1-2. Uzye amazwi yano yawa pe Ekawizya 11:6 yalemenkana wuli nu mulimo wakuwizya?

MUNSI zimwi awantu wakalondesya sana ukwivwa ilandwe lizima. Swinya nga wivwa vye wakalonda ukumanyilapo na vinji. Lelo munsi zinji awantu wasilonda ukwivwa pe Leza na pe vino Baibolo ikalanda. Uzye kuno mukakwikalila awantu wakapocelela wuli ilandwe lizima? Asa mulandu na vino wangacita nga twaya mukuwawizizya, e Yehova weni akalonda sweswe tutwalilile ukuwizya mpaka ayize alande ukuti casila.

² E Yehova wawika kaali impindi yino tulilecelapo ukuwizya. Nga cawa wo-o apano ‘insilo yiliyiza.’ (Mat. 24:14, 36) Acani cino tuzipizile ukucita pa kuti tutwalilile ukuwizya ilandwe lizima ukuficila Yehova ayize alande ukuti nomba casila?​—Wazyani Ekawizya 11:6.

3. Avya vino twandi tusambilile mwe co-o icipande?

³ Icipande cino cafumileko calanzile pa nzila 4 zino zingatwavwa ukuwa “awalondo wa wantu” awazima, akuli ukuti ukuwomba icete umulimo wa kuwizya. (Mat. 4:19) Mwe co-o icipande twasambilila pa nzila zitatu zino zingatwavwa ukutwalilila ukuwizya asa mulandu na vino tungapitamo. Twandi tulole nu mulandu wuno cacindamila (1) ukuwika umulimo wakuwizya inkolelo, (2) ukuwa awatekanye, ne (3) ukutwalilila ukuwa ni suwilo iliwome.

4. Amulandu ci wuno tuzipizile ukuwicila amano ku mulimo wuno Yehova watupa?

⁴ E Yesu wanenile awasambi wakwe vino awantu waliwa mu manda yakulecelezya na vino viliwacitika. Cino calenzile awanenele lyankani amuno wamanyile ukuti vyo-o ivintu vyalinji nu kuwapumbula. Wa wanenile nu kuti “lolelanji.” (Mat. 24:42)  Kwalinji ivintu ivivule mu mpindi ya kwe Noa vino vyalenganga awantu watawika amano ku wusoce wakwe. Ica musango wo-o cingatuciticila. (Mat. 24:37-39; 2 Pet. 2:5) Awuli umulandu wuno tuzipizile ukuwicila amano ku mulimo wuno Yehova watupa.

5. Uzye iwaliko lya Imilimo 1:6-8 lyalondolola ukuti umulimo wakuwizya ilandwe lizima wuzipizile ukufika kwinye?

⁵ Yo-o impindi apano tuzipizile ukuwika sana amano ku mulimo wakuwizya. E Yesu walanzile ukuti awasambi wakwe walitwalilila ukuwizya swinya waliwomba ukucila na vino Yesu wawomvile pano walinji mu nsi. (Yoha. 14:12) Lelo pa nsizi ya mfwa yakwe, awasambi wamwi wanyocezile ku mulimo wuno wawombanga uwa kukoma inswi. Nomba pano wazyulupusile, e Yesu wavwizye awasambi wakwe ukukoma inswi imvule mu cizungusyo. Swinya wawomvizye conye icizungusyo pa kuwavwa ukumanya ukuti umulimo wa kupanga awasambi wacindama walusya vyonsinye. (Yoha. 21:15-17) Pano atani anyocelemo kwi yulu, wamanyisizye awasambi wakwe ukuti; umulimo wakuwizya wuno watalisile walinji nu kusalangana insi yonsinyene. (Wazyani Imilimo 1:6-8.) Mu myaka yino yakonsilepo, e Yesu walanjizizye umutumwa Yohani icilolwa pa kumulanjizya vino viliwacitika mu “wanda wa Mfumu.” * Pa vintu vino Yohani waweni, pawa ni cilolwa ca kuzungusya muno waweni umungeli akuwizya “ilandwe zima ilya wumi wamuyayaya ilyakulandila awantu wamyiko na myiko, awandimi ndekakane-ndekane, na wansi zyonsi.” (Ukuwu. 1:10; 14:6) Ukwasowa nu kuvwilika e Yehova akalonda twawombako wo-o umulimo wuno wukuwombwa insi yonsinye mpaka ayize atunene ukuti casila.

