1, 2. (a) Amutende ci wuno tungawa nawo mwe yaa amanda? (b) Acani cino cikalenga ukuti tutati twawa nu mutende weneco weneco mwe yaa amanda? (Lolani icikope papela.)

 SWENSINYE tukalonda twakwikala icete ukwasowa ukusakamikwa. Tukasalifya nkaninye Yehova pa kutupa ‘umutende wakwe Leza’ wuno wukalenga tutati twakwelenganya pe vino vikalenga twasakamala! (Flp 4:6, 7) Swinya pa mulandu wakuti twayipa kwe Yehova, tukawa nu mutende ne Leza, akuli ukuti ukuwa iviwuza naweliwe.​—Rom 5:1.

² Naponye impindi yitani yifike iya kuti e Leza atupe umutende weneco weneco. Mwe ya-a amanda ya kulecelezya amatale, awantu wakapusana sana swinay awantu awavule wakunda ukupokota. (2 Tim. 3:1-4) Pa mulandu wakuti swe wina Klistu wacisinka, tuzipizile ukulwisya Satana ni visambilizyo vya kwe ivya wufi. (2 Kor. 10:4, 5) Lelo wano wangalenga sana tuleke ukuwa nu mutende, awalpwa lwitu wano asa wa Nte. Walupwa lwitu wamwi ncepamwi wangatuseka pe vino twazumilamo, wangatunena ukuti twaleta amalekano mulupwa, annti wangatutinya ukuti walitukaana nga twatwalilila ukuwa wa Nte. Avyani vno tuzipizle ukucita nga cakuti walupwa lwitu wakatukanya ukupepa Yehova? Avyani vino tungacita pakuti tusipicizye ivya musango woo?

3, 4. (a) Uzye vino e Yesu wasambilizyanga vyalinji nukukuma wuli awantu? (b) Ampindi ci pano cingasyupa ukukonka Yesu?

³ E Yesu wamanyile ukuti vino wasambilizyanga vyalinji nukupusanya awantu nu kuti wano walinji nukuwa awasambi wakwe wazipizile ukuwa awasipe pa kuti watwalilile ukumukonka na pano wakuwakanya. Awa mu lupwa nga wakutukanya ukupepa, mu lupwa musiwa umutende. E Yesu watili: “Mutize muwakwelenganya muwati niza leeta umutende munsi; awe ntizaleta umutende, ukuwa alisumo. Niza mukupatania wanachonsi kwewayisi nawo awanachanachi kwe wanyina, wanyinavyala wana kwewanyinavyala; awalwani walutilizye wa muntu waliwa awachiwanza chakwenye.”​—Mat. 10:34-36.

⁴ Pano e Yesu wavwanzile ukuti “Mutize muwakwelenganya muwati niza leta umutende,” wasuzile mukuti wano wivwanga kwe vino wawanenanga wazipizile wakwelenganya pe vino vyalinji nukwaciticiala nga wawa awasambi wakwe. Amazwi yano e Yesu wawizyanga yalinji nukupatanya awantu. Kweni cino e Yesu walondanga, akusambilizya awantu icisinka pe Yehova, asa kupusanya awantu. (Yohani 18:37) Naponye, wonsinye wano walinji nukuwa awasambi wa kwe Klistu walinji nukuwa ni ntazi nga cakuti walupwa lwawo ni viwuza wakana ukusambilila icisinka.

5. Antazi ci zino awasambi wa kwe Yesu wakasunkanya?

⁵ Pa ntazi zino e Yesu wanenile awasambi wa kwe ukusipicizya alinji nukuwakanya ukupepa kwa lupwa lwawo. (Mat. 10:38) Pa kuti awasambi wa kwe Klistu watwalilile ukumukonka, wazipizile ukusipicizya pano wakuwaseka nanti nga wakuwakanya kwa lupwa lwawo. Nga kukonkavye wapocelela ivivule ukucila na pe vino wasya.​—Wazyani Marko 10:29, 30.

6. Avyani vino tuzipizile twakwizuka nga cakuti walupwa lwitu wakutukanya ukupepa Yehova?

⁶ Nanti walupwa lwitu wangatukanya wulinye ukuti tutapepa Yehova, tusileke ukuwakunda, nanti ciwe woo tuzipizile twakwizuka uktui wano tufwile ukutemwa nkani we Leza ne Klistu. (Mat. 10:37) Swinya tuzipizile nukumanya ukuti e Satanga angalenga tucilemo ukukunda wa lupwa lwitu ic akuuti tuleke nukuwa ni cisinka kwe Leza. Nomba katulande pe vimwi vino walupwa wangatukanya ukucita na vino tungacita pakusipicizya zyoo intazi.

