1. Uzye ampindi ci pano cingatamya ukutwalilila ukuwombela Yehova?

UZYE mukwelenganya ukuti ampindi ci pano cingamiwomela sana ukutwalilila ukuwombela e Yehova? Uzye apa mpindi yino muli ni ntazi nanti pano muli nu mutende? Kweni, nga twawa ni ntazi tukasuwila sana e Yehova. Nomba avyani vino tukacita nga ca kuti tukwikala umutende? Uzye mpindi zimwi tukakwiwilila ukuti ayili mpindi yino tuzipizile ukuwombela sana e Yehova? E Yehova wasosile awina Israeli ukuti vyo-o vyalinji nu kuwaciticila nga watacenjezile.​—Amasu. 6:10-12.

2. Aca kulolelako ci cino e Asa walanjizizye?

² Imfumu Asa wawa aca kulolelako icizima, amuno wasintilizile nkaninye pe Yehova. Atasuwilanga vye e Yehova pano wawa ni ntazi lelo na pano kuli umutendenye. “Umwezo wa kwe Asa walinji awulungamane uwumi wakwe wonsinye.” (1 Izya. 15:14.) Walanjizizye ukuti wawombelanga e Yehova nu mwezo wakwe wonsinye pano wafumizye ukupepa konsinye ukwa wufi mu Yuda. E Baibolo ikati “wononile ivifulo vya wina nsi muno wapelanga inzuwi ni vifulo muno wapepelanga, wafwantinye ivimawe vino wimisile nu kuputulanya ivimiti vino wimisile.” (2 Imila. 14:3, 5) Wafumizye ne nyinakulu e Maka pa wunafumu, amuno wawomelezyanga awantu ukupepa twaleza twawufi.​—1 Izya. 15:11-13.

3. Avyani vino twandi tulandepo mwe co-o icipande?

³ E Asa atononile vye twaleza twawufi tuno wapepanga. Lelo wawombesizye ukutunjilila ukupepa kwa cisinka nu kwavwa awaYuda ukutalika ukupepa Yehova naswinya. Co-o calenzile e  Yehova alenge e Asa na wina Israeli ukwikala mu mutende. * Pa myaka 10 yino Imfumu Asa yatekanga, awina Israeli ‘wisile mu mutende.’ (2 Imila. 14:1, 4, 6) Mwe co-o icipande twandi tulole vino e Asa wawonvizye icete impindi ya mutende. Twandi tulole na vino awina Klistu wakutalicila wawonvizye icete impindi ya mutende wulyanye vino Asa wacisile. Na mukulecelezya twakwiza twasuke iwuzyo lya kuti: Uzye tungawonvya wuli impindi ya mutende nga ca kuti watupa uwuntungwa wa kupepa Yehova mu nsi yino twikala?

4. Ukulingana ni waliko lye 2 Imilandu 14:2, 6, 7, uzye e Asa wawomvizye wuli impindi ya mutende?

⁴ Wazyani 2 Imilandu 14:2, 6, 7. E Asa wanenile awantu ukuti e Yehova awino wawapile “umutende.” Nomba asa mulandu na wo-o, e Asa asitela ayelenganyepo ukuti yo-o yalinji ampindi yakwikala vye nu kuyitopwa uwumi. Wasozilepo ukutalika ukuzenga utwaya, amalinga, impungu ni mpongolo. Wanenile awantu wa ku Yuda ukuti: “Insi yicili ayitu.” Uzye wasuzile mwinye pa kulanda ya-a amazwi? Wasulanga mukuti kutalinji awalwani awali wonsinye mwe yoyo insi awakuwalesya ukuya kuno wakulonda nanti awakuwalesya ukuzenga. Wawomelezizye awantu ukuwomvya icete yo-o impindi ya mutende.

5. Amulandu ci wuno e Asa wawomezizye awasilika wakwe?

⁵ E Asa wizile awomvyako yo-o impindi ya mutende ku kuwomya awasilika wakwe. (2 Imila. 14:8) Co-o citakusula ukuti atasuwizile mwe Yehova. Lelo wamanyile walinji amulimo wakwe ukupekanizizya cankani awantu amuno ncepamwi walinji nu kusunkanya intazi ku nkolelo. E Asa wamanyile ukuti wanda wumwi umutende wuno awa Yuda  wayitopwanga walinji nukusila. Wonye avino vizile avicitika.

