wacisile. Co-o calenga watalonda  nu kunyocela kwe Yehova. Wamwi cino cikalenga wakalola ngati kwalinji vino wawafyenzile mwi wungwe. Awa musango wo-o wakalonda wumwi wino angawawikako amano nu kuwateyelezya pano wakulanda vino vili ku nsingo. (Jem. 1:19) E Maria wino walesilepo ukulongana nu kuwizya watili: “Cino nalondanga vye we ciwuza wino ninganena vino nkuyivwa. Wino anganjavwa nu kunjivwicisya.”

12. Lanjililani vino e Yehova akakwavwa awatonte ukutalika ukumuwombela na swinya

¹² E Baibolo yikalanda ukuti ulukundo lwa kwe Yehova luno wakwatila awantu wakwe, lwawa ngati antambo. Amunzila ci? Tuti mwaponela mu cizinji icitali cino mutange muyifumye mweweneco. Cino cingamyavwa vye ukufuma, antambo. Nu wakumizutila ku londe. Wonye avino Yehova wacisile ku wina israeli wano wamusile. Wawanenile ukuti : “Nawapalamizizye ni cikuku nu lukundo.’’ (Hos. 11:4) Na yonye impindi avino acili akayivwa pe wonsinye wano waleka ukumuwombela pa mulandu na masakamika ni ntazi. Akalonda wamanye ukuti wa wakunda nkaninye, swinya akalonda ukuwavwa pa kuti watalike ukumuwombela na swinya. Lelo e Yehova atanga afume kwi yulu ukwiza mukuwavwa. Angawomvya mwemwenye ukuti muwavwe.

13. Uzye ilyasi lya mwanawitu e Pablo lyatulanjizya wuli ukuti nga tuli nu lukundo tungavwa wanji ukunyocela kwe Yehova?

¹³ Cacindama nkaninye ukutwalilila ukunena awatonte ukuti e Yehova wa wakunda nkaninye ukusanzyako na wonsinye mwi wungwe. E Pablo wino tulanzilepo mu cipande cino cafumapo, walesile ukuwombela Yehova ukucila pa myaka 30. Walanzile ukuti: “Wanda wumwi pano nafumanga pang’anda umutondo tondo. E nkazi wumwi umukote wansunkinye. Amazwi yano walanzile ni nzila yino wayalandizilemo  yambomelezizye nkaninye. Walanjizizye ukuti wankunda nkaninye. Natalisile ukulosya nge ne munya. Namunenile ukuti e Yehova awino amitumile ukwiza mukulanda na nene. Paponye nasozilepo nu kunyocela kwe Yehova.”

14. Ukulingana ni cilanjililo cino cikazanwa pe Luka 15:4, 5, acani cino umucemi wacitanga ndi wazana ing’onzi insowe?

¹⁴ Nga twazana awatonte, tutazipizile ukuleka ukuwavwa. Tuzipizile vye ukutwalilila ukuwavwa nu kuwawomelezya. Wamwi wangakwivwa vye intete zya kunyocela kwi wungwe lya kwe Yehova wulyanye vino umwana musowe mu cilanjililo ce Yesu wayivwile. Swinya wuciwuza wawo ne Yehova wusiwoma ndi vino walinji pano watani watonte. Tuzipizile ukuwavwa pakuti wawomye wuciwuza wawo ne Yehova. Mu cilanjililo ca ng’onzi insowe, e Yesu walondolozile vino umucemi muzima akacita. Akasendela ing’onzi yakwe pa ciweya nu kuyinyocezya kuno kuli imbuye. Nanti aca kuti atewombesizye pa kuti ayizane. Akayinyamula nu kuyitwala ku mbuye amuno akamanya ukuti yitakweti amaka yakupita nu kunyocela kumbuye.​—Wazyani Luka 15:4, 5.

15. Uzye tungavwa wuli umuntu umutonte wino akulonda ukunyocela kwe Yehova? (Lolani amazwi na yanji pa kamutwe kano kakuti “ Iciwombelo Icizima.”)

¹⁵ Avino cawa na pakwavwa awatonte. Pakapita impindi pa kuti watalike ukuwombela Yehova. Amuno kukawa intazi zimwi zino wazipizile ukucinvya zino zingawanyosezya ku nsizi. Lelo umuzimu wa kwe Yehova, Izwi lyakwe, na mabuku yano umuzya akatupekanizizya, vingatwavwa ukwavwa awatonte ukuwoma mu vya kwe Leza na swinya. (Roma. 15:1) Uzye tungacita wuli pa kuti tuwavwe? E eluda wino wawomba imyaka imivule watili: “Awatonte awavule wakalondekwa  ukutalika ukuwatungulula isambililo lye Baibolo.” * E kawizya wino akutungulula isambililo ku mutonte, azipizile ukuyipepusya. Azipizile ukuwa amuntu wino umutonte atanga atiine ukumusimicila vino vili ku nsingo.” Fwandi wa eluda nga waminena ukutalika ukutungulula isambililo ku mutonte mwalola ukuti alongo luno lusiloleka.

16. Uzye twamanya wuli ukuti tukawombela ponga na wangeli pano tukuvwamba wano watonta?

¹⁶ Amalyasi amavule yakatwavwa ukumanya ukuti tukawombela ponga na wangeli mwe wo-o umulimo wa kuvwamba awatonte. (Ukuwu. 14:6) Mulole cino caciticizile e Silvio uwa ku Ecuador. Wanda wumwi wapefile kwe Yehova ukuti amutumile uwa kumwavwa ukunyocela kwe Yehova. Walile atani amale nu kupepa, wivwile vye alamu ya ku cisakati yalila. Wa eluda wawili wizile mukumutandalila. Wa eluda watemilwe sana ukutalika ukumwavwa pa kuti anyocele kwe Yehova.

17. Tuliwakwivwa wuli nga tukwavwa awatonte ukutalika ukuwombela Yehova na swinya?

¹⁷ Mwawa insansa nkaninye mukwavwa wano watonta ukunyocela kwe Yehova. Umwanawitu e Salvador e painiya wino akawombesya nkaninye ukwavwa awatonte watili: “Nga nelenganya pa watonte wano watalika ukuwombela e Yehova na swinya. Nkazana vye ivilamba vikulukuta mu minso pa mulandu ni nsansa.​—Imili. 20:35.

18. Nga cakuti mwatonta mu vya kwe Leza acani cino muzipizile ukusuwila?

¹⁸ Nga cakuti pe yo-o impindi mwatonta mu vya kwe Leza. Muwakwizuka ukuti e Yehova acili wamikunda nkaninye. Swinya akalonda ukuti mutalike ukumuwombela na swinya. Wulyanye vino mwalinji pa kutalika. Lelo kuli vimwi vino mufwile ukucita. E Yehova weni wawa ngati aweyo umukwasi wa mu cilanjililo ca kwe Yesu. Akamilindilila mwi wungwe lyakwe swinya nga mwanyoka alimipocelela ni nsansa.