1-2. Ukulingana ne 1 Timoti 6:20, acani cino Timoti wapocelezile?

IMPINDI IMVULE tukapako wanji ukuti watusunjileko ivintu vimwi ivya mutengo. Ku ca kulolelako, tungasunjisya indalama mu banki. Nga twacita wo-o tukamanya ukuti indalama zitu zisunzilwe icete, swinya watanga wiwe nanti ukusovya. Fwandi twamanya vino cikasula ukusunjisya ivintu ivicindame kwe wanji.

² Wazyani 1 Timoti 6:20. E Paulo wanenile Timoti ukuti wapocelezile icintu icicindame nkaninye, akuli kuti icisinka pe vino Yehova akalonda ukucitila awantu. E Yehova wapileko e Timoti ulongo lwa “kuwizya amazwi” nu kuwomba “umulimo wa kwe wakawizya wi landwe zima.” (2 Tim. 4:2, 5) E Paulo wawomelezizye Timoti ukulemasya cino wapilwe. Nasweswenye twapwa ivintu vyamutengo. Avintu ci vyonye vyo-o? Swinya amulandu ci wuno tuzipizile ukucinjilila vyo-o ivya wila vino Yehova watupa?

3-4. Avyani vino vikalanjizya ukuti icisinka ca mu Baibolo cacindama sana?

³ E Yehova watupa icisinka cino cikazanwa mwi Zwi lyakwe Baibolo. Co-o icisinka cacindama nkaninye. Amuno cikatusambilizya ivya kuwa na wuciwuza wuzima ne Yehova. Nu kutwavwa ukumanya vino vingalenga tuwe ni nsansa zya cisinka. Tukafuma mu wuzya wa visambilizyo vya wufi swinya tukaleka imisango miwipe, nga ca kuti twacisuwila.​—1 Kor. 6:9-11.

⁴ Umulandu wunji wuno tuzipizile ukucindicila sana icisinka ca mu Baibolo awa kuti, e Yehova akacisokolola vye ku wantu ‘wano wawa nu mwezo uwuzima wuno wukalonda  ukupusuka.’ (Imili. 13:48) Awantu awayicefye wasuwila ukuti e Yehova akawonvya umuzya wa cisinka swinya uwa mano pa kutusambilizya ivisinka vya mu Baibolo. (Mat. 11:25; 24:45) Lyonsinye tuwakwizuka ukuti tutanga twivwicisye vino vyawa mu Baibolo pa lwitu. Amuno icisinka ca mu Baibolo cacindama nkaninye.​—Imilu. 3:13, 15.

5. Acani cinji cino e Yehova watupa?

⁵ E Yehova watupa nu longo lwa kuwizya ilyasi lizima pe weliwe na pa kulonda kwakwe. (Mat. 24:14) Ilyasi lizima lino tukawizya lyacindama nkaninye, amuno likakwavwa awantu ukuwa mu lupwa lwa kwe Yehova. Swinya likawapa nu longo lwa kwizawa nu wumi wa muyayaya. (1 Tim. 4:16) Nanti aca kuti wamwi wangawomba nkaninye ne wanji wawombe katici, swensinye tukatunjilila umulimo uwucindame wuno wukuwombwa pe yo-o impindi. (1 Tim. 2:3, 4) Ala alongo uluyiwele ukuwombela ponga ne Yehova!​—1 Kor. 3:9.

6. Acani cino caciticizile wano waposilwe ukusunjilila vino wapilwe?

⁶ Mu mpindi ya kwe Timoti, awina Klistu wamwi watacindisile ulongo lwa kuwombela ponga nu Leza. E Demasi wizile atemwa sana ivya mu nsi ica kuti wizile asya nu mutumwa Paulo. (2 Tim. 4:10) E Fegulasi ne Hemojenesi nawo wizile awaleka ukuwizya pa mulandu wakutina ukuti wangiza wawacuzya ndi vino calinji kwe Paulo. (2 Tim. 1:15) E Humenai, Alexander, ne Filete nawo wizile awawa awasangu nu kuleka ukuwombela Yehova. (1 Tim. 1:19, 20; 2 Tim. 2:16-18) Wa-a wonsinye pa kutalika walinji awina Klistu awawome, lelo wizile awatalika ukulola ivintu vino wapilwe ukuti vitacindama.

