1. Avyani vino mungacita pa kuwa e ciwuza na wumwi?

PA KUTI tuwe iciwuza na wumwi, tufwile ukulazanwa nawe impindi inkulu. Pano tukuya tukulanda vino tukwelenganya nu kuyivwa, apano tukawa sana iviwuza. Lelo impindi zimwi citapepuka ukuwa iviwuza vya kwe Yesu. Amulandu ci?

2. Antazi ci iya kutalicilapo yino yikalenga tuwapotwa ukuwa iviwuza vya kwe Yesu?

² Intazi ya kutalicilapo aya kuti tusitela tulolanepo nu Yesu. Na wina Klistu awavule mu mpindi zya watumwa na wonye wasitela walolepo e Yesu ndi vino na swenye tusitela tumulolepo. Lelo e Peter walanzile ukuti: “Cingatenga musitela mu mulole, mwamukunda. Mwamusuwila nanti aca kuti musimulola.” (1 Pet. 1:8) Acino nanti tusitela tulole e Yesu tungawa iviwuza vyakwe.

3. Antazi ci iya citi wili yino yikalenga catupota ukuwa iviwuza vya kwe Yesu?

³ Intazi ya citi wili aya kuti tutanga tulande nu Yesu. Nga tukupepa tukalanda nu Yehova. Nanti aca kuti pa kupepa tukapitila mwi zina lya kwe Yesu, tusipepa kwe weliwe. E Yesu asilonda nanti katicinye ukuti twapepa kwe weliwe. Amulandu ci? Amuno ipepo aluwali lwakupepa, wino tufwile vye ukupepa we Yehova mutupunye ampela. (Mat. 4:10) Lelo naponye tungalanjizya vino twakunda Yesu.

4. Antazi ci iya citi tatu yino yikalenga ciwatupota ukuwa iviwuza vya kwe Yesu, swinya avyani vino twandi tusambilile?

 ⁴ Intazi ya citi tatu aya kuti e Yesu akakwikala kwi yulu, acino tutanga twizye nawe ndi vino tungizya na wantu wanji. Lelo tungasambilila ivivule ukwasowa nu ku mulola. Twandi tupituluke mu visinka 4 vino vyandi vitwavwe ukumanya ivyakucita pa kuti tuwe iviwuza vya kwe Yesu. Ica kutalicilapo lekani tulole umulandu wuno cacindamila ukuwa iviwuza vya kwe Yesu.

5. Amulandu ci wuno tuzipizile ukuwela iviwuza vya kwe Yesu? (Lolani nu tumbokosi tuno tukuti, “ Nga Twakunda Yesu Apano Tungawa Iviwuza vya kwe Yehova,” na kano kakuti “ Ukumanya Icete Icifulo Cino Yesu Wakwata.”)

⁵ Nga tukulonda ukuwa iviwuza vya kwe Yehova, tuzipizile ukuwa iviwuza vya kwe Yesu. Amulandu ci? Teyelenganyani pe yo-o imilandu yiwili. Uwa kutalicila awakuti, e Yesu wanenile awasambi wakwe ukuti: “Nu Tata nye wa wakunda. Wa wakunda, amuno mwankunda.” (Yoha. 16:27) Walanzile nu kuti: “Pasi wumwi wino angaya kwe Tata suka ndiwapita mwakwe nene.” (Yoha. 14:6) Ukwelezya ukuwa e ciwuza wa kwe Yehova ukucila ukutalicila ukuwa e ciwuza wa kwe Yesu acili conganye nu kwinjilila mu cikulwa pa mbili wili pano asa pa mulyango. E Yesu wayikolinye ku “mulyango wa ng’onzi.” (Yoha. 10:17) Umulandu wa citi wili awa kuti, e Yesu wakolanianga e Yisi wulyanye vino wawa. Walanzile ku wasambi wakwe ukuti: “Wensi wino wandola nene lyo walola nu Tata nye.” (Yoha. 14:9) Inzila inzima yino yingatwavwa ukumanya e Yehova akupitila mukusambilila pa wumi wa kwe Yesu. Pano tukuya tukumanyilako e Yesu apano tukamukundilako.  Swinya pano wuciwuza witu wukuwomelako apano tukaya tukutemelwako e Yisi.