7. Uzye wano watwalana na wino asa we Nte muwuye wazipizile walola wuli itwala lyawo?

⁷ E Baibolo ikasocela awatwalane ukuti ‘waliwawa ni ntazi mu wumwi wawo.’ (1 Kor. 7:28) Nga cakuti e wakwinu asa we Nte, lyo muliwa mwawa ni ntazi zino wano watwalana wa Nte watupu wasisunkanya. Napnye, muzipizile mwalola iivntu ndi vino Yehova akavilola. Mufwile mwakwizuka ukuti nga cakuti e wakwinu akakana ukuwa umusambi wa kwe Klistu, woo asa mulandu wakulekanilanapo nanti ukupatukana. (1 Kor. 7:12-16) Nanti aca kuti umonsi wino asa we Nte asitutungulula ulupwa lwa kwe mu vya kwe Leza, e wakwakwe azipizile amucindika amuno awili umutwe wa lupwa. Nu monsi umwina Klistu azipizile ukukunda e wakwakwe wino asa we Nte.​—Efe 5:22, 23, 28, 29.

8. Amawuzyo ci yano muzipizile ukuyiwuzya nga cakuti e wakwinu impindi zimwi akamilesya ukupepa Leza?

⁸ Mungacita wuli nga ca kuti e wakwinu wati amilesya ukupepa? Ku cakulolelako e nkazi wumwi wamulesizye kwe wakwakwe ukuti atawaya mukuwizya ilyasi ilizima amanda yamwi mwe Sabata. Vyoo nga avino vikamiciticila, mufwile ukuyiwuzya ukuti: ‘Uzye e wakwane akalonda ndeke ukupepa Leza? Woo nga asa vino akalonda, uzye mfwile ukumutontela?’ Nga mukupampamila vye pa cintu conga mutaliwakwata intazi imvule mwi twala linu.​—Flp 4:5.

9. Uzye umukwasi umwina Klistu angasambilizya wuli awana wakwe ukucindika umukwasi wawo wino asa we Nte?

⁹ Nga cakuti e wakwinu asa we Nte, cikatala ukusambilizya awana ivya kwe Leza. Ku cakulolelako, muzipizile ukusambilizya awana witu ukukonka isundo lya mu Baibolo lino likati: “Uwachindika eso nunyoko.” (Efe 6:1-3) Nomba mungacita wuli nga cakuti e wakwinu asikonka vino Baibolo ikalanda pa miwele imizima yino tuzipizile ukuwa nayo? Muzipizile muwamucindika pa kuti awana winu wamikolanya. Muwawika amano pa miwele imizima iya kwe wakwinu swinya muwamusalifya. Mutati muwalanda iviwipe pe wakwinu lyo awana winu wakwivwako. Lelo muzipizile ukulondololela awana winu ukuti cila muntu wawa ni nsambu zya kuyisolela ukuwombela Yehova. Awana winu nga wali ni miwele imiziima, ncepamwi e wakwinu wino asa we Nte nawenye angatalika ukupepa Yehova.

10. Uzye umukwasi umwina Klistu angasambilizya wuli awana wakwe icisinka ca mu Baibolo nga cakuti e wakwakwe asa we Nte?

¹⁰ Impindi zimwi umukwasi wino asa we Nte, angapaticizya awana wakwe ukuti wazevya vino wano wawa mukupepa kwa wufi wakazevya nanti angatalika ukuwasambilizya vino vyawa mukupepa kwa wufi. Awonsi wamwi wano awa wa Nte wangalesya ne wakwakwe wino we Nte ukusambilizya awana ivya mwe Baibolo. Lelo nanti cingawa wonye, umuci umwina Klistu, azipizile ukwelezya na maka yakwa ukusambilizya awana icisinka ca mu Baibolo. (Imili 16:1; 2Ti 3:14, 15) Ku cakulolelako, umulume angakanya umuci umwina Klistu ukuti atati awatungulula awana wakwe amasambililo ya mu Baibolo swinya atati awasenda na mukulongana. Nanti aca kuti umwanaci wino watwalwa azipizile ukonka vino wakwakwe akulonda, anganenako awana vino wazumilamo pano wakwakwe asipo, nga akucita woo, lyo akusambilizya awana wakwe imiwele imizima na pa kwe Yehova. (Imili 4:19, 20) Kweni awana awano waliyisolelapo nampo nga akuwombela Yehova nanti awe.​—Amas 30:19, 20. a

11. Acani cino cingalenga mutalike ukupusana na waluupwa wano asa wa Nte?

¹¹ Ncepamwi pakutalicila mutanenile walupwa lwinu ukuti mukalongana ni Nte zya kwe Yehova. Naponye, lyalile isuwilo linu lyawomelako, mwasozilepo ukuwanena pe vino mwazumilamo. (Marko 8:38) Nga cakuti vyoo vyalenga mupusane na walupwa lwinu wano asa wa Nte, katusambilile vino mungacita pakuti mutapusana nkani swinya mutwalilile awa cisinka.