6. Avyani vino vingalenga tuwike amano ku mulimo wa kuwizya?

⁶ Tungatwalilila ukuwika amano pa mulimo wa kuwizya nga tukwelenganya pe vyonsinye  vino Yehova akucita pa kutwavwa. Akutupekanizizya ivivule vino vikutwavwa ukuwa iviwuza vyakwe. Pe vyo-o pawa amabuku amapulintwe, aya kuwomvya pa ma kompyuta, amalyasi yakutamba na ya kwivwako vye nga ne programu ye Broadicasting. Teyelenganyani pe co-o, pa webusaiti yitu pali ivyewo mu ndimi ukucila 1,000! (Mat. 24:45-47) Pe yo-o impindi awantu watalemenkana pa mulandu na kuno wakaya mukupepa, utuwungwe twa mapolitiki tuno wakatunjilila nanti vino wumwi wikala. Lelo awawonvi wa kwe Yehova weni ukucila pe 8 000,000 walemenkana. Ku cakulolelako, pe Cisano pa 19 April , 2019 awawonvi wa kwe Yehova insi yonsinye watanvile e vidyo ya mapepo yamutondo tondo iyili yonganye. Swinya wulyanyene uwanda amanguzi, awantu 20,919,041 walongine ku kwizucizya Imfwa ya kwe Yesu. Ukwelenganya pe vyonsinye vyo-o vino Yehova akucita kukatwavwa ukutwalilila ukuwika amano ku mulimo wakuwizya.

7. Uzye ukukonka icakulolelako ca kwe Yesu kungatwavwa wuli ukuwika amano ku mulimo wa kuwizya?

⁷ Cinji cino cingatwavwa ukuwika amano ku mulimo wakuwizya, akukolanya Yesu. Atalesile icili consinye ukumupunvyanya pano wawombanga umulimo wakuwizya. (Yoha. 18:37) Nanti ‘amawufumu yonsinye’ yano e Satana wamulanjizizye yatamukumpuzile umwezo. Wakanile na pano awantu walondanga ukumuwika pa wufumu. (Mat. 4:8, 9; Yoha. 6:15) Atawisile amano kukuwa ni vyuuma swinya atalinji ni ntete asa mulandu navino wano wamucuzyanga wacitanga. (Luka 9:58; Yoha. 8:59) Nasweswenye tungatwalilila ukuwika amano ku mulimo wakuwizya nga tukwizuka ukusunda kwa kwe Paulo pano twelezwa. Wawomelezizye awina Klistu ukukonka icakulolelako ca kwe Yesu pakuti ‘watakatonte nu kunenuka’!​—Hebe. 12:3.

8. Uzye ukutekanya acani, swinya amulandu ci wuno tuzipizile ukuwela awatekanye pe yo-o impindi?

⁸ Ukutekanya akuteka umwezo pano tukulindilila ukuti vimwi vize vicitike. Tuzipizile ukuwa awatekanya pano tukulindilila ukuti ivintu vize vizipe muwumi na pano tukulindilila ukuti e Yehova ayize aficilisye ukulonda kwakwe ukwakutuzifizya insi. E kasesema Habakuki walondesyanga ukulola kuno Yehova wafumyapo uwunkalwe wuno walinji mu Yuda. (Haba. 1:2) Awasambi wa kwe Yesu wenecelanga ukuti Uwufumu walinji nu ‘kuloleka paponye’ nu kuwaluwula ku mitecele ya ci Roma. (Luka. 19:11) Nasweswenye tukalindilila ukulola kuno uwufumu wa kwe Leza wulifumyapo iviwipe vyonsinye nu kutwinjizya mu nsi mpya muno muliwa uwulungamane. (2 Pet. 3:13) Lelo tuzipizile ukutwalilila vye ukulindilila mpaka wo-o uwanda wize wufike. Lekani tulande pa nzila zimwi zino Yehova akatusambilizizyamo ukuwa awatekanye.