7. Amicenjelo ci yino Satana akawonvya pa kuti twacita vino akulonda?

⁷ Anzila ci zimwi zino Satana akawonvya pa kuti tusye vino Yehova watupa? Lolani imicenjelo yimwi yino akawomvya. Akawonvya ivya kumalilamo icitendwe ndi vino amavidyo, intaneti, amabuku na manyuzipepala pa kuti tutalike ukwelenganya nu kucita vino vingalenga tuleke ukukunda Yehova, nanti tuleke ukukonka amasundo yakwe. Akatuletela amasakamika nu kutucuzya pa kuti tuleke ukuwizya. Swinya akatuzembeleka ukuti twakwivwa ku ‘malyasi ya wufi’ aya wasangu pa kuti tusye iwungwe lya kwe Leza.​—1 Tim. 6:20, 21.

8. Acani cino mukusambililako kwe vino vyaciticizile umwanawitu e Daniel?

⁸ Nga tutacenjezile tungapotwa ukulemasya icisinka cino twapwa. Lekani tulandeko  pe Daniel, * wino wakunzile sana ukuteya amagemu ya pa kompyuta. Walanzile ukuti: “Natalisile ukuteya ya-a magemu lyo indi vye ni myaka 10. Pa kutalika nateyanga amagemu amazimanye. Lelo mu kupita kwa mpindi natalisile ukuteya muno mwawanga uwunkalwe ni vya mizimu.” E Danel wizile atalika ukuteya amaawazi 15 cila wanda. Walanzile nu kuti: “Namanyile ukuti amagemu yano nateyanga ni mpindi yino nasumbanga pa kuteya, vyantalusyanga kwe Yehova. Icakuti nizile intalika ukulola ngati ntazipizile ukukonka vino Baibolo ikalanda.” Nasweswenye nga tutacenjezile, ivya kumalilamo icitendwe vimwi vingalenga tuleke ukuwika amano ku cisinka cino twamanya. Na mukulecelezya tungatayila ivintu ivicindame vino e Yehova watupa.

9. Ukulingana ne 1 Timoti 1:18, 19, uzye e Paulo wakolinye e Timoti kwe weni?

⁹ Wazyani 1 Timoti 1:18, 19. E Paulo wakolinye e Timoti ku musilika. Swinya wamuwomelezizye ukuti “leka amazwi nye yayo yawe avyanzo vyako ivya kulwilako.” E Paulo atalandanga pa kulwa na wasilika lwa kumuwili. Uzye awina Klistu wawa wuli ngati awasilika wano wakalwa inkondo? Amiwele ci yino tuzipizile ukuwa nayo pa kuti tufikepo ukuwa swe wasilika wa kwe Klistu? Lekani tulole ivintu 5 vino tungasambililako ku cilanjililo cino umutumwa Paulo wapile. Vyo-o ivintu 5 vyandi vitwavwe ukulemasya icisinka cino twapwa.

10. Amulandu ci wuno tuzipizile ukukundila sana e Yehova?

¹⁰ Muwakundilako e Leza. Umusilika umuzima wawa ni cisinka. Akawombesya na maka pa kuti acinjilile wino wakunda nanti cino wacindamika. E Paulo wawomelezizye Timoti ukukundilako e Yehova, akuli kuti ukuwa na katiina na wucisinka kwe weliwe. (1 Tim. 4:7) Fwandi ukukundilako e Yehova kungalenga tutwalilile ukulemasya icisinka.​—1 Tim. 4:8-10; 6:6.