12. Amulandu ci wuno wa lupwa wano asa wa Nte wangatukanizya ukupepa Yehova, nomba tungacita wuli pakuti tuwawalangulucilako?

¹² Muwalangulucilako wa lupwa lwinu wano asa wa Nte. Nanti acakuti mutemilwe nkaninye pa cisinka ca mu Baiblo cino mukusambilila, wa lupwa lwinu ncepamwi wangalola ngati wamiwipa nanti ukuti mwawa mukawungwe kamapepo kano katamanyikwa ni cete. Pamwi wangalola nukuti mwawapata amuno musizevyako nawao amaholide. Wangatiina ukuti iviwipe vingamiciticila nga mwafwa. Pakuti muwawalangulucilako, muzipizile muwalola ivintu ndi vino wakuvilola swinya muzipizile muwakutika sana pakuti mwiluke vino vikulenga walola ivintu ndi vino wakuvilola. (Imilu 20:5) Umutumwa Paulo welezyanga ‘ukumanya awantu wonsinye’ pakuti awawawizizya ilyasi lizima, wonye avino naswenye tuzipizile tuwacita.​—1Ko 9:19-23.

13. Uzye tuzipizile twalanda wuli na walupwa wano asa wa Nte?

¹³ Muwawa awatontelele pano mukulanda nawo. Baibolo ikati “Umuvwango winu wuwawa awuzima.” (Kol 4:6) Tungalenga kwe Yehova ukuti atupe umuzimu uwutele pa kuti tuwalanjizya ukuti twawa ni vikomwa vya kumuzimu pano tukulanda na walupwa lwitu. Tutazipizile twawapanzika pe vyonsinye vino twazumilamo. Nga cakuti vino walanda nanti ukucita vyatulumya umwezo, tuzipiziile tuwakolanya awatumwa. E Paulo walemvile ukuti: “Tukula twakwelengulwa, atuwapepa; tukula twayimvwa atuzizimichizya; tukula twatukwa intusi, atutolelea namazwi yankumbu.”​—1 Kor. 4:12, 13.

14. Awuzima ci wuno wawa mukuwa ni miwele mizima?

¹⁴ Muwawa ni miwele imizima. Nanti aca kuti ukutontelela pano tukulanda na wa lupwa wano asa wa Nte kungalenga tuwakwivwana nawo, imiwele imizima yino twawa nayo ayino yingatwavwa nkaninye. (Wazyani 1 Peter 3:1, 2, 16.) Muwacita vino vingalenga walupwa lwinu walola ukuti wa Nte wakakwika icete mu matwala yawo. Wakasunga icete awana, wawa nimiwele imizma swinya wawa ni nsansa. Nanti acakuti wa lupwa lwitu watasambilizile icisinka, tungawa ni nsansa ukumanya ukuti imiwele yitu ikulenga e Yehova ukusecelela.

15. Tungapekanizizya wuli lya nkani ivya kucita nga kwawa vinovingalenga tupusane?

¹⁵ Muwakwelenganizizya lya nkani ivya kucita. Muwakwelenganizizya lya nkani vino vingalenga mupusane na walupwa lwinu, swinya muwakwelenganya na pe vino mungacita. (Imilu. 12:16, 23) E nkazi wumwi uwa ku Australia watili: “Etatavyala wapasile nkaninye icisinka ca mu Baibolo. Vino twacitanga, pano tutani tumutumile foni, twapepelanga ponga ne wakwane, twalenganga kwe Yehova pakuti atwavwe ukuwa ni cikuku pakumwasuka nga wakalipa. Twapekanyanga amalyasi yakulanda pa kuti tuwalanzyanya icete nawe. Tutalondanga ukulanzyanya nawe ivivule sana ica kuti tutalike nukupokotela pa mipepele, acino twacefyanga impindi yakulanda nawe.”