9. Avyakulolelako ci vino vikalanjizya ukuti e Yehova watekanya?

⁹ Vino e Yehova akacita vikalanjizya ukuti watekanya nkaninye. Ku cakulolelako wapile e Noa impindi inkulu iyakuzenga uwato nu kuwa we “kawizya pa wulungamane.” (2 Pet. 2:5; 1 Pet. 3:20) Swinya wawisileko sana amano pano Abrahamu wamukulowozyanga pe vino walinji nu kunona e Sodomu ne Gomora. (Inta. 18:20-33) Ne pa mpindi nkulu, watwalilizile ukutekanizizya awina Israel wano watalinji ni cisinka. (Neh. 9:30, 31) Cinji cino cikatulanjizya ukuti watekanya, akupa awantu wano wakalonda ukuwa aviwuza vyakwe impindi yakuti “watontolokwe.” (2 Pet. 3:9; Yoha. 6:44; 1 Tim. 2:3, 4) Vino Yehova watekanya vikatwavwa ukuwa awatekanya pano tukuwizya nu kusambilizya. Swinya akatusambilizya  ukuwa awatekanya ukuwomvya ivya kulolelako vya mu Baibolo.

10. Uzye ica kulolelako ca mulimi cino cikazanwa pe Jemusi 5:7, 8, cikatusambilizya vyani?

¹⁰ Wazyani Jemusi 5:7, 8. Icakulolelako ca mulimi cikatusambilizya vino tungawa awatekanye. Ivimelwa vimwi vikakula zuwa. Lelo ivimelwa ivivule vino vikakoma ivikomwa vikazimba pa kukula. Ivilimwa vino awina Israeli walimanga vyasumbanga imyezi 6 pakuti watalike ukusombola. Awalimi wakomelanga imbeyu zyawo pa mvula ya mulowoko, nu kusombola pano imvula yikaya mukusila. (Mar. 4:28) Cingazipa sana ukukolanya ukutekanya kwa mulimi, nanti acakuti citapepuka.

11. Uzye ukutekanya kulitwavwa wuli mu mulimo wa kuwizya?

¹¹ Ilivule awantu wano watapwililika wakalonda ukulola zuwa cino cikukufuma mwe vino tewakuwomba. Lelo nga cakuti tukulonda ivilimwa vitu vikule nukukoma icete tuzipizile ukuvitekanizizya nu kuvisakamala. Co-o casanzyamo ukulima, ukukomela, ukwipilila, ukulimilila nu kwitilizya. Nu mulimo wakupanga awasambi avino wawa. Pakalondekwa ukuwombesya. Amuno pakapita impindi pa kuti awasambi waleke ukuwa na kapatulula nu kutalika ukulanjizya ulukundo ni cikuku vino tukuwasambilizya. Ukutekanya kulitwavwa ukutwalilila ukuwizya nga ca kuti awantu wasakulonda ukwivwa. Swinya akuno kulitwavwa na pano twazana wano wakulonda ukusambilila Baibolo. Amuno tutanga tupaticizye umusambi ukuwa ni suwilo. Impindi zimwi na wasambi wa kwe Yesu nye wapotwanga ukwivwicisya zuwa vino wawasambilizyanga. (Yoha. 14:9) Tungawizya nu kusambilizya, lelo wino akamezya we Yehova.​—1 Kor. 3:6.

