Pe lyo-o iwaliko pawa amazwi yakuti: “Ndi walola wakateka wati wakwelengula awasaluke, wawakania mwakwe vino viyine ivya kusimicila, utize uwazunguka. Amuno inkombe yonsi yikacinjililwa na wino amulusizye amaka, nga wonsinye awalanga wakucinjilila na wamaka makulu nkani.”—Ekawi. 5:8.

Nga twakonka amelenganyo yitu, tungalola ngati lyo-o iwaliko likalanda pa wakateka wa munsi. Lelo amazwi yano yawa pe lyo-o iwaliko yakatwavwa ukumanya icisinka cimwi pe Yehova. Co-o icisinka cikatuwomelezya nkaninye nu kutusansamusya.

Lyo-o iwaliko lye Ekawizya 5:8 likalanda pe kateka wino akacuzya umupiina nu ku mufyenga. We-e kateka azipizile awakwizuka ukuti kwawa wino wamulusya amaka wino akalanga akulola vino akucita, swinya kwawa na wanji awa vifulo vyapapela wano wamulusizye. Ku cawulanda awapiina na walanda wakayimba nkaninye pa mulandu na vino wa-a wakateka wawa.

Lelo na pano ivintu visyufile nkaninye, ukumanya icisinka ca kuti e Yehova akalola vino wakateka wakacita kungatuwomelezya nkaninye. Tungapepa kwe Yehova nu kumunena vyonsinye vino vikutusakamika. (Amalu. 55:22; Flpi. 4:6, 7) Twamanya ukuti “aminso ya kwe Yehova yakalolecesya ko-o na koko mu nsi yonsi, kukulwila na maka wano imyezo yawo isi na kasinza nawe.”—2 Imila. 16:9.

Lyo-o iwaliko lye Ekawizya 5:8 likatwavwa ukumanya insi yino twisilemo. Likatwavwa nu kumanya icisinka ca kuti lyonsinye kukawa wino akalola vino wanji wakucita. Ni cicindamisye nkani aca kuti, likatwavwa ukwizuka ukuti e Yehova awa Maka Makulu swinya awino walusya wakateeka wonsinye. Pe yo-o impindi akutecela mu Mwana wakwe e Yesu Klistu imfumu ya Wufumu wakwe. E Leza Uwa Maka Yonsi nga nu mwana wakwe wakalola vyonsinye vino vikacitika. Swinya wakalola awantu wonsinye.