6. Uzye awina Klistu wakutalicila wawomvizye wuli impindi ya mutende?

⁶ Nanti aca kuti awina Klistu wakutalicila wawacuzyanga, kwawa ni mpindi yino wikalanga mu mutende. Uzye wawomvizye wuli yo-o impindi? Wa-a awanaci na wonsi wacisinka wawomvizye impindi yawo ukuwizya ilandwe lizima ukwasowa ukuleka. Iwaliko lya Imilimo likalanda ukuti “wacindikanga” e Yehova. Watwalilizile ukuwizya ilandwe lizima ica kuti ‘wavulilangako nu kulunduluka.’ Co-o cikalanjilila ukuti e Yehova wawapazile mukuwombesya kwawo mu mpindi ya mutende.​—Imili. 9:26-31.

7-8. Avyani vino e Paulo na wanji wacisile pano walinji mu mutende? Londololani.

⁷ Awina Klistu wakutalicilapo wawizyanga ilandwe lizima ukuli konsinye kuno wakulonda. Ku cakulolelako, pano umutumwa Paulo waweni ukuti walinji nu longo ulwa kuwizizya awavule mu Efese, atalemile na kwi sote watalisile kuwizya nu kupanga awasambi.​—1 Kor. 16:8, 9.

⁸ E Paulo na wina Klistu awawuye wizile awawizizya awavule mu mwaka wa 49 C.E, pano awasambi na waeluda wamwi mu Yerusalemu wapinguzilepo ivya kucita pi lyasi lya kuzembululwa. (Imili. 15:23-29) Walile e Paulo na wanji waya wanena vye awa mwi wungwe vino waeluda na wasambi wapinguzile pa mulandu wakuzembululwa, wonsinye watalisile ukuwombesya ukuwizya ilandwe lizima “pi zwi” lya kwe Yehova. (Imili. 15:30-35) Avyani vino vyafumilemo? E Baibolo yikalanda ukuti “amawungwe yawomile mwi suwilo nkaninye swinya wayanga wakonjelezwa ukuvula amanda yonsi.”​—Imili. 16:4, 5.

9. Uzye cawa wuli mu nsi izivule, swinya aliwuzyo ci lino tuzipizile ukuyikolowozya?

⁹ Mu nsi imvule tukawizya mu mutende ukwasowa nu wakutulesya. Uzye mukakwikala mu nsi ya musango wo-o? Nga avino cawa yikolowozyani ukuti, ‘Uzye nkawomvya wuli wo-o uwuntungwa?’ Mwe ya-a amanda ya kulecelezya, awawomvi wa kwe Yehova wakasecelela amuno wapanvilwa nkaninye ukuwomba umulimo uwukulu uwa kusambilizya nu kuwizya ilandwe lizima. (Mar. 13:10) Swinya pe yo-o impindi kwawa ivivule vino tungawomba mu mulimo wa kwe Yehova!

10. Uzye iwaliko lya kwe 2 Timoti 4:2 likatuwomelezya ukucita cani?

¹⁰ Uzye tungacita wuli pa kuti tuwomvye icete impindi ya mutende? (Wazyani 2 Timoti 4:2.) Tuzipizile ukuwomvya yo-o impindi kukuyiweweta nu kulola nga cakuti kuli vimwi vino tungapilukamo pa lwitu nanti e lupwa lwitu nu kutalika ukuwombesya mu mulimo wa kuwizya nanti ukuwombako wupainiya. Yo-o asa mpindi yakuvwambisya ukuwa ni cuuma amuno tutalipusuka na vyo pa wucuzi wukulu.​—Imilu. 11:4; Mat. 6:31-33; 1 Yoh. 2:15-17.

11. Avyani vino wamwi wacita pa kuti wawizizye wanji ilandwe lizima?

¹¹ Wakawizya awavule wasambilila icitundu cinji pa kuti wasambilizye awavule ukumanya Yehova. Iwungwe lya kwe Yehova lyatupa iviwombelo ivilekane lekane vino vingatwavwa ukuwizizya mu ndimi imvule. Ku cakulolelako mu 2010, amabuku yafumile mu ndimi ukufika kwe 500. Mwe ya-a amanda tukawa na mabuku ukucila mu ndimi 1,000!