12. Tungalanjizya wuli ukuti twatekanya pano tukuwizizya wa lupwa lwitu?

¹² Citapepuka ukutekanya pano tukuwizizya wa lupwa lwitu wano asa wa Nte. Lelo icisinka ci sundo cino cawa pe Ekawizya 3:1, 7 cingatwavwa. Pano pakati: “Kwawa impindi . . .  zyakumyalala ni mpindi zya kuvwanga.” Imiwele yitu imizima ayino yingalenga wa lupwa wavwambisye ukwivwa kwi landwe lizima. Swinya impindi iyili yonganye tuzipizile ukuyipekanya ukuwanenako pe Yehova. (1 Pet. 3:1, 2) Ukucincila kwacindama sana pano tukuwomba umulimo wa kuwizya lelo tuzipizile ukuwa awatekanye ku wili wensinye, ukusanzyako nawa lupwa lwitunye.

13-14. Uzye awantu ci wano tungakolanya ukuwa awatekanye?

¹³ Tungasambilila ukutekanya ku wawomvi wa kwe Yehova wano walembwa mu Baibolo na ku wanawitu. E Habakuki walondesyanga nkaninye ukuti uwuwipe wusile. Lelo walanjizizye ukuti walinji amutekanye pano walanzile ukuti: “Nandi nkwele pa kapungu kakulolela.” (Haba. 2:1) Umutumwa Paulo nawe walanzile ukuti walondesyanga “ukumala” umulimo wakwe. Lelo watwalilizile ukuwa amutekanye pa ‘kuwizya ilandwe lizima.’​—Imili. 20:24.

¹⁴ Lekani tulole pa cakulolelako ca watwalane wano wazanilwepo kwi sukulu lya Gilead. Wa-a awatwalane wawatumile ukuya mukuwombela kuno wakawizya wacepa. Ko-o kuno wawatumile awavule asa wina Klistu. Swinya kwalinji vye awa mpendwa wano wazumilanga ukusambilila Baibolo. Lelo wanji wano walinji nawo mwi sukulu lya Gilead, wawasimicilanga vino watungululanga amasambililo ye Baibolo na wantu wano wavwanga ukwiza mu cine ku nsi kuno wawatumile. Nanti acakuti wasimicilanga vyonsinye vyo-o, wa-a awatwalane watwalilizile vye ukutekanya nu kuwizya asamulandu na vino awantu walinji kwe yo-o incende. Pa nsizi ya myaka 8, wizile awawa ni nsansa nkaninye ukulola wenga pa masambililo yawo wabadizwa. Acani cino vyo-o ivyakulolelako vya kunsizi ni vya manda ya-a vikutusambilizya? Wa-a awawomvi wa kwe Yehova awacisinka watwalilizile ukuwa awacincile mu mulimo wa kuwizya. Swinya e Yehova wawalambuzile pa kutekanya kwawo. Acino lekani tuwakolanya “wano wakasuwila nu kulindilila cimyamya.”​—Heb. 6:10-12.

15. Anzila ci yimwi yino isuwilo likatwavwa ukutwalilila ukuwizya?

¹⁵ Twasuwila mwi landwe ilizima lino tukawizya. Awuli umulandu wuno tukalondela ukuwizizyako na wanji pe lyo-o ilyasi ilizima. Twasuwila na mumalayo yano yakazanwa mwi Zwi lya kwe Leza Baibolo. (Amalu. 119:42; Ayize. 40:8) Tukayilolela na minso yitu vino amasesemo ya mu Baibolo yakuficiliswa. Tukalola vino imikalile ya wantu yikazipa nga wakonka ukusunda kwa mu Baibolo. Co-o cikalenga tusinilwe ukuti awantu wonsinye wakulondekwa ukwivwa ilandwe lizima.

16. Uzye Amalumbo 46:1-3 yakatwavwa wuli ukumanya ukuti nga twasuwila Yehova ne Yesu tulitwalilila ukuwomba umulimo wa kuwizya?

