1. Acani cino swensinye tuzipizile ukucita?

UZYE mungazumila ukutalika ukusamala mu luwilo ulutale, sana sana nga mulwile nanti mutonsile? Kweni asa cipepuke ukuzumila. Lelo umutumwa Paulo walanzile ukuti awina Klistu wonsinye wawa mu luwilo. (Hebe. 12:1) Fwandi nga tukulonda ukwizapoka icilambu cino e Yehova watulaya, tuzipizile ukutwalilila ukusipicizya ukufika ku nsilo, asa mulandu na vino twawa nampo nga swe wakote, swe watici nanti tucili tukweti amaka.​—Mat. 24:13.

2. Acani cino calenzile ukuti e Paulo alande amazwi ya pe 2 Timoti 4:7, 8 mukusipa?

² E Paulo walinji nu wuntungwa wakulanda amuno wasamazile “uluwilo ukufika na ku nsilo.” (Wazyani 2 Timoti 4:7, 8.) Uzye lonye uluwilo luno e Paulo walanzilepo, aluwilo ci?

3. Aluwilo ci luno Paulo walandangapo?

³ Impindi zimwi e Paulo nga akulonda ukulanda pa masambililo amacindame walembanga pa vintu vino vyacitikanga mu ndwizyo zino zyalinji mu Grisi. (1 Kor. 9:25-27; 2 Tim. 2:5) Wakolinye uwumi wa mwina Klistu ku luwilo. (1 Kor. 9:24; Gal. 2:2; Flpi. 2:16) Umuntu akatalika ukusamala mwe lo-o “uluwilo” ndi wayipa kwe Yehova nu kubatizwa. (1 Pet. 3:21) Akakwiza mukumala lo-o uluwilo nga Yehova wamupa icilambu ca wumi wa muyayaya.​—Mat. 25:31-34, 46; 2 Tim. 4:8.

4. Avyani vino twandi tusambilile mwe co-o icipande?

⁴ Amwinye muno uluwilo lwakusamala lwakolanila nu wumi wa mwina Kristu? Lwakolana mu nzila zitatu. Iya kutalicila aya kuti, tuzipizile ukukonka inzila yino yilitufisya ku cilambu; iya citi wili aya kuti, tuzipizile ukuwika amano ku cilambu, ni ya  citi tatu aya kuti, tuzipizile ukutwalilila vye ukusamala asa mulandu ni ntazi zino tungapitamo.

5. Anzila ci yino tuzipizile ukukonka pano tukusamala, swinya amulandu ci?

⁵ Pakuti wino akusamala mu luwilo lwa kucimvyanya apoke icilambu, azipizile ukukonka mulyanye muno afwile ukusamalila. Naswenye nga tukulonda ukwizapocelela icilambu ca wumi wa muyayaya, tuzipizile ukukonka inzila ya wina Klistu. (Imili. 20:24; 1 Pet. 2:21) Lelo e Satana na wano wakamukolanya wasilonda twakwikala vino awina Klistu wazipizile ukwikala, wakalonda ‘tuwasamalila nawo ponga.’ (1 Pet. 4:4) Wakatuseka nga walola vino tukasolapo ukwikala swinya wakalanda nu kuti inzila yino weni wasolapo ayino yikawaletela uwuntungwa. Lelo vino wakalanda avya wufi.​—2 Pet. 2:19.

6. Avyani vino tungasambililako kwe Brian?

⁶ Wonsinye wano wakasolapo ukutalika ukwikala ndi vino awa munsi ya kwe Satana wakakwikala, wakakwiza mukuzana ukuti vino wasolapo ukucita visiwaletela uwuntungwa nanti katicinye. Lelo wakawa awazya wa kwe Satana, swinya wakayiteka nu wuzya ku lunkumbwa lwa muwili wawo. (Roma. 6:16) Mulole ica kulolelako ca kwe Brian. Awakwasi wakwe wamwavwizye ukutalika ukwikala vino awina Klistu wakakwikala. Lelo walile wafisya imyaka pakasi ke 13 ukufika ku 19, watalisile ukuvwilika nga cakuti ukutwalilila ukwikala ndi vino awina Klistu wakakwikala kulimuletela insansa. E Brian wasozilepo ukutalika ukwikala ndi vino awa munsi ya kwe Satana wakakwikala. Walanzile ukuti, “Ntamanyile nu kuti uwuntungwa wuno nalondanga walinji nu kunteka uwuzya ku misango imiwipe. Nawomvyanga uwuwi imiti yino uwuteko walesya swinya namwanga ipaala nu kucita uwuzelele. Mukupita kwa mpindi natalisile ukuwomvya imiti yino yikakola ukucila pe yino nawomvyanga swinya nizile inkunkuma. . . Natalisile ukukazya yo-o imiti pa kuti nazana umwakwikalila.” Mukupita kwa mpindi e Brian wasozilepo ukutalika ukwikala ukulingana na masundo yano Yehova watupa. E Brian wapilusile swinya wabatizizwe mu 2001. Pe yo-o impindi wawa ni nsansa pa mulandu wa kuti akakonka vino e Yesu walanzile. *