12. Uzye awantu wakakwivwa wuli nga wivwa ilandwe lizima mu lulimi lwawo? Landani ica kulolelako.

¹² Uzye awantu wakayivwa wuli nga wasambilila pe Yehova mu lulimi lwawo? Lekani  tulole pa cakulolelako ca kwe nkazi wumwi wino wazanilwe ku kulongana kwa citungu kuno kwawezile mu Memphis, Tennessee, U.S.A. Ko-o ukulongana kwalinji mu ci Kinyarwanda, ululimi luno wavulila ukuwomvya mu Rwanda, Congo (Kinshasa), na ku Uganda. Pa nsizi ya kulongana we-e nkazi walanzile ukuti: “Wo-o awuli umuku wakutalicilapo ukwivwicisya ivyewo pa kulongana kwa citungu pa myaka 17 yino yapitapo ukufuma pano nacintizile mo-o mu United States.” Ukwasowa nu kuvwilika ko-o ukulongana kwamufisile sana pa mwezo amuno kwalinji mu lulimi lwakwe. Uzye mungasambililako ululimi lunji pa kuti mutalike ukuwizizya wano wawa mu cifulo muno wamipa ukuwombela? Uzye mu cifulo cinu mwawa wumwi wino mukulola ukuti angakunda ukwivwa ilandwe lizima nga mwamuwizizya mu lulimi lwakwe? Muliwa ni nsansa nkaninye pa mulandu wakuwombesya kwinu.

13. Uzye awanawitu ku Russia wawonvizye wuli impindi ya mutende?

¹³ Asa wanawitu wonsi wano wakayitopwa ukuwizya ilyasi lizima ukwasowa intazi izili zyonsinye. Mu nsi zimwi watawa nu wuntungwa wa kuwizya pa mulandu wa kuti wawawinda ku mawuteko. Ku ca kulolelako, lolani cino caciticila awanawitu ku Russia. Awanawitu wawacuzizye pa myaka imivule nkaninye. Lelo mu March 1991 wizile awawapa uwuntungwa wa kupepa. Pe yoyo impindi mu Russia wakawizya walinji vye 16,000. Nomba pa nsizi ya myaka 20 impendwa yizile ayicila pe 160,000! Cikalanjizya apatiswenye ukuti wa-a awanawitu wawombesizye nkaninye pano walinji mu mpindi ya mutende. Nanti ciwe wowo, yo-o impindi ya mutende itatwalilizile. Lelo asa mulandu nu kupiluka kwa vintu, wa-a awanawitu watwalilila ukuwombela Yehova. Swinya watwalilila ukucita icili consinye cino  wangakumanisya pa kuti watwalilile ukumuwombela.

14-15. Uzye e Yehova walanjizizye wuli amaka yakwe pano wavwizye e Asa?

¹⁴ Mu mpindi ya kwe Asa, umutende wutatwalilizile. Amuno awasilika wa maka 1,000,000 wano wafumile ku Ethiopia wayile ku kulwisya awaYuda. E songo wa wasilikali wa wina Ethiopia e Zira wasuwizile ukuti walinji nu kucinvya awaYuda. E Asa weni atasuwizile mu wasilika, wasuwizile sana mwe Leza wakwe e Yehova. E Asa wapefile ukuti: “Oko we Yehova Leza witu, amuno tweyamila kwa kwe wewenye, mwa kwe wewenye amuno twizila mu kulwisya iwumba lyo-o.”​—2 Imila. 14:11.

¹⁵ Awasilika wa ku Ethiopia wavuzile nkaninye, ica kuti nga akuwalinganya ku wasilika wano Asa wakweti wanginjilamo imiku yiwili. Lelo nanti ciwe wo-o e Asa wasuwizile ukuti e Yehova awa amaka swinya walinji nu kuwapususya. Wonye wo-o avino Yehova wacisile. Wavwizye awantu wakwe ukucinvya awasilika wa ku Ethiopia.​—2 Imila. 14:8-13.

