Uwusinincizyo wukalanjizya ukuti e Yesu wizile awa e Simapepo Mukulu mu 29 C.E., pano wabatizizwe. Awusinincizyo ci wowonye? Pano Yesu wabatizizwe wayipile mukucita “ukulonda” kwa kwe Leza. Co-o cikusula ukuti wayipekinye ukupa uwumi wakwe inzuwi. (Gal. 1:4; Hebe. 10:5-10) Ukulonda kwa kwe Yehova kwawa ngati apakupelela inzuwi. Pano e Yesu wapile uwumi wakwe calinji ngati wamupa inzuwi apakupelela inzuwi. Pa-a apakupelela inzuwi patalisile ukuwako ukufuma palyanye pano e Yesu wabatizizwe. Inzila ya kupepelapo e Yehova ukupitila mu nzuwi yawa ngati alitempile. Lyo-o itempile lizile aliwako pano e Yesu wabatizizwe. Wulyanye vino apakupelela inzuwi pacindime nkaninye pi tempile, avino nu kulonda kwa kwe Yehova kwacindama nkaninye mukupepa kwa cisinka.—Mat. 3:16, 17; Hebe. 5:4-6.

Inzila ya kupepelamo e Yehova ukupitila mu nzuwi ya kwe Yesu, yino yalinji ngati alitempile, yatalisile. Nomba itempele lyalondekwanga e simapepo mukulu. Acino e Yehova wapasile Yesu “nu muzimu uwutele mbali na maka” pa kuti awino ayize awe we simapepo mukulu. (Imili. 10:37, 38; Mar. 1:9-11) Uzye awusinincizyo ci na wunji wuno wukatwavwa ukumanya ukuti e Yesu wizile asontwa ukuwa we Simapepo Mukulu pano atani afwe nu kuzyulupuka? Cimwi cino cingatwavwa, akulola vino calinji kwe Aaroni wino walinji we simapepo mukulu lyo ne Yesu atani ayize mu nsi.

Isundo lino e Yehova wapile Musa lyalanzile ukuti e simapepo mukulu vye awino walinji ni nsambu zya kwinjlila Umutele Nkani. Ku muputule Uwutele Nkani wawisileko icimwenda icikulu. E simapepo winjilanga Umutele Nkani pa wanda wa Cifuta Mulandu. (Hebe. 9:1-3, 6, 7) E Aaroni na wasimapepo wanji wapakwangwa pano watani winjile na mu cifulo Icitele Nkani. Fwandi e Yesu nawenye afwile wapasilwe nu muzimu uwutele ukuwa we Simapepo Mukulu pano atani afwe, apano “wapisile pa cakucinga, akuli ukuti, umuwili wakwe” nu kuya nu muwumi wa kwi yulu. (Hebe. 10:20) Awuli umulandu wuno umutumwa Paulo walandizile ukuti e Yesu wizile ngati we “simapepo mukulu” nu kupita ‘mu cifulo icitele icikulu swinya icipwililike cino awantu watazenzile na makasa yawo’ mpaka winjila “mwi yulunye”—Hebe. 9:11, 24.

Ampindi ci pano icipangano cipya waciwomizye? Pano Yesu wayile kwi yulu nu kupa umutengo wa wumi wakwe uwupwililike, wacisile ivintu viwili pa vintu vitatu vino vyalondekwanga pa kuti icipangano cipya citalike ukuwomba. Vyonye vyo-o avino vyalenzile ukuti icipangano cipya citalike ukuwomba. Avintu ci vyovyonye vitatu?

Icakutalicila e Yesu wanyocezile kwe Yehova mwi yulu, ica citi wili wanenile e Yehova ukupocelela inzuwi yino wapile; Mukulecelezya e Yehova wapocelezile inzuwi yino e Yesu wapile. Vyalile vyonsinye vyo-o vyacitika apano icipangano cipya catalisile ukuwomba.

E Baibolo yitatunena mukulungatika impindi yino e Yehova wapocelezile umutengo wa nzuwi yino Yesu wapile. Fwandi tutanga tulande impindi yino icipangano cipya cawomile nu kutalika ukuwomba. Lelo cino twamanya aca kuti papisile amanda 10 ukufuma pano Yesu wayizile kwi yulu ukufika pa Pentecositi. (Imili. 1:3) Pe cilyanye iciputulwa apano e Yesu wapile umutengo wa wumi wakwe kwe Yehova. (Hebe. 9:12) Cino twalandila wo-o amuno vino vyacitisile pa Pentecositi avino vikatwavwa ukumanya co-o icisinka. (Imili. 2:1-4, 32, 33) Ukufuma pe wonye uwanda apano icipangano cipya catalicizile ukuwomba.

Fwandi tungati, icipangano cipya cawomile nu kutalika ukuwomba pano e Yehova wapocelezile umutengo wa wazi wa kwe Yesu. Swinya cizile acitalika ukuwomba pano e Simapepo Mukulu e Yesu wizile awa we Kawicizyanya mwe co-o icipangano.—Hebe. 7:25; 8:1-3, 6; 9:13-15.