6. Amulandu ci na wunji wuno wuzipizile ukulenga tuwe iviwuza vya kwe Yesu? Londololani

⁶ Tuzipizile ukuwa iviwuza vya kwe Yesu nga tukulonda ukuti e Yehova akwasuka amapepo yitu. Co-o cikusula ukuti tuzipizile ukucita na vinji ukucila ukulanda vye amazwi yano tukalanda pa nsilo yi pepo aya kuti “ukupitila” mwi zina lya kwe Yesu. Tuzipizile ukumanya vino e Yehova akawomvya Yesu pa kwasuka amapepo yitu. E Yesu wanenile awasambi wakwe ukuti: “Consi cino mwiza mwalenjela mwi zina lyane ndicicita.” (Yoha. 14:13) Nanti aca kuti e Yehova awino akakwivwa nu kwasuka amapepo yitu, wapako e Yesu amaka ya kucita vino e Yehova wapingulapo ukucita. (Mat. 28:18) Acino pano atani atwasuke, akatalicila ukulola nga ca kuti tuwomvizye vino e Yesu watunenile. Ku cakulolelako e Yesu watili: ‘Amuno nga mukutetela wano wakamiluvyanya, nu Mukwasi winu uwa mwi yulu nawenye alimitetela, Lelo nga musitetela wanji pe vino wakamiluvyanya, nu Mukwasi winu uwa mwi yulu nawenye atalimitetela pe vino mukaluvyanya.’ (Mat. 6:14, 15) Ala cacindama nkaninye ukucitila wanji wulyanye vino tungakunda ukuti e Yesu nu Yehova watucitile.

7. Awaweni wano walinoncelamo mu nzuwi ya kwe Yesu?

⁷ Wa ciwuza wa kwe Yesu awano walinoncelamo mu nzuwi yino wapile. Twamanya wuli? E Yesu watili, ‘alitulila awawuye uwumi wakwe.’ (Yoha. 15:13) Awawomvi wa kwe Yehova wano wafwile pano e Yesu atani ayize munsi nawonye walisambilila pe weliwe nu kusolapo ukumukunda. Pe wa-a awawomvi wa kwe Yehova wano walizyulupuka pawa e Abrahamu, Sara, Musa, nu Rahabu. Nanti aca kuti wacitanga ivilungamane nawonye pa kuti wize wapocelele uwumi wamuyayaya walitalicila ukuwa iviwuza vya kwe Yesu.​—Yoha. 17:3; Imili. 24:15; Hebe. 11:8-12, 24-26, 31.

8-9. Nga swe viwuza vya kwe Yesu acani cino tungacita, swinya ndi vino e Yohani 15:4, 5 yikalondolola amulandu wuno ukucitila wo-o kwacindamila?

⁸ Twawa ni nsansa ukuwombela ponga nu Yesu mu mulimo wakuwizya nu kusambilizya awantu ilandwe lizima ilya Wufumu. Pano Yesu walinji mu nsi na wenye wawombangako wo-o umulimo wa kusambilizya. Napanye pa-a pano wanyocela kwi yulu ataleka. Amutwe wi wungwe swinya awino akatungulula nu mulimo wuno wukuwombwa uwa kuwizya nu kusambilizya. Wacindamika sana vino mukawombesya ukwavwa awantu awavule ukumumanya nu kumanya e Yisi. Ukulanda vye icisinka, cino cikalenga twawomba wo-o umulimo amuno e Yehova nu Yesu wakatwavwa.​—Wazyani Yohani 15:4, 5.

⁹ Izwi lya kwe Leza likatusambilizya ukuti tuzipizile ukutwalilila ukukunda e Yesu pa kuti twasecelesya Yehova. Acino lekani tulande pa vintu 4 vino vingatwavwa ukuwa iviwuza vya kwe Yesu.

10. Acani cino tuzipizile ukutalicilapo ukucita pa kuti tuwe iviwuza vya kwe Yesu?

¹⁰ (1) Manyani e Yesu. Tungamanya icete Yesu nga tukuwazya amabuku ya kwe Mateyu, Marko, Luka ne Yohani. Pano tukwelenganya pa malyasi yano yakalanda pa wumi wa kwe Yesu, apano tukamukundilako swinya tukatalika nu kumucindika pe vino wawombanga na wantu. Ku cakulolelako e Yesu atasendanga awasambi wakwe ngati awazya, nanti aca kuti awino walinji we Yisikulu.  Lelo wa wasimicilanga vyonsinye ivya pa mwezo. (Yoha. 15:15) Awasambi wakwe ndi wali nu wulanda nawenye wawanga nu wulanda. (Yoha. 11:32-36) Na walwani wakwenye waweni vino e Yesu wapanganga iviwuza na wonsinye wano wapocelela ilandwe lizima. (Mat. 11:19) Nga tukukolanya Yesu wulyanye vino wawombanga na wasambi wakwe, tuliwakwivwana na wantu wanji. Tuliwawa sana ni nsansa swinya tuliwatemelwako e Yesu nu kumucindika.

11. Anzila ci iya citi wili yino tuzipizile ukukonka pa kuwa iviwuza vya kwe Yesu, swinya amulandu ci wuno cicindamizile?

¹¹ (2) Muwakolanya e Yesu mwe vino mukwelenganya nu kucita. Tukawa sana iviwuza vya kwe Yesu nga ca kuti twamumanya icete swinya tukumukolanya. (1 Kor. 2:16) Uzye tungamukolanya wuli? Yelenganyani pe co-o. E Yesu wawisile sana amano pa kwavwa awantu wanji ukucila pa kucita ivya kuyisecelesya. (Mat. 20:28; Roma. 15:1-3) Pa mulandu na wo-o umwezo wuno wakweti, wayipelesyanga swinya watetelanga wanji. Atafulwanga zuwa pe vino awantu walandanga ku mbali. (Yoha. 1:46, 47) Swinya atapingulanga awantu ukulingana na vino wacisile ku nsizi (1 Tim. 1:12-14) Umweneco watili: “Ndi mwakundana apano awantu wonsi walimanya kuno mwe wasambilizi wane.” (Yoha. 13:35) Mwayikolowozya ukuti “Uzye vino nkacita vikalanjizya ukuti nkakwelezya na maka ukuwa pa mutende na wanawitu na wankazi?”