11. Amulandu ci wuno tuzipizile ukuwombesya pa kuti tuwe ni miwele mizima?

¹¹ Muwakwelezya na maka ukucita icizima. Umusilika azipizile ukuwombesya na maka pa kuti awawa umuyipekanye lyonsinye ukulwa inkondo. Cino cavwizye e Timoti ukulewuka imiwele miwipe, akukonka ukusunda kwa mutumwa Paulo ukwa kutwalililila ukuwa ni miwele mizima nu kutwalilila ukuwa ponga na wina Klistu wawuye. (2 Tim. 2:22) Lelo walondekwanga ukuwombesya pa kucita vyonsinye vyo-o. Naswenye tuzipizile ukuwombesya pa kuti tulewuke ku viwipe. (Roma. 7:21-25) Tuzipizile ukuwombesya pa kuti tuzule uwuntu wukali nu kuzwala uwuntu wupya. (Efes. 4:22, 24) Swinya cikapinda ukuyiwomelezya nga tutonsile pa kuti tuye tuzanwe mu kulongana.​—Hebe. 10:24, 25.

12. Anzila ci zino zingatwavwa pa kuti twawonvya icete Baibolo?

¹² Umusilika azipizile ukumanya ivya kuwonvya icete ivyanzo vyakwe. Lelo pa kuti awaviwomvya icete azipizile awaviwomvya lyonsinye pa kuti ciwelele. Naswenye tuzipizile ukumanya ivya kuwomvya Izwi lya kwe Leza Baibolo. (2 Tim. 2:15) Tukaya mukusambilila ivya kuwomvya Izwi lya kwe Leza nga tuli pa kulongana. Lelo nga tukulonda na wanji wasinincizye ukuti icisinka ca mu Baibolo cacindama nkaninye tuzipizile twayisambilizya lyonsinye. Co-o citakusula ukuti tuzipizile ukupelela vye pa kuwazya ampela. Cikusula ukuti tuzipizile ukuwazya nu kwelenganya  sana pe vino twawazya. Swinya tuzipizile ukuvwambilapo ivyewo na vinji pa kuti tuvivwicisye vino tukuwazya nu kuwaviwomvya mu mikalile yitu. (1 Tim. 4:13-15) Nga tukucita wo-o tuliwawonvya icete Baibolo pano tukusambilizya wanji. Tuliwawalondolela vino twawawazizya nu kuwavwa ukulola vino viwakumile. Acino nga tukuyisambilizya Baibolo lyonsinye, tuliwa swe wakasambilizya awazima.​—2 Tim. 3:16, 17.

13. Ukulingana na Waheberi 5:14, avyani vino tuzipizile ukucita pa kuti tumanye ivya kupusanya icizima ni ciwipe?

¹³ Muwakwiluka icizima ni ciwipe. Umusilika azipizile ukumanya vino vingamuletela intazi nu kuvilewuka. Nasweswenye tuzipizile ukumanya vino vingatuletela intazi nu ku vilewuka. (Imilu. 22:3; wazyani Waheberi 5:14.) Ku ca kulolelako, tuzipizile ukusola icete ivya kumalilamo icitendwe ndi vino amaprogramu ya pa TV na mafilimu. Amuno mu maprogramu amavule na mu mafilimu mukawa sana vino Yehova wapata swinya vino vingatuletelela. Sweswe tusisola ivya musango wo-o, amuno vingatalika ukonona wuciwuza witu ne Yehova katici katici.​—Efes. 5:5, 6.

14. Uzye ukwiluka kwavwizye wuli e Daniel?

¹⁴ E Daniel wino tulanzilepo kali wizile ayiluka ukuti amagemu yano wateyanga ayano yalenzile awayivwa vino wayivwanga. Acino wizile avwambilapo ivyewo pa Watchtower Library pa ntazi yino wakweti. Uzye ukucita wo-o kwamwavwizye wuli? Walesile ukuteya amagemu amawipe. Wayafusile yonsinye swinya walesile nu kwizya na wano wateyanga nawo. E Daniel watili, “Nizile intalika ukuwomvya impindi yane ku milimo ya pa ng’anda nu kuwa ponga na wanawitu na wankazi.” Pe yo-o impindi e Daniel we painiya swinya we eluda.