16. Uzye twamanya wuli ukuti impindi ya mutende yilisila?

¹⁶ Nanti aca kuti tutamanya icete cete cino ciliciticila wenga na wenga ku nkolelo, cino twamanya aca kuti umutende wuno awantu wa kwe Yehova wakayitopwa pe yo-o impindi wutalitwalilila. Muwakwizuka vino e Yesu walanzile pa manda ya kulecelezya ukuti “imyiko yonsi yiliwawavitilwa nanti ukumipata.” (Mat. 24:9) Nu mutumwa Paulo nye walanzile ukuti ‘wonsinye wano wakalonda ukwikala ukulingana na wukapepa mwe Klistu Yesu waliwacuzya.’ (2 Tim. 3:12) E Satana wiza ni “cikalazi icikulu,” acino tuzipizile twakwenecelela ukuti nasweswenye angatucuzya.​—Ukuwu. 12:12.

17. Uzye isuwilo litu lingelezwa wuli?

¹⁷ Kwasyala vye katici, swensinye twandi tutalike ukupita mu ntazi zino ziliyelezya isuwilo litu. Amuno kuliwa ‘uwucuzi uwukulu wuno wusitela wuweko ukufumilila ku wutalicilo wa nsi ukufika kwi lelo, swinya wutalitela wuweko na swinya.’ (Mat. 24:21) Indupwa zitu zingiza zitupilucile swinya pamwi wangiza wawinde nu mulimo witu uwa kuwizya. (Mat. 10:35, 36) Uzye mulisuwila mwe Yehova ndi vino Asa wacisile?

18. Ukulingana na Waheberi 10:38, 39, avyani vino vingatwavwa ukuyipekanizizya lya nkani pano umutende wutani wusile?

 ¹⁸ E Yehova akawomya isuwilo litu pe yonye impindi pa kuti atupekanizizye kwe vino vilicitika ku nkolelo. Akawomvya ‘umuzya wacisinka swinya uwa mano’ ukutupekanizizya vino vingawomya wuciwuza witu na weliwe. Swinya akatwavwa ukuwomya isuwilo litu palyanye pano likulondekwa. (Mat. 24:45) Lelo swensinye tuzipizile ukuwombesya pa kuti tutwalilile ukuwa ni suwilo iliwome mwe Yehova.​—Wazyani Waheberi 10:38, 39.

19-20. Ukulingana ne 1 Imilandu 28:9 amawuzyo ci yano tuzipizile ukuyikolowozya swinya amulandu ci?

¹⁹ Nasweswenye tuzipizile “ukuvwamba e Yehova” wulyanye vino e Asa wacisile. (2 Imila. 14:4; 15:1, 2) Tukatalika ukumuvwamba nga ca kuti twasambilila pe weliwe nu kusolapo ukubatizwa. Tukawombesya nkaninye pa kuti twakundilako e Yehova. Ukwelenganya pe ya-a amawuzyo kungatwavwa ukumanya nga ca kuti tukuya tukukundilako e Yehova nanti awe. Tungayikolowozya ukuti: ‘Uzye nkazanwa lyonsinye mukulongana?’ Pa kulongana tukapocelela ivyewo vino vikatwavwa ukutwalilila ukuwombela e Yehova swinya awanawitu na wankazi wano tukazanapo wakatuwomelezya. (Mat. 11:28) Tuzipizile nu kuyikolowozya ukuti: ‘Uzye nkawazya Baibolo cila wanda? Uzye nkawa na mapepo ya lupwa cila sabata nga nawa nu lupwa? Uzye natantika uwanda wakuyisambilizya Baibolo nga ntawa nu lupwa? Uzye nkawombesya mu mulimo wa kuwizya nu kusambilizya wanji e Baibolo?’

²⁰ Amulandu ci wuno tuzipizile ukwelenganya pe ya-a amawuzyo? E Baibolo yikatunena ukuti e Yehova akaceceta vino vili mu myezo yitu na vino tukwelenganya. Fwandi cingazipa ukumukolanya. (Wazyani 1 Imilandu 28:9.) Nga ca kuti twalola ukuti kuli mumwi muno tuzipizile ukupilukako nampo nga amu miwele yitu, vino tukakwelenganya nanti vino tukalonda ukucita mu wumi, tuzipizile ukulenga kwe Yehova ukuti atwavwe ukupiluka. Amuno yonye ayili impindi yino tuzipizile ukuyipekanya kwe vino tuli mukupitamo ku nkolelo. Fwandi tutazipizile ukuleka icili consinye cilenge tupotwe ukuwomvya icete yo-o impindi ya mutende!