7. Amisewo ci yiwili yino yalumbulwa pe Mateyu 7:13, 14?

⁷ Ala cacindama nkaninye ukumanya ukuti inzila yino twakonka ayino yilitufisya ku cilambu! E Satana akalonda tuwasamalila mu musewo uwukulu muno mwawa awantu awavule. Wo-o umusewo uwukulu wutatala ukukonka.  Lelo “wukatungulula kwi lowelwe.” (Wazyani Mateyu 7:13, 14.) Pa kuti tutwalilile ukusamalila mu musewo uwufyenenkane wuno wukatungulula ku wumi, tufwile twasuwila sana Yehova nu kumutontela.

8. Acani cino wino akusamala uluwilo lwa kucimvyanya akacita ndi wapona?

⁸ Wano wakasamala mu luwilo lwakucimvyanya wakawika vye amano kuno wakuya nu kulolecesya pano wakulyata pa kuti watayipunula. Lelo impindi zimwi wino wakusamala nawe angawapizya nanti wangayipunula. Wino akusamala ndi wapona akakatuka nu kutalika ukusamala na swinyanye. Asitalika ukwelenganya pe cino te camuponya lelo akatwalilila ukuwika amano ku cilambu.

9. Acani cino tuzipizile ukucita nga twayipunula?

⁹ Naswenye mu luwilo lwitu tungayipunula imiku imivule, mu milandile yitu na mwe vino tukacita. Wano tukasamala nawo wangacita vino vingatucisa. Nga ca kuti ica musango wo o cacitika tusizunguka. Swensinye tutapwililika swinya tukasamala mu musewo uwuli wonganye wuno wukatungulula ku wumi. Acino impindi zimwi tungapunkana na wano tukasamala nawo mwe lo-o uluwilo. Umutumwa Paulo walanzile ukuti impindi zimwi tungawa ni “cakuyilizyanya.” (Kolo. 3:13) Lelo citanga cizipe ukutalika ukuwika amano pe cino tecatupunuzya, cingazipa ukutwalilila vye ukulolecesya ku cilambu cino tulipocelela. Nga twapona tuzipizile ukukatuka zuwa nu kutwalilila ukusamala. Lelo cingawipa nkaninye nga cakuti twafupuka ica kuti twakana nu kukatuka amuno tungapotwa ukusamala uluwilo lwitu nu kwizapoka icilambu. Ni ciwipisye aca kuti tungacilicila wanji wano wakwelezya na maka ukusamala mwe wo-o umusewo uwufyenenkane uwa kuwumi.

10. Avyani vino tuzipizile ukucita pa kuti tutapunuzya wanji?

¹⁰ Cino cingatwavwa pa kuti ‘tutapunuzya’ awanawitu na wankazi akuleka ukuwapaticizya ukucita ivintu mu nzila yino tukulola ukuti ayili iyizima. (Roma. 14:13, 19-21; 1 Kor. 8:9, 13) Ukucita wo-o kukatupusanyako na wano wakasamala uluwilo. Weni wakacimvyanya na wawuye, swinya cila muntu akakwelenganya vye pe vino angacita pa kuti awino awine. Ica kuti wakalwisya na maka ukucilila awawuye pa kuti wawe pankolelo. Lelo mwe lo-o uluwilo  lwa ku wumi tusicimvyanya. (Gal. 5:26; 6:4) Cino tukalonda akwavwa awavule ukumala lo-o uluwilo pa kuti twize tupocele ponga icilambu. Awuli umulandu wuno tukakwelezya na maka ukukonka ukusunda kwa mutumwa Paulo kuno watili, ‘mutawika vye amano pe vino vingamizipila lelo mwawika na mano pe vino vingazipila wanji.’​—Flpi. 2:4.

11. Uzye wino akusamala akawika amano pa cani, swinya amulandu ci?

¹¹ Ukusanzya pa kuwika amano mulyanye muno wakusamalila, wano wawa mu luwilo lwa kucimvyanya wakawika amano pa cilambu. Nanti aca kuti kuno wakuya mukumalila uluwilo ukutali, lelo cino cikawavwa akwelenganya pe vino wandi wayivwe nga wapocelela icilambu. Ukucita wo-o kukawavwa ukutwalilila ukusamala ukwasowa ukunenuka.