¹⁶ Twasuwila Yehova Intulo yi lyasi ilizima lino tukawizya ku wantu. Twasuwila ne Yesu wino wasontwa ukuwa Amfumu mu Wufumu wakwe. (Yoha. 14:1) Asa mulandu na vino vingatuciticila, e Yehova atalitela aleke ukuwa amaka yitu swinya ica kuvwamamo citu. (Wazyani Amalumbo 46:1-3.) Twasuwila nu kuti e Yesu akutungulula umulimo wakuwizya ukuwomvya amaka yano e Yehova wamupa.​—Mat. 28:18-20.

17. Simikani pa cakulolelako cino cikulanjizya umulandu wuno tuzipizile ukutwalilila ukuwizya.

¹⁷ Isuwilo likalenga tutavwilika ukuti e Yehova alitulambula pe vino tukawombesya. Impindi zimwi na mu nzila yino tutakwenecela. (Ekawi. 11:6) Ku cakulolelako, cila wanda awantu awavule wakalola utumasitandi na matebulo pano tukawika amabuku yitu. Yo-o anzila inzima iya kuwizizyamo. Mu kabuku ka Mulimo wa Wufumu aka mu Ciwemba aka  November 2014 mwalinji uwacitici wino wasambililanga pa university. We-e e kasukulu walondanga ukulemba ilyasi pa Nte zya kwe Yehova. Atamanyile kuno kwawezile Ing’anda ya Wufumu, lelo wizile azana amabuku yitu pi tebulo lino wawisile mu university mukasi nye. Wazanile ivyewo vino walinji nu kuwomvya mwi lyasi lyakwe. Mukupita kwa mpindi wizile abatizwa nukuwa Inte ya kwe Yehova. Pe yo-o impindi we painiya wa mpindi zyonsi. Ukwivwa ku malyasi ya musango wo-o kukatwavwa ukutwalilila ukuwizya ilandwe lizima amuno yakatwavwa ukumanya ukuti kucili kuli na wanji wano wakulonda ukusambilila Baibolo.

18. Acani cino calenga tusinincizye ukuti umulimo wa kuwizya pa Wufumu wulisila ukulingana ni mpindi yino e Yehova watantika?

¹⁸ Tusivwilika ukuti tulileka ukuwomba umulimo wa kuwizya pa mpindi yilyanye yino e Yehova wawikako. Mulole cino cacitisile mu manda ya kwe Noa. E Yehova walanjizizye ukuti akacita ivintu pa mpindi injanane. Mupipi ni myaka 120 pano Intalala yitani yitalike, e Yehova watanticizile lyankani impindi yino yalinji nu kutalicilapo. Pa nsizi ya myaka imivule e Yehova wanenile e Noa ukuzenga iciwato. E Noa watwalilizile ukuwombesya pa kasi ka myaka 40 nanti 50 pano Intalala yitani yitalike. Nanti aca kuti awantu wativwanga vino wawanenanga, watwalilizile vye ukuwasoka ukuficila pano Yehova wamunenile ukutalika ukwinjizya izyanyama mu ciwato. E Yehova wasusile “ayiyala ku cisakati” pano impindi yakumine iya kuti intalala yitalicilepo.​—Inta. 6:3; 7:1, 2, 16.

19. Avyani vino tukwenecela ku nkolelo nga twatwalilila ukuwa awancincile mu mulimo wa kuwizya?

¹⁹ Nombanye e Yehova wandi atunene ukuti twamala ukuwomba umulimo wa kuwizya. Apano aliyonona insi ya kwe Satana nukuleta insi mpya muno muliwa awantu wacivwila. Acaleka fwandi lekani tutwalilile ukukolanya Noa, Habakuki, na wanji wano watwalilizile ukuwa awacincile pano wawombanga imilimo yawo. Swinya lyonsinye twawika amano pa mulimo wa kuwizya, pa kuwa watekanye, nga na pa kuwomya isuwilo litu mwe vino Yehova watulaya.