15. Amulandu ci wuno amalyasi ya wufi yawipila?

¹⁵ Tutazipizile twakwivwa ku malyasi ya wufi aya wasangu, wulyanye vino Timoti wakananga ukwivwa kwe ya-a amalyasi. (1 Tim. 4:1, 7; 2 Tim. 2:16) Ku ca kulolelako, awasangu wangatalika ukusalanganya amalyasi ya wufi pa wanawitu na wankazi nanti ukulanda amazwi yamwi yano yangalenga tutalike ukuvwilika iwungwe lya kwe Yehova. Amalyasi ya musango wo-o yangatonsya isuwilo litu. Tutazipizile ukuyasuwila. Amuno yakafuma ku ‘wantu wano wononeka amelenganyo swinya wano watawa ni cine’. Cino wakacitila wo-o,  wakalonda vye ukuleta “amazwi ya mipanzi ni mpokoto.” (1 Tim. 6:4, 5) Wakalonda tusuwile amazwi yawo pa kuti tutalike ukuvwilika awanawitu.

16. Avintu ci vino tuzipizile ukulewuka?

¹⁶ Muwalewuka vino vingamipumbula. E Timoti “walinji amusilika musuwilwa uwa kwe Klistu.” Atawisile amano ku vyuuma nanti kwe vinji ivya mwe yo-o insi. Lelo wawisile amano pa mulimo wa kuwizya. (2 Tim. 2:3, 4) Nasweswenye tutazipizile twavwambisya ukuwa ni vintu ivivule ivya mwe yo-o insi. Amuno ‘ukuvwambisya icuuma’ kungalenga tuleke ukukunda Yehova, Izwi lyakwe Baibolo nu mulimo wa kuwizya. (Mat. 13:22) Fwandi tuzipizile ukupepusya imikalile yitu nu kuwomvya impindi yitu mu “kuvwamba . . . Uwufumu inkolelo.”​—Mat. 6:22-25, 33.

17-18. Acani cino tuzipizile ukucita pa kuti tucinjilile wuciwuza witu ne Yehova?

¹⁷ Mwayipekanya ukucitapo cimwi zuwa. Umusilika azipizile ukuyipekanizizya lyankani ukuicinjilila kwe vino vingacitika. Nga tukulonda ukucinjilila ivintu ivicindame vino Yehova watupa, tuzipizile ukucitapo cimwi zuwa zuwa nga twalola uwusanso. Nomba acani cino cingatwavwa? Akupekanizizya lyankani vino tungacita nga ca kuti iviwipe viza mu kupumicizya.

¹⁸ Katulanjilile, ilivule nga ca kuti awantu wawita kumwi nampo nga apa muteweto, wakatalicilapo ukuwanenela lyankani umulyango wuno wuwezile apafupi kuno wangafumila zuwa. Amulandu ci wuno wakacitila wo-o? Pa kuti cize ciwapepucile ukufuma zuwa nga kwacitika uwusanso. Wonye wo-o avino na sweswenye tuzipizile ukucita. Tuzipizile ukuyipekanizizya lyankani nga ca kuti iviwipe viza mu kupumicizya pano tukuwomvya intaneti nanti pano tukutamba TV. Nga twacita wo-o, cilitupepucila ukuyicinjilila kwe vino vingonona wuciwuza witu ne Yehova. Swinya tulitwalilila ukuwa ne kampingu umusanguluke.​—Amalu. 101:3; 1 Tim. 4:12.

19. Avizima ci vino tuliyitopwa nga twatwalilila ukucinjilila ivintu ivicindame vino Yehova watupa?

¹⁹ Tuzipizile ukucinjilila ivintu ivicindame vino Yehova watupa, akuli kuti icisinka cino cawa mu Baibolo nu longo lwa kuwizizya wanji ilyasi lizima. Co-o cililenga tuwe ne kampingu umusanguluke, uwumi wuzima, ni nsansa zino zikafuma mukwavwa wanji ukumanya Yehova. Ukulenga umuzimu wa kwe Yehova akuno kungatwavwa sana ukutwalilila ukucinjilila vino twapwa.​—1 Tim. 6:12, 19.