12. Acani cino e Yehova watulaya?

¹² Mu luwilo luno tukasamala e Yehova watulaya icilambu ca wumi wa muyayaya mu nsi nanti kwi yulu nga ca kuti twasamala ukufika na ku nsilo. E Baibolo yikatwavwa ukwelenganya vino co-o icilambu ciliwa. Nga twatwalilila ukwelenganya pe vino Yehova watulaya tutalitela tunenuke.

13. Avyani vino twakwata vino wano wakasamala uluwilo watakwata?

¹³ Wano wasamalanga uluwilo mu Grisi watontanga swinya nu muwili wasasilanga pa mulandu wa kusamala. Lelo wasipicizyanga vyonsinyene vyo-o. Cino cawavwanga sana, akutwalilila ukusamala cila wanda pa kuti ciwelele. Naswenye twawa ngati awanye, amuno wakatusambilizya vino tungatwalilila ukusamala mwe lo-o uluwilo lwa ku wumi. Nomba sweswe twawa ni vivule vino vikatwavwa ukutwalilila ukusamala. E Yehova angatupa amaka, swinya amaka yakwe yasisila. Nga twasintilila pe vino watulaya, ataliwatusambilizya vye ivya kusamala lelo alituwomya nu kutuwomya!​—1 Pet. 5:10.

14. Uzye iwaliko lye 2 Wakorinte 12:9, 10 likatwavwa wuli ukutwalilila ukusipicizya?

¹⁴ E Paulo wapisile mu ntazi imvule. Ukusanzya pa kumutuka intusi nu kumucuzya, impindi zimwi wayivwanga umutonte swinya walinji nu “munga mu muwili” wuno walwisyanyanga nawo. (2 Kor. 12:7) Nomba atalesile zyo-o intazi ukumunenula, lelo apano wasintililanga sana pe Yehova. (Wazyani 2 Wakorinte 12:9, 10.) Co-o calenzile ukuti e Yehova atwalilile ukumwavwa ukusipicizya zyonsinye zyo-o intazi zino wapitangamo.

15. Acani cino cilicitika nga ca kuti tukukolanya Paulo?

¹⁵ Nasweswenye wangatutuka nanti ukutucuzya pa mulandu na vino twasuwilamo. Swinya impindi zimwi tungacula pa mulandu wakulwalilila nanti ukutonta lwa ku muwili. Lelo nga twatwalilila ukukolanya e Paulo, tuliwalola vino e Yehova watukunda na vino akatusakamala.

16. Uzye acani cino mungacita nanti aca kuti mutawa nu wumi uwuzima?

¹⁶ Uzye mukalwalilila nanti mwalemala? Uzye amakokola yakaluma nanti mwalwala aminso? Asa mulandu ni ndwala yino mwalwala, mwakwizuka ukuti namwenye mungatwalilila ukuwombela e Yehova caponga na wano wakuloleka ukuti wali nu wumi uwuzima. Wasongo awavule na wano wakalwalilila wataleka ukusamala uluwilo lwa ku wumi. Ukwasowa nu kuvwilika e Yehova awino akawapa insimpo amuno watanga wasamale ku maka yawo aweneco. E Yehova akawapa zyo-o insimpo pano wakukutika pa kulongana, nampo nga ape foni nanti wakutamba vino ukulongana ku kucitwa pa kompyuta. Swinya wakawizizya wadokota, wa nasi, na walupwa lwawo.

17. Uzye e Yehova akakwivwa wuli pa wanawitu na wankazi wano wakalwalilila?

 ¹⁷ Mutati muwafupulwa nga mwalola ukuti mutakukwanisya ukuwombela Yehova ndi vino muzipizile ukumuwombela, swinya mutakwelenganya nu kuti mutalitela mukwanisye ukusamala mpaka na ku nsilo. E Yehova akasalifya nkaninye pe vyonsinye vino mwamuwombela swinya wamikunda nkaninye. Atalitela amilecelezye ku ciyayaya. (Amalu. 9:10) Aliwapalamila sana kwe mwemwe. Mulole vino e nkazi wumwi wino walwalililanga walanzile, watili, “Pa mulandu wakuti nkalwalilila, nsiwomba umulimo wakuwizya ndi vino nawombanga pano nalinji ne mupuma. Lelo namanya ukuti nga nawomba nanti katicinye nkasecelesya Yehova.” Namwenye nga mwasakamikwa, muwakwizuka ukuti mutawa mwenga. Yelenganyani pa ca kulolelako ca mutumwa Paulo, na mazwi yakuwomelezya yano walanzile ukuti: “Nkasecela mukutonta kwane, . . . amuno pano ntonsile apano nkawa na maka.” ​—2 Kor. 12:10.