16. Mungacita wuli pakuti muleke ukwivwa uwuwi nga cakuti mwacita vino walupwa lwinu wasilonda?

¹⁶ Kweni mutanga mwenecele ukuti muliwa mwakwivwana na walupwa lwinu wano asa wa Nte lyonsinye. Nga mwapusana na walupwa lwinu, cingamiluma amuno mwawakunda nkaninye swinya lyonsinye mukalonda muwacita vino vingalenga wakwivwa icete. Nga cakuti mwivwa uwuwi, mutati muwaleka vino mwakunda wa lupwa lwinu, viwalenga muwapotwa ukutwalilila ni cisinka kwe Yehova. Nga mwatwalilila ukuwa ni cisinka kwe Yehova, walupwa lwinu walilola ukuti cacindama ukuwombela Yehova. Cino mufwile mwakwizuka lyonsinye acakuti, mutanga muwapaticizye ukusambilila icisinka camu Baibolo. Lelo nanti ciwe woo, muwacita vino vingalenga walola ukuti mwawa uwuzima mukukonka vino e Yehova akatunena. E Leza witu uwa lukundo akalonda ukuti nawonye wanda wumwi wize wasolepo ukumuwombela.​—Ayiz 48:17, 18.

17, 18. Avyani vino vingamyavwa nga cakuti uwa mulupwa lwinu waleka ukuwombela Yehova?

¹⁷ Nga cakuti e lupwa lwinu wawingwa nanti wayifumya mwi wungwe, mungivwa ngati wamilasa vye nulupanga. Mungacita wuli pa kuti musipicizye?

¹⁸ Twalililani ukuwika amano ku vya kwe Leza. Pakuti mutwalilile ukuwomya isuwilo linu, muzipizile mwawazya e Baibolo, ukupekanya ukulongana nukuzanwako, kuwizya ilyasi lizima, nukupepa pakuti muwasipicizya. (Yuda 20, 21) Mungacita wuli nga cakuti mukucita vyonsinye vyoo, lelo mucili mukwivwa uwuwi? Mutafwile ukunenuka! Nga mwatwalilila ukuwa awawome mu vya kwe Leza mungaleka ukwivwa uwuwi. Katulanda pe vino vyaciticizile wino walemvile Amalumbo 73. Vino watalisile ukula ivintu vyapusine na vino e Yehova wavilolanga swinay watalisile ukwivwa uwuwi, lelo wapilusile mwe vino welenganyanga pano winjizile mu ng’anda ya kwe Leza. (Amalu. 73:16, 17) Namwemwenye nga cakuti mwatwalilila ukupepa Yehova mungaleka ukwivwa uwuwi.

19. Mungalanjizya wuli ukuti mwacindika vino e Yehova akasalapula awantu wakwe?

¹⁹ Muwacita vino vikalanjizya ukuti mwacindika ukusalapula kwa kwe Yehova. Ukuwinga umuwembu wino asilapila kungalenga wonsinye mwi wungwe wanoncelemo, ukuwikako na wino acisile iciluwo nanti acakuti pakutalicila akakwivwa uwuwi. (Wazyani Waheberi 12:11.) Ku cakulolelako e Yehova watunena ukuti, “mutize muwawa apaliponga” nawakacita waviwipe wano wasilapila. (1 Kor. 5:11-13) Nanti aca kuti umwezo wungaluma, tutazipizile twakwizya nelupwa lwitu umuwingwe, tutazipizile twatumizyanya amafoni, amameseji, ukutumilana amakalata, nanti akutumilana amameseji ya pa nzila zyakwivwanilamo izya pa intaneti.

20. Alisuwilo ci lino tuzipizile ukuwa nalyo?

²⁰ Twalililani ukuwa ni suwilo. Ulukundo “lukasuwila vyonsinye,” lukasuwila ukuti awantu wano waleka ukuwombela Yehova walitalika ukumuwombela na swinya. (1 Kor. 13:7) Nga cakuti mwalola ukuti e lupwa lwinu, akulonda ukutalika ukuwombela Yehova, mungamupepelako pakuti Amawaliko yamwavwe swinya acite na vino e Yehova akalanda pe Ayizeya 44:22 pano pakati: “Nyoka kwenene.”

21. Avyani vino mungacita nga cakuti musikwavwana na walupwa lwinu pa mulandu wakuti mukakonka Yesu?

²¹ E Yesu watili nga twakunda nkani awantu ukucila na vino twamukunda, tutanga tuwe swe wasambi wakwe. Naponye wasuwila ukuti awasambi wakwe wali nukutwalilila ukuwa ni cisinka nanti wakuwacuzya kwa lupwa lwawo. Nga cakuti mwaleta ‘ulupanga’ mu lupwa lwinu pa mulandu wa kukonka Yesu, muwakweyamila pe Yehova pakuti amyavwa ukusipicizya. (Ayize. 41:10, 13) Muwawa ni nsansa amuno e Yehova ne Yesu wakakunda vino mukacita swinay walimilambula nga mwatwalilila ukuwa ni cisinka.