12. Anzila ci iya citi tatu yino tuzipizile ukukonka pa kuwa iviwuza vya kwe Yesu, swinya amulandu ci?

¹² (3) Muwakwavwa wa munyina wa kwe Klistu. E Yesu akalola ukuti nga tukwavwa awapakwe lyo tukucitila weliwe. (Mat. 25:34-40) Tungawavwa, nga tukuwombako umulimo wuno e Yesu wapile awasambi wakwe uwa kuwizya nu kupanga awasambi. (Mat. 28:19, 20; Imili. 10:42) Awapakwe wangawomba vye wo-o umulimo nga cakuti “ing’onzi zinji” zikuwavwa. (Yoha. 10:16) Muwakwizuka ukuti nga mukuwombako wo-o umulimo lyo mukulanjizya ukuti mwakunda awapakwe nu Yesu.

13. Uzye tungakonka wuli ukusunda kwa kwe Yesu kuno kwawa pe Luka 16:9?

¹³ Tukawa iviwuza vya kwe Yehova ne Yesu nga tukusangwilako pa kuti twavwilizye umulimo wuno wakatungulula. (Wazyani Luka 16:9.) Ku cakulolelako, tungasangwilako ku mulimo wa nsi yonsinye, ku kwavwilizyako umulimo wa kuzifya Amang’anda ya Wufumu ni vikulwa vinji, ku kwavwa wano waponezilwe ni ntazi, na kwi wungwe. Swinya tungavwako na wano tukulola ukuti wasowezizye. (Imilu. 19:17) Zyo-o azili inzila zino tungalanjizizyamo ukuti tukwavwa wa munyina wa kwe Klistu.

14. Ndi vino Waefeso 4:15, 16 yikalanda, anzila ci iya namba 4 yino tufwile ukukonka pa kuwa iviwuza vya kwe Yesu?

¹⁴ (4) Mwawombela ponga ni wungwe lya kwe Yehova. Tukawa iviwuza vya kwe Yesu, umutwe wi wungwe nga cakuti tukutontela wano wakutungulula. (Wazyani Waefeso 4:15, 16.) Ku cakulolelako, pe yo-o impindi iwungwe lya kwe Yehova likwelezya na maka ukuwomvya icete ama ng’anda ya wufumu yano yalipo. Co-o calenga amawungwe yamwi wayasanzinkanye ponga nu kupilulako amatelitori yakuwombelamo. Ukucita wo-o kwalenga twawomvya icete imisangulo yino awanawitu wakasangula. Pa mulandu na ko-o ukupiluka, wakawizya wamwi wakapilukako mwe vimwi pa kuti wakonke vino iwungwe lya kwe Yehova likutunena. Wamwi  wawanena ukucintila mwi wungwe linji. Wa-a wakawizya wakafuma mwe ya-a amawungwe yano wawelezizye nanti aca kuti wapanzile iviwuza ivivule. Ukwasowa nu kuvwilika e Yesu akakunda nkaninye ukulola wa-a wakawizya wa cisinka wano wakawombela ponga nu kupiluka ukuli konsinye mwi wungwe lya kwe Yehova!

15. Uzye wuciwuza witu ne Yesu wuliwa wuli ku nkolelo?

¹⁵ Awapakwe wawa ni suwilo lyakuwa ne Yesu umuyayaya pano waliwateka nawe mu Wufumu wa kwe Leza. Waliwa ponga ne Klistu, waliwa mulola, waliwalanda nawe swinya waliwawa nawe. (Yoha. 14:2, 3) Nanti aca kuti wano wawa ni suwilo lya kwikala mu nsi watalitela walole e Yesu, lelo wuciwuza wawo na weliwe wuliwomelako pano wakuyitopwa uwumi wuno e Yehova nu Yesu waliwapa.​—Ayize. 9:6, 7.

16. Avilambu ci vino tukapocelela pa mulandu wa kuwa iviwuza vya kwe Yesu?

¹⁶ Nga twasolapo ukuwa iviwuza vya kwe Yesu, tukapocelela ivilambu ivivule. Ku ca kulolelako, tukalola vino e Yesu watutemwa na vino akatwavwa. Twawa ni suwilo lya kuwa nu wumi wa muyayaya. Ni cicindame aca kuti, ukuwa iviwuza vya kwe Yesu kulilenga tuwe nu longo ulwa kuwa iviwuza vya Mukwasi wakwe, e Yehova. Ala alongo ulukulu ukuwa iviwuza vya kwe Yesu!