18. Antazi ci inkulu yino wamwi wakupitamo?

¹⁸ Wamwi wano wakasamala mwe lo-o uluwilo lwa ku wumi wakapita mu ntazi inkulu zino wanji wasimanya nu kumanya. Ku cakulolelako, wamwi wakalwala indwala ya masakamika. Amulandu ci wuno vino wakapitamo vyasyupila? Umulandu awa kuti yo-o indwala yisiloleka kulonde ndi vino mungalola wino ayivunile ikasa nanti wino walemala. Wano walwala amasakamika, ku londe wangaloleka ngati awapuma, fwandi lyo mukasi muli icilonda. Yo-o indwala ya masakamika yaluma nkaninye wulyanye vino cikakwivwika ndi uyivunile ikasa nanti icinama. Nomba cino yo-o indwala yawipila nkani aca kuti wanji watanga wivwicisye vino ukucula, swinya watanga wakusakamale nkani ndi vino wangasakamala wino indwala yikuloleka.

19. Acani cino tukasambililako ku ca kulolelako ca kwe Mefibosheti?

¹⁹ Nga ca kuti mukalwalilila swinya mukalola ngati kusi nanti wumwi wino akumwivwicisya, ica kulolelako ca kwe Mefibosheti cingamyavwa nkaninye. (2 Sam. 4:4) Walinji we cilema, swinya Imfumu Davidi nayo yamufyenzile. Kutalinji akulonda kwakwe Mefibosheti ukuti acule umusango wo-o. Lelo vyonsinye vyo-o vino wapitangamo vitalenzile awe ni cipyu, watwalilizile ukusalifya pa vizima vino vyamuciticilanga. Swinya atalesile ukusalifya Davidi pa cikuku cino wamulanjizizye. (2 Sam. 9:6-10) Asa mulandu na vino Davidi wacisile, e Mefibosheti welezizye ukulola cino calenzile acite ica musango wowo. Atalesile vino Davidi wacisile vimulenge ukutwalilila ukufulwa. Swinya atatalisile ukupa e Yehova umulandu pa mulandu na vino Davidi wacisile. E Mefibosheti wawisile vye amano pe vino angacita  pa kutunjilila Imfumu yino Yehova wasonsile. (2 Sam. 16:1-4; 19:24-30) E Yehova walenzile nu kuti vino Mefibosheti wapisilemo vilembwe mu Baibolo pa kuti vize viwatwavwa.​—Roma. 15:4.

20. Uzye ukusakamikwa kwalenga wamwi ukuwa wuli, swinya acani cino wangatwalilila ukusuwila?

²⁰ Pa mulandu wa masakamika awanawitu wamwi na wankazi wakakwivwa intete zya kuwa pa wantu awavule. Lelo wakayipelesya ukuzanwa mukulongana kwa pi wungwe, ukwa muputule, nu kwa citungu. Nanti wangivwa insoni zya kulanda ku wantu wano watamanya, wasileka ukuwizya. Nga avino namwenye mukayivwa, muwakwizuka ukuti mutawa mwenga. Kwawa na wanji nye wano wakupita mwe vino mukupitamo. Swinya mutakwiwilila ukuti e Yehova akasalifya nkaninye pe vino mukawombesya. Wonye vino mwatwalilila ni cisinka ukwasowa ukunenuka, acimanyisyo ca kuti e Yehova awino akamipaala nu kumipa amaka ya kumyavwa ukusipicizya. * (Flpi. 4:6, 7; 1 Pet. 5:7) Lyonsinye muwakwizuka ukuti mukasecelesya nkaninye e Yehova wo-o vino mukatwalilila ukumuwombela na pano mukupita mu ntazi.

21. Acani cino swensinye tungacita nga cakuti e Yehova watwavwa?

²¹ Tukakwivwa icete ukumanya uwupusano wuno wawa pa luwilo lwa ku cimvyanya nu luwilo lwa ku wumi. Mu luwilo lwa kucimvyanya luno lwalandwapo mu Baibolo, umuntu vye wenga awino wapokanga icilambu. Lelo mu luwilo lwa ku wumi mweni, wensinye wino watwalilila ni cisinka alipoka icilambu ca wumi wa muyayaya. (Yoha. 3:16) Mu luwilo lwa kucimvyanya musisamala wano wasi nu wumi uwuzima amuno watanga wakwanisye ukusamala. Lelo mu luwilo lwa ku wumi, wensinye angasamala nu kufika ku nsilo. (2 Kor. 4:16) E Yehova ndi watwavwa swensinye tungatwalilila ukusamala ukufika na ku nsilo!