Twalililani Ukuwa Awacincile Pano Tuli ku Nsilo ya “Manda ya Kulecelezya”
FUMANI KWE VYONSINYE VINO VYAKUMA UKUPEPA KWA WUFI
16 Wazyani Ukuwumbulika 18:2, 4, 5, 8. Ya-a amavesi yakalanda na pe vinji vino e Yehova akalonda wano wakamupepa wacita. Awina Klistu wa cisinka wonsinye wazipizile ukufuma kwe vyonsinye vino awa mwe Babiloni Mukulu wakacita. Pano umusambi we Baibolo atani asambilile icine, pamwi walinji mukupepa kwa wufi. Pamwi walongana ponga na wano wawamo swinya wacitangako na vino wakacita. Swinya pamwi watulanga ni ndalama kwe yoyo imipepele. Pano umusambi we Baibolo watani wamuzumilizye ukuwa we kuwizya wino atabatizwa, azipizile ukufuma wensinye mu mipepele ya wufi. Co-o cikusula na mukuti azipipizile ukutuma e kalata ku calici kuno wapepanga nanti ku kawungwe kuno wapepanga ukuwanena ukuti alesile Ukupepa nawo. a
17 Umwina Klistu wacisinka atazipizile ukuwomba incito yino yakuma ku mipepele ya wufi. (2 Kor. 6:14-17) Ku cakulolelako, atazipizile ukwinjila incito ku calici. Swinya umwina Klistu wino akawomba ku kampani kano asa kamipepele, atazipizile awombela sana pa cikulwa ca mipepele ya wufi. Swinya nga akayiwombela vye umweneco, atazipizile ukuzumila ukuwomba incito iyili yonsinye yino yingatunjilila Babiloni Mukulu. Amulandu ci wuno tusilondela nanti katicinye ukutunjilila Babiloni Mukulu? Amuno tusilonda nanti katicinye ukukumako ku milimo nu luwembu lwa mipepele yino e Leza walanda ukuti yakombela.—Ayize. 52:11. b
18 Impindi yimwi umonsi wumwi wino walinji ni ncito yakuwombela pa calici wavwambanga ukwinjizya eluda incito intici pe lyonye icalici lino lyawezile mu tawuni muno eluda wikalanga. We-e umonsi wamanyile ukuti we-e umwanawitu lyonsinye wakananga ukuwombela pa macalici. Nomba pe yo-o impindi we-e umonsi atakweti winji uwa kuwomba yo-o incito. Nanti calinji wo-o, we-e umwanawitu watwalilizile vye ukukonka ivisinka vya masundo ya mu Baibolo swinya wakanile ukuwomba yo-o incito. E Sabata wino wakonsilepo, mwe nyuzipepa mwalinji icikope ca muntu wino wawikanga umusalaba pa calici pano umwanawitu wakanile ukuya mukuwombelapo. Umwanawitu azumila ukuwomba yo-o incito, nga awino walolecezile pa cikope cino calinji pe nyuzipepa. Nomba yelenganyani vye vino awina Klistu wawuye wanga wamulole! Swinya mwelenganye na vino Yehova walinji nu kumulola.
a Tutazipizile nukuwa mu tuwungwe tuno imipepele ya wufi yapanga ndi vino utuwungwe twa wana awacitici. Ku cakulolelako, tutazipizile ukuwa mu kawungwe ka YMCA (Young Men’s Christian Association), na kawungwe ka YWCA (Young Women’s Christian Association). Nanti aca kuti wano wawa mwe to-o utuwungwe wakati asa tuwungwe twamapepo, icisinka aca kuti to-o utuwungwe twafuma ku mipepele ya wufi swinya tukacita na vino awamumipepele wakacita.
b Nga mukulonda ukumanya na vinji pe vino Baibolo yalanda pa ncito zino zyakuma imipepele ya wufi, lolani icipande ca kuti “Amawuzyo Ukufuma kwa Kawazya” mu Ulupungu lwa kwe Malonda ulwa April 